°°°
فتحت عيوني بصعوبة بسبب الشمس ..
حسيت بحرارة فضيعة بجسمي والعرق مغرقني ..بعض التراب كان بين ظهري وملابسي وراسي ينبض بألم وحاس بسائل يابس على جلدي ، قسم بالله يا إن أحداث ليلة أمس مرت على بالي فجأة في ثواني وفزيت بقوة وقمت متجاهل قد إيش جسمي مكسر ! حلقي جاف وثوبي وصخ ومقطع وبالقوة أمشي أصعد التل اللي طحت منه قدها الشمس بوسط السماء وحاارة تحرق ! حتى صوتي راح ! طلعت بصعوبة فوق التل وطحت على الأرض أتنفس بصعوبة وأحس إني بدأت أهوجس ! كتمة وحر وتعبان وكلي تراب ودم ولي فوق عشر ساعات منسدح والشمس تضربني وراسي ينزف ! أقسم بالله إني سمعت صوت نزار !
" تذكر لو أنمسكت إنت محد بينقذنا "
" وأسرع عشان ما يلحقون يسوون فيني شي "توسعت عيوني لما تذكرت إني تأخرت عليه حيييل !! حفشت الثوب وركضت بسرعة لمكان المخيم وطحت وتقلبت ورجعت قمت أركض أرركض لين بدأت أشوفه ! بسرعة أسرعت لين وقفت قدام المدخل بخوف وما كان في أي شيء حرفيًا غير أثار مضاربتنا و .. دم بكل مكان ! إقتربت عاقد حواجبي فعلًا دم دم ! حلف بالله إن اللي نزف هالكمية ميت يعني ميت ! يدي ترجف وكل ما أتخيل إيش ممكن صار له تدمع عيوني ! مسحت الدموع بخشم أحمر وخرجت أدور على أي شيء يوصلني للبيت ! مافي أثار سيارات قده الهواء محى كل شيء كنت أدور وألف زي المجنون وأنادي بصوت بالقوة أسمعه أنا
" نزاار .. نزاار "
الجو كئيب والريح حارة وتجيب المرض ، تجيب لك شعور باليأس والحرارة والرمال اللي على مد البصر ! كنت أمشي بلا وجهة أو طريق بس أتمشى وأنادي بإسم نزار وأتلفت لعل ألمح طيفه من بعيد ، الدم والذباب اللي كانوا متجمعين حول الدم إنعادوا براسي وزفرت بيأس وأنفاسي ثقيلة وناديت وناديت ولا أحد لبى نداي ، ناظرت للسماء وطيحت نفسي على الأرض وغمضت عيوني بتعب وهمست
" يا رب ساعدني "
تذكرت قبل أعرف نزار وقبل يتوفى أبوي الله يرحمه ، لما أختي ملاك كانت تبكي لأنها حلمت فيني وإكتشفت بعدها إن كل أهلي حلموا فيني ، هذا هو تفسيره ؟ معقول حلمهم تحقق ؟ سبحانك ربي ! غربت الشمس وأنا من تل لتل من منحدر لمنحدر تعبان وعطشان وجوعان وحرّان ، كم صار لي أتمشى ؟ من الظهر إلى أن غربت الشمس وأرجع أطيح على الأرض وأفقد وعيي من التعب وأنا ظنيت وقتها إني بموت خلاص ! المخيم إختفى وضاع ولا دريت وين أروح ووين أغدي ! لكني صحيت ! صحيت مو عشاني ، عشان نزار ، جسمي يتحرك من وحده وأنا عيوني تدور لأي شيء ممكن يفيدني !
أنت تقرأ
أُحـجِـيَـة | puzzle
Acción••• [ أُحـجِـيَـة ، القِطعَة الأخِيرَة ] ••• لَا مَعنَى لِلَوحَتِكَ حَتّى تَعثُرَ عَلَى تِلكَ القِطعَة الضَائِعَة مِنَ الأُحجِيَة . * تنبيه * ممنوع شتم البطل أو أهله وأصحابه لو عندك تعليق شين أحتفظ فيه لنفسك - عامية مقتبسة من قصة حقيقية