سيفين

الأُحْجِيَّة الرْابِعَةُ

طِينٌ أنا، كُلما صافَحْتُكِ
نَبَتَ فَوقَ يَديّ الياسِمينَ

- صباح الخير .

.....................

فتحت عيوني بقوة وانا اصيح شبيكم ركزت شفت ماريا تركض و تصرخ و زُها تركض وراها و هم تصرخ بس جانت تضم ضحكتها بالگوه

احاول استوعب الوضع و سمعت صوت بابا فاتح الباب وواكف  يصيح :

بابا شكو شبيكم ؟؟

شمرت البطانيه و گمت جريت زُها من ايدها  و حجيت :

لا بابا ماكو شي بس هاي زُها و سوالفها .

: بابا خوفتوني عليكم على كيفكم مره ثانيه .

: ان شاء الله .

هو راح نزل و انا سحبت زُها من شعرها على كيف و گعدتها على الجربايه مالتي و انا گعدت جوا يم رجليها رفعت راسي و سالت بجديه :

زُها حبيبتي انت عقلج بي شي ؟

باوعتلي بأستغراب و سألت :

هاا؟؟

كضيت ايديها بين ايدي و حجيت :

حبيبتي انتِ صاحيه عندج عقل حالج حالنه ؟

عافت ايدي :

اي شبيه انا .

دفعت ايدها بقوة و صحت بصوت :

مو صاحيه زُها مو كافي ترا كبرتي بطلي هالتصرفات شنو شامره على البنيه من الصبح و مخليتها تگعد على راسي لج حتى بابا اجه يركض على صوتها شمسويتلها .

باوعت لماريا الي طلعت من الحمام و تباوع ل زُها بحقد و رجعت باوعت لزُها ضحكت بوجهي وهي تجاوبني :

يااا ما سويت شي  شبيكم بس شمرت عليها ماي و حطيت ثلجه بظهرها و هي حسبالها فد شي و كعدت تكمز .

رفعت راسي استغفر عفتها و گمت غسلت و صليت و نزلت جوا ما لگيت احد ب الصاله اتوجهت للمطبخ لگيت ماما تحضر الاكل بستها و گعدت على الطاوله هي سألت بدون ما تلتفت :

شبيكم ماما من الصبح ابوج گال مابيهم زُها و سوالفها .

حطيت ايدي على الطاوله و حطيت راسي فوكها حجيت و انا اغمض عيوني :

مابينه شي بس بنتج راح تشيبنه على وكت من ورا سوالفها بالله عليج گعدت على صريخ و ناس تتراكض تطلع الحماره شامره ماي و ثلج على ماريا من صبح الله .

ماما ضحكت و اجت تحرك ايدها على راسي :

تعرفونها اختكم تحب تتشاقه وياكم انتِ شلونج .

: زينه انا بس نعسانه ماما ترا زُها كبرت و مرات تزودها الها يوم مكتوله انا مابيه كل يوم اگعد على خرعه .

: بعدين انا احجي وياها .

دخل بابا صبح علينا و تبعوا البقيه اتريگت و طلعت للدوام ،