#حبيبتڪ_أنتٓ
بقلم جيهان
نضت رحت للكوزينة حبيت ندير كاش تحلية انا نخدم و نخمم في رائد وين إختفى درك راه شهر ونص ما عيط ما والو من ديك المرة قال مانزيدش نعيطلك وصح تلفون نهزو عشر مرات في نهار ما تدخل لا أبال لا ميساج منبعد قلت وشبيه عزريني انا تاني كي كان وراي نظل نقولو أخطيني و منسحقش و غير بعد ظهرت نحوس عليه بصح رغم البعد هذا كامل جامي عيطلتو ولا بعتلو ميساج الله يسهل عليه دخلت عليا ماما ، معامن تهدري نتي _ ما نهدر معا حتى واحد علاه _ نشوف فيك وقفة و تحاجي وحدك وقيل سوطاولك الخيوط _ ماما وشبيك تزيدي عليها بلاك تهت برك هادي تاني نديرو فيها حكاية ،سمطتني و جات وقفت فوق راسي وشنو هذا واش راكي ديري _ قلقت و سخفت على حاجة حلوة هاه راني في لاموس تاع شوكولا _ وديريها حلوة بزاف كيما لمرة لي جازت نعتلك حتى طايشت _ لا جات مليحة هاكي ذوقي، هزت شوي ذاقت ايه مليحة حطيها تبرد برك وراحت هزيتها انا حطيتها تبرد غسلت ماعني و رحت عندها قعدت في الارض هاكي فصليلي هادو _ منعرفش للمودال هدا مرانيش مالفة بيه_ _و لباتخون واش يدير هيا حركي روحك لازم تتعلمي باه نعول عليك في شحال من حاجة نولي منين نحطك نلقاك ، وليت حكمتو أصلا منقدرش ناقشها حطيتو وبديت نفصل صح طولت مالفة يدي خفيفة باسكو حوايج كنت متمكنة منهم بصح هادي لالا _ جات ماما تشوف هاكي خرجتيها سواسة صحيتي صح طولي مرة لولة ما تعرفيش بشوي بشوي تتعلمي و تهزي الصنعة _ان شاء الله ، ماجات ماما تهزهم باه تخيطهم نسمعو في عياط برا و باب تعنا تاع التحت راح يتهد صاي قلت تكسر ،ماما حتى حكمت فيا خفت يطلعلها السكر من الخلعة _ ماما وشبيك بالعقل برك ما تتخلعيش ارواحي نشوفو واش كاين خرجت تجري طلت من بالكون دورت ليا قاتلي راهي صفية الكلبة ،انا قلبي حبس خفت كشما جات دير ولا نتوقع منها كلش هبطنا هكاك لا حطينا خيمارات لا والو حلت ماما و هاديك مزالها تنبح حاطة يديها على مسلانها و تهدر و تعيط كي شغل محوسة تخرج لجيران يتفرجو مزية كنا في وقت صباح تقريبا اغلبية خدامين و يقراو غير برك جارنا كبير خرج ليها ،علاه تندبي و تعيطي ادخلي لدار و قابضي تكسريلنا في راسنا حكمتها ماما من يدها و دخلتها _واش كاين واش تسحقي جاية صباح ربي تعيطي و تقابضي _ متحكيش معاي احكي مع بنتك لي محوسة تفسد بين الخاوة غير عرفت بلي حمزة محوسة يخطبها دارت برائد ولد حورية و لعبت بيه عادو في دارو ميشموش في بعضاهم و الدبزة قايمة اه كون عينها في رائد علاه تقبل بحمزة و هيا ظل في السوڨ تتراما معاه من بلاصة لبلاصة الله اعلم من وكتاه شي هذا يصير نطقت ليها ماما اقفلي فمك مش معنتها كي رفضت ولدك تولي كل دقيقة تجي تندبي فوق راسي و مكفاكش شي هذا وليتي تحاولي و كي قطعتي الامل خلاص من جيهتها جاية تشركي في فمك
ونتي شفتيها بعينك بلي مع رائد ولا شفتيها في سوڨ لاصقة فيه خبريني _ مشفتش بصح وصلولي الخبر _ لي وصلولك الخبر قولهم قاتلكم سعاد روحو تقودو ولي عينو يهدر في بنات ناس يجي يواجه مش يهدر مور الظهر كي لوليات هادي قوليهالهم بالحرف و من ليوم منسحقك لا تجي لا تعتبي بابي ظهرتي صح مراكيش تاع عشرة ولا وحدة أنو ناسبوها أصلا ديري روحك جامي عتبتي لباب هادي و مع السلامة _ صار يا سعاد على آخر عمري ديريلي هكا جاست _ نديرلك هكا و ندير ما أكثر خاطر كون جيتي كي ناس طبطبتي على الباب قال هاو واش كاين وواش سمعت اذا كاين منها ولالا نتي لا جاية تبرحي و تعيطي لرب لي خلقك محوسة تفضحيها زعما علبالي انا بنتي و تربيتي كيفاه جامي تروح لحاجة حرام ولا طريق لعوجة بإرادتها يا حاجة تكون محتمة عليها يا مكانش منها أصلا مالا اتفضلي ماراني حابة نسمع لا هدرتك لا نزيد نشوفك صاي بان وجهك تاع الصح _ معليش ليام بيناتنا و نشوف كيفاه تندمي على كل جاست راكي ديري فيه _ روحي برك ولات خرجت زادت وقفت برا و تعيط مخلاتش طلت عليها ماما قالتلها والله ما تروحيش صح راح تشوفي حاجة ما تعجبكش و نزل المستوى تاعي ليك ماجات تروح بسيف سمعها لي يسوا ولي ميسواش ماما غلقت لباب و دورت شافت معاي بوحد النظرة تمنيت كون راني متتت و مشافتش فيا هكاك و طلعت مهدرتش معاي خلاص قتلتني بالبارد زربت لحقتها ماما وشبيك متقوليليش صدقتيها ،محبتش تهدر معايا دخلت لبيتها وقفلت الباب من وراها عيييت نطبطب عليها تخرج تهدر معاي والو قعدت قدام لباب و نبكي ،ياماما اخرجي اضربيني وعيطي عليا و مديريش كيما هكا حرام عليك جبت قريب ساعة وانا قاعدة في الارض ما حن قلبها لا والو ما خرجت ما حلت الباب و انا نحاول و نعاود فيها هزيت روحي ورحت الشومبرة تاعي طايشت بكيت بكيت حتى رقدت نضت مع لعشية عينيا منفخين حالتي حالة زربت خرجت من بيت قلت بلاك نلقى ماما تهدر معاي و نقدر نفهمها والو مزالت غالقة اوو. هادي مخرجتش خلاص من قبيل زدت طبطبت عليها مردتش عليا رحت للكوزينة و قعدت راح نتغم وحد إحساس مقدرتش نشرحو وحد الخيبة والخذلان الذل ولا إهانة حشمت من روحي مسحت عينيا من البكاء ونضت نفيض الحليب درك يجي بابا و خايفة منوو هو تاني يكون كشما سمع ولا راحو سمعوه علبالي مش راح يغفرلي ماما على الأقل مع الوقت نقدر نتقرب منها و نتفاهم معاها أما هو مكانش كيفاه لقيت ماما دخلت انا راح ننطق معاها حطت صبعها على فمها اشششت نفس تاعك منسمعوش مرانيش حابة يدخل صوتك لوذني خلاص لأنو علبالي نقدر نهز لموس هذا و نقتلك بكل دم بارد فهمتي وادعي أنو الهدرة متوصلش لباباك برك ولا شهدي على روحك _بصح علاه متفهميش مني أنا و تسمعيني راكي تظلمي فيا _ مظلمتك لا والو ما تلعبيهاش مسكينة عليا ونتي فترة اللخرة كامل و حوالك مقلبة وانا نقولك يا حووور كشما كاين احكي يا حوور تعرفيني أموور هادو منحبهمش و منتساهلش معاهم ياحور ياحوور نهار كامل وانا ننبح ونندب اه حتى يجو ناس هكا يبهدلو بيا قدام جيران على آخر عمري من شكون من بنتي _, وعلاه وحدة كيما هاديك تصدقيها والله ما درت لا برائد ما حوست نفسد بيناتهم وانا وين نعرفهم حتى نطيح الروح ولا نخليهم يتقابضو رائد اول مرة عرفتو ولا عرفت اسمو نهار خرجت معاك و تلاقيناه _ ما تبرري لا والو كنت مرانيش مصدقتها بصح غير قالت ظل في السوڨ معاه و تفكرت داك نهار كي رحتي معاي و ملقيتكش الله اعلم وين كنتي تم بردت بيا الدنيا و عرفت بلي واش تهدر صفية كاين صح _ سما قصدك نظل في سواڨ معاه هكا لدرجة هادي والله ما تغيض من صفية نقول راها تكرهني و زيد كي رفضت ولدها بصح تغيض منك نتي ما فهمتي لا والو بديتي تحللي و تفسري من راسك و تقذفي فيا ،نضت رحت للبيت قفلت طحت نبكي هذا شي راه والو من صفية بدات تلعب معاي من درك صح رائد شفتو في السوڨ بصح هو لي كان يعيط و يندب عليا مش أنا لي عدلت روحي و رحت نجري عندو نمدلو في روحي أصلا كون عيني نديرها درتها بكري مقعدتش للوقت هدا ودرك سبة كامل منو هو هاه وسخ سمعتي هنا وصل وين حاب يوصل انو يبطلني من حمزة و راح تمسخر بيا و لعبها عليا يحبني و معرف وشنو وهو والو كامل كذابين كيف بعضاهم حمدلله مزادش لعب بيا ووصل لحاجة اكثر ما هكا و طيشني و تم واحد ما يندب عليا وقفت رحت هزيت تلفون شفت معاه آخر آبال في شهر لي جاز ،الله لا تربحك نتا ورجال لي كيفك كلاب عيييت نحبس من البكاء مكنتش محوسة لا بابا ولا ماما يشوفو فيا هاديك النظرة تاع اني خذلتهم و كسرتلهم ظهورهم علاه يعني بقيت هكاك نطايش ساعة فوق سرير ساعات نولي نقعد في الارض كي نحس نار لاهبة فيا كي تغميت خلاص رحت غسلت بردت روحي توضيت و صليت طحت نبكي على السجادة مقدرتش نحبس حتى لقيت عينيا حرقوني بزاف و ثقالو خشمي تسد ومقدرتش نتنفس سع نضت نحيت عليا خيمار و طبقت سجادة تاع صلاة خرجت لقيت بابا هداك وين دخل يبان مش في حوالو خلاص يا خوفي كشما راحو قالولو والله نموت و نحيى و لي تغيض اكثر اني معنديش يد فيها الله غالب عليا شافني هكاك _ وشبيك حور كنتي تبكي علاه عينيك هكا منفوخين _ مقدرتش برك سطر و دوخة دارو فيا حالة _روحي ريحي خليك من خدمة دار _ خلي درك نحطلك حليب اشرب منبعد يرحمها ربي ،سما مادام يهدر هكا ما سمع والو وليت دخلت للكوزينة لقيت ماما تشنف عليا وانا نسخنلو في حليب سمعتو يعيط عليها ،ارواحي دقيقة نسحقك هزت روحها و خرجت عندو وانا كملت حطيتلو في لبلاطو و نستنى فيه يجي يشرب والو طولو حتى لقيتهم دخلوا بابا قعد شرب لحليب ليه ليه ووقف بعد خرج هو بلاك مزال ما قفلش باب برا و دور ليا ماما مدتلي وحد الكف عينيا دارو و حكمتني من شعري هكا يا الكلبة ديري لباباك جا مسكين سمعوه الهدرة في القهوة بصح هكاك و مظلمكش و مهدر والو و حب حتى يستفسر مني واش كاين الحمد لله لي عرفت كيفاه نقنعو بلي بلاك قصدهم على حمزة لي خطبها و شافونا نهار واقفين معاه مهم طببتها درك تهزي بعضاك وتروحي تعيطي لهذا المخلوق لي وصلنا للحالة هادي يجي يخطبك ولا يدبر راسو كيما لعب بيك يديك _ وشبيك ديري هكا شكون قالك لعب بيا و طيشني علاه اغتصبني وانا لا خبر ولا نظل برا نهوم معاه ولا نبات ليالي حاطة تلفون في وذني _ لالا غير توصل يمسك اقسم بالله لموس يذبحك _ مادام باقية هكا تتاهمي فيا و مش حابة تسمعي مني تقذفي فيا _ شوفي مرانيش حابة نسمعك ولا نفهمك لوقت لي كنت حابتك تفهميني و نعرف كلش نتي فمك كان مخيط ودرك كي تفضح كلش تحوسي تفهميني اعرفي بلي يا حوور حاجة لداخل توجع فيا مرانيش قادرة لا نسمع ولا نفهم ونصيحة مني غيير روحي لرائد هذا قولو يجي يحط عليك اليد خير من تبهديل لي راه صاير وخرجت ،قعدت من فشلة جامي ولكان حطيت بلي لحالة راح توصل بيا لهنا جاااامي حبييييت نعيط بالصوت لي عندي و نقول والله راني خاطيني هذا خفت نقولهم مع اللول و يفهموني غالط شوف وين وصلت بيا الامور نروح نحاولو يجي يخطبني انا لي كان يحاول فيا باه غير نهز عليه نرروح درك ليه و نقولو تعيش ارواح تخطبني والديا راني فضحتهم و ماما حابة تتهنى مني صفية كلبة راحت نشرت الخبر في كل بلاصة رحت للبيت هزيت تلفون نرعش دخلت لي ميساج مقدرتش نبعت و نحاول قلتلو يعطيك الصحة هكاك فضحتني و مرمدتني قدام الناس خليت لي يسوا ولي ميسواش يهدر فيا و في الشرف تاعي بابا يلوحولو في الهدرة و ماما مش قادرة تشوف فيا و تقولي بهدلتيني هادي هيا لغاية تاعك أنو تتمسخر و تهرب المهم بطلتني من خوك ورحت مالا حبيت نهنيك راك وصلت وين حاب و من عندي أنا مرانيش مسامحتك
و حطيت تلفون رحت حكمت بلاصتي بقيت نبكي حتى رقدت تنفخت من رقاد صباح ماما جات تخبط عليا في الباب نوضي نتي هيا نوضي _مرانيش قادرة _ غير لخير ان شاء الله علاه هذا باه تحكي و تتصوحبي قادرة وحاجة خلاف لا هياااا _ مفقتش بروحي كيفاه ولييت نعيط بالصوت اخطييينيييييي متزيديييش عليااااا حرااام عليك نبقا نهدر ونعااااااود مراني مصوحبة حتى واحد خليني في حالي كي متفهمنيش نتي شكون راح يفهمني جيران اه قولي كي متوقفيش معاي نتي و نحس واحد في كتافي راح يجي زعما واحد غريب يوقف جاااامي حبييييت يالوكان نهار في حياتي تفهميني ومتضغظيش عليا بصح نتي لالالاا منين تجيك فرصة تحصريني حتى نتغم وليت نخبط في وجهي خلوني في حاااالي يرحم والديكم راح نهبل حتى طحت خلاص مافقت بوالو نسمع في صوت ماما تهدر وجايني كي شغل بعييييد عينيا مرانيش قادرة نفتحهم ،ياربي طفلة هادي راني قتلتها حوور نوضي تعيشي وراس بنتي ما نزيد نهدر معاك حاجة دخل بابا يهدر واش صرا كي عيطتي مفهمتش واش راكي تهدري شافني هكاك مطايشة و راسي في حجر ماما جا يجري سعاد وشبيها حووور واش صرالها _معلباليش حتى لقيتها طاحت على طولها من قبيل نفيق فيها والو _ هيا هزيها لبسيلها نهبطوها لسبيطار بركاي مانلعبو بحياة طفلة انا نسمع فيهم بصح تقول ما عندي لا يدين لا رجلين مرانيش قادرة نتحرك عينيا ياربي وتقول غلقوهم ما حبو يتحلو لاحت عليا ماما خيمار طويييل و عباية لبستلي درعيها منبعد بابا ركزني عليه و قفلتها نوضتني بشوي و تقولي حووور هيا اتكاي عليا وعلى باباك و حركي رجليك بالعقل عيييت والو تقول طفل صغير هداك وين بدا يتعلم المشي ولا بابا هزني و هبطني لطاكسي لحقتو ماما و داوني لاكلينيك لي قريبة لينا دخلوني قاسولي السكر و لاطونسيون قالهم راهي ناقصة تغدية و زيد من ضغظ صرالها إنهيار بعدوها على أي حاجة تقلقها حطولي سيروم كي خلص كتبولي دواء و شوي فيتامينات و خرجنا خييير من كنت رجليا نلوح فيهم و حاكمة في بابا حاسة رقبتي تشبحت من عياط لي عيطتو قبيل ركبت من لورا و طرحت روحي خلاص و ماما راحت من قدام وصلنا بعد طلعت لفوق نحيت و رقدت ماحاسة بوالو ولا وين ربي حاطيني تقول في غيبوبة نحس غير بماما تجي فوق راسي تبقا تمسح على شعري و تبكي و تقولي سامحيني كون علبالي بيك توصل الامور هنا والله ماندير هكا بصح الله غالب نهار تولي أم تحسي واش كنت نحس لأنو مهما نشرحلك مش راح تفهميني مهما نكبرو من العمر كاين حوايج يبقاو اكبر منا لازم حتى نوصل لعمرهم ونعيشوهم باه نفهموهم هكاك نتي و تبقى غير تحكي تجيب حتى ساعة ولا اكثر ساعات نغفى ساعات نفيق ونبقى نسمع فيها كل مرة و كيفاه ......
