"حركة غير موفقه ي امي..او مفروض اقول بعدا يا ست تهاني"..و قبضت ابوي الكان واقف جمبي لصقت السكين الجازفتها من الطريق في رقبته..
امي طبعا ما كانت متوقعه اني اكون كاشفاها كان هي ولا ابوي..بس برضو م استبعدت تكون خاته احتمال لاي شي عشان كدا شلت معاي السكين..
حسيتها اتوترت بس م بينت و قالت لي "ما بتقتلي انتي"
"في نيويورك بسببي مات واحد امبارح..تقدري تتاكدي لو عايزه"
بلعت ريقها و هي ساكته و بعداك قالت لي "انتي كيف عرفتي اننا عندنا علاقه بالموضوع؟"
قلت ليها "يعني الخاطفين جابو وحده محل بتي درسوها محتوى حياتها عديل عشان تعرف تحاكيها..حيكون الزول دا منو غيركم انتو..بس عارفه؟ ختيت احتمال يكونو صحباتها عادي لانهم بعرفوها..بس الخلاني اتاكد هو غبائك"
"كيف؟"
"دقستي لما خليتي سوزي تعرف انه الاكلة المفضله ليسرا هي المكرونه بالبشمل..دي حاجه كانت خاصه بي انا و بتي و ماف زول بعرفا غيرنا..و اللي هي انك قايله اكلتها المفضله بشميل..في حين انها بتحب ورق العنب..عشان كدا كل ما تعملي بشميل مخصوص ليسرا كنا بنضحك فيك"
تهاني حست وشها اتلون من الغضب بس كانت ثابته لسه و مؤشرة المسدس علي..قلت ليها "من ما يومداك في المكالمه سوزي قالت لي كان نفسي اصور ليك البشمل الطلبتها مخصوص بس للاسف كاميرتي محروقه..بس اكيد ما بتحصل حلاوة حقت حبوبة..حسيت بالغرابه..لانها بتكرهها عمى و يستحيل تطلبها"
كانت لسه ساكته..قلت ليها برضو "الشاشه الخربتيها انتي قاصده عشان ما تخربي مخططك..عشان ما اضطر اضرب فيديو كول..و طوالي بعد سوزي مشت نيويورك صلحت الكاميرا..و يوم ماركوس ضرب فيديو كول بالغلط اضطريتو تحولو للخطة ب طوالي عشان لو ضربت فيديو كول تاني سوزي ما حتقدر ترد..اتضطريتو تخترعوا قصة الاختطاف في نيويورك..عشان تشتتو ذهني هناك..و خليتو فيروز تلاقيني في الطياره و تقعد جمبي مخصوص عشان عارفني بحكي قصة حياتي لاي زول..عشان احكي ليها و تساعدني..و تقعدني في بيتها و تراقبني!! و تخت جهاز تصنت في شنطتي!!..و تحكي ليكم اي تفصيله انا بعملها!! عشان كدا دايما لما اجي احكي ليك يا امي بلقاك مجهزة الرد الحتقوليه لي مسبقا! علما بانك من زمان لما احكي ليك مشاكلي م بتعرفي تواسيني في نفس اللحظه!"
اخدت نفس و تاني واصلت "انا اصلا قلت انتو حتدوروا مني شنو! من يوم خليتو منذر ولدكم و جيتو وقفتو معاي لما بتي كان عمرها خمسه سنين و قعدتو معاي قلت ديل جو كدا ساي الله هداهم ولا في سبب! لما لقيتكم السنين دي كلها ما عملتو حاجه وثقت فيكم و اعتبرتكم امي و ابوي..طلعت عينكم على وش بتي!! و انا اقول يا امي انتي ليه بتهتمي ببشرة يسرا اكتر منها! و بتجيبي ليها الماسكات و بتمنعيها تطلع في الشمس من غير طاقيه!!! انا كنت عميانه من الحق"
