ထမင်းစားခန်းထဲသို့ ဝင်လိုက်သည်နှင့် စားပွဲ၌ အသင့်ထိုင်စောင့်နေသူကြောင့် ဂယူဘင်း မသိမသာပြုံးလိုက်မိသည်။
သူ နေမကောင်းဖြစ်ပြီးနောက် မယ်မယ်တို့၏ဆူပူမှုကြောင့် ဖြစ်ဟန်ထင်၊ ထိုကလေးက သူ့ကားနှင့်အတူလိုက်၍ ကျောင်းသွားကျောင်းပြန်လုပ်လာရုံသာမက မနက်စာစားချိန်များတွင်ပါ အတူရှိနေတတ်သည်မှာ နှစ်ပတ်နီးပါးရှိပြီဖြစ်၍ ရံဖန်ရံခါ နှစ်ယောက်လုံး နန်းဆောင်၌သာ ညစာစားဖြစ်သည့်အချိန်များတွင်လည်း ဆုံတတ်ကြသေးသည်။
ရက်အနည်းငယ် အတူရှိပြီးနောက် သတိထားမိလာသည့် ထိုကလေး၏ ချစ်စရာကောင်းသည့်အကျင့်တစ်ခုမှာ မနက်စာစားချိန်တိုင်း သူ့အား အတူစောင့်ပြီးမှ စားတတ်ခြင်း။ ပါးစပ်ကထုတ်မပြောသော်လည်း သူ အတန်းအတွက် လိုအပ်သည့်စာရွက်စာတမ်းများ ပြင်ဆင်ရင်း နောက်ကျနေသည့်အခေါက်တိုင်း စားပွဲပေါ်ရှိ စားစရာများကို လုံးဝမထိဘဲ ဖုန်းသုံးရင်းသာ ထိုင်စောင့်နေတတ်သည်။
ယခုလည်း သူ ထမင်းစားခန်းထဲသို့ ဝင်လာသည့်အခါမှသာ စားပွဲပေါ်တွင်ချထားသည့် များပြားလှသည့် မနက်စာအမယ်များထဲမှ ခေါက်ဆွဲပန်းကန်အား လှမ်းယူ၍ မွှေနေသည်။ သို့သော် အိမ်ရှေ့စံပြောဖူးသကဲ့သို့ ငယ်စဥ်ကတည်းက ဖူးဖူးမှုတ် အလိုလိုက်ခံထားရသည့် မင်းသားလေးဖြစ်သောကြောင့်ထင်၊ ခေါက်ဆွဲပန်းကန်အား တူဖြင့်မွှေရာ၌ပင် နှံ့စပ်အောင် မမွှေတတ်ဘဲ အခက်တွေ့နေရာ ဒီအတိုင်းကြည့်မနေနိုင်တော့သဖြင့် သောက်လက်စ ကော်ဖီခွက်ကိုချကာ ခေါက်ဆွဲပန်းကန်အား လှမ်းယူ၍ မွှေပေးလိုက်သည်။ ထိုအခါ မာနခဲလေးက ခပ်တည်တည်ကြည့်လာ၍ "ကျေးဇူး" ဟု နှုတ်ခမ်းလှုပ်သည်ဆိုရုံ ပြောလာသည်။
နှစ်ပတ်နီးပါး မနက်စာအတူစား၍ ကျောင်းသွားကျောင်းပြန် အတူရှိပြီးနောက် သူတို့နှစ်ယောက်၏ကြားရှိ ဆက်ဆံရေးမှာ ယခင်ထက် ပို၍ရင်းနှီးလာသော်လည်း လုံးဝစကားမပြောသည့်အဆင့်မှ မေးတစ်ခွန်း၊ ပြောတစ်ခွန်းအဆင့်သို့သာ တိုးတက်လာခြင်း။
