زهرةٌ الغيث

بارت ٢

' رجِعت البيت اليوم ده عكس ما كُنت نازلة ، حاسة إني ..حاسة إني راجعة مش فاضية .. كإني مشغولة زي ما يكون قلبي زادتله نبضة ، والحقيقة أنا كُنت عارفة الحِمل ده زاد بسبب إيه بس نعكس أخر حرفين .. عينيه بعتتلي نظرة زلزلتني بس مخلتنيش أفقد توازني بالعكس دي مخلية قلبي مُستقر كإنه كان مستني عينيه عشان يطمن شوية ويرَجْع ضحكة كُنت فاكرة نفسي مش هشوفها مرسومة على وشي تاني .. طول ما أنا راجعة في الطريق أغنية أهواك شغالة وعبدالحليم كإنه عالم بحالي وهو بيقول جُملة | وألاقيك مشغول وشاغلني بيك وعينيا تيجي في عينيك وكلامهم يبقى عليك وإنتَ تداري | .. دخلت غيرت هدومي وهنام عشان معايا بكرا موعد مع أحد أحلامي '

_ صباح الخير يا أستاذة زهرة نموسيتك كُحلي يا هانم .
- معلش يا بوص خليها عليك وبعدين دي أول مرة يعني .
_ ما عشان أول مرة هعديها ، يلا عشان تتكلمي مع الضيف قبل التصوير عشان تتفقوا هتقولوا إيه .
- ثواني يا بوص من أمتى وأنا بتكلم مع ضيف قبل الحلقة ؟
_ لازم يا زهرة عشان ده مش أي ضيف ده محامي كبير .
- ولو بردو يعني إيه محامي كبير ولا يهمني و لو مش عاجبه ال system بتاعي خلاص ميصورش والحلقة هعرف أمشيها إزاي .

– فعلاً عنيدة زي ما بيقولوا عنك .
_ أهلًا أهلًا هشام بيه نورت الإستوديو ، أتفضل يا فندم .
– أخبارك يا دكتورة مش دكتورة بردو ؟
- عندك مانع .
– نهائي ، أنا بس ببدي إعجابي بمكانتك وبفكرك بيها .
_ طب إيه مش يلا نجهز يا زهرة عشان قربنا نطلع على الهوا ، أتفضل يا هشام بيه من هنا .
– نتقابل على الهوا يا يازهرة .

- يا ستير يارب إيه الكائن ده ، مش كفاية مبيقبلش غير القضايا الشمال .
_ زهرة عدي يومك ، ده مينفعش نلعب معاه .
- ليه يعني بيعُض .
_ زهرة إنتِ زي بنتي وأنا بقيت أخاف عليكي بجد هو أنا آه بحب جرأتك وقوتك بس لازم أحذرك .. متلعبيش مع الكُبار يا زهرة .
- مفيش حد كبير على الغلط وأنا دوري أكشف كل ده وأحارب .
_ يبقى ناوية على موتك .

- ليه يعني هو عشان بشاور على الغلط وبحاول أصلح يبقى ساعتها أكون ناوية على موتي .
_ آه عارفة ليه عشان لما بيلاقوا أي حد بيحاول يكشفهم أو أصلًا هم مكشوفين بس الناس بتخاف فلما يلاقوا حد قوي بيهدوه ، مينفعش تصلحي في حاجة أساسها متاكل يازهرة عشان هتتهد فوق دماغك ..فهماني يا بنتي ، يلا أجهزي عشان الحلقة .

- عمري ما هقتنع بكده ، ربنا أسمه العدل يعني مبيرضاش بالظلم وطلاما وفقني في الطريق ده يبقى مكتوبلي فيه عمل لازم أكمله ، عمري ما هخاف ولا هطبلّهم .. ولو هفضل لوحدي بردو هكمل ولو جه يوم وربنا كتبلي إني أموت على إيد واحد منهم يبقى ساعتها هردمْهُم قبلي .

' روحت جهزت عشان الحلقة وأنا جوايا مش طايقة إللي أسمه هشام ده ، بني آدم الخُبث بيلعب في عينيه وجلده متحول ، بس مش عليا '

- السلام عليكم ورحمة الله رجعنا لكم بحلقة جديدة أتمنى تكونوا بخير ومستعدين لحلقة النهاردة ، العدل أساس المُلك ومعروف إن ده مبدأ الإستقلال والأمن عشان كده ضيفنا النهاردة محامي مشهور جاي يشرفنا ويدينا شوية من خِبراته فنرحب سوا بالدكتور هشام منصور ، أزيك يا دكتور .
– أنا تمام يا زهرة ومبسوط إني في إستضافة مُذيعة كبيرة زيك .
- شكرًا جدًا يادكتور وأتمنى الحلقة تبقى لطيفة عليك وعلى جمهورنا .
– وأنا كذلك .
- جاهز ؟
– جدًا .