سيفين

الأُحْجِيَّة الثَالِثَة

جِسمي مَعي غَيرَ أَن الروحَ عِندَكُمُ
فَالجِسمُ في عزبَةٍ وَالروحُ في وَطَنِ.

صباح الخير .

.......................

تحجي بقهر و دموعها تنزل ..
فجأه استوعبت عن منو جاي تحجي و استوعبت حالتها حاولت اكون هاديه و احجي بقوه :

: انتِ تعرفينه مستحيل يتخلى عنها و لا باي شكل من الاشكال دارلا كافي اتعودي و اتقبلي هاي الحقيقه بابا راح يبقى يروح يشوفها و يحجي وياها .

: بس انا ما احبها و ما اريد اتقبل وجودها بحياتي ما اريدها ما اريدها  .

حضنتها بقوه وما انا ما عندي كلمات تهون عليها احس كلشي طار و ما عدت اعرف شگول او شسوي و مجان ب ايدي حل او سبيل غير اني احضنها هذا الشي الوحيد الي بأيدي حتى اهون عليها ،

من حسيتها هدأت سحبتها وياي و اتوجهت لغرفتي فتحت الباب دخلتها و دخلت باوعتلي و سألت :

ليش جايبتني هنا ؟

: عادي اسولف وياج انتظريني بس اغير ملابسي .

حجيتها وانا اطلع الملفات من الجنطة خليتهن على صفحة وفرغت باقي الغراض منها هي دخلت گعدت و حجت :

چان بدلتي و اجيتي يمي المن جارتني وراج ؟

: شكد لحوحه خل ابدل و اجي مو ترحين .

حتى ما باوعتلها عفتها ورحت للحمام غيرت ملابسي و اجيت لگيتها فاتحه ملف و تگلب بي گعدت يمها  :

ها فهمتي شي ؟

: لا عباره عن طلاسم ما اعرف شلون تفهمين هيج سوالف .

اخذت الملف من ايدها فتحته على اول صفحه .

: سهله ماماتي تردين اعلمج .

: لا لا دخيلج مالي خلگ هيج سوالف .

سديته للملف وحطيته على صفحه جريت ايدها حطيتهن بحضني باوعت لعيونها ،

: براحتج هسه خلينه نحجي .

عدلت گعدتها و باوعتلي ب اهتمام و حجت تحثني على الكلام :

تمام يلا احجي اسمعج .

: داري ماماتي الي صار صار و هذا من الماضي و احنه ما نگدر نلوم نفسنا على قدرنا كل واحد لازم يرضى بقضائه و قدره و يتقبله .

: انا راضيه بس انتو كل شوي تذكروني بالي صار و تقهروني .

: دارلا ديري بالج تخلين اشياء تقهرج وبعدين منو ذكرج ب الي صار ؟

: ابوج ابوج هو الي ذكرني و مو كافي الصوره الي بوجهي اربعه وعشرين ساعه ؟؟

: اولاً اسمه بابا وهو ابونه ثنيناتنه مره ثانيه ماريد اسمع منج هل كلمه ثاني شي بابا هم انسان و اله مشاعر و من حقه يعيش حياته بالطريقه الي يحبها .