أميرة__أنا مش مصدقة يا وَنَس أنك هتتجوزي وتسبيني.
كنت سامعة كلام أميرة طول اليوم، عن أدد ايه هي خايفة أن يونس ياخدني منها بعد الجواز. النهاردة كان الفرح وكنت متوترة وخايفة، أنا داخلة على حياة جديدة ومش عارفة هعمل ايه.
كنت قاعدة في مكاني وجسمي كله بيترعش،بعد ما خلصنا كتب الكتاب، مكناش عاملين فرح كبير، هو حاجة صغيرة على القد في البيت بتاعهم، واللي أتضح انه كبير وشكله مخيف ومش مريح خالص بالنسبالي وكأنه بيت خارج من فيلم رعب.
حسيت بأيد يونس بتمسك كفوفي زي ما يكون حس بيا وبتوتري، بصيت على ملامحه اللي كانت قريبة مني، شعره البني وعيونه الزرقة اللي مدموجة في الرمادي بشكل مناسب ودقنه وملامحه المريحة ودقنه البارزة، كان شخص مثالي بالنسبالي ومعرفش ازاي القدر حطه في طريقي.
يونس__خايفة؟
وَنَس__هموت من الخوف.
يونس__أنا معاكِ.
ابتسمت بهدوء وضغطت على أيده، وفضلت طول اليوم لحد ما الفرح خلص ماسكة في ايده، اللي لأول مرة ألاحظ أن عروقه بارزة ولونها غامق بشكل غريب بس مميز.
كنت واقفة مع يونس لما يوسف جه وشده من ايده، ووقفوا بعيد، يوسف مكنش شبه يونس خالص واللي يشوفهم ميقولش أخوات، يوسف كانت عيونه لونهم أخضر غامق وملامحه حادة وعنده دقن وشعره لونه أسود.
يوسف__لقتها.
يونس__هي اية دي اللي لقتها؟
يوسف__لقتها يا يونس، ركز معايا شوية.
يونس__بتهزر!؛ هي مين؟
يوسف__أميرة.
يونس__صاحبة وَنَس؟
يوسف__بالظبط.
يونس__طب ما ده حلو، فين المشكلة؟
يوسف__المشكلة ان أنا بحب واحدة تانية؛ وأنتَ عارف.
يونس__بس دي الجزء الناقص من روحك!
يوسف__عُمر أخوك متجوز واحدة تانية وعايش عادي اهو.
يونس__لو مسمي اللي عُمر فيه عايش عادي تبقىٰ مُغفل.
يوسف__لو كانت ظهرت قبل ما أقابل مريم؛ مكنتش هتردد لحظة أني اقرب منها.
يونس__اللي أنتَ شايفه صح لـ حياتك أعمله.
كنت واقفه بليل بتفرج علىٰ الهدوء والليل ، ومستمتعة بـ نسمة الهوا البارده اللي بتلمس ملامحي ؛ وبتدل علىٰ قرب الشتا ،فصلي المفضل.
يونس__بتعملي ايه؟
وَنَس __بتفرج علىٰ الليل.
يونس__الشتا قرب.
وَنَس __نفسي أشوف التلج وهو بينزل.
يونس __ بس أحنا معندناش تلج في مصر.
أنت تقرأ
مطر أغسطس
Romance⥢يبحث يونس عن نصفه الآخر. ⥢قصة حب بالعامية. ⥢الرواية قيد التحويل لنسخة فصحى. جميع حقوق الرواية محفوظة بالكامل للمؤلف. لا يُسمح بالنقل أو الاقتباس دون إذن مسبق.
