لكشف الحقيقة

البحث عن أبي

البحث عن أبي
التحديات الكبيرة معاها مسئوليات كبيرة و بما إنك بقيت في مهمة فخليك متأكد أنك مناسب للمهمة دي و إن انت فيك موهبة مميزة تجعلك جدير بالثقة و مناسب للمهمات اللي هتبقي فيها (ده أولا )
ثانيا/ الصحاب مش بالكترة و متتغرش في إن صحابك اعدادهم كتيرة انت ممكن صاحب واحد يبقي أحسن من ألف واحد مخادع و عامل نفسه صحبك خليك حكيم في اختياراتك و اختار بعقلك و أركن العاطفة علي جنب
دي كانت القواعد اللي بابا كان دايما بيقولها ليا قبل ما يختفي فجأة بسبب إن ناس بتبحث عنه
انا حسام محمد شاب عندي 26 سنة خريج جامعة علوم كلية القاهرة و مع اختفاء والدي بقيت انا المسئول عن أهلي و دايما بابا كان بيعلمني و انا صغير أسرار كتيرة و ألغاز كتيرة و كان دايما عارف اني بحب الحاجات دي كان دايما يخبي أي حاجة بتاعتي و يسيب مكانها ورقة فيها رموز علشان يدلني علي مكانها من غير ما يساعدني و لإني كنت ذكي كان سهل عليا اني أجيبها و دايما كل يوم لازم يبقي في وقت معين بابا يعلمني معاني الرموز و أحل الشيفرة ازاي و بقيت بحب الغموض أوي و كشف الأسرار و مكدبش عليكوا كنت بتفرج علي افلام و اقرأ روايات للمحقق شارلوك هولمز
و لما كبرت بقا كبر معايا شغفي في البحث عن الغموض و الأسرار و بقيت بحاول ابحث عن أي حاجة تقدر توصلني لبابا
و في رحلتي بقا لما كبرت و بقيت عايز ادور علي بابا عرفت صاحب أو تقدرو تقولو كده أخ لأنه بجد رغم المواقف اللي عديت فيها و اللحظات اللي كنت بمر بيها كان هو الثابت اللي متغيرش برغم عدد كبير من اللي اتخلوا عني بس وجوده كان أحسن من وجودهم و الشخص ده يبقا أحمد (شاب ٢٧ سنة محافظة الجيزة خريج كلية علوم و شغفو كلو في القراءة و البحث عن معلومات تاريخية و عارف معلومات تاريخيه كتيرة)
أحمد شاب بيواجه خناقات مع أهله و إنهم دايما بيقللوا منو و بيستخفوا بيه فقرر إنه يسافر لمحافظة القاهرة علشان الكلية اللي التحق بيها و اتعرفت عليه في الكلية مع إنه اكبر مني بسنة و بقينا اكتر من اخوات و يعتبر قاعد معايا ٢٤ ساعة و كان بيبحث معايا عن أي علامة تدلنا علي مكان بابا و زمان فاكر إن بابا كان عنده مكتبة و كنا بنزورها و يعرفني معلومات تاريخية و أماكن تاريخية و عجائب الدنيا السبعة القديمة و الجديدة و ساعات كنت بحس انه تدريب بس هو كان تدريب فعلا لأنه كان عارف ايه اللي هيحصل و كلامه ليا في وداعه و كلام زي إني هبقي قد المهمة اللي انا هبقي فيها و إني الشخص المناسب للمهمة دي

يوم الأحد ١٨/٥/٢٠١٨
كان يوم غير مجرى حياتي لما لقيت ماما بتنادي عليا تصحيني
أمي:- حسام قوم حسام في بريد جه ليك دلوقتى
أنا:- بريييد و ليا أنا!!! مين اللي لسة بيستخدم البريد و الحاجات القديمة دي

مضمون الرسالة:-( في إيطاليا و أهم العلامات المائلة و من أعجب سبعة في العالم هتلاقي تكملة طريقك هناك)

حسام :- ايه ده ! إيطاليا و و مين أعجب سبعة دول و علامة مايلة ايه علاقة الحاجات دي ببعض
يعني بابا لسة حي و موجود طب هو فين و ليه مبعتش هو الرسالة و قالي مكانه علي طول بدل الألغاز دي
يعني كده في مغامرة كبيرة و رحلة جديدة
حسام:- ايه يا أحمد تعالي بسرعة عايزك
أحمد:- خير في إيه
حسام:- مش هعرف اشرحلك هنا لازم تاجي
• بعد عشر دقايق