⚜️#حور _رائد
⚜️#حبيبتک _أنتٓ
#بقلم_جيهان
ساعة وانا واقفة مع المراية نشوف مع لبستي حجاب في الغوز مع خيمار و صاك رمادي درت شوي مكياج غيسيل طلعت شفاري وغوجلافغ في فمي بقيت هايمة وانا هكاك نغتر بروحي و بزيني حتى نسمع في ماما من تحت تعيط عليا حووووور والله نطلع ليك روحك ناخدها _اني جيت و هبطت نجري _ساعة يا مخلوقة ربي ونتي توجدي في روحك علاه رايحة تعرسي و من وكتاه تحطي داك شي في وجهك _نورمال ا ماما حطيت شوي حماير برك _اني نشوف فيک ليام هادو وليتي تشوفي مع روحك بزاف غير الخير ان شاء الله _وعلاه كي طفلة تهتم بروحها شوي تبداو نتوما طلعوا في حسابات مكانش منهم_ياو ربي يجيب لخير برك راكي بنتي و نعرفك ليام لخرة هادي مراكيش عاجبتني من نهار خرجتي آخر مرة _واش تقصدي ماما _ما نقصد والو منحبش نظلمك بصح كلش يعيى ويبان و هيا امشي راح لحال خرجت وانا وراها نمشي منعرف علاه غير نعطس تفيق بيا و ليام هادو كامل وهيا تشارشي عليا علاه تبدلت مهم وحنا ماشيين فتنا على ديك الحومة عدلت مشيتي وبقيت نشوف هك وهك نحوس بعينيا بلاك نلمحو _حوور غير لخير عينيك خرجو _ماما وشبيك تعسي فيا كيفاه درك نمشي و نغمض عينيا _مش تغمضيهم بصح ديما نقولك اوزني تصرفاتک راهم يفضحوک_افففف يعني ديما نفس الاسطوانة _اقفلي فمك متأفأفيش عليا و امشي قدامي تحركي عديت قدامها و مشيت و هيا تشوف معاي _وانا في قلبي نقول وين راح هذا منشوفوش خلاص نلمحو مرة في 3اشهر و لا أكثر رحنا لسوق قضينا كملنا وهوما مع ماما كل دقيقة يلوحو لكلمة ليا ولا يجو ليها يقولو نقصدوك في بنتك كيما كل مرة مهم شرينا واش خاصنا ورجعنا انا ماما تخيط وانا نعاونها الحمدلله ياربي ماعندو مايخصنا بابا من صغرو خدم في التجارة و ربح منها حل لماما حانوت صغيير تحت الدار تحط فيه خدمتها و انا حاكمتهولها ربي عطاها موهبة في الخياطة تبدع فيها مهم وحنا في طريق لقينا جارتنا صفية تاع حومة فوقانية و مالفة تخيط عند ماما كليون فيدال مهم واش راكي لباس _شافت معاي _حور بنتي الله يبارك مارايحة ونتي تزياني وين بيها _ ههه حشمتيني قالت لماما لعشية ان شاء الله نجو عندكم قاصدين الخير_قالتلها ماما مرحبا بيكم_يعيشك و بقات تشوف معاي و قرصتني على خدي وࢪاحت _اييي ياماما واش مانحملهاش ثقيلة على القلب_اسكتيني علينا عيب لمخلوقة ما وصلتكش _ايه علبالي بصح مقدرتش نحبها الله غالب ديما نحس نيتها خبيثة ماما بقات تقرص وتحمر عينيها فيا _ وحنا ماتحركناش من بلاصتنا نلمح في طاكسي تاعو واقفة لهيه مقابلتنا ࢪجليا ولا يرعشو خلاه و حكمت في ماما _وشبيك راح طيحي _لا والو دخت برك مفطرتش صباح معدتي خاوية _حكمتني من خدي منبقاش نقولك كولي مليح باه تهزي صحتك يا طفلة _ايه خلاص ماما ناس تشوف فينا _وين راهي ناس هادي لي تحكي عليها _والو هيا برك نروحو مشينا تحركني وصلنا منين طاكسي تاعو نشوف فيه كي لعادة قاعد و يتكيف لبستو ديما كحل في أكحل ويشوف معاي جامي عديت من حداه و نحا عينيه مني حتى نفوت ونولي منبانش و هو ياكلني بشوفاتو منعرف كيفاه وانا هايمة نتعكل ونطيح طيحة تاع كلاب جا وجهي مقابل رودة تاع طاكسي تاعو تبهدلت _ماما يا طفلة نتي صح ضربتك دوخة نزل يجري من طاكسي حكمني من يدي نوضني وانا وجهي ولا حمر مقدرتش نشوف فيه قلتلو برك يعطيك الصحة قربني قالي حووور وضغظ على زدني حتى وجعني ومنبعد طلق يدي _ماما بقات تشوف معاه قاتلو مش نتا ࢪائد ولد حورية _قرب ليها سلم على راسها ايه انا هو بالذات _الله يبارك وليت راجل طوول و عࢪض_يبارك فيك _واش أحوال حورية_منقدرش نقولك لباس راهي طايحة فراش ومرض كلاها_ربي يشفيها ان شاء الله نِعم الناس قولها اي تسال عليك سعاد الخياطة _يبلغ ان شاء الله و قال هيا مالا نخليكم و شاف معاي و اتهلاو في رواحكم وركب طاكسي و تحرك خلا وراه الغبار _قاتلي ماما راكي تشوفي هذا لبارح كان صغيير خلاص و ليوم ولا راجل _تعرفيهم نتي _وكيفاه منعرفهمش حورية أمو كانت حبيبتي بصح راحو نقلو منا وحد الوقت وعندهم عامين ولا عاودو رجعو و شفتي هاديك صفية اي ضرة تاع حورية سما ࢪائد هاديك مرت باباه _اااا صحا باباه مدي زوج نساء _ايه من نهار زوج على حورية حطمها وراحت راحت و رجعت ليه _حرام عليه يدير هكا _ايه كاين رجال هكا تلقاي نساهم مكفيينهم وموفيين بصح يحبو نساء الله غالب _كملنا نمشيو ووصلنا لدار حطينا القضيان و نحيت قشي و انا نطبق فيه نشم في ريحتو مزال راها لاصقة فيه تقتل رجوولية بإمتياز معرف وشمن بارفان يحط دخلت عليا ماما وانا نشم في قشي _هبلتي وقيل _تبهدلت لالا غير شميت فيهم وحد ريحة هذا مكان _كملي برك وهيا الحقيني نتي ديري لغداء وانا نبدا نفصل القنادر _ايه معليش ، هيا ولات راحت و انا لبست قندورتي حكمتها في سل..يب كيما مالفة لميت شعري الفوق و رحت بديت نرحي البصلة باه ندير الغداء قلت خلي نحط كيتمان و نلهي روحي حوست عليهم في لاليكات لي كنت لابستها لقيت معاهم ورقة فيها نومرو و مكتوب رائد_تشوكيت وفرحت من بعد قلت اهاه كيفاه بصح لاحو في الجيب خبيث هذا وقيل كي نوضني استغل الفرصة مهم هزيتو حطيتو في الخزانة بين القش و خليتو طوول للكوزينة درت الغداء كملت طفيت عليه رحت عند ماما نعاونها خيطنا لي كوموند لي بقاو و تغدينا غسلت لماعن و رحت نرقد شوي قفلت لباب وهزيت داك نومرو نشوف معاه كتبتو منبعد عيطت برك باه يبقى نومرو مكتوب أصلا معنديش دراهم في لابيس وخليتو هكاك بلا إسم و قطعت الوࢪقة و قلت خلي نرقد شوي حطيت راسي غصت خلاص حتى نلقى ابال دخلتني _هزيت نشوف ياه هذا نومرو تاع ࢪائد بصح معنديش دراهم كيفاه وصلتوو لابال جيت نشوف لقيت روحي مركبة لابيس اوريدو سما لاشتا معندكش توصلو عادي بلي بيبيتي _ياه نندب على زهري الكلب واش داني لهاد التبهديل زدت لقيت ميساج وصل فتحتو _علبالي بلي راكي حوور هزي نحكي معاك _ريبونديت مرانيش حوور و راني غلطت برك في نومرو ديزولي و حطيت تلفون ياااه قلبي راح يخرج لقيت ماما طبطب عليا حلي اطفلة لاه قافلة لباب _رحت حليتلها _وشبيك قافلة على روحك _والو حبيت نرقد برك شوي _وشمن ترقدي منبعد تجي صفية هيا وجدي معاي ضيافة _اييي نكرها منوجدش _طيري تشوفي قدامي نعتلك ظرافة تاعك كيفاه دايرة مشيت وانا نطوط في شواربي درنالها شوي صابلي واصلا عندنا من قبل شوي قاطو و مقروض درنا تحلية و خلاص مع jus و حليب بزاف عليها _كملت قاتلي روحي اغسلي عليك و البسي حاجة مليحة _علاه خير برك شكون قالك راح نخرج و نقابلها_تخࢪجي و يدك على ࢪراسك _والله ،والله علاه شايفتني نتمسخر معاك روحي ودزتني للبيت نص ساعة نلقاك واجدة _والله ماما هبلت منها بالصح اي مالفة تجي وجامي حتمت عليا نقابلها بصح كلش كان باين غير انا بهلولة _مهم درت على راي ماما لبست قندورة مليحة لميت شعري كوتشوفال لبست سنسلة خفيفة وخلاه وقعدت هكاك عاودت هزيت تلفون لقيتو زاد بعت ميساج علبالي بلي حووࢪ وعلاه مراكيش حابة تحكي معاي اذا تقعدي من بعد عاوديلي حاب نحكي معاك شفت ميساج و خليتو هكاك بقيت نخمم يعني واش يستحق مني _مهم زمان شوي و جات صفية هيا وبنتها ياربي واش نكرهم استقبلناهم و ضيفناهم قعدنا وهوما يحكيو حتى حكاياتهم سامطة و مكنتش علبالي بلي راني مقابلة ناس لي راح يكرهولي حياتي ويدمروها منبعد نطقت صفية شوفي ا روميساء حوور واش زيانت مش كيما قلتلك _ايه اني نشوف حسيتها هاديك بنتها شوي هكا وتنوض تضربني غير لخير برك مانعرفها ماتعرفني مهم وهوما يحكيو انا محوسة نلقى برك فرصة و نهرب حتى صدمتني صفية كي قالت مالا ا سعاد نتي حبيبتي و معريفة قديمة مش راح نلقى خير منك ولا خير من اني ناسب عايلتك رانا جينا قاصدينك في بنتك حوور لولدي حمزة _ياخاه واش راهي تحكي هادي _ان شاء الله ماتردوناش حبيت حنا نساء نحكيو و زيد رجال تاني يحكيو و ان شاء الله حوور تكون من مكتوب ولدي حمزة _وشبيها هاديك قصدها تولي عجوزتي بعيد الشر ياخلايا غير فكرة برك غمتني ولي زاد غمني ماما كي قالت انا من جيهتي قابلة نزيدو ناخدو راي باباها برك _ياني نندب سما انا ماعنديش راي نرفزتني وليت نضت من حداهم ماما قالتلهم اي حشمت برك دخلت للبيت و قفلت عليا وشنو حكاية هادي لي جات بيها مصيبة هاديك وماما لي راهي فرحانة وقابلة كي شغل هيا لي راح تزوج ومامدتلي حتى حق اووو لدرجة هادي بصح يروحو ولازم نتفاهم معاها على هاد الموضوع بقيت حابسة روحي في البيت حتى روحو وطووول خرجت نجري لماما وشبيك نتي هبلتي كيفاه هذا تقولي ايه راني قابلة و نزيد نشاور راجل وانا رجل كرسي وقيل ماعندي حتى رأي _اسكتي برك ماعندو ماراح يخصك معاهم علبالي صفية نعرفها و ناس ملاح نتي برك لي مكحلة قلبك عليها _ما راني مكحلة لا والو مانحملهاش و خلاص شافت معاي و محبتش تهدر نعرفها كي دير هكا معنتها قرارها ماراحش تتراجع فيه _معليش يجي بابا و يرحمها ربي بقيت قاعدة على نار حتى جا بابا كي حل الباب كي لعادة رحت نجري عندو و حضنتو وهو يهزني كي لبيبي تقول عمري عامين مش 26 سنة ديما محسسني اني مزلت صغيرة _بابا من صباح نستنى فيك _وعلاه كشما أحتاجت الببونة تاعي _لا والو _خرجت ماما ليه على سلامتك يحيى _يسلمك وضحك علبالك ليوم جاو قصدوني في حوور دار سي ... لولدهم حمزة ولد مرأة ثانية _ايه علبالنا مرأة قبيل وين خرجت _ايه ماعندو ما خصهم بصح انا كيما تقول حووࢪ هاديك هيا _منك صح تاخد رايها محوسة كيما ديما حتى تخليها تقعد هنا في وجهونا_ومنبعد ياك دار باباها تقعد لوقت ما تحب _علبالنا بلي دار باباها وحاجة ما تخصها بصح طفلة ما دوملها غير دار راجلها _يعطيك الصحة قلتي ما دوملها غير دار راجلها بصح راجل هداك يكون صح راجل باه تقدر تكمل حياتها معاه وانا مش راح نسيف عليها لأنو هيا لي راح تزوج مش أنا _شحال يعجبني كلام بابا وليت نسلم عليه و نعاود. يا بابا و شحال نحبك _ايه هكاك دللها و خليها حتى نحصلو فيها _فرد عوينة كيفاه ما نددللهاش مهم وانا هكاك مع بابا وماما تسيي تقنع فيه باه يمدني ليهم وهو بقى في قرارو بلي حوور لي تقرر اذا ايه ولالا مهم تعشينا غسلت ماعن و رحت لشومبرتي جات ماما قعدت قدامي قاتلي حوور بنتي تعرفيني نحبك ونعزك راكي فرد طفلة عندي مش راح نرضالك الهلاك بصح اسميعني وحطي عقلك في راسك و اتستري خير في دار راجلك درك راكي صغيرة و خطابة راهم عليك مش نفس شي اذا وصلت ثلاثين ولا كتر و ناس نعرفوهم و زيد قراب لينا مش بعيدة لي نخافو عليك اي حاجة راكي قدام عينا مهم حكات مليييح حتى معرف كيفاه عمرتني و قنعتني و حطيت في راسي بلي غدوة نروح نقول لبابا اني قابلة حتى جا داك لميساج منو لي خربطلي كامل حساباتي نقرا فيه ونعاود يهدد صحا صحا زواجك من حمزة انسايه و غدوة ترجعولهم بلي مراكمش قابلين فهمتي ولالا و قرار يبقى عندك باه متندميش بقيت نشوف وشبيه هذا واش حاسب روحو مكانش علبالي بلي من هنا مجرى حياتي تبدل خلاص
نضت من رقاد ولا وشمن رقاد رقدتو وانا بايتة نخمم غير نطلع و نهبط في هداك ميساج لي بعتهولي رائد عيييت نفسرو واش دخلو في حياتي ولا في قراراتي حتى يهددني هكاك راسي راح يخرج على الغلاف من السطر وليت تقعدت في بلاصتي عينيا بسيف نحل فيهم نضت رحت للكوزينة حطيت قهوة طيب منبعد رحت للدوش غسلت وجهي وتوضيت خرجت طفيت على النار و صليت و رجعت حطيت فنجال قهوة و نشرب و نمسد في راسي بلاك يحبس سطر لقيت ماما بعد دخلت من وكتاه تنوضي الوقت مالفة كون مش بالدبزة والله ما تتحركي _وعلاه انا رقدت حتى نوض _ وشكون قالك مترقديش مزال تخممي في موضوع هداك يخي حكينا فيه لبارح و خلصنا _ ماما هذا زواج مش تمسخير حتى نحكو فيه حكاية تاع نص ساعة و قص _ نص ساعة ايه تكفي انو تعرفي بلي ناس فاميلية سمعتهم مليحة جامي وصلو واحد خدامين على رواحهم ماعندو ما يخصك _ انا هاديك صفية مش مرتاحة ليها تبانلي هم بالنسبة ليا _ بركاي بركاي بلا رخس تاعك المرأة جامي وصلتنا من نهار دخلت هنا و بديت نخيط وتجي عندي جامي وصلتني وقاتلي كلام مش مليح ولا جاست هكا ولا هكا مفهمتش منين تجيبي الهدرة هادي _ يا ماما وعلاه أنا قلتلك دارت انا إحساسي هكا يقولي راح تعجب فيا منحسش ولا كيفاه _ خلاص اسكتي برك واش قلتي آخر كلمة قابلة ولا لا_ مزال نزيد نخمم _ حوور ازربي روحي خممي وقولي ملخر قبل لا ينوض باباك باه ليوم يقولهم ياك طابت يا تحرقت _ كيفاه هذا نزرب نخمم علاه تبانو طيشو فيا _امشي طيري للبيت لا نفسدلك وجهك خلاص هدرة زايدة لسانك ولا يلسع _خلاص راني رايحة ،نضت للبيت دزيت لباب برك و قعدت نبان راح ناخد قرار مصيري و صح مصير زواج هذا يا نكون عرفت نخير يامرة خلاف نعض يدي من ندامة و اه برك من الندامة دورت راسي هزيت المخدة نشوف مع تلفون ملي طفيتو لبارح مزدتش شعلتو ميساج تاع خربطني و خوفني شوي شعلتو لقيتو لحقني شحال من ميساج منو بزاف الهدرة بصح نفس المعنى انو منقبلش و خلاص وشبيه هذا كي شغل كنت مصوحبتو ولا حبيبتو و راح نزوج هو صح رائد يعجبني و بزاف و مكنتش ملاحظتو غير بسبتو لأنو هو بتصرفاتو و كيفاه يعسني بعينيه خلاني نتوله ليه بصح عادي مش نحبو ولا كون يخطبوني نقبل بلا ما نخمم عادي معندي علاه نتعلق بيه لأنو إعجاب برك شفت مع تلفون مع ميساج لخر قالي صباح الخير ياك قلتي لباباك بلي مش قابلة هكا أحسن شي ليك و ليهم و اسمعي الهدرة والله حتى ضحكني حاسب من يومو يمشي عليا كلمتو يقولي موتي نموت مالا روح تقود تشوف بعتلو لا راني قابلة مش راح نلقى خير من حمزة و قلت لبابا ايه و قفلت تلفون و انا نرعش معرف علاه زربت خرجت عند ماما قلتلها ايه راني قابلة جرات حضنتني وبقات تسلم عليا فرحانة ،و اخيرا راح نفرح بيك مادام عيني حية _ ربي يخليك ليا و ديما فرحانة _كون ما جاش صباح و ناس راقدة نزغرت _ماما بعدا تزغرتي مزال لحال _ مابقاش اصبري نروح مالا نوض باباك و نقولو هيا راحت و انا واقفة قلبي يخبط راح يخرج من جيهة زواج وحد احساس و زيد خفت شوي من رائد قعدت على طابلة تم حتى تهت لقيت بابا و ماما داخلين عليا صبح عليا بابا سلمت عليه و نضت حطيتلو حليب باه يفطر نطق ليا هامالا ببونة تاعي هداك آخر قرار و كلمة صاي ،شفت معاه بتردد ايه آخر قرار _منبعد خزر لماما بنص عين و يضحك و يعني هدا قرارك نتي بدون تدخل جهات خارجية _ ههههه قاتلو راك تقصد عليا _ كشما هدرت أنا و قلتلك راكي نتي خاطيني ااا سما راكي تظلمي فيا _ نتا لي دير في النش ،يعجبوني كي يعودو يتناڨرو هكا جيت خارجة منبعد لا إراديا مني دورت لبابا و قلتلوو ،بابا وكون نحب نبطل منبعد ياك نورمال _ أكيد مهم متوصلش لحاجة رسمية و يكون عندك سبة ...
