Unicode
" ဘယ်လို ဖြစ်ရတာလဲ ရန်ကြီးရာ "
" အလုပ်လုပ်မလို့တဲ့ေလ "
" အေးလေ ဒါတော့လုပ်ရမှာပေါ့ကွ "
ဒါဆန်းသလား။ လက်လှုပ်မှ ပါးစပ်လှုပ်ရမှာ။ သူရော ရန်ကြီးရော
ကြက်တိုက် ဖဲရိုက်တာအပြင် ဘာမှမလုပ်တတ်။ တစ်ဖက်ကအလုပ်လုပ်မယ်ဆိုတော့ ဘယ်လောက်ကောင်းသလဲ။
"ငါက သူ့ယောက်ျား သူ့ကိုနေမလောင်အောင်ထားချင်တာ
ငါနဲ့ယူလိုက်လို့ သူ့ဘ၀ ပျက်ပြီလို့ပြောနေတဲ့ ရွာထဲကပါးစပ်ပေါက်တွေကို ပိတ်ပစ်ချင်တာ "
" ဟ ရန်ကြီး ခြေမွေးမီးမလောင် လက်မွေးမီးမလောင်မဟုတ်ဘူးလားကွ "
" ငါက ထမင်းဟင်းမချက်တော့ဘူး အဲတော့ နေပူထဲ ပင်ပင်ပန်းပန်း မလုပ်ရအောင်တော့ ငါရှာကျွေးနိုင်တယ် "
လက်စသတ်တော့ ရန်ကြီးက အသစ်စက်စက် ယောက်ျားလေးကို
သူဌေးသားလို လက်ပေါ်တင် ဖူးဖူးမှုတ်ထားချင်တာ။ ဟိုက အလုပ်လုပ်မယ်ဆိုတော့ ဒေါသထွက်တာ ဒါကြောင့်ကိုး။ ညီမမှာ သာရှိရင် ရန်ကြီးနှင့် ပေးစားပြီး ယောက်ဖတော်ပစ်မှာ။
" သာဒင် ငါတို့ အလုပ်တစ်ခုလုပ်ရအောင် အရင်ကငါတစ်ယောက်ထဲ တုံးတိုက်တိုက် ကျားကိုက်ကိုက် နေလို့ရတယ် ခုသုတ ငါ့ဘ၀ထဲရောက်လာတော့ ကြက်တိုက် ဖဲရိုက်ရုံနဲ့ မရတော့ဘူး"
အဝေးကို ကြည့်ကာ ဆွေးဆွေးမြေ့မြေ့ ပြောလာသည့် ရန်ကြီးကြောင့် သူတို့ဖြတ်သန်းခဲ့သည့် ဘ၀ကို ပြန်တွေးမိသည်။
" မင်းက ဘာလုပ်ချင်လို့လဲ မင်းနောက်မှာ ငါရှိတယ်နော်
ဒါပေမယ့် ကိုယ်ပိုင်အလုပ်ဆို ပိုက်ဆံအရင်းအနှီးလိုတယ်ကွ "
သာဒင်အပြောကြောင့် သက်ပြင်းချမိသည်။ သူ့လက်ထဲတွင် ပိုက်ဆံများများမရှိပါ။ တစ်ကိုယ်ထဲဖြစ်တာရော ကြက်တိုက်ရင် ငွေရွှင်တာကြောင့်ပါ ရသမျှပိုက်ဆံ အကုန်သုံးပစ်တတ်သည်။ အရေးကြုံလာရင် သူ့လက်ထဲ ငါးပြားတောင် မနဲဖမ်းဆုပ်ရမည်။
ပိုက်ဆံ လေးငါးထောင်လောက်နှင့် သူများလက်အောက် မလုပ်ချင်ပါ။ ရန်ဘုန်းအောင်တို့ပိုက်ဆံမရှိပေမဲ့ မာနတော့ကြီးသည်။ တစ်သက်လုံး ဘယ်သူမှဂရုမစိုက်သလို နေခဲ့ပြီးမှ ယောက်ျားရကာမှ ရှိတဲ့ မာနလည်း ခေါက်သိမ်းရတော့မည်။ သူ့ကို ယူပြီးမှ မျက်နှာငယ်ရတဲ့အဖြစ်မျိုး မဖြစ်စေချင်ပါ။
