أزمة ضمير

2

الحاضر،،

كنت بحكي لي ياسر في قصتي قام قاطعني "ماما انا عايز اعرف قصتك بي بااابا..دا شنو البتحكي ليه"

"اصبر علي يا ياسر ثواني جاياك وحده وحده..لازم تعرف السبب الرئيسي الخلاني الاقي ابوك شنو"..

الماضي،،

قضيت اسبوعا مريراً دون ابنتي..لم اتوقع ان العيش هنا في هذه الشقة دونها سيكون صعباً الى هذه الدرجه..تباً لما لم اسافر معها..

اني اشم رائحتها في كل مكان و اسمع صوتها الطفولي يناديني "ماما" كثيرا..

لم هذه القهوة التي احتسيها ليس لها طعم؟ اوه يجب ان اتصل عليها و اتحدث معها الان قبل ان اجن..

اخذت هاتفي و اتصلت عليها و ما هي الا ثوان حتى اجابت "مااامااا"

"يا حبيبة ماما..كيفك؟"

"انا الحمدلله كويسه و انتي؟؟"

"بخير بخير نحمد الله و نشكره..مشتاقه ليك بس"

"اخ يا ماما بالاكتر والله..زهج بس مستنيه بكره دا يجي متين عشان انزل الجامعه"

"اطلعي اتفسحي شوفي اصحابك القدام وين"

"زي ما قلتي يا ماما اصحاب قدام..هسي لا لامه في ارقامهم لا لامه في محل سكنهم"

"اه ما مشكله..افتحي تلفزيونك دا بس اقعدي احضري و عندك السوبرماركت تحت انزلي جيبي النفسك فيه و برمجي برااك يا زوله"

"اي اصلا دا كان محتواي الاسبوع الفات كله"

قعدنا اتونسنا كتير بعداك اديتها لامي و ابوي تتونس معاهم..

كان الحال دايما كدا..بصحى الصباح بضرب ليسرا و بعد ترجع من الجامعه هي البتضرب لي..و تاني بالليل مرات بضرب ليها مرات لا..

بعد نزلت الجامعه كونت ليها شله صحبات و اصحاب اصلا هي بتخش في الناس سريع لانها فرفوشه و اجتماعية شديد..

زي م قلت ليكم كنت مرات بضرب ليا بالليل و مرات لا..بعداك بقت هي البتضرب لي ثااابت بتتجرس لي من القرايه الما تمت شهر من بدتها..والله عذبتني عذاب بالبكى..

يوم كدا كان ما عندي موضوع و ما نعسانه ف ضربت ليها..قامت ردت لي و كان ظاهر في صوتها انها زي النعسانه كدا..

قفلت الخط قلت اخليها تنوم..

بعد شوية لقيتا ضاربه لي فيديو كول..قلت اكيد بالغلط..

فتحتو و كنت متوقعه تجيني الشاشه سوداء بس ما حصل..جاتني صورة ولد كدا كان ماسك التلفون و في يده قزازة ويسكي و بشرب و قال لي بلهجة امريكيه "اوه من الانسه الجميله؟"

و كان في بت واقفه وراه و بتشرب برضو و بتضحك.. و ظاهر زي الفاتحين اغاني..

فجاه كدا جات بت شالت التلفون و قفلت الخط..ملامحها م ظهرت زي الناس بس كان واضح انها يسرا..