Cricket Chronicles

WC final thoughts

A/N: Just my take on this WC final

Haan maana ki hum final haar gaye par usse pehle das match bhi to jeete na. Itni achchhi journey rahi hai : Rohit ke starts, Virat ka beech mein date rehna, Bumrah ki accuracy, Shami ki karamaatein, itni achchhi camaraderie dekhne to mili- on field and off field moments khaas taur pe Rohirat ke, Dilip sir ke fielding medal ko kaun bhool sakta hai, hum subah uthkar sabse pehle vahi video to dekhte the.

Sabse achchhi baat to ye hai ki is baar lagbhag humari poori team ne contribute kiya, zaroorat padne par har kisi ne step up kiya, ye koi 2-3 man carryjob nahi tha balki hum sahi maayne mein ek team ki tarah khele, To humein apni team pe garv hona chahiye jo ki zaahir si baat hai humein hai bhi par more importantly, humein khush rehna chahiye.

Itni saari achchhi cheezon ko final hi sahi par ek bure match ke liye kyon bigaadein? Lagatar 10 match jeete hain, sabne performance kiya hai, mausami taur par bure din bhi to aate hi hain na, toh ek bure din liye itna achchha dedh mahina bigadne kya kya matlab hai, haan vo trophy sone pe suhaga zaroor hota par suhaga na sahi, humare paas sona to hai.

Ye para khaas un logon ke liye jo meri tarah bahut pehle se cricket dekhte aa rahe hain. Ye Rohit aur Ashwin la last WC tha, aur shayad Virat, Jadeja aur Shami ka bhi, Virat ke fitness ki baat mat kijiyega, fitness retirement ka iklauta karan nahi hota, recent example Lanning ka hi le lo. Ek baat to pakki hai ki hum in sabko dobara ek WC mein ek saath kabhi nahi dekhenge, to haar ya jeet, humein is WC aur is final ko bhulane ke bajay yaad rakhna chahiye, bitterly nahi par fondly, kyunki jaisa bhi ho, yahi ek aakhri baar tha, har kisiko to fairytale ending nahi milti na, to ye ending jaisi bhi hai, par apni hai.

Aur ye World Cup matches kya hai? Normal ODI matches jinka kitabi aur prestige ke taur par zyada mahatva hota hai. Records kitne bharosemand hote hain ye to hum sabhi jaante hain, 10 saal baad log kahenge Rohit Sharma overrated tha, toh hum unhe Rohit Sharma ki innings ka kya impact tha ye kaise samjhayenge, kyonki record books ye saari cheezein bayaan nahi kar sakte.

Aur rahi baat prestige ki humne poora tournament dominate kiya hai, we were the team to beat, humko harana hi har kisika dhyeya tha, isse badi baat kya ho sakti hai, ek match harne se kya prestige kam hota hai, so it's important that as ICT fans we walk proud and joyous and not with our shoulders slumped.

Aur ek aakhri baat, vo ladki yaad hai jo Aus ke medal distribution ke samay India-India chilla rahi thi? Vahi attitude hona chahiye humara. Samne valon ko crowd silent kar denge ye vo jo bolna hai bolne do, humara jawaab hona chahiye hi haar ya jeet, chaahe kuch bhi ho jaye, hum apni team ke liye gala faad ke cheer karte rahenge!

Bas itna hi kehna tha.

Jai Hind 🇮🇳