#بقلم جيهان
طلعت راسي شفت مع ماما و درتلها براسي بمعنى واش كاين زادو كملو يضحكو قاتلي سيد من صباح وهو يهدر معاك ونتي راسك دافنتو تقول يهدر مع الحيط قلت في قلبي يعني هذا واش قتلكم بالضحك منبعد عاود قالي واش حوالك لباس ماجيت ننطق الحمد لله لا بسيف منبعد قالت عمتو راهي حشمانة خلي يبقاو وحدهم على راحتهم خير قاتلي ماما ايه مالا نوضو للبيت و خلاص هيا حور وليت وقفت مشيت وهو تبعني تفكرت هدراتو عليا كي يبقا يمشي وراي ياربي وليت نزرب حتى تلفتلي كيفاه نتمشى أصلا دخلت للبيت قعدت وهو قعد مقابلني محبيتش نهز راسي معاه خلاص شفتو غير كي يهز في رجلو _،حوور شوفي معاي طلعي راسك لاح صبعو طلعلي راسي هاحطي عينيك في عينيا وشبيك _هاه راني شفت وشبيك _ كون تشوفي قلبي كيفاه راه يخبط راح يخرج من بلاصتو _ علاه وشبيك تاني _ اني قلتلك انا قلبي رهيييف ميحملش ديك المشية ولا هاد الزين كامل _ حلووووف هدرتو خلاتني ندخل في قشي _ حوور وشبيك ليوم حلوة بزيادة عينين و شوارب و مادارو فيا _ رائد وشبيك تهدر هكا _ واش هدرت مزال ما شفتي والو عندي قاموس و راني حاب نعبر نستنى غييير في الفرصة و الوقت المناسب مهم خليني منك كون نبقا نهدر عليك راني منحبسش نجيو لشروط و هدرة تاع الصح شوفي نتي درك انا راني حاب نديك مهما كانو عيوبك ولا السلبيات تاعك شخصيتك ولا شكلك حبيتك ووصلتك و راح نديك ان شاء الله ياحور حابك تهنيني و تكوني صح شريكتي لي غير ندخل لدار ننسى هم برا كامل نعيش معاك في عالم خلاف فيه غير انا و نتي نضحكو كيفيكف و نبكيو كيفيكف لي يوجعك يوجعني ولي يضرك راح يضرني ولي يوصلك راه وصلني انا قبلك حطيها في بالك و جميع واحد يآذيك راح نوقف في وجهو قبلك وشي هذا راح تشوفيه بالتطبيق مش غير هدرة بالمختصر كون لي مرأة نكون لك راجل ونص ان شاء الله ، من كلامو بقيت نرمش برك و نشوف معاه أصلا تهت فيه ونسيت على روحي ،هاه ونتي واش عندك كلام حابة تقوليه _ انا شي لي حابة نقولو انك المهم تصلي و تخاف ربي لأنو لي يخاف ربي علابالي راح يخاف ربي فيا و ميآذينيش رانا مخلوق مهما نظاهرو بالقوة نكذبو برك على رواحنا داخلنا ضعيف بزاف سما نحتاجو بنادم في حياتنا نستقواو بيه مش يستقوا علينا و منحبش الضرب تاع الحيوانات لأنو مرة خلاف كون نطلب طلاق ولا نغضب لدار بابا بسبة انو هزيت يدك عليا ما تستغربش منحبش انا الاهانة و الضرب _ ماعاش لي يهز يدو عليك كشما عندك شروط خلاف هدرة حابة تهدريها _ لا مكانش و لخدمة نقدر نخدم مرة خلاف بديبلوم تاعي اذا نقدر _ اذا كانت خدمة بين نساء ولا مافيهاش الاختلاط نظيفة باينة ايه وين راه مشكل انا حاجة خلاف تاع تخلاط ولا مشبوهة باه نقولك ملخر والله ما تخرجيها متافقين _ ايييه أكيد _ خلاص مالا ربي يجيبلنا لي فيه الخير و ناض مدلي دراهم و قالي هيا اخرجي نعتيلي منين لباب _راااائد اني نعرفك واش راك تخمم _ ولا يضحك بالصوت حتى مقدرش يتنفس _ وشبيك نتا والله سيريو تحيرني كيفاه تخمم _ غييير ماتحكيش على تخمامي كون جيتي تعرفي واش راني نخمم تشوكاي راني معريك _ ياخاه اسكت متزيدش تهدر لي يهدر معاك أصلا غالط _نعلبو زين الحشام ،منبعد تفكرت بلي شحال معيطلي قلتلو اصبر واش معنتها ليام هادو ما عيطت ما سقسيت_ غييير ما تفكرينيش مرانيش حاب نجبد الموضوع هذا و نفسد اللحظة كي نتفكر بلي راجل شافك بلا خيمار تقول ندخل فيك بدماغ نديفورميك مالا خلينا راكحين ديجا جبدتي برك موضوع قلقني قلتلك ماشفانيش اربي غير لمحني خرج مسكين يجري وانا غطيت شعري ومديتلو ل أمانة تاعو ومادارش أصلا غير كيما لاح يدو برك _ خلاص اسكتي مرانيش حاب. نسمع لا لمحك لا مديتيلو يدك يرحم والديك منبعد كي نهدر ولا نتغشش تقولي مزير و تخنقني _خلاص ما هدرنا والو ،ولا هو فتح الباب و خرج و انا من وراه رجعت عند نساء وهو خرج عند رجال دخلت قعدت في نفس بلاصتي وهوما بداو يسقسيو تفاهمتو عجبك وانا غير نهز في راسي نشوف فيها ليوم راح نتغاشا من الحشمة قالتلهم بنت عمتو خلو طفلة حشمانة كليتوها باللاسئلة منبعد و يبان كلش نطقت ليا جداتو الله يبارك انا طفلة هادي دخلت خاطري هذا ما يليق برائد وربي يهنيكم و يسعدكم منبعد جبدت خاتم لبستهولي قاتلي باه يعرفو بلي راكي تاع رائد فرحتني و عجبني بزاف هوما زادو شوي و راحو خارجين وقفت معاهم خرجو بقات غير لعجوز تمشي بشوي خرجتها للباب لقيت رائد يستنى فيها شاف معاي و غمزلي ناضت تضحك جداتو منبعد قاتلو كاين كاين لخير عندك الهبرة واللحمة عندك واش تمس راه الخير مبزع ،هو ناض يضحك قالها غير جدة لي تفهمني ، انا فهمت و ما فهمتش قلت مستحيل لي في راسي كيفاه تهدر مع حفيدها هكاك بصح كي نتفكر هدرتها و حكاياتها لداخل نتوقعها منها عادي خلاص شفت معاه بنص عين تاع ومنبعد يرحمها ربي بقيتها على خير زدت سلمت عليها هيا راحت وانا دخلت قعدنا انا رفيدة عمتي و ماما نطقت عمتي قولولي برك اربي ملاحظتوش بين داك المرة هادي مرة فرق كبيييير قالتلها ماما كيفاه يعني _ قصدي على الڨسرة و الأجواء والله ما حسيت بالوقت كيفاه جاز حتى من طفل ظريف يهبل قلتلك من الاول بلي هداك راه كلب كبيير خوه خير عليه قولي ايه و عينيك مغمضين _ ربي يهنيهم ان شاء الله ،رفيدة هزي راسك شوي نهار كامل ونتي غارستو في تلفون بزاااف ولات نزلتو على جنب و بقينا نڨسرو منبعد نضت بدلت خبيت قاطو و غسلت ماعن و مسحت الصالون عمتي و بنتها روحو غير كملنا تعشينا ماما غسلت الماعن لقيت بنت عمتو عيطت عند ماما حكات شوي منبعد قالت كيفاه الأجواء تم راهي قابلة عجبها ولد خالي ،قلتلها في قلبي عاجبني من بكري ورانا قابلين قبل ما تجو ، قابلين ان شاء الله عجبها من كلش و نتوما كشما هدرلكم _ هو يا اختي أصلا قبل ما نروحو و هو قانع بيها كيفاه الله اعلم غير حور حور و تاني نسيت مقلناش بلي أمو اي فراش مقعدة مقدرتش تجي باه يكون في حسابكم _ اها علبالنا خلايا بعدا منقدروش ظروف نورمال هاي جداتو في مقام أمو و عمتو الله يبارك واقفين معاه ياو ربي يهنيهم برك و لباقي كامل ميهمش _ ايه والله عندك حق خلي مالا منبعد يهدر معاها هيا و يشوفو وكتاه خطبة _يرحمها ربي _برحمتو هيا تصبحي على خير و كوبات
بقات ماما تحكي معاي و انا عقلي بعيد كي شغل هدا وين فقت بلي راح نديرو خطوة رسمية و اذا كمل ربي وكتبلنا هذا هو البنادم لي راح نعيش معاه باقي حياتي بالمليحة و القبيحة منقدرش كي نقلق منو نطفي عليه تلفون ولا نبلوكيه لأنو نكونو واقع مش تمسخير تاع علاقات بزااااف حوايج راح يتبدلو ،ماما شافت فيا وقالت نتي منحكيش معاك خير تقول حيط ياربي ساعة و انا نهدر وحدي _راني معاك تهت برك شوي _ في واش راكي تخممي _ والو حياتي راح تولي سيريوو نزوج دار مسؤولية معرف راح نكون قدها ولالا _ كي تحطي عقلك في راسك و توزني تصرفاتك و قبل ما ديري حاجة تخمممي الف مرة مش تلوحي برك راح تكوني قدها و تفوتي لهيه علاه دار واش راح تهزي السماء صح تتبدل حياتك بصح توالفي كامل زوجنا وعادي مع الوقت تأقلمنا وحنا نحكيو دخل بابا قعد قال بلي خطبة منا على 20 يوم هيا و قطع الشرط _ وشمن 20 يوم ياو شهرين و ما يكفوش _ نتوما بوليتيك نتاع النساء انا منعرفلوش معرفتش اذا لقاطو و تسييقة للصالون يدو منكم 20 يوم كامل هاديك معلباليش _ وعلاه غير قاطو هادي خطبة لي سالي و قاطو و تحليات و قادر يجو مع الغداء طفلة ما شرات لا غوب لا والو _ نتي يا سعاد مهبولة بالخدمة _ كيفاه يجو يقولو و دار سعاد هكا و ماكلتها هكا هاديك وهاديك تعرف نساء فامهم مشركين يضحكولك في وجهك بصح غير يروحو لا قاطو يابس لعروسة تبان كبيرة على عمرها عمتها مبهدلة يماها متشردة صالون مغبر _ ههههه قلبك راه معمر منهم هادو مشركات الفم _منحبش يحكيو عليا هكا كلش يكون بالطبع _ هيا ملخر قابلين بعد 20 الخطبة باه نقولهم حور اهدري وشبيك ساكتة _انا معنديش مشكل بعد يوم ولا عشرين كيفكيف _ ايييه هكاك عندك حق مش يديك لي يخدمو ولا نقولك روح قولهم ايه و خلاص كيما جات خلي تجي خليتهم يكملو يهدرو و انا رحت للبيت طرحت روحي على السرير وبقيت نخمم هزيت تلفون حبيت نعيطلو بقيت نتفكر في لحظات صباح وهدراتو لقيت روحي حشمت يعني صح ميحشمش راجل هذا خلاص وليت بعتلو ميساج وينك رائد شوي هكا عاود بعتلي يا عيون رائد راني غير هنا علبالك هيئتك ملي روحت ماراحتش من عينيا _بعدااا لدرجة هادي _ مش حتا نهدر و نعبر كلش باين حقا واش قلتو على خطبة _قابلين _هيا مليح هكا أحسن مالا نخليك صحا منبعد _ان شاء الله وراح من يوم فات حتى جاااازو يامات بعدنا على نهار شوفة و قربنا لنهار الخطبة بقا غير يوم واحد محسيتش كامل باليامات كيفاه جازو و حنا نجريو منا ومنا رفيدة ساعات تجي تعاوني انا مع ماما يد في دنيا و يد في حلاوات وزيد كوموندينا لي سالي غدوة فليل خلاص نخدمو تحليات و بزاف حوايج نحطوهم وتاني نخرج نجيب لاغوب تاعي مهم تهنيت مبقاليش رحت حكمت بلاصتي حطيت راسي على مخدة نخمم في رائد معرف علاه تبدل 19 يوم هادو عيطلي غير 3مرات و حكينا قدقد لباقي غير مرانيش قاعد منقدرش نحكي راني مزروب معرفتش وين راه مشكل وقيل بطل و مش حابني و يدير هكا باه انا نكره و نبطل محوسها تجي من عندي هبطتلي دمعة يعني معجبتوش داك نهار حاسة بلي كاينة حاجة بصح وشنو هيا هزيت تلفون باه نبعتلو ميساج لقيتو كاتبلي يامثيرة الشفتين أغمضي عينيكِ واسقيني من خمر شفتيكِ ولو قطرة أُعطِر بها فمي وأُطفىء حرائق جنوني المشتعلة بكِ تبسمت وانا دمعة في عينيا حتا تسوفيج تاعو هذا توحشتو بعتلو رائد عيطلي شوي هكا ورد عليا منقدرش راني مشغول زدت فالبكاء وشبيه هذا يدير هكا كشما كاين راح نهبل منبعد تغكرت مور شوفة كي قلتلو خطبة بعد عشرين يوم و لعرس وكتاه قالي غير لعرس متحوسيش عليه وكتاه منقدرش درك خلاص حيرني كلامو هذا حاب نكون في دارو في اقرب وقت و منبعد يقول لعرس مكانش يهدر هدرات يبان يعشق التراب لي نمشي عليه بصح غير نحب نحكي معاه يجبد ويدير السبة يا ويلي واش راه مخبي عليا مرانيش مرتاحة خلاص من تصرفاتو خايفة نتغدر و علبالي مش راح نتخطى راح تبقى وجيعة تبع فيا طوول حياتي.....
حليت عينيا على صوت اذان الفجر تڨعدت في بلاصتي ياربي هداك هو نصلي و نفري اموراتي و نفطر و نسهل عند الحفافة توضيت و صليت وانا مزالني فوق سجادة لقيت لباب تفتح بشوي طلت عليا ماما هاه نضتي _ايه نضت قبيل _ مليح زعما جيت نوضك مالا كملي وانا نروح نوجدلكم الفطور _صحا ،ولات هيا خرجت وانا رحت نوضت رفيدة قلتلها تغسل و تلبس و تلحقني باه كي نخلصو نروحو برك و انا زدت شفت حوايج لي راح نديهم معاي للحفافة فاقدتهم باه ما ننسى والو و خرجت للكوزينة لقيت ماما حطتلي الحليب شربت زادت جات رفيدة فطرنا كملنا ماما راحت نوضت بابا وانا لحت عليا العباية برك و خيمار جا بابا فطر و قالنا هيا لكان نسهلوا لأنو انا حكمت دالتي عندها بكري باه نخلص و نجي ولينا خرجنا وصلنا لعندها لقيناها هداك وين تمسح في دنيا ماعندهاش بزاف ملي خلصت قعدنا شوي هكا وجات بدات معاي واش ديري واش ماديريش دارتلي مشطة سامبل و مكياج تاع عينين شارجي مع غوج نيود روعة عجبني زادت كملت ل رفيدة دارتلها حاجة خفيفة و كملنا عيطت لبابا جا داني طريق كامل وهو يتمسخر بيا يدور لرفيدة يقولها نتي مشفتيش حور وين راحت ياك ديتها معاك و علاه تجيبيلي في هادي مهم بقا هكاك حتى وصلنا للدار استقبلونا بالزغاريت ماما حضنتني زادت عمتي لقيت جيران تاعنا جاو داتني معاها للبيت بقات تقرا في القرآن ،ماما ياك كلش واجد و حاجة ما ناقصة _ اييه متخميش على توجاد كاين كلش درك ركحي روحك و كشما تحتاجي هاي معاك رفيدة ولا عيطيلي صحا، هيا راحت خرجت وانا بقيت نحسب في دقائق و ساعات وكتاه يفوت الوقت نعيط لرائد و نعاود ميهزش بصح غير نبعتلوا ميساج يكون معاي وصحا نعيط تقول داخل تحت الارض وليت بعتلوا ميساج على قداه تجو هكاك شوي هكا و ريبوندا عليا ساعتين و حاجة نجو واش راها ببونة تاعي _ متقوليش هكا غير بابا لي يعيطلي هكا وزيد كون جيت تسقسي و تحوس على حوالي راك تعرف واش حوالي _ معليش حبيبي نهار تعرفي ظروفي تقدريني _ وعلاه متخبرنيش باه منلومش عليك و ندير حسابي و نقدر ظروفك و منحاسبكش على الطالعة و النازلة _ حوور مش أي حاجة تتحكى انا مرانيش مرأة لي بالعة كاسات كل دقيقة ڨرڨرقر بالهدرة يجي وقت تعرفي كلش بقيت نشوف مع ميساج و نعاود وليت نزلت تلفون غايضتني لربي حسيت اني تسرعت في زواجي هذا و يعني هذا نعرفو مليح حتى نقبل بيه بلاك هدرة تاع صفية راح تخرج و راح نندم من درك مش حتى نوصل عندهم مرانيش حابة نبكي درك و يبقاو يسقسو فيا واش كاين بقيت قاعدة هكاك دمار طلعلي جابتنا ماما لغداء للشومبرة تغدينا كي قربت الوحدة و حاجة جابتلي رفيدة الغوب لبستها جاي في الغوز كلار مع صوندال و بوشات فضي ولبست الاكسسوارات تاعها و قعدت بقات رفيدة تصور فيا ديري بوزيسيون هكا زيدي هكا طلت علينا ماما كملتي الله يبارك ماشاء الله ربي يحميك بقات تقرا عليا و قاتلي ياك واجدة _ نوغمالمون واجدة بصح حاكمتني خلعة راح نطيح _ ان شاء الله خير اقراي برك اي وحدة تتخلع مش حاجة جديدة ،زادت شوي و خرجت وانا بقيت وحدي حتى سمعنا كلاكسون برا انا تم وليت نرجف صح قلبي راح يخرج ياربي حتى وقفت وليت ندور دخلت رفيدة ،راهم جاو وشبيك يا طفلة دوري اقعدي شوي _مقدرتش ولات حكمتني قعدتني و تركح فيا و هيا شابعة عليا ضحك منبعد قاتلي انا نروح درك شوي يبداو يسربيو و يوكلو فيهم قلتلها روحي قعدو نسمع في الحس تاع الناس و الاولاد دايرين رايهم وانا نطل بشوي من باب نتوقب عليهم نشوف في ماما و نسا عمومي رايحين جايين و هازين في يديهم و يسربيو وقيل حتى نشوف في وحدة خارجة من صالون و جاية عندي رحت نجري قعدت في بلاصتي شوي هكا و طبطب قلتلها ادخلي ، حلت لباب لقيتها بنت عمتو شافتني ولات تزغرت جات سلمت عليا واش راهي عروستنا ضحكت معاها من الحشمة مقدرتش نجاوب والله لباس ونتي ، وشبييك حشمانة هههه هادي غير خطبة ارواح ارائد تشوف مرتك راهي ماتت بالحشمة وحنا هكاك نسمعو في الزغاريت برا دارت حالة شفت معاها تاع واش كاين _ صاي راكي وليتي مرتو شرعا _ وشنوو هزو الفاتحة _ ايه علاه معلبالكش _ والله ما علبالي _ مالا رائد المزروب ما خبركش _ لا منحكيش معاه أصلا كي قلتلها هكاك ولات ناضت _مالا انا نخليك على راحتك حتى يجي يخرجك و العجوزة برا اي تسنى فيك من نهار شافتك و هيا مرت رائد ديتيلها عقلها _ ههههه مام انا حبيتها أيا منبعد أن شاء الله راحت هيا و انا لغمة زادتني كيفاه هذا فتح عليا وانا آخر من يعلم وشنو العقلية هادي سما صح عينو يملكني نبقى تاعو بصح حاجة خلاف مفهمتش وشنو هيا سمعت لباب يطبطب قلت بغش ادخخل لقيتو فتح لباب و دخل وردو وراه وشبيه الزين مغشش _ منك نتا _ واش درتلك انا _ كيفاه ليوم فاتحة وانا معلباليش _ وعلاه تهدري بشنايفك وانا فرحان لي وليتي مرتي صاي _ رااائد _ عييون رائد _ يارائد حبس ما دير هكا ،قرب ليا و هز صبعو يمشيه على وجهي ،واش ندير مادرت والو نتي لي تغلي وحدك _صااار كي فتحت عليا وانا معلباليش وليت نغلي وحدي _ توحشتك ، كي قال هكاك رجليا رعشو _ رائد ما تبدلش الهدرة و زيد كون توحشتني راك تسقسي عليا مش راميني في الثقيل وانا نجري من وراك كي الكلبة _ حاشى وشنو الهدرة هادي _ علاه كذبت مفهمتش وشنو الغاية تاعك زعما انو حتى طيحني فيك وتجبد روحك _ شوفي حور نهدرلك و هنا نقصو لحكاية بعد اولا انا مرانيش ذراري حتى نلعب معاك تاع ندير روحي نحبك و نطيحك فيا منبعد نخليك و نحطك بالثقيل هذا التمسخير خاطيني كون معينيش فيك ما ندورش أصلا بيك و مانجري وراك ما نحوس عليك مالا علاه راك هارب مني ولا وليت مش عاجبتك لكان راح تبقى هكا نحبسو درك خير من تكبر الامور اكثر _ تمسخري بيا علبالك حنا وين رانا ياو في الخطبة و يستناو فيا ندخل و نجيبك وزيد مفتحين راكي مرتي شرعا شوفي لحكايات وربيش في المشاكل وين وصلنا هيا حوور هاتي يدك و طيشي عليك تخمام زايد في حوايج تافهين و مكانش منهم هيااا ناس يستناو بقيت نشوف معاه منبعد مديتلو يدي وقفت ولا قرب لوذني و همس مقالولكش بلي جيتي فتنة _ ههه رائدد لوكان يصرا واش يصرا لعادات تاعك متنساهمش _ سامحيني بصح كي نشوفك منقدرش ما نتغزلش بيك و هيا نروحو كروشيتو منبعد فتح لباب لقيت لغاشي يصور شعلو الغناء تقول كنت في بلاصة و رحت لبلاصة خلاف حنا نمشيو و هوما يزغرتو دخلنا لصالون لقيت جداتو قاعدة في بلاصتنا سلمت عليها قعدنا منبعد دخلوا لابياس و jus مدتلوا بنت عمتو لابواط تاع لخاتم و شعلوا الغنية enfin ديت شاتمنيت غير انا هيا و زغاريت نديرو لاباڨ و ياعمري نتعاهدوا على هموم الدنيا انيا نتاحدوا مبروك مبروك علينا صايي صايي تهنينا صافي بليزير فرحنا والدينا فالحلال ياعمري انيا تلاقينا ،حكملي يدي وانا نرعش لبسلي الخاتم ولات ماما نغزتي على جنبي و مدتلي خاتم تاعو زدت ليستهولو حطولنا لابياس حكمت لموس و حط يدو على تاعي و قطعناها مدولنا طرف كليناه كيفيكف و زدنا شربنا jus دوحنا شوي و شطحنا مع الغاشي فاتت روعة منبعد هو واقف قربت ليه بنت عمتو تحكي معاه وانا تهت فيه كوستيم كيفاه واتاه و لحية مطراسية اه نموت على الراجل السمر خيير من خوه روجي دور ليا قالي كون تبقاي تشوفي معاي هك نهزك و نهرب بيك نضت نضحك يتوله لكلش حاجة ما تفوت عليه ولا هو خرج و انا بقيت قاعدة معاهم جداه تسلم و تعاود نلقاها مدتلي دراهم قلتلها خلي _ لا احكمي بركة كيفاه ترديني حشومة عليك سلمت على راسها _ كتر خيرك وربي يخليك ديما هكا واقفة عليهم _ ان شاء الله يا بنتي ، نشوف مع الغاشي لي يشطح لي ياكل وكاين لي قاعد كل واحد كيفاه حتى لقيتهم يقولو هيا تلبسو ام رجال يعيطو عليكم باه تروحو وقفو لقيت عبلة بنت عمتو جات عندي قالك ارواحي دقيقة نستحقك او قدام للكوزينة و قالك لوحي عليك حاجة فوق راسك _ يتمسخر بيا هذا كيفاه نلوح حاجة عليا مكان والو اعطيني خيمارك ديتو عليها و خرجت ليه لقيتو واقفة و مقابلني بظهرو ،راائد ،دور ليا ازربي ارواحي قبل لا يلمحك كاش واحد رحت ليه وشبيك كشما استحقيت _ استحقيتك نتي حاب يخلص كلش و نزوجو ونديك و نهرب بيك _ راني ليييك رائد_ متقوليش كيما هكا تزيدي على مابيا ان شاء الله كي ليوم و تكوني دوري في داري _ ان شاء الله يارب نلقاه جبد بواط صغيرة تاع سنسلة مكتوب فيها رائد شفت معاه _ وكي عاد مكتوب فيها رائد انا واش ندير بيها _ دوريها على جنب ، وليت دورتها لقيت مكتوبة حوور _ هادي باه يبقى اسمي مربوط بإسمك و جامي يتفارقو و هاتي نلبسهالك نحيت خيمار و هو جا من وراي و لبسهالي و باسني على رقبتي جبدت روحي ، وشبيك نتا هبلت وكون شافوك _ واحد ما كاين متخاافيش _ راااائد خليني من التهور هذا تاعك والله يخلعني ،ناض يضحك هيا درك انا نخليك اتهلايلي في روحك بزاااف و حور مش معنتها كي منهزش عليك ولا منقعدش راني نكهرك ولا نجرجر فيك نحي الهدرة هادي من بالك انا نحبك لا مش نحبك نعشقك من نهار شفتك و شي لي حبيت نوصلو انو تكوني حلالي و راكي وليتي حلالي وزيد تكوني في داري ان شاء الله صحا حوور تفاهمنا _ ايه تفاهمنا _ هيا مالا نروح برك ولا هو خرج دخلت لقيت بنت عمتو مزالت واقفة مع ماما مديتلها خيمار تاعها و سلمت عليا و خرجت رحت قعدت هكاك فوق فوتاي نسمع فيهم زادو روبلوها وهوما مروحين جوارين كامل طلو عليهم رفيدة و بنات جيران لي جاو في بالكون يطلو و يكحلو عليهم دخلت رفيدة تجري يااا حوور اخرجي تشوفي هادي خطبة مالا العرس كيفاه ادعيلي ندي صاحبو ديريلي لافار الله يسهل عليك _ شكون صاحبو هذا انا رائد و قريب ما نعرفوش يا حتى صحابو والله كون نهدر قدامو ياخدني يقول اي بلاك مالفة تشوف فيهم نهار نضخاس عليه شوي و يرحمها ربي نديرلك لافار و نزوجك نتي تاني خير ما تقعدي تزنقي _ صحححح والله نحبك _ هههه كي عادت في الزواج تحبيني معليش _ لا مش هكاك _ روحي برك راني نتمسخر هيا هاتي يدك خليني نوض لاغوب هادي مخلاتنيش نتحرك ،نوضتني منبعد قاتلي اصبري سع راحت جابت كاميرا ،تعمن هادي يا مخلوقة _ تاع ولد عمي هههه ديتهالو اقعدي اقعدي نصورك راني حطيت كارت ميموار فيها _ اسمعي ياك ميبقاش هنا تصاور عند راجل مديريليش مشاكل ياخاه _ علاه هبلت راني علبالي ونزيد نفيريفي قبل ما نرجعهالو مهم اي ديري ليبوزيسيون تعرفي كان في خاطري قبيل نصورك مع رائد _ هاو صورو ناس واش تزيدي _ لالا هكا وحدكم _ يعني متركبيهاليش نورمال اي فاتت _ ما نورمالش كل لحظة و حلاوتها لازم تبقى معاك نقولك حاجة روحي عيطيلو يجي _وشنوو صوري صوري و بلعي قاتلك نعيطلو هادي في التاريخ ماصراتش _ واش فيها ياربي برك قوليلي راهو جارك لفوق زوج خطوات يكون عندك وزيد راكي مرتو _ عيييب ياخاه راح و يعاود يرجع علاواه هذا باه يصور والله يديرونا مضحكة ناس _ نتوما هكا ديما تخممو في ناس حنا عباد ضيعنا بزاف حوايج بسبة ااا نظرة المجتمع و كيفاه يشوفنا انا من عندي كي نعود ما نديرش حاجة حرام مايهمنيش نهار لي ولينا نقدمو عيب على حرام خلات الدنيا _ سما راكي تقنعي فيا ولا وشنو مفهمتش _ انا قلتلك برك و نتي دبري راسك تعاودي تعيطيلو يجي و ديرو تصاور هبال ولا نصورك وحدك نورمال وين راه المشكلة بقيت نشوف معاها قلتلها هاتي تلفون ،ناضت تسوطي _ بالعقل وشبيك تقول راجلك لي راه جاي نندب عليك كي دير _ اسكتي برك هاكي تلفون و عندك تتعڨني كي تحكي معاه ، عيطتلو مرة لولة و زدت مرة ثانية وليت هزيت الو رائد _ يا عيون رائد _هههه متحشمنيش حبيت نقولك لكان تقدر تجي عندي درك _ علاه هذا توحشتيني ليه ليه _ سامط هذا نحوس نصورو قبيل مصورناش و كيفاه يوم كيما هذا منديروش تصاور ب ديبوزيسيون ملاح _ وشمن بوزيسيون _ راااائد خلاص انا غالطة لي عيطلتك __ ههههه صاي راني جاي بصح ياك داركم علباللهم باه ميصراش سوء تفاهم _ هيه علبالهم مالا راني نستنى فيك و كوبيت نمروح على وجهي نطقت ليا رفيدة نتي ديما هكا كل ما يحكي معاك _ كيفاه يعني _ يلوح كلمات يخي وجهك كيما راه درك _ ايه ديما هكا _ نمووت على راجل لي كيما هكا _ موووتي نشوف فيك نتي راكي سريعة الالتهاب كتر منو وشبيك يا مخلوقة حقا ويني ماما _ اي في الكوزينة _ مالا عيطيلها تجي نحكي معاها بلي راه جاي خير من يصرا تبهديل ،راحت هيا عيطتلها جات ، واش كاين _ ماما او جاي رائد _ علاه هذا غير لخير _ والو راح نصورو برك _ نتي لي عيطتيلو _ ايه نورمال ياك _ وجه تبهديل جايحة _ علاه عييب ولا حرام _ مقلت والو بصح جايحة هذا ما نقولك _ خليني برك _ راكي مخلية انا نقول لباباك لا يزيد يجي سيد و يحسبو مقدرش يصبر عليك وجا يديك معرف منين تخرجي بهاد الخرجات _ خاطيني و خزرت في رفيدة شافت معاي رفيدة و هزت يديها انا اقترحت برك يا طاطا سعاد اقترااااح هيا قالت ايييه معندو ما دخلني كانت قادرة ترفض بصح وقيل توحشت راجلها _ قالتلها ماما هكا ظاهرلي انا تاني و راحت خرجت تعيط لبابا ، شوفي يارفيدة تقول نهزك ونخبطك بعد جيتي ضدي في دورة بعد _ ما قلت والو يا اختي هاه راني قفلت _ عندك حق لحتي بومبة و درك تسكتي ،بقيت نستنى ربع ساعة لقيت ماما دخلت قالتلو هاهي لالة تستنى محوسة تصور ولا. معرف عليها و شافت معاي كنت فوق فوتاي طالقة روحي زربت نضت ولات خرجت و رفيدة لبست خيمار و جات قرب ليا قبل ما يهدر ولا يدير اي حاجة قلتلو عنددك تتصرف هكا ولا هكا بنت عمتي اي معانا تعييش _ ههه وليتي تخافي من تصرفاتي لدرجة هادي كونك هانية راني عاقل ولات هيا تقولنا ديرو يديكم هكا زيدو هكا مهم درنا تصاور هبال حتى كاميرا كاليتي تاعها تقتل صورة لخرة حط راسو في رقبتي و يدي انا على كرشي و يدو فوقها هيا صورت و خلصت و انا نقولو رائد خلاص وقيل رقدت هيا ، ولا هز راسو دوختني ريحتك يابنتي _ متقوليش يابنتي نكرها كلمة غير بابا يقولي هكا _ صحا يابنتي _ شوف شوف كيفاه يدير _ خلاص كملت المهمة تاعي خلصنا _ ايه خلاص _ نوغمالمون ندي كادو حق ما جبتيني و شنشفتيني بالتصاور و انا نتعوج ،دورت شفت مع رفيدة كانت مهبطة راسها و تشوف مع كاميرا في تصاور بصح كان علبالي بلي راهي تسمع _ رائد باي باي هيا _ راكم تشوفو فيها تحاوز فيا _ ايه نحاوز فيييك باي مرة خلاف ان شاء الله _هههه معليش اشفاي عليهاا ولا هو خرج علبالي من نظرة تاعو هاديك او مخو مسوفج نتوقع منو اي حاجة و زيد قدامها والله عيب طليت عليه من طاقة طلع راسو دارلي بيدو ادخلي وليت دخلت و رحت للشومبرة تاعي قلت ل رفيدة تجي معاي تعاوني نحي عليا جات نحيتها و هيا جبدتها من فوق قلبتها و خبيتها باه متتوسخش منبعد ربعت في الارض و بديت نفك في شعري و رفيدة تنحيلي في مساسك و تغني _ اسكتي صرعتيني بداك الصوت _ يا ويلي تاع وجهك نغنليك هاتي راسك هنا نكملك ولات نحاتلي و شعري عييت نسلكو والو مخبل في بعضاه تقول سلك حكيت سيروم مفادش قاتلي رفيدة ادخلي دوشي و حطي عليه ابري شومبوان بلاك يتسلك _ والله ماراني قادرة بلاك نقص هادو مخبلين نورمال ام لداخل ميبانوش _ باه تولي فرطاسة و شعرك فارغ من داخل جيبي سلاكة صغيرة خلاه درك بشوي نفتحهولك بقات معاه وانا نبكي قلب ورب باه فتحتو _ ياخاه طفلة شرڨت بالبكاء _ وجعني مقدرتش _ اااا نتي فراجيل و راح تزوجي زعما تقدري على زواج _ جا مكتوبي زوجت نهار نروح عندو و نشوف اذا راح نقدر و نتحمل أني قاعدة اذا مقدرتش نرجع _ كيفاه ترجعي مفهمنش _ نطلق _ نندب عليييك بعيد الشر وشنو الكلام هذا علاه ارواح و طلق حسابلك سعاد راح تخليك تطلقي والله تخرجهالك على عينيك تعرفي كيفاه ناس تاعنا كي يشوفو وحدة مطلقة تكوني نورمال يحكو معاك غير يقولو اا هاديك لي كنتو تحكو معاها مطلقة تم تم يولو يبلڨو في عينيهم عندك حاولي قد ما تقدري تتجني الطلاق _ تأمني والله ما يهمني فيهم لأنو انا لي نكون نعاني مش هوما مادام وصلت لدرجة هاديك يعني راني نضريت صح ومنبعد قصدك انا في حالة يرثى لها نقول خلي برك نلم داري وولادي مجتمع ميحبش المطلقة ياو طز فيهم اول حاجة راحتي و سعادتي و لباقي ميهمنيش _ شوف شوف حنا واش رانا نهدرو على الطلاق في الخطبة بسم الله الرحمان الرحيم حووور خلينا من السيرة هادي بصح كلامك راني معاك الف بالمية انا مديت وجهة نظرة و نتي تاني مديتي و لزوج صحاح بصح تاعي كاينة و تاعك قليييل وين راها كاينة هذا مكان ، ايه صح خليني من هدرة هادي نضت لبست قندورة و شعري لميتو برك أصلا جلدة تاع راسي راح طير خليت رفيدة مع تلفون و خرجت لقيت ماما مع عمتي في كوزينة يتوانسو ومعاهم عجوزة جارتنا كبيرة حكمتها ماما للعشاء ديما هكا مناسباتنا دنيا فارغة سيرتو دارنا اه برك شافت معاي ماما هاه نحيتي عليك ديك صاشية تهنيتي تغميت في بلاصتك بيها _ كيفاه ا ماما صاشية علبالك شحال صارفة عليها _ ااا هاديك الله يسهل معرف عليكم جيل هذا كيدايرين مهم دراهمك صرفتيهم ها ظفار ها شفار ها صوندال قلتلها ياو عندك صباط في فضي قاتلي لالا ستيل تاع هاد لغوب يخرج عليه غير لي صوندال ياه نندب و حنا بكري لي جا في طريق نلبسوه يا لوكان صباط جدة _ ماما هادي حصة فضائح ولا وشنو مهم جيت نقولك وشنو لعشاء _ بطاطا طايبة _ نكرها علاه _ مووتي طبڨي على يديك _ بصح راني نشوف في الكسكاس _ جيتيني تتمهبلي وقيل حور كيفاه ليوم ندير بطاطا نعرض المراة على زوج حبات بطاطا بالمرڨة درت شخشوخة باللحم _ صحيييتي بصح كون بالجاج خير مي معليش جعت _ روحي هزي صالون راهو اقلب يقعد ياربي _ راني عروووسة _ تعرويس كمليه في صالون يالله ، مشيت لصالون أصلا نحب نتمسخر معاها برك لكان على الخدمة اي راجعة راجعة ليا ماما منحبش نخدمها بزاف لأنو راح يجي نهار و نروح و كلش يرجع ليها وحدها جبت لي بواط تاع لقاطو خبيت فيهم واش بقا من لحبات لملاح بصح قريب بكيت كي شفت حبة معضوضة برك و حبة منحيلها شيكولة تشوفي تعب تاعك قدامك شنشفوه ههه كملت هزيت سنية تاع نحاس تعنا خبيتو و تاع جارتنا حطيتو قدام لباب كي تخرج تلقاه و تسياق خليتو لغدوة ميكونش لغاشي و نصب الماء في الدنيا كامل و نجبد براحتي كي كملت رحت عند رفيدة قلتلها تمدلي لاكارت ميموار نحطها في تلفوني مدتهالي وليت حكمت بلاصتي و جبت حبيبات قاطو و نتفرج ف لي فوطو لي صورنا و فيديوات تاع الخطبة سيرتو تصاور عجبوني ندور و نعاود نرجع نكبر على وجه رائد و نتفرج حتى نلقى رفيدة نطقت وشبيك نتي راجل قريب تعميه تفصيلة تاع وجهو حفظتيها واش تزيدي _ خليني راجلي حلالي نشلل عينيا بشوفتو نورمال _ ماهدرنا والو بصح راكي باينة ذايبة في الحب بهدرلك زوج كلمات تروحي فيها كون جيتي متحبيهش غير يبدا يتغزل بيك تقولي اعععع واش يهدر هذا صح ولا راني غالطة _ ايه صح بصح نحشم خاطر رائد راهو مش يهدر كلمات ياو كلماااااات خطيرين فيهم قنبلة كارثة _ ينخاف منو على هادي قلتلك يعجبني راجل لي كيما هكا باينة صاحبو كيفو _ همممم مالاعحبك رائد _ ايييه بزاف بصح متفهمنيش غالط عندك يروح بالك بعيد والله راني نهدر بحسن نية _ ميهمش درك راني مرتو كيما تهدري تهدري علبالي عينك في صاحبو هدا لي انا أصلا جامي شفتو _ ايه والله لا عجبني بزاف حبيتك تكوني واسطة _ يرحمها ربي خليك من تمسخير تاعك و رزاني نقول لرائد عليه بصح كون يعوجلي خلقتي راكي نتي تتحملي مسؤولية _ايه كونك هانية _ بصح ياربي قوليلي برك وين شفتيه كيفاه قاعد والله حسابلي ما عندو صحبة _ يا حبيبتي هدا صاحبو روح في الروح من بكري حسام عشقي و غرامي _ اهاه بعدا عشقتي خلاص _ اصبري اصبري شوفي كيفاه قاعد جبدت تلفون و نعتتلي و صح كانو متصورين رائد و هذا صاحبو حسام كيما قالت لعشية هادي بعد باسكو رائد بالكوستيم و كاتبلو صاحبو ربي يهنيك خويا لعزيز شفت معاها والله اول مرة نسمعها منك بصح انا تاني نساير فيك علاه رائد نعرفو هذا عوام و سنين أصلا معنديش بزاف ملي عرفتو حتى هدرة منهدروش كي الناس خلاص قليييل وين حياتو كيفاه عايشة معلباليش _ ايه سينورمال مع الوقت تعرفي و تكرهي _ علاه نكره _ تهدري بزااف حور لا ، دخلت علينا ماما وشبيكم توتوتو مدخلين ريسانكم في بعض هيا امشيو تتعشاو او وجد نضت نجرررري ميتة بالشر حطتلنا في صالون و بابا راح يدي لراجل عمتي الماكلة و يجي و حطتلو في كوزينة وحدو وانا وعمتي و رفيدة و ماما و جارتنا قعدنا في طابلة تاع صالون تعشينا خلصنا نطقت ليا جارتي قاتلي نتي هذا لي داك تاع عائلة هاديك يخي مزوج ولا راني غالطة كي قالت هكا ماكلة حصلتلي حتى سعلة معرفتش نسعل وقفت وجهي ولا قطرة دم مافيهش ،شكووون هذا لي مزوج قوليلييي من وكتاااه مزوج ماما شوفي معاها واش راهي تهدر و كون مزوج علاه ما نسمعش _ يا بنتي وشبيك انا سمعت برك بلي من بكري سي فلان مدي زوج نسا ، قالت ماما راهي على باباه ياو على اب رائد و حكمتني حوور وشبيك ديري هكا ياخاه طفلة ماتت و حيات اتنفسي وشبيك رفيدة مديلي كاس ماء ابنتي وليت قعدت تم فوق فوتاي و شربت كاس ماء يديا يرعشو انا صاي فهمت بلي راهي تقصد باباه بصح جسمي مقدرتش نتحكم في تصرفاتو نرعش كامل يا خلايا هذا غلطت برك في الهدرة و قالت مزوج و كون تكون صح ولا مرة خلاف يزوج وقيل يسوطيلي عرڨ اقسم بالله مانزيد نهار خايفة يجي هكا نهار نتدفن حية ومانشوف لي نحبو مزوج بقات ماما تشوف معاي حوور نوضي روحي لبيتك وشبيهم حوالك تقلبو يا طفلة ركحي روحك و اتنفسي مكان والو قاتلي جارتنا لكان صرالك هكا من كلامي سامحيني يا بنتي مكنتش نقصد بلاك معرفتش كيفاه نهدر _ لا مش نتي انا لي مستوعبتش مليح و تخلعت هكاك برك بلا سبة وليت وقفت و رحت للبيت طفيت الضو عليا و دخلت تحت درا كلمة او مزوج تتعاود في وذني افففف وشبيا انا درك نبقا حاكمة على هاد الكلمة حتى قلقت من روحي كترت عليها بزاف و زدت فيها بصح لا إراديا معلباليش وعلاه لقيت رفيدة طلت عليا ،رقدتي بعد _ مزال طفيت برك عليا الضو باه نركح ادخلي لكان تقعدي _ لا رانا مروحين درك شوي يوصلنا باباك حقا لاكارت ميموار تاعي راهي عندك هاتي تلفون نبعتلك تصاور _ هاكي ابعتي كلش ماتنساي والو مديتلها تلفون خليتها تبعت كلش و نهار نزيد عليهم تاع عقود و لعرس نروح نخرجهم كامل و ندير البوم خلصت نلقاها مدتلي تلفون هاااكي او بعتلك حبيب القلب ههه و قاتلي هيا انا مالا نخليك سلمت عليا و راحت هزيت تلفون نشوف معاه بعتلي يا عيون رائد ويينك راكي بالغوب هاديك تشطحي و تمرحي في قلبي ههه _ اني هنا كنت نتعشا برك يا قلب حوور _ ههه اهاه بالشوي علينا لالا تطور ملحوظ _ ممم راني نحاول نعبر على جاالتك _ منحوسكش تحاولي تعبري متهدريليش كلام معسول على روحك نحبك نهار تحسي بكلام تاع الصح تولي تخرجي فيه بلا ما تحسي مش تحاولي باه تقوليه _ عندك حق محوسة نوصل للحظة لي نولي نهدر فيها بلا ما نحس وتاني بلا ما نحبس _حوور راكي وحدك نعيطلك ، فررحت و اخيرا حن قلبو عليا _ ايه راني وحدي عيطلي _تم تم عيطلي اول مرة من نهار عرفتو حكينا قدقد حتى نلقاه قالي حوور حبيت نسقسيك بصح اعرفي اذا سؤالي احرجك ولا قلقك متجاوبينيش عادي _ ايه سقسي و نشوف خوفتني بهدرتك وشمن سؤال هذا _ لا هو هادي بصح على حسابك نتي كيفاه راح يأثر راح نقولك برك على خوالك و لافامي تاع أمك جامي شفتهم و محظرو لا شوفة ولا خطبة و مالقيتهمش مام في فاتحة علاه _ ملقيتهمش و عمرك ماراح تلقاهم تعييش متزيدش تجبدلي على هادي سيرة تاع خوالي هادي نقطة كحلة في حياتي _ ايه أكيد كيما تحبي راني قلتلك حاجة كي تكوني مكيش مرتاحة و نتي تحكي فيها عادي راحتك أهم __ ايه خليني من سيرة هادي أمك واش حوالها حابة نشوفها بقات غير هيا متعرفتش عليها _ مام هيا متسخايليش شحال حابة تعرفك عيييت فيها نجيبها في الخطبة و الشوفة محبتش _ تمنيت تجي بصح راحتها اولى وربي يشفيها _ ان شاء الله _ حوور وليتي مرتي علبالك مرانيش مصدق _ علاه متصدقش صدق و عاود _ تمنيت و سعيت ووصلت _ حقا رائد نسقسيك علبالي حاجة تافهة بصح قولي برك نتوما في العسكر صح فرماج لي يجيبوهولكم بنين لدرجة هاديك ؟_ وشنوووو العسكر بصح انا معڨبتش لارمي _ بركا بلا تمهبيل قصدي خدمتك درك _ حوور انا واش نخدم _ جونداغم _ شكون قالك _ عمتي لي هدرت قالت ولد لمرأة ثانية حورية يخدم جدارمي _ شكون هذا لي راه يخلط عليكم و هدرلكم هدرة كيما هادي _ معلباليش قالولي هكا و زيد نتا لي متحكيلي والو _ سقسي باباك درك يقولك واش نخدم او علبالو بكلش _ قولي نتا برك _ معليش خلي تعرفي من باباك مهم انا نخليك راح نطفى و غدوة مش ڨاعد على جال كون تعيطيلي ولا منقدرش نحكي متقوليش بلي وشبيه و تبداي طلعي في حسابات وحدك و تكرهني و راح طيشني ومعرف وشنو خليك من الهدرة هادي اني قلتلك بلي بلاك منقعدش و لكان قعدت راني نبعتلك ميساج صحا حبيبي _ صحا تصبح على خير _ ونتي بخير ماتنحيش سنسلة من رقبتك مهما صرا حور _ أكيييد راح تبقى في رقبتي و مدخلتها داخل جيهة قلبي _ جيهة وشنو فوق واش _ رائد تصبح بخير _ هههه ونتي بخير و كوبيت ،ياخاه راني بديت نطيح في حاجة وسمها رائد و نطيح في الحب ياك راجلي وحلالي نورمال الصح كامل درك اذا يستاهل لحب و التضحية ولالا معليش مع الوقت و نشوف نضت خرجت طليت على ماما لقيتها طارحة روحها و حاطة وسادة تحت رجليها مطلعتهم غير توقف و طول يتنفخو شافت معاي منبعد عاودت غمضت عينيها ، ماما نجيبلك زيت ندهنلك و نديرلك ماساج _ والله كون ديريها تربحي راني مدڨدڨةوليت رحت جبت زيت حطيت شوي في يديا و بديت نمسد في رجليها ظهرها حتى نطلع مع كتافها و نطرطق في عظامها و هيا تقولي زيدي زيدي بلاصة هاديك راها ضارتني حتى كملتلها ولات هيا راحت للبيت تاعها ترقد و انا غسلت يديا توضيت و صليت جا بابا قعدت معاه شوي حكينا و ضحكنا تفكرت حكاية خدمت رائد قلتلو بابا نسقسيك نتا رائد واش يخدم _ علاه معلبالكش _ يابابا وانا وين راح نعرف معندي كيفاه _ يخدم في اونتر بريز تاع ليكتروميناجي _ واش بالضبظ _ مش حاجة كبيرة حاكم شوروم من تحت بصح يخدم في مركز لي هيا في ولاية هاديك و فروع تاعها راهم في شحالل من ولاية صح مش خدمة الله الله ولا سلاكها مليح مهم حلالية و نظيفة و مفيهاش تعب بزاف عيشة كريمة و خلاص _ ااا صار وشمن شركة هادي معروفة كوندور ولا ايريس ولا الجي _ ههه يابنتي وانا وين علبالي علاه انا حكمتو كيما مدايرتلي نتي درك و نسقسي و نعاود انا قلتلو اذا عندك خدمة ستابل تقدر تعيش بيها بنتي قالي واش قلتلك بالحرف راني نخدم في شركة تاع ليكتروميناجي بصح مش حاجة كبيرة غير أمن برك تاع شوروم هدا مكان _ ميهمش لمهم كيما قلت يا بابا حلال و باين مصدر تاعها منين _ يعطيك الصحة و تاني ميكونش بخييل لأنو واحد بخيل مستحيل تعيشي مهما تعيياي تحملي راح يجي نهار و تكرهي _ ايه صح مع الوقت نشوفو كلش _ يرحمها ربي امشي بالنية برك ربي ميخيبكش اهيه وين راحت أمك _ قبل لا تدخل نتا راحت ترقد غلبت _ اييه بزاف وقفت ليوم مالا يا لببونة انا نرقد برك تصبحي بخير _ ونتا بخير نضت بستو بابا هو عينيا منقدرش نستخايل حياتي بلا بيه من نهار حليت عينيا مالقيت غير دلال و تفشاش من عندو ماما تقولو راك تفسد في الطفلة و تخرجلك علة و هو يقولها لا علبالي بتربيتي كيفاه و صح خرجت على قد ثقتو و كتر ولا نهار درتلو تبهديل ولا خرجت مع ذراري من قرايتي لدار و لعكس و نهار لي سوتنيت وليت محجوبة في دار سيرتو كي تعلمت خياطة و اتقنتها ملييح وليت غير دار نعاون ماما و مينداك نخرجو لسوڨ ولا يدينا بابا يحوس بينا هدا مكان حياتي بسيطة خلاص وحيدة والديا عايشة هانية بيناتهم مشكل لوحيد لحد.الان نعتبارو كبيير هو فضيحة لي دارتهالي صفية رغم اني انا مش بيدي و محبيتش شي هذا يصرا رائد لي كان يضغظ عليا و يزير و خوفني و علبالي و متأكدة بلي خاطيني معنديش ذنب في واش صرا ربي وكيلها ساعة هادي من ضربة هاديك مبانتش خايفة تخرجلي بخرجة واعرة تنسيني في كلش و تندمني على النهار لي عرفتها فيه
