الحاضر،،
كنت بحكي و مندمجة شديد في القصه لقيت ياسر رقد جمبي نام..
زعلت و قلت "للدرجه دي قصتي ممله"
قعدت اعاين ليه و انا مبتسمه و بقيت بمشي يدي على شعره..طبعا اكيد ما جبت ليه سيرة اني ديلر ولا كل القصص دي..كنت بفطفط على مزاجي..
خلاص طالما نام خلوني اتم القصه ليكم انتو،،
الماضي،،
الساعه 10:30p.m:
دخل كريم البيت دخلتو الاولى يداب من الصباح..عمر كان عازمه عشان يغير ليه جو..
قبل يطلع السلم انتبه لينا انا و امه قاعدين برا في الحديقة الخلفيه في الكراسي بنتونس..استغرب شديييد و وشه جاب الوان..بقى بفكر امه دي ناوية على شنو؟
طلع برا و داهمنا بعصبيه و قال لامه "انتي ناوية على شنو؟ جبتيها تاني؟"
استنتجت انه بتكلم عني..و اسلوبه ما عجبني خالص..قمت على حيلي و قلت ليه "اتكلم معاها براحه دي امك"
"انتي ما تتدخلي"
وشي اتلون من الاحراج و قعدت محلي و انا ساكته..اما فيروز قالت لولدها "كريم مالك في شنو هسي؟ مش عملت عملتك امس و قلت كل الفي قلبك عني؟ جاي هسي تتدخل فيني انا و صحبتي؟"
"ماما..انا ما كنت قاصد ولا حرف من القلتو..اساسا كنت جاي اعتذر ليك"
"ولا تعتذر ولا زفت..انت كنت قاصد كل كلمة قلتها..الواحد و هو شارب ما بيكذب" و بدت تبكي..
انا م كنت فاهمه الحاصل شنو ف مسكتها حضنتها و بقيت بعاين لكريم بلوم و عتاب..قال لي بعصبيه "م تعايني لي كدا..ماما ممكن اتكلم معاك"
لزتني و بقت بتكورك "لا ما ممكن!! سيبني في حالي ما عايزه اتكلم معاك! امشي اتكلم مع ابوك مش هو الكويس و انا الجبانه!"
"ماما والله ما كنت قاص.."
هرشته "اطلع قلنا!!"
كريم سكت و طلع برا البيت..اما فيروز قعدت في كرسيها و رجعت تبكي..بقيت بحاول اواسيها لحد م هدت شويه بعداك سالتها "مشكلته شنو؟"
"ولدي بكرهني..ما بحبني..وراجلي خلاني..بيكرهني برضو..كل الناس بتكرهني" و كانت بتشهق و تبكي..
كلامها آلمني شديد ف بقيت ماسكاها علي و حاضناها..قلت ليها "ششش..ولدك اكيد بيحبك بس دي لحظة غضب و انفعال منه..بعدين كيف كل الناس بتكرهك؟ انتي ناسياني ولا شنو؟ انا عمري ما صاحبت وحده حلوه زيك و مستعده احبك عمري كلو"
فيروز رفعت راسها و مسحت دموعها و قالت لي "بجد؟ شايفاني انسانه كويسه؟"
"ياخ كويسه و بس معقوله؟ بعد كل العملتيه معاي دا؟ انتي اكتر زول كويس لاقاني في حياتي"
