سكنت ملامحها من جملته المهَيبه الي ارعشتْ كل خليه في جسمها وكأن من بعد جملته نست كل الكلام الي كانت ناويه تقوله
اما هو كان ساكن وما بين تاره و تاره يسرق النظر يمها لحين ما نطق : كنتي ناويه تقولين شي ؟
لفت هي وتوترت من سؤاله ونَطقت بهدوءّ : باقي تنويّ الزواج من اخت خويك ؟
سكن لـ دقائقّ ونطق بهدوء عكس الضجيج الي بداخله : ما يصير الى كل خير ... تطمنيّ
هزت راسها وكأنها ارتاحت من كلمته " تطمنيّ " سكتت وسكرت على الموضوع
———————...—————
رجعوا للبيت والكل اتجه لغرفته
~
(دخلوا غرفتهم )
فسخ ناصر ثوبه وارتمى على السرير بتعب جات نوف بعد ما علقت عبايتها وجلست
لفت على ناصر : وش تتوقع بيكون البيبي ؟
ناصر اعتدل واحتضن كفوفها بـ كفوفه ونطق : الي يجي من الله حياه الله .. اهم شي يكونون يشبهون امهم
توردت ملامحها من الخجل .. ضحك ناصر : اوف طلعتي تستحين يا نوف ؟
نوف : اجل وش اسوي اكفخ وجهك مثلاً !
ضحك ناصر وانسدح وسحب الحاف ونام وما هي الا دقائقّ ونامت نوف
————————————-
.. يوم جديد ...
قامت هيام على دق الباب تأففت وقامت تفتح دخلت ريم : يالله صباح خير , عقدت حجاجها ونطقت : خير آنسه ريم وش بغيتي ؟
ريم : وش بغيت يا لبى روحتس .. انتي تجهزي الحقي على عمرتس
هيام : ليه وش فيه ؟ زاد قلقها من كلام ريم على بالها "ان احد فيه شي " راحت ريم وجلست على طرف السرير بتحلطم: قولي لي من بيشرفنا اليوم ؟ توقعي؟
هيام بهدوء : خالاتس ؟؟
ريم : اه ياربي متى افتك من ذي العيشه و اعرس وافحط في وجيهكم , كان خلف عند الباب يسترق السمع بس لما سمع جملة ريم دخل وهو يقول : ما اظن على وجهتس ذا احد بيطل فيتس
ريم : الى قل يا زيني و نيال الي بيحصل احد مثلي هذا امه داعيتله
خلف : الا قولي داعيه عليه عشانه ابتلش بوحده زيتس
ريم قامت : اف جيت افضفض من الكتمه وجيت انت وزودتها , وتنهدت : ما اقول الى الله يزوجني بواحد مليونير ينسيني اساميكم
خلف : انتي احمدي ربتس اذا جاتس علي ولد خالتي سميره
ريم بقرف: والله لو خلصوا الرجال وجاني ذا ماني قابله فيه من زينه وزين امه
خلف : يحصلتس الا حبي ايدتس وجه وقفى
ريم : رح زين , يلا لا تتاخرون الحين العجايز جايين
خلف دفها وهو يضحك : دايخه اقسم بالله
وقفل ولف على هيام : وانتي ماذا نوم ما شاء الله
هيام : تعبانه من امس , هنا خلف تذكر الي صار امس ونطق بقلق خاف اثر عليها : الا قولي باقي يوجعتس ؟ تعبانه !!
هيام ناظرت رجلها : لا لا بخير , ارتاح قلبه ونطق : زين زين
راح خلف وراحت هيام للحمام ( يكرك القارئ)
———-........——————-
بعد ما تجهزت القت نظره على نفسها بالمرايه الي امآمها
كانت لابسه فستان باللون الاحمر ملفوف على جسمها بطريقه مرتبه وكان عاري الاكتاف اما شعرها تركته منسدل على ظهرها عشان يغطيه واضافت اكسسورات فضيه وفيها حجر باللون الاحمر
نزلت بعدما تعالا الضجيج وهنا عرفت انهم وصلوا شدت على فستانها بتوتر وراحت لهم تسلم
دخلت عليهم وكان المجلس مليئ بالحريم ولفت لقت البنات جالسين واحت تسلم من نطقت وحده باستغراب : هذي من؟
ام سعد : هذي حرم خلف ولدي "هيام"
تعالى صوت وحده بينهم بقول : ماشاء الله عرف يختار خلف واحنا الي ما توقعنا انه بيعرس ، ماشاء الله اسم على مسمى يا هيام
ابتسمت هيام وراحت تجلس جنب نوف
نطقت ام علي "خالتهم سميره " : بس وش قصروا فيه بناتنا يا علياء
ام سعد : حشى يا اختي بناتكم جميلات ما شاء الله وكلن مأخذه من جمالها نصيب بس عاد ابو سعد والعيال الله يحفظهم ما بغوا الا هم
ام تركي : انتي يا نوف في اي شهر ؟
نوف : في الشهر الثالث
ام تركي : بس عاد توك صغيره تحملين عاد سمعت ان الي تحمل وهي صغيره يكون صعب عليها بعدين
ام الجوري : لا يا اختي من قالتس الا يمكن يموتون يا الجنين يا الام
نوف بخوف على نفسها وعلى الي في بطنها شهقت بخوف ونطقت : بسم الله
هنا ام محمد ما تحملت وقالت : لا يا اختي انتي وياها انا ربيت وانا صغيره ما صار بي شي لا تخوفون البنت ما راح يصير فيها شي بأذن الله
ام علي تاففت : ان شاء الله , الا وين ريم ما اشوفها
ام سعد : في المطبخ
ام علي : زين خليها تتعلم كود انها تعرس
كانوا الحريم يتكلمون والبنات على جنب يتهامسون
نوف نطقت ل هيام بخوف : يا بنت اخاف كلامهم يطلع صدق
هيام : لا وين يا اختي هذولا واضح ما عندهم سالفه والله صرت ما الوم البنات لا كرهوهم وش ذا؟؟
نوف : مسكينه ريم عمتي علياء حاكرتها في المطبخ عشان لا تطلع وتسوي مصيبه
نطقت ام علي بخبث ل هيام : وانتي يا هيام حامل ؟؟
هيام همست في اذن نوف : جاء دوري في التحقيق
ضحكت نوف ونطقت هيام : لا والله يا خالتي باقي مطوله
ام علي : هاو ليش ؟ لوم كنت مثلتس من اول شهر حملت
هيام ابتسمت : هذي انتي يا خاله مب انا
ام علي بطرف عين لما ما عجبها الكلام : وش تقصدين ؟؟
هيام : ابد سلامتس
ام الجوري : خلوا خلف و ناصر يدخلون نبي نبارك لهم
قامت حنين تناديهم ورجعت : خلف الحين جاي اما ناصر يقولون مدري وين راح
قامت نوف بتتصل على ناصر اما هيام كانت تطالع البنت ومنتظرتها تتغطى لفت مروى لقت هيام تناظرها وطقت كتفها بـ هيام : لا تأشرين ما راح تتغطى من زمان وهي كذا صار عمرها ١٩ وهي للان ما تغطت
هيام : حلوه ذي يقطون نصايح وما يطبقونها على انفسهم
تنهدت مروى : مدري عنهم , قطع كلامهم صوت خلف لما دخل وقال بصوته الجهوري : السلام عليكم , قاموا الحريم يسلمون عليه
ولما وصل عند " شذى " تخطاها وصد وراح يجلس بجانب هيام الي كانت بعيده منه قليلاً تكلمت ام علي : زعلتني منك يا خلف
خلف : عسى ما شر يا خاله الله يبعد الزعل منا ؟
ام علي : تاخذ بنت عمك وانت واعدني انك بتتزوج بنتي لا اعرست
"شذى بنت الخاله سميره "
خلف اعتدل ولد النظر بحركه سريعه ل ملامح هيام الي كانت متفاجأه وتناظر في ام علي
خلف : النصيب يا خاله وبنتك تستاهل الي احسن مني
تكلمت ام علي بخبث : ايه أن شاء لله
ام الجوري لفت على صفا : صفا قومي جيبي السماعه بنرقص
ولفت على خلف الي كان بيطلع : وانت وين رايح ليه جايبين السماعه اجل ؟
خلف : لا يا خاله انا طالبتس خليني اتوكل
جت صفا وشغلت ومسكت ام الجوري بكف خلف وبدوا يعرضون
وانضمت ام علي و ام تركي وام سعد وام هيام وام محمد والعمه شريفه
كانت هيام تناظر لهم والبنت الي كانت تناظر خلف بعدين قامت شدى ومسكت يد ام الجوري وبعدتها عن خلف وجات بجانبه
هنا هيام جن جنونها كيف وبأي حق تلمسين رجال متزوج لا والادهى من كذا قدام زوجته قامت هيام عناداً فيها ودفتها ومسكت يد خلف وبدت ترقص معهم خلف الي انصعق من حركتها ما ينكر انه كان فرحان من داخله اما شذى حقدت وجلست وهي زعلانه
خلصوا من الرقص وراحوا يجلسون اما خلف نزل ولحقته هيام خلف اف عليها : وش كانت ذيك الحركه ؟
هيام بأنكار : وش اي حركه ؟
خلف : حركت اليد وش تفسيرها
هيام توترت : خلاص ياخي بس كنت برقص حرام الرقص يعني وكانت بتروح بس مسك يدها خلف وسحبها جهته هنا هيام توترت وقالت بتعتعه : ودك شي ولا خلني اروح ؟؟
خلف : ما كملت كلامي اصبري , سكتت هيام وقال خلف : اذا ودك ما اتزوج قولي .... ما اردكَ !
