بقلم جيهان
جبت يومين فراش ما ناكل ما نشرب نوض غير ل توالات تالمون كنت محطمة الوقت لي لازم نحكم في صلاتي انا زدت فرطت فيها اكثر و بعدي على ربي زاد عليا حسيت روحي وحيدة بابا يجي يحاولني هيا حوور كولي غير لقمة هادي راكي شفتي طبيب واش قالك راكي ناقصة تغدية وبلا لانيمي لي من قبل هالكتك يبقى يحاول حتى حشمت على روحي رغم اني مدرت والو بصح عينيا مقدرتش نهزهم فيه كي يحتم نولي ناكل هادوك زوج مغارف باه يولي يروح ماما كي نكون فاطنة متجيش عندي خلاص غير نرقد تكون فوق راسي حتى طلع صباح و هيا تمسح و تبكي و تحكي ،كي خرج بابا و قفل وراه لباب طلعت راسي حسيت كي شغل لاماس ضربت فيه لقيت صاشي تاع دواء قدامي شربت تاع الراس حوست على تلفوني لقيتو مطايش قدام لخزانة كيما نزلتو آخر مرة كي بعت ميساج لرائد وانا قاعدة تم نضت ليه هزيتو شعلتو تمنيت اني نلقى ميساج ولا حتى رد ولا شافو برك وااالللو عاودت بعتلو صحيت درت رايك منبعد خليتني نطايش في سبيطارات و راسي منهزوش باليومين هادي هيا رجلة لي تحكي عليها كذاب و منافق تفوووه على اشكالك ونزلت تلفون حطيت راسي بعد ركحلي سطر استحليتها حتى رقدت غدوة صباح لقيت بابا ينوض فيا هيا حوور تفطري و نديك دوري شوي _مرانيش قادرة _ لا بزاف عليك الفراش علبالك بلي يجبد و يخليك فيه هيا والله درك تنوضي متكسريش كلمتي _ وليت نضت معاه فطرت وهو يحتم عليا بسيف كملت شربت دواء و بابا راح يخرج طاكسي و قالي نلحقو هزيت تلفون لقيتو يفيبري شفت معاه رائد نضت نضحك حتى تمرمدت وطحت و نضت و تبهدلت راك تعيط بصح معليش نشوفو وين راك حاب توصل هزيت _حوور وشبيك وكتاه مرضتي واش صرا _ وعلاه تحوس عليا درك عندك حق درت رايك و هربتي _ وشمن درت رايي صح كنت متغشش منك بصح والله غير كنت خدام و مرانيش تم خلاص في ولاية خلاف _ ايه مالا نتا رحت منا و مرت باباك جات دارت رايها وصلتني لسبيطار و فضحتني و هذا كامل بسبتك نتا من نهار دخلت حياتي قلبتها كنت عايشة لباس بيا براسي _ متهدرييش هكا والله واش درت كامل من حبي ليك و خوفي يديك واحد خلاف _ نعلبو الحب لي كيما هكا منسحقوش مرمدني خليه ليك ان شاء الله ربي يبعدني عليك بعد السماء على الارض و كوبيت عليه و هبطت لبابا ركبنا داني دورني في الحديقة قعدنا شرالي ماكلة ضحكنا و ڨسرنا عرفت بلي راجل هدا لي قدامي ميستاهلش اني نخلي ناس تحكي عليه و يشرو عليه في القهاوي ولا أني نكسرلو ظهرو و ثقتو فيا خلاص هنا و بس... بقينا ندورو و نحوسو حتى قرب يطيح ليل باه حكمنا الطريق و قصدنا الدار في طاكسي بابا حاطلي المالوف يموت عليه وانا ندندن معاه لخرجة هادي مع بابا صح كنت محتاجتها رجعتلي روحي تاع قبل لي كنت بيها لي قبل ما نعرف رائد ولا حمزة ولا حتى صفية وصلنا لدار انا نزلت برا وبابا دخل طاكسي دورت شفت واقف بعيد قرب بقا يمشي خفت غير كشما يدير جاست مقود هيا بابا باه تحل الباب لقيتو فات قدامي شاف معاي وراح كأنو واحد جاز برك خرج بابا قفل الڨاراج و دخلنا لداخل لقيت ماما في كوزينة دير في طاجين زيتون تعرفني نمووت عليه كي دارتو عرفتها بلي حابة تصالحني هادي هيا طبيعة ماما من بكري كي تتناقش معاي ولا معا بابا تروح طيبلنا حاجة نحبوها غير ناكلو تسقسيك عجبتك لكان قلتي أيه تقول درتها على جالك و تطلب السماح هادي هيا حفظت طريقتها كيفاه و صح غير دخلت و نحيت عليا لحوايج لقيتها تعيط هيا تتعشاو وليت رحت للكوزينة قعدت حطتلي كليت منبعد بقات تشوف معاي ،عجبتك ؟_ ايه بنين _ درتو على جالك سامحيني حوور مكانش قصدي نضغظ عليك والله من خوفي برك و حضنتي كي لقيتها ناضت تبكي خلاص _ وعلاه تبكي والله مسامحتك و أصلا منقدرش نهز يالوكان نقطة كحلة في قلبي عليك منقدرش الله غالب عليا تضغظت من كل جوايه و انفجرت في ديك لحظة مش معنتها نتي هيا السبب الرئيسي في واش صرا الهدرة ولا مناقشة لي صرات هيا القطرة لي أفاضت الكأس هدا مكان حضنتني و باستني هزيت ماعن حبيت نغسلهم مخلاتنيش رحت للبيت لقيت تلفون حرقو بالعياط كوبيت درك لوكان نشوفك طلع في روح قدامي منهزش صاي بزاف رحت هزيت حوايج دخلت للدوش دوشت و خرجت صليت صلاتي خرجت قعدت مع بابا و ماما و كي حبيت نوض نلقى بابا قالي حوور اقعدي نهدر معاك ،وليت قعدت _انعم _ راهم زادو طلبوني فيك دار سي.. بصح مرة هادي مش حمزة لا ولد لمرأة لولة ،شفت معاه زدت شفت معا ماما لكلام هربلي ما لقيت ما نقول نضت قلتلو نخمم رحت نجري للبيت ما عرفت إلا نقبل ولا لا و نديرو كأنو مدخلش لحياتي و ما عرفتوش بصح قلبي حابو و عقلي لالا بقيت في صراع بيناتهم عاودت جات عندي ماما كيما لمرة لي جازت و قاتلي مرة هادي مش راح نحتم عليك اذا تقبلي ولالا بصح تبعي واش يقول قلبك كي شغل زادت اكدتلي بطريقة غير مباشرة باه نقبل غير خرجت رحت توضيت و صليت الاستخارة لقيت بلي قلبي رتاحلو و حابة قربو مفهمتش علاه رقدت وانا نستنى يجي غدوة ونشوف مع روحي اذا راني مزال مع قراري و نقبل ولا كلش يتعكس و نقول لا بصح مكانش علبالي بلي راني رايحة للجحيم برجليا و مش أي جحيم....
جابتني الفطنة مع اذان الفجر تڨعدت في بلاصتي عينيا يحرقو بزاف من قلة الرقاد رحت توضيت و صليت دعيت ربي يبعد عليا الشر وولاد الحرام و يقدملي لي فيه لخير خلصت قعدت شوية منبعد عاودت رقدت لأنو كنت فشلانة حتى مع صباح جات نوضتني ماما كيما مالفة غسلت عليا و خرجت حطيتلهم الحليب شربنا قالي بابا خممتي ولا مزال _ مزال ولا قلتلو بلي ليوم تردلو _ لالا قلتلو نشوف مع تاع الدار ومنين يمدولي الكلمة اني نقولك وكتاه تجي وتجيب العايلة _ ايه هكاك خير _ مالا خممي مليح قبل لا تقولي مش كيما الاول لي رفضتيه مع اللخر بنتي منبقاوش حنا هنا نلعبو مش تمسخير هذا صحا _ اييه ،هو ولا راح يخدم وانا قعدت نطلع و نهبط هو قابلة بصح حاجة تمنع فيا معرف وشنو هيا شافت معاي ماما ،واش بيك حور _ والو نخمم برك بصح كيفاه يقولو رفضت خوه حمزة و قبلت ب رائد صح يزيد يأكدو لغاشي شكوك تعهم بلي راني كنت معاه و مصوحبتو سيرتو بابا خاطر سكوتو هذا ما يبشرش بالخير _ نتي درك ما تخميش على ناس خممي على روحك على زواجك راه مسؤولية اسكو تقدري عليها ولالا باباك ماراهو حاط والو في بالو اديها من عندي هادي يحوس غير على مصلحتك و كيما تقولي يقولك ايه لكان شايفة روحك راح تتهني مع هذا الراجل اتوكلي على ربي و قولي ايه و اذا لالا كيما قلتي لخوه ربي يجيبلك من بلاصة خلاف هذا تاني كيفيكف _ مرانيش عليه خايفة من عايلتو سيرتو مرت باباه علبالي مش جاي منها الخير _ شوفي نقولك كي يكون راجل معاك وواقف في كتافك ياربي تكون دنيا كامل ضدك لأنو هو الصح دوري دوري و ترجعي لعندو يقيسك واحد يكون هو في كتافك ويوقف في وجهم كامل خيير من يكونو كامل معاك وهو ضدك هكاك ماراح تستفادي والو _ ايه علبالي بصح هو مراحش يكون ديما معاي تعرفي يخدم جونداغم و يروح معلبالش شحال من شهر و يرجع يقعد غير شوي و يزيد يروح هكاك راني نعيش في حياتي معاهم هوما مش معاه هو _ مالا اشرطي دارك وحدك يكريلك ولا يدبر راسو الا صح عينيو فيك راح يقبل انو تخرجو بدار وحدكم هدا ما نقولك و زيدي خممي و خلاص وكيما قلتلك لبارح تبعي قلبك واش يقولك و ناضت هيا تاني خلاتني نتخبط مع تخمامي لي كلاني قلت ندير كيما قاتلي ماما و خلاص غير يجي بابا نقولو قابلة بشرط نخرج نسكن وحدي اذا قبل يجي و نديرو شوفة إذا لالا الله يسهل عليه و خلاص رحت عند ماما قلتلها واش قررت _ ربي يجيبلك لي فيه لخير وخلاص اسمعي درك انا نلم لبيت هادي منين نخيطو نسيقها و نلم خيوط و لقماشات ونتي روحي ديريلنا محجوبة للغداء _ايه و نضت رحت للكوزينة درت العجينة منبعد زدت قطعت بصلة و طماطم باه درت الحشوة طيبتها كملت وليت مشقرة و خدودي راح يتفلڨو من سخانة كملت مسحت كوزينة من زيت و كلش باه ناكلو في نظافة حطيتها جات ليا ماما _يعطيك الصحة ليوم مالا كمليه غير رقاد رتحي وعيطي لباباك قولو يجيب معاه كوكا ويجي يتغدا _ رحت عيطتلو ،جا تغدينا راحت ماما حكات معاه على رأيي وشرطي قالها آخر كلمة ليها قاتلو ايه اذا قبل بشرطها معنتها قابلة و راح خرج باه يخدم و لعشية يرجعلهم الكلمة رحت انا توضيت و صليت و رقدت مع لعشية خلاص نضت لقيت رائد خلالي ميساج بلي قابل بشرطي و انو يكريلي منين راه يخدم فرحني كلامو و بينلي بلي صح راهو حابني للحلال خليت ميساجو هكاك معندي أصلا ماراح نرد عليه غيير يجي نهار شوفة و نتأكد صح لباقي ساهل نضت عند ماما لقيتها دير في حليب قعدت فوق طابلة نستنى في بابا يجي باه يأكدلنا هدرتو حطت الحليب و زادت المسمن لي درتو صباح ستنينا شوي حتى جا بابا سلم علينا و قعد و حنا نشربو قال جماعة راهم ردو عليا في لوقفة بعد و قال بلي قابل و نديها معايا وين راني نخدم و خلاص _ ماما ، ايه ربي يقدمهم الخير مالا و تفاهمتو على نهار يجو هو و ماليه للشوفة _ قالي غير نتفاهم مع دار راني نعيطلك _ايه باه نديرو حسابنا برك قبل الوقت _ايه يرحمها ربي ،هزيت انا شللت ماعن قهوة و صليت العصر هزيت تلفون قلقت ما لقيت ما ندير حبيت نشوف رائد وليت بعتلو ميساج قول لبابا شوفة بعد يومين شوي و رد عليا و علاه توحشتيني و محوسة تشوفيني _، يخلعوني هدراتو نحسو يراقب فيا و عاسني لقيتو عيط بعد هزيت عليه وبقيت ساكتة وشبيك ساكتة اهدري _نتا لي عيطت ولا أنا _ انا عيطت باه نسمع صوتك _وهاك سمعت صوتي ومنبعد _نرتاح كي نسمعو و نهار تكوني معاي تم نتهنى صح _ ممم _ قوليلي ريحتي شوية _ ماعندو ما خصني الحمد لله كي تخطيني نتا و مشاكلك لي تخنقني راني هايلة _ لكان عليا انا مش راح نخطيك حطيها في راسك و مشاكلي هاديك على حسابك نتي اذا تاخدي راي مش راح تشوفي حتى حاجة و هادي انا نضمنلك بصح اذا تخشني راسي راح نكسرو _ نتا لي تحب تتحكم بزاف و تقولي ديري و ماديريش لكان تبقى هكا غير نحبسو من درك انا انسانة مسالمة نحب الكالم و راحة البال كيما عشت في دارنا خاطيني مشاكل مام كون يصراو مشاكل شوي منقدرلهمش اك شفت واش دارتلي مرت باباك من ضغظ طحت مفقتش بروحي خلاص مالا غير قولي من درك _ كون غير جات فيا انا ومش فيك و بالنسبة لمرت بابا متخافيش كي هيا كي ولدها لي هز الهدرة راني حاسبتهم و توصي على جاية و علاه تخافي ياك راح نديك و نعيشو وحدنا الله يسهل عليهم متوصليهمش و علبالي مش راح ديريها و لي يوصلك لتم يشوف كيفاه منحبكش تظلميهم بصح والله لي يوصل شعرك منك يشوف حسابو كيفاه راح يكون _ ايه خلاص مالا نقص من تزيار تاعك هدا و تحكم _ منقدرش بصح غير تجي عندي و كلش راح يكون لباس ياك يا لعميرة _ صاي بديت تشعر بعد ههه أيا تصبح على خير _ ونتي بخير و كوبيت بديت نفرح اني قبلت بلاك حياتي معاه راح تتغير و نعيش صح الحب لي من نهار زدت وانا نحوس عليه منبعد فقت مع روحي والله صح نضحك شحال نية لبدايات كامل هكا تعجبنا منبعد كي نشوفو الصح نتصدمو ديجا منخممش بزاف كيما جات تجي .نضت شعلت تيلي نتفرج مالقيت ما يصلح قلت خلي نشوف ماما واش راهي دير رحت عندها لقيتها مع الخياطة وليت عاونتها خلصنا مدتلي هبطتهم لتحت و حليت حانوت نوغمالمون هذا هو الوقت لي يجو يدو حوايجهم جاو كامل بقات غير وحدة ستنيت والو شفت مع ساعة راح يأذن المغرب وقرب يطيح الليل لقيت لباب يطبطب و دخل بعد راجل كي لقاني بلا خيمار خرج يجري ياااا نندب والله ماما تقتلني ظل تقولي كي تهبطي لوحي عليك لخيمار بصح ننسى تالمون والفت غير نساء برك لي يجو و جامي جا راجل لقيت منشفة لحتها راسي مهم حاجة تستر شعري و طليت عليه انعم خويا كشما تستحق _ سامحيني اختي اني جيت ندي لاكوموند تاع فلانة... _ اا صار نتا بعتتك من صباح نستنى فيها وليت مديتهالو غير تحرك شوي وليت نحيت منشفة و لحت يدي باه نقفل الحانوت نلقاه في وجهي بسم الله الرحمان الرحيم يايما قلبي _واش جابك نتا درك فهمني _ سما راجل كان هنا و نتي هكا شعرك عريان واش يعني هذا _ مايعني والو بركا ما تألف رائد درك برك و منشفة فوق راسي غير راح نحيتها _ تكذبي قولي بلي مشافكش بشعرك هكا _ مشافنيش _ حوووور ما تمسخريش بعزريني كيما كل مرة تكذبي عليا _ واش كذبت غير مرة كي قلتلك ما دخلتش شفت حمزة هدا مكان رديتها بعد كل مرة نكذب عليك و إيه شافني بشعري بصح لا بقصدو ولا بقصدي و زربت غطيتو كي قلتلو هكاك شاف معاي و راح بلا ما يهدر حتى كلمة بقيت واقفة مسمرة وشبيه هذا كي يقلق يولي يخوف أما الهدوء تاعو يفوت الخوف لهيه سمعت ماما تعيط عليا وليت فقت مع روحي قفلت وطلعت لفوق لقيتها تستنى هاه واش جاو كامل _ ايه خلاص ما بقى والو _بصح وشبيك طولتي _ لا وحدة برك طولت بزاااف هدا وين بعد جاو داولها لاكوموند ديالها و قفلت و طلعت _ ايه صحا ،رحت انا درت العشاء و انا هكاك جا بابا و قعد في كوزينة معايا و عيط لماما قالها جماعة راهم يجو بعد يومين نطقت ماما ليه _ ياخاه وشمن يومين هادو _ علاه هذا راح تخربو دنيا اشريو شوي قاطو و فرات دنيا نظيفة درك انا راجل لي نقولكم واش ديرو لمهم حاجة خفيفة برك هادي مراهيش خطبة ، سما رائد دار على هدرتي و قال لبابا شوفة منا على ليومين بديت نحبك اوسمك قلتلها ماما ايه عندو الحق بابا وعلاه واش راح نديرو نخربو دنيا كيما في الأول بلا فايدة حاجة سامبل وصاي انا هكا حابة _ ايه خلاص مالا و انا علاه مادابيا نريح روحي كملنا تعشينا ماما غسلت لماعن و رحت للبيت كنت نستنى آبال من عندو ولا حتى ميساج كيما مالف والو قلت بلاك مزال مغشش من قبيل كي هدرت هكاك منبعد و يولي نورمال شعلت تيلي و بقيت نتفرج حتى رقدت فوتت ليومين هادوك مع توجاد خفيف في دار شرينا زوج انواع تاع قاطو مع غريبية و مقروض و بقلاوة و تاي معاه صامصة و مكسرات و معجون روايال نحطوهم منبعد بزاف و سيقنا دنيا مسحة للصالون عيطت لبنت عمتي خرجت معاي حبيت المرة هادي لا نلبس لا غوب ولا قفطان مبالغيين فيهم سيرتو للشوفة وانا مرة لي جازت ندمت عليه وليت شريت غوب فولار افلور جاية هكاك تحت الركبة و يديها طروا كار كي شفتها في لمانكان هبلت عليها بزاااف شابة و محبيتش نقيس تم مهم ديت لاطاي لي قدي و رحت للدار بنت عمتي من خرجتنا هادي حسيتها تبدلت معاملتها معاي و قاتلي بلي غدوة تجي عندي و اذا كشما نحتاج معاونة نعيطلها سبحان الله مبدل الاحوال يا هداها ربي ياراهي تخمم في كاش مصيبة و ندعي ربي يعطيها على قد نيتها مهما كانت ،خلصنا شرينا روحت للدار و هيا راحت لدارهم نحيت قشي و دوشت منها باه نحي للتعب تاع ليوم ومنها لغدوة مبقاش وقت شعري نشفتو و قلت فليل و نجبدو خرجت وانا لافة عليا المنشفة و نمسح في شعري شفت تلفون من داك نهار ما عيط لا والو بعتت ميساجات بصح مايردش ياخوفي يكون بطل و مراهوش جاي كيفاه ندير تبهديلة قدام ماما و بابا عمتي ياربي و مايديرهاش بيا بصح وشنو طبيعة هادي لي تقلقو حاجة يجبد روحو ما يواجه لا والو زدت رحت عيطت والو يصوني و مايهزش بقيت هكاك نار تاكل فيا يعني بعد شي هذا كامل غدوة نتصدم بلي ميجيش نزلت تلفون وقلت نخليها على ربي اذا يجي ولالا ماعندي ماراح ندير الله يسهل كملت شيحت شعري جبدو لابسيف كي عاد بدا يطوال ولا يتعب و صليت و رقدت نضت صباح رعشة مدايرتلي و لخلعة تقول ليوم دخلتي معرف وشبيا حتى وقفة مقدرتش نوقف وليت حصلتها في السكر قلت بلاك هبطلي على هادي رحت حطيت كاس ماء فيه سكر و شربتو والو تقول حاكمني خباط لدرجة يديا يتهزو وحدهم بسم الله رحمان الرحيم رحت توضيت و صليت قريت قرآني لقيت ماما ناضت وبابا بقينا هكاك نداورو منبعد خلاص جات عمتي و رفيدة بنتها درنا لمسات الاخيرة لدنيا و صالون هكا ماما تحب كلش يكون قدقد ياربي لاشتا جايين ضياف برك هكا طبيعتها معرف تضخم الامور او انها دير شان و قيمة و قدر بزيادة للضيف معرفتش وشنو بالضبظ كي خلصنا دخلت لبيت مع رفيدة باه نولي ليا لبست ديك لغوب خفيفة و حطة هايلة صح طلقت شعري كسلتو ملييح مكياج درت كيما مالفة ندير كي نخرج غير مرة هادي زدت اونتيساغن و غيسيل و غوجالافغ دورت ليها رفيدة صاي هكا خلصت _ زيدي شوي _ معندي ما نزيد نعرف ندير غير هكا _ارواحي نديرلك _ لا متخلطيليش نحب حاجة سامبل _ وشكون قالك راح نخلطلك ارواحي برك ،حكمت ايلاينر دارتلي و ايشادو نوار شوي تحت شوافري لي من تحت و كريو بيض داخل عين شافت معاي هاه ونتي تقولي تخلطيلي هزيت مراية نشوف عينيا كبارو كتر رجعو عينيا تحفة وفوق هذا نبان مش حاطة لأنو ايشادو جاي مع خط الرمش تحتاني و كريو بيض مبدلش فيا حاجة لأنو انا أصلا مهرودة من لانيمي و ديما عينيا هكاك و ايلاينر اول مرة نديرو يسحب العين مهم تحفة عجبني بزاف ، والله يعطيك صحا يارفيدة حاجة سامبل بصح هايلة _ بلامزية بصح لحق جيتي تحفة خير على داك لمرة بينك كبيرة مرة هادي لالا تباني صغيرة و شابة بنوتة وغوب واتاتك يابنتي رائد كون يشوف لخير هدا لي مبزع وراك كيفاه يدير برك نضت نضحك قلتلها في قلبي راهو تولهلو قبلك سيد حافظني حفاظة و هيا تقولي كون يشوف منبعد بقيت واقفة و رايحة و جاية ياربي قرب الوقت و فات الظهر عندو بزااف هدا هو الوقت و ياويلي يكون مش جاي لفكرة برك فشلتني لقيت رفيدة تشوف معاي وشبيك نتي تهدري وحدك و قاتلة روحك ونتي رايحة جاية دوختيني اقعدي كي ناس شوي _ مقدرتش متوترة وخايفة _ علاه راح يدخل عليك بركاي بلا سماطة ركحي روحك و اجمعي حتى افكارك و كلامك خير من تبقاي مفرفشة و كي تدخلي تولي تتعڨني ، لقيت بلي عندها الحق وليت قعدت في بلاصتي لقيت ماما و عمتي جاو ،ااا حور صح مرة هادي جيتي خير على مرة لي جازت ممم سما كامل تفاهمتو بلي مرة لي جازت جيت باشعة _ لالا وشكون هدر هكا نتي في كل حالاتك مليحة بصح مرة هادي خير _مدابيا اسيدي سما كاين تطور منبعد قلتلها ماما قداه ساعة _اي ثلاثة و نص علاه _ مش يعني طولو شوي _ معرف هدا هو الوقت لي لازم يجو _ خايفة ميجوش _ وعلاه هذا ياك مدو كلمة ولا صاي بطلنا بعد مكانش كلمة في هاد الوقت _ معرف شكيت برك ،سمعت بابا يعيط راهم وصلو جماعة تم وين رجعت فيا الروح وتنفست مليييح راحو هوما خرجو استقبلوهم و رفيدة قعدت معاي منبعد خرجت وانا نعيطلها و نبعتلها ف لي ميساج يا كلبة ارواحي قوليلي شكون جا شوي هكا و جات ،هيا خبريني واش الاحوال برا _ عندك حسب ماعرفت جات عمتو تاع مرة لي جازت و بنتها و جداتو _ من باباه ولا من أمو _ وانا وين علبالي لالا نجيب دفتر العائلي خير _ هيا برك كملي و شكون تاني رجال جا هو _ لا ماجاش هذا واش شوكانا برا أمك حارت _ تحكي منك صح و علاه سماوها شوفة درك انا نتشاوف مع جداتو ولا كيفاه زبل كون عينو ما يجيش يهدر ومالا من صباح نعدل في روحي لشكون نضت بعد راح نلم شعري _حبسي وشبيك هكا يا اختي ناار تنفاعلي ليه ليه او جا حبيب القلب متخافيش حبيت نلعبلك على الوتر الحساس و نشوف واش ديري _ يعني وقت تمسخيرك _ واش نديرلك حبيت نقلقك _ بصحتك راكي قلقتيني ،جات ماما لاه تندبي غير قربت للباب سمعت صواتكم اه ديجا هيا ناس قالو مزروبين باه يروحو جريت للمراية شفت مع روحي _ هيا برك كل دقيقة تشوفي مع روحك ما عندو ما خصك خرجت معاها فرحانة عكس مرة لي جازت زيد حشمانة و مخلوعة شوي دخلنا لصالون سلمت على عمتو و زدت بنت عمتو معاها طفل صغير يبان ولدها و زدت جداتو وقعدتني حداها ،واش حوالها بنتي ان شاء الله راهي لباس _والله نحمدو ربي ونتي لحاجة _ كيما حب ربي _ سبحانو زادت هدرت معاي عمتو و بنت عمتو هوما يحكيو وانا ساعة نرد بكملة و ديفوا نبقى ساكتة ولا نتبسم بصح مهم شي لي عرفتو بلي راني قاعدة آلاز و فرحانة بين قلوب صافية سبحان الله قلب و كيفاه يحس مرة لي جازت عييت نقعد معاهم نحسهم منافقين الكذب يمشي في دمهم أختو و امو و خالتو تاع حمزة حتى من عمتو لاحظت بلي مرة لي فاتت جات غير ساكتة و مرة هادي لعكس تضحك تڤسر محسيناش خلاص بالوقت حتى قالت جداتو هاجيبو الطفل يشوفها ياربي ما يشبع منها شوي ،ياخاه جداتو شوي مقودلها قال يشبع بيها حوجي خرجت ماما عيطلتو و بقا بابا و راجل عمتو تم مهم دخل لاح السلام و انا عييت نطلع راسي غير نحوس نشوف نلقى روحي هبطتو جداتو ضربت بيدها على فوتاي على جنبي اقعد اولدي هنا سامي مرتك ،هههه رجعتني مرتو بعد ولا هو بعد قدامي ضربت في نيفي ريحة بارفان لي شميتها اول مرة تصادفت فيه كي طحت و جا نوضني وروحت للدار بقيت نشم في قشي اه برك وشمن بارفان يحط راهي دوخ تهبل تهبل تقول نوض نعضو وانا هكاك نهدر وحدي كيف المهبولة سمعتهم يضحكو
