🔱حبيبتڪ_أنتٓ
#بقلم_جيهان
كي قالي هكاك وليت خرجت حسيت كأنو تسرعت و مرة خلاف تصرا حاجة وتتحتم عليا نبطل و منلقاش كيفاه اه برك دخلت للبيت بقيت مسندة و مطلعة راسي للبلافون كرشي بدات توجع فيا و معرفتش السبب نضت شربت دواء تاع ليسطوما لأنو دارلي حريڨ و حكمت لبيت تاعي هزيت الفراش و سيقت لقيت ماما تعيط عليا باه ندير الغداء رحت درتو كملت توضيت صليت و رحت نعاونها في الخياطة تمنيت كون جات عندي أخت تعاوني و توانسني نقلق وحدي و نفد لاشتا أخ معليش نسناه من لعشية لعشية و نڨسر معاه من نهار خلصت قرايتي و انا قاعدة في دار لا دخلة لا خرجة لا صحبة وحدي ديما هكا شافت معاي ماما _لكان راني غلبانة ولا قلقتي روحي ريحي _ لالا نورمال واصلا مبقاش هاه راني كملنا مزالت لافينيسيون تاع هادي برك _ ايه كيما تحبي ،كملت واش بقالي ورحت حطيت الغداء تغدينا غسلت ماعن و دخلت نرقد شوي هذا هو روتيني نطيب الغداء نخلص نعاون ماما منبعد نتغدا و نروح نرقد شوي حتى مع لعشية نوض رقدت منبعد لقيت ماما جات تحرك فيا حوور نوضي يا حوور دورت ليها _واش كاين _, لقيتها حاكمة تلفون و تسد فيه باه ميسمعوناش و قاتلي اسمعي اي عيطتلي درك صفية راهو قالهم باباك بلي قابلين و قاتلي وكتاه نديرو شوفة سمانة جاية _انا دوخة تاع رقاد مزال راني نستوعب وشمن سمانة جاية علاه هذا شكون يجري ورانا _اقفلي اهدري بشوي المرأة تسمع فيك ياو شوفة مش خطبة _ ااا صحا ايه لي تشوفيه مناسب هداك هو _باستني و راحت حكمت تلفون نسمع فيها تقولها ايه سبت هادي لي في وجوهنا خاطي لجاية ان شاء الله مرحبا بيكم، معرف علاه ماما فرحانة لدرجة هادي كي راح تزوجني ولا انها ناسبتهم هوما بالتحديد والله ما فهمت عاودت فتحت تلفون حبيت نشوف اذا قرا ميساج ولالا و اذا قراه واش رد عليه لقيتو شافو و خلا vu قلت بلاك راح يخليني في حالي مادام قراه و مردش عليا ولا يعني راح كشما محوس يدير اففف أخطيني منو واش راح يديرلي يعني راني في دار ما نشوفو ما نتلاقا بيه و تلفون نقفلو منبعد كي نخرج نشري بيس خلاف و هادي نكسرها وهو ما نعرفو ما يعرفني و قص عليا نضت للكوزينة حطيت حليب لقيت بابا حل لباب رحت عندو كيما ندير ديما استقبلتو دخل قعد حطيت لحليب شربنا منبعد بابا قال _يا مرأة هيا البسي نروحو عند راجل اختي راهم يقولو حالتو غير تزيد وراه مهلوك مالا نروحو نطلو عليه ما تدري لموت من الحياة _ مسكين والله راه يعاني ربي يخفف عليه اصبر مالا نروح نلوح عليا الحجاب حوور روحي تلبسي _لالا منروحش _وعلاه هذا حتى متروحيش تبقاي وحدك _ منحبش نشوف واحد مريض و مهلوك والله ننضر ياقلبي يوجعني
وكيفاه ديري تبقاي هنا وحدك_ايه نورمال نقفل برك لباب ماعندو ما يصرالي ،ولات ماما راحت تلبس و راحو خرجو زربت قفلت لباب من وراهم ملييح و قعدت في لبيت نتفرج تهت منبعد بديت نخاف و ليل قرب يطيح عيطت لماما ،الو وينكم راكم جايين_ مزال حكمونا نتعشاو علاه قلقتي _ لالا خفت وحدي هنا _ شفتي كيفاه قلنالك ارواحي معانا نتي راسك خشين يخي قفلتي لباب مليح برك ماتخافيش ماعندو ما يصرالك غير نتعشاو نقول لباباك نروحو _اها لالا خلي درك نلبس و نجي عندكم _مطوليش مالا و اقفلي وراك لباب مليح احور _ ايه صحا ، نضت لحت عليا الجلابة و خيمار هزيت مفاتحي تلفون لبست كلاكات في رجلي و طفيت الضو و قفلت بيبان و خرجت أنا وقفت في لباب تاع دار زدت قفلت و تحركت نمشي بشوي و مهبطة راسي طلعت راسي فجأة لقيت طاكسي تاعو زوج خطوات تدخل فيا شفت معاه و ياريت ما شفت كون يحكمني ينهشني عادي ولا يكلاكصوني عليا مالقيت روحي غير دورت و رحت نجري للدار من لهفة معرفتش كيفاه حتى نفتح لباب انا فتحها و خبطتها لقيتو خبط بيدو افتحي نحكي معاك حوور _روح منا راك علبالك واش راك دير والله و يشوفونا جيران يا نوليو في لسان كل واحد _ وانا واش دخلني في ر## جيران تاعك ورب العزة نحكمك نقتلك _ وعلاه واش تكون حتى تقتلني ولا تدخل _ ايه مبقاش وانا نعتلك انا واش نكون _ روح بركا بلا مشاكل زيد توصل لهدرة لبابا و اتقبل صاي انا مش تاعك راني من مكتوب حمزة كي قلت هكاك ولا يخبط في لباب اقسم بالله نص لجيران خرجو وليت نبكي روح الله لا تربحك راك فضحتني يا كلب _ والله يا حور كون ما نعجبش فيك و نخليك هكاك نشوفو شكون يديك حمزة ولا خلافو وتم ابكي و اندبي مليح و ليام بيناتنا قلتلك ما تخشنيش راسك بصح حابة تلعبي معاي مالا اتحملي تعب المراحل تاع اللعبة كامل و انسحاب مكانش باه يكون في علمك و راح طحت تم قدام لباب عييت نتحرك ياربي منين خرجلي مصيبة هادي يعني انا من وكتاه مالفة بالخلايع هادو نحيت خيمار تم تنفست كي ركحت هزيت روحي و طلعت لفوق عاودت فتحت دنيا و شعلت الضو لقيت ماما تعيط ،الو _ وينك نتي وشمن طريق حكمتي ساعة باه توصلي _ لا راني بطلت عجزت لا نخرج بقيت في دار _ ااا حنا بقينا نستناو خلي مالا هيا منبعد رانا منطولوش ونجو _هيه صحا و كوبيت زربت نحيت جلابة ولبست ڨندورتي رحت حطيت واش بقا من الغداء يسخن كليت و حكمت بلاصتي لفلفت عليا الغطاء و خايفة لا ندور نلقاه هنا قادر يديرها عادي خلاص ياربي واش ندير نحكي لماما ولا لبابا خايف يفهموني بالغالط و يقولي بلي راني معاه في علاقة على هادي يدير هكا و أصلا من حقهم شكون لي نقولو بلي واحد ما نعرفوش غير نشوفو من بعيد برك واول مرة مدلي نومرو و سمع بلي راح يخطبوني هبل مفهمتش علاش لقيت تلفون يصوني نسيت مقفلتوش كيما حكيت مع ماما كوبيت عليه جيت راح نطفيه لقيتو بعتلي ميساج والله و طفي تلفون حسابك راح يكبر كتر مكلاه تخشني راسك وليت خليتو برك و ميساج مرديتش عليه شوي هكا بعتلي شفتي كيفاه كي تاخدي الراي و تبقاي عاقلة خير من تقسحي راسك تجي غير عليك وعلى قلبي أصلا قلبي رهيف و مخليتيش فيه كي شفتك بالجلابة نتي تتحركي وانا نتحرك معاك اه يا حور و ما درتي فيا و تحوسي يديك حمزة شفتي الموت تديك هيا و ميديكش هذاك الكلب ..كي قريتو ميساجو هدا اللخر تخلطتي حشمة مع خوف وحيرة ،حشمة من وصف تاعو لشكلي ولا مشيتي و خوف من تحكم تاعو و اصرارو و تهديدو و حيرة علاه يدير في شي هذا كامل زعما يحبني ووكتاه لحقو الوقت أنو يحبني ولا يحفظني باه يحب انو نكون ليه وحدو رديت عليه ايه معليش نقبل تديني لموت و متدينيش نتا رد بعد انا هيا الموت بذاتها مرحبا بيك في الجحيم بصح متقوليش احح ولا اه _ واش بيه هذا يهدر بالالغاز خربطني زربت طفيت تلفون ديما انا هكا خوافة نتظاهر برك من برا بصح من داخل مكانش واحد خواف قدي و منحبش نواجه بزاف غير نساير و ايه وخلاص منحبش ندخل قي نقاشات الطويلة سيرتو لي معندها فايدة رقدت و ربعت يديا كيما مالفة نرقد عييت نحي هادي طبيعة حتى داتني عيني و رقدت خلاص نسمع برك في بابا و ماما كي جاو و دخلوا و هوما يهدرو ماما طلت عليا و راحت كي شغل انا فايقة بصح في نوم بعد عينيا مقفولين طوول بعد عاودت رحت فيها حتى لقيت ماما تنوض فيا صباح بسيف باه تحركت ووقفت رحت درت روتيني كملت الفطور خلصت جاز نهاري عادي بين خدمة تاع دار و تاع خياطة غير لعشية دخل بابا لقيتو دخل سلمنا عليه منبعد كي قعد قالي حوور لبارح فليل ماجا حتى واحد _تفكرت ضربة تاع لبارح قلتلو لا انا بقيت لفوق وما جا حتى واحد علاه بصح _ معلباليش جيران صباح وانا رايح نخدم قالولي بلي فليل وحنا مكانش سمعو الخبيط في لباب وواحد يهدر هنا _(ياعزرين وصلوهالو سخونة بعد ) قلتلو لا بلاك او جارنا لي مربي كلاب يخي تعرفو ديما يخبطو هنا _ متقوليليش رجع لعوايدو يطلق الكلاب قدام لباب ياك حذرتو ميعاودهاش _ لا مارانيش متأكدة قلت بلاك برك باسكو انا ما سمعت حتى خبيط بلاك كنت راقدة و مفقتش _ معلباليش انا تاني مافهمت والو خفت يكونو كاش سراقين و حسبونا خرجنا كامل و كشما عولو يدخلو لدار و نتي هنا وحدك والله هذا واش حير بالي _ معليش فاتت بالخير باه نديرو حسابنا للجاي ،مزية مكانش ماما راحت للبيت ولا كون موضوع ما تفوتوش على خير وتبقى تربش حتى تجبد واش كاين الحمد لله يارب بابا ناض غسل عليه و توضا وماما جات عندي واش كاين وشبيه باباك _ واشبيه مابيه والو ،المهم ارواحي تشوفي لي مودال تاع لي غوب _وعلاه واش ندير انا بغوب علاه عرس يخي غير شوفة خفيف ظريف _ وعلاه انا قلتلك غوب ب لافوال حاجة خفيفة راني نخيط .....
وعلبالي كيفاه مش جاهلة _وعلاه قلتلك جاهلة قصدي برك نحب على حاجة خفيفة وخلاص _ايه ارواحي تشوفي هادي واش رايك _منحبش لاكولار هادي _نورمال نقدرو نبدلوها _اها ماما واش رايك نشري قفطان خفيف مش من هادوك ثقال _ايه مليح حبيت نقولك و قلت بلاك ميعجبوكش _لالا نحبهم مالا ليامات هادو و اخرجي و شوفي لي مودال _ايه معليش _ارواحي عاونيني نكملو لي كوموند لي بقاو باه منزيدوش نحكمو و نتفرغو لخدمة دار و الحلاوات ، ايه اني جاية رحت من وراها ساعات هيا تفصل و انا نخيط ولا هيا تخيط وانا نقي ونفيني مهم حتى كملنا تقريبا لنص الليل ليوم تعبنا صح مالفة هادي خدمة نقسموها لشحال من يوم حطيتهم في لي بوكس تاعهم هبطتهم للحانوت لتحت باه غدوة يجو يدوهم كاين باب تاع حانوت داخل دار و لباب لكبيرة اي في طريق كملت عاودت قفلت وطلعت لفوق غير صليت و كملت طرحت روحي راح تخرج و مسلاني يسطر وقيل راح تجيني وصح غير منبعد شوي رحت توالات لقيتها لالة مولاتي جات وليت بدلت عليا و رحت لبست تقاشر باه ميقيسنيش هواء ولفلفت روحي بالغطاء هزيت تلفون شحال وليت مندخلش فيسبوك ديما مطفيتو بسبة الهم هداك و مغلطتش لأنو بعد ما فتحت بعتلي ميساج حور متلعبيش بأعصابي و بركاي بلا قباحة وروحي لباباك و قليلو مرانيش قابلة رديت عليه احلم شي هذا يصرا وعلاه كي نبطل راح تديني نتا _ نديك ولا منديكش هاديك ترجع ليا قلتلو مالا انا تاني نزوج ولالا هاديك حاجة ترجع ليا أنا _ ايه معليش نشوفو و لفي روحك مليح احبي نخاف عليك تمرضي ،نضت تڨعدت نشوف مع ميساج و نعاود دورت راسي لطاقة مقفولة بقيت نشوف هكا وهكا و هذا واش يقصد بهدرتو والله خوفني يعني حاط كاميرا هنا ااييي واش راني نخلط وقيل مسلسل يدخل و يحط كاميرا و زيد يراقبني بلاك هدرها برك و جات سواسوا منبعد زاد بعتلي متعبيليش هداك المخ الصغير و ارقدي خير طفيت تلفون وانا قلبي يضرب في الألف راح يخرج و رقدت ،فاتو ليامات وبقاو يومين للشوفة تلفون منفتحوش خلاص لأنو علبالي اذا فتحتو راح يبعت و انا نبقا نقرا و يستفزني و نرد و منحبسوش مالا هكا احسن بلاك كون تولي بيني وبين حمزة حاجة رسمية يخطيني و قفت رحت نلبس لأنو ليوم خارجة نشري قفطان برك لأنو لباقي عندي كلش و شوي صوالح تاع قاطو لي كيسات و كدا مهم لبست كملت درت غوجالافغ و غيسيل تحلبت كنت مش مالفة نديرهم غير مرات لخرين كي وليت نخرج و رحت عند ماما هيا ملبستيش _ وشكون قالك راح نروح لخدمة فوق راسي روحي برك وحدك ما عندو ما يصرالك _ ماما تحكي صح ومن وكتاه انا نخرج وحدي اها هيا برك و كي نجي نتعاونو _ اني درت على هدرتك بصح كون نجي و تقولي مرانيش قادرة ولا خدمتك تتعوجي فيها نعتلك كيفاه نحب الخدمة مسڨمة_ ايه خلاص برك هيا ناضت تلبس سمعت لباب يطبطب خرجت حليت لقيت وحدة مالفة تخيط عند ماما ديما سلمت عليها ،ماماك اي هنا _ أيه اي هنا ادخلي لداخل و رحت نعيط لماما قلتلها اي جات فلانة نلقاها خبطت راسها _وشبيك_ علبالك وعدتها نخيطلها ڨندورتها و تديها ليومين هادو _ يخي قتلنا رواحنا غير باه منزيدوش نحكمو _ معلباليش مقدرتش نردها _وكيفاه درك _روحي نتي وحدك ياك كنتي رايحة في الأول هكاك و انا نزرب نخدملها _علاه يعني ديرلي هكا من وكتاه نخرج نطرح انا وحدي برا ،ولات مدتلي دراهم و صاتني واش نشري و نعيطلها كون نحصل في كشما حاجة و خرجت خايفة لا نلقى مصيبة هداك انا ستقويت زعما ب ماما مهم رحت وصلت سوڨ منين ديما نشرو قصدت حانوت لي ديما نشرو سقسيتو على حوايج قاتلي عليهم ماما منبعد خرجت لحانوت تاع قفاطن عجبوني زوج بصح حبيت ندي لخفيف و احترت في كولار كيفاه مالا خيرت البوغدو برك هايلة تصلح على لابو بيضة سلكتو و رحت لل حانوت تاع صوالح لقاطو معرفتش وشمن مودال ماما حابتو بالضبظ عيطلتها اپال فيديو ساعة باه خيرت واش حابة يعني كون جات وشرات وحدها خير.....
خرجت من عندو درك صاي كملت قاصدة دار لقيت واحد من مالفة نشوفهم ديما كي نجي مع ماما يتبع فيا و يلوح في الهدرة _بسيف شفنا القمر وحدو وشبيك اختي ديري علينا _كي عدت أختك دير مزية و تخطيني _لقيتو بدا يزرب وانا تاني وليت نزرب في المشية حتى قريب نطيح نسمع في صوتو وشكون من غيرو رائد ،اسمع نتا في شكون راك تلحق أيا طبڨ رجليك _هذاك نكر بعد قالو مكنتش نتبع فيها راني رايح في طريقي وكمل مشى قدامي حتى راح وهداك بقا واقف يشايع فيه منبعد دور ليا كملت نمشي كي شغل مش كاين و ندعي في ربي أنو ميلحقنيش وبلاك يحشم كي رانا في طريق و قدام الناس بصح هيهات لقيتو حكمني من يدي و زير درت اييييه وشبيك نتا واش حاسب روحك _ مادام نتي ديري هكا نبقى حاسب روحي نهار تتعدلي نتعدل _روح أخطيني حاجة ماراهي تربطني بيك مالا كون تخليني احسن ليا وليك _ شفتي هادي في الاحلام و ماتصراش قصدك حاجة حابها انا يديها خويا لي ميتسماش اخ الكلب كون تخطبتي لواحد خلاف و رفضتيني كيما هكا ميهمنيش بصح لحمزة لالا _اطلق يدي وجعتني و زيد رانا برا قدام ناس روح خليني _ وينوما ناس مكاين حتى واحد نعتيهملي دورت نشوف صح مكان حتى واحد. أصلا زنقة هادي خالية و هذا شي زاد خوفني ولا قرب ليا _بعد بعد بعد _ مالا قلتي حمزة هو مناسب و مكتوبي اه ،بقيت ساكتة زاد قرب خلاص وينو لسانك لي مشىرك في لي ميساج وين راح اهدري منبعد هز صبعو مسح غوجالافغ ولحس صبعو ،حيرني جاست تاعو هذا بقيت نشوف _مترمشيش كيما هكا حور راني مش حاب ندير حاجة في الحرام ولا نقيسك خودي الراي مش راح ينقص منك العمر اذا رحتي لباباك و قلتيلو بلي راني مش قابلة فهمتي شغلي شوي هاد العقل و خبطني بصبعو لراسي ،هيا امشي درك تروحي بقيت في بلاصتي حتى عيييط هييا اتحركي حكمت حوايج في يدي واش شريت و مشيت حتى تفكرت هدرتو تاع لبارح على مشيتي دورت لقيتو يشوف معاي حتى تلفتلي وليت نزرب ،سمعتو قالي ياو متزربيش وتتحركي هكا راكي تقتليني _ياخاه على الراجل صح مهبول ما وصلت لدار قطرة دم ما بقات فيا حطيت حوايج و ماما تسقسي فيا وانا عقلي مكانش غايب _ هذا خرجتي مرة وحدك تقول قتلوك و طلقوك غير لخير _ لا والو غلبت برك و قريب تودرت في السوڨ هدا مكان ونضت نحيت قشي حكمت لقاطو زينتو و حطيتو ف ليكيسات و خبيتو راح بابا جاب بقلاوة من الكوشة خليتها تشرب العسل و منبعد نقصها مهم وجدت كلش باه غدوة نبقى راكحة ندوش برك و نهتم بروحي ورحت نرقد فات باقي ليوم عادي خلاص غدوة نضت سيقت دنيا مسحة خفيفة لأنها أصلا نظيفة و نفضناها وجدت سنيوات حطيتهم في كوزينة علبالي غدوة انا و ماما وحدنا راح نتخلطو سما درك خير نحي عليا غير كملت وليت لروحي دوشت و جبدت شعري باه يركح حطتلنا ماما تعشينا و رحت حكمت بلاصتي خليتهم يتفاهمو شكون جاي وشكون لا هاديك حاجة متهمنيش.....
لي جا مرحبا ولي ماجاش مرحبتين بعد آخر مرة تلاقيتو ما فتحتش تلفون درك فتحتو قلت نهدر مع بنت عمتي هاديك لي راجلها مريض بلاك تجي غدوة رغم اني نعرفها متحبينيش بصح قلت على الأقل طفلة معاي راني وحدي كي الغولة كرهت وقلت هداك مهما يبعت لي ميساج مندخلش و منقراش بصح ميساجو لي وصلني من فوق خلاني لا إراديا ندخل و نقراه كتبلي علاه يا حور ديري هكا كل ما ندخل لدار نقول بلاك نلقاهم بلي قاعدين و حبسو من التوجاد لأنكم عيطتو وقلتولهم مش قابلين بصح لا لعكس ندخل نلقاهم يوجدو هوما يمكرو فيا ونتي اكثر منهم هوما حطموني ونتي راكي تحطمي فيا بصح والله ندمك و نديرلك حاجة تخليك راسك متهزيهش على فهامتك ،وليت نبكي هزيت تلفون وخبطتو كسرت بيس هذا عرفتو سمانة ولا ركبلي الرعب الله لا تربحك وليت دار نخاف نخرج منها حابة درك نروح نقول لبابا بطلت بصح معنديش سبة وعلاه مكرة تاعي خلاتني اني نروح نقول قابلةوعلاه رقدت وانا هكاك ندمت على كل خطوة درتها ليامات لخرين هادو علااااه كون بقيت بايرة مش خير و خير لقيت ماما تنوض فيا صباح يالله فيقي مبقاش لحال عمتك اي جات اي هنا زربت نضت قلتلها و جات معاها ،مكملتش هدرتي و قاتلي لا ماجاتش _ ايه باينة و علاه تجيني أصلا هيا من بكري ما تشمش فيا علاه الله اعلم رحت غسلت وجهي و دخلت سلمت على عمتي ڨسرت معاها قلت لماما نعاونك في الغداء محبتش قاتلي تلصق فيك ريحة طياب خلي برك مكلاه وليت خليتها و دخلت للبيت قاعدة جبدت قفطان زدت حددتو شوي و لي زاكسيسوار تاني وواش نلبس في رجلي شعري كسلتو و لميتو من قدام وليت خرجت تغديت معاهم و عاودت رجعت لبيتي درت مكياج لبست و قعدت نستنى جات ماما طلت عليا بقات تسمي و تصلي على النبي ،ربي يحميك يا بنتي ان شاء الله ويكونو ناس يعرفو قيمتك لأنو نتي متتعاوديش _ان شاء الله يارب و خرجت زمان و لقيناهم يطبطو وانا نطل بنص عين جات أختو و أمو وزوج نساء منعرفهمش و زوج رجالة ملمحتهمش مليح دخلو نساء لصالون و رجال لبيت لڨعاد وانا وقفت وليت نفرك في يديا قلبي من بعيد يتسمع دقات تاعو نشوف مع روحي و نعاود منبعد نزيد ندور حتى سمعت بابي يطبطب ادخل لقيت بنت عمتي دخلت سلمت عليا منبعد قاتلي هاكي تلفون هذا واش جابني _ علاه نحكم _احكمي برك يحكي معاك او هبلني ،حكمتو عليها و حطيتو في وذني ،الو شكون معاي بقا ساكت ،الو جيت راك نكوبي لقيتو نطق _حووور علاه ديري هكا طلي عليا من طاقة نشوفك _روح وشبيك نتا مهبول على روحك _ ايه مهبول بييييك و هبلتيني _ مهبلتك لاوالو حاكمة حدي نتا لي معرف عليك ، ناض يعيط طلي ولا درك ندخل تم ,قاتلي بنت عمتي طلي او يديرها كون تشوفيه كيفاه وصلي مخك يحبس نتوقع منو كلش مالا غير طلي عليه ،وليت قدمت لطاقة وطليت لقيتو تحت شجرة دارنا قاعد منبعد طلع راسو بقا يتفرج منحاش عينيه درتلو براسي وشبيك قالي ادخلي وليت دخلت و قفلت طاقة عاود عيط هزيت حور تقبلي اقسم بالله حمزة ما يخرجش عايش من دار هاديك و نتي قرري و كوبا قعدت في بلاصتي ياربي واش ندير كيفاه نخرج درك نقولهم راني بطلت جامي صرات وليت نبكي حتى لقيت ماما جات هيا حوور محوسين يشوفوك بقيت في بلاصة كيفاه نقولها درك بلي بطلت اه يا رائد حرام عليك منين خرجتلي
