#حكاية_وعد (4)
وقفنا لما زين اخد وعد ورجعوا الڤيلا ووعد دخلت اوضتها تاخد شاور وترتاح علشان كانت تعبانه
بعد مرور بعض الوقت باب اوضة وعد خبط
وعد : ادخل
حسناء دخلت وقالتلها
: ها اي الأخبار دلوقتي
وعد اول لما شافتها حست انها مخنوقه مكنتش قادره تتقبلها قالتها بضيق
: كويسه كنت هنام خلاص
حسناء قربت وقعدت على طرف السرير وقالتلها
: زعلانه مني مش كدا
وعد : لا مش زعلانه هزعل ليه
حسناء : ع فكره كريم مبيحبكيش ياوعد ولو كنتي كملتي حياتك معاه كانت هتبقى جحيم لأنك هتعيشي مع شخص مش عايزك انتي اتفرضتي عليه مش اكتر
وعد كانت ماسكه نفسها بالعافيه علشان متعيطش من كلام حسناء الجارح وكانت بتحاول تنفذ كلام زين لما قلها اوعي تحسسيها انك مدايقه
فقالت بثبات
: ع فكره انا خلاص طلعت كريم من دماغي وقررت ابص على حياتي
حسناء بسعاده : بجد يعني خلاص راجعه مصر
وعد : لا مش راجعه دلوقتي في حاجه مهمه اوي وبتاعتي لازم اخدها معايا
حسناء بتعجب : حاجة اي
وعد بإرتباك : اقصد الباسبور بتاعي هه امال هرجع مصر ازاي
حسناء : اه الباسبور ع العموم انا مبسوطه اوي انك تقبلتي الموضوع عادي وبإذن الله ربنا هيرزقك بال يسعدك ياوعد
وعد وهي كاتمه غيظها: متشكره جدا ليكي تسلميلي
وبعدين قالت بصوت واطي من تحت سنانها
: ياخطافة الرجاله الهي تولعوا لو فكر ياخدك ف حضنه
حسناء : ها
وعد بضحكة مصطنعه: لا مفيش حاجه كنت بقول انا عايزه انام شويه وكدا
حسناء : اه تمام انا اسفه طولت عليكي
وقامت وهي بتقول
: تصبحي على خير
خرجت من الأوضه
وعد اول لما هي خرجت راحت ناطه من ع السرير بعصبيه وطالعه البلكونه وهي مش طايقه نفسها وعماله تكلم ف نفسها بغيظ وتقول
: يارب لو مش انا ال هاخده خده عندك انت يارب بس متخليهوش يتجوزها
وبعدين قالت بعصبيه
بقى انا اتساب علشان دي فيها اي حلو عني يعني
فجأه سمعت صوت حد بيقولها
: يمكن لسانها مش عايز قطعه زيك
بصت ناحية الصوت لقت زين واقف ف بلكونته
وعد بعصبيه : انت بتطلع منين كل مره
زين وهو واقف ماسك فنجان القهوه ف ايده اخد رشفه وقالها
: يمكن بطلع م البلكونه
