يوسف__يعني أيه يا مريم مش عايزة تكملي؟
مريم__يعني مبقتش قادرة أكمل يا يوسف ، ملهاش معنىٰ تاني.
يوسف__طيب ليه ، ماحنا كويسين سوا.
مريم__يا يوسف أنا مبقتش قادرة أتحمل الوضع ده ، أنا مليش مكان فـ حياتك.
يوسف__يا مريم أنا بس مشغول الفترة دي .
مريم__المشكلة مش فـ أنك مشغول ، المشكلة فـ مشاعرك ، أنا طول الوقت مش حاسة أن ليا مكان في مشاعرك ، دايمًا حاسة أن في حاجة ناقصة.
كنت عارف أن اليوم ده هيجي، بس متوقعتش أنه يجي بالسرعة دي. أنا كنت فاهم كويس أيه الحاجة الناقصة اللي بتتكلم عنها مريم، أنا دايمًا بقدملها نص قلب ونص مشاعر ونص روح.
والدنيا أتلغبطت أكتر بعد ظهور أميرة؛ اللي أنا مش قادر أبطل تفكير فيها، أو أراقبها من بعيد.
يونس__وناوي تعمل ايه دلوقتي؟
يوسف__مش عارف، الغريب أن أنا مش حاسس بـ حاجة.
يونس__عشان مكانك مع أميرة مثلًا.
يوسف__أنا كدا يعتبر بستغل أميرة، لما حياتي كانت ماشية بدماغي؛ كنت بحاول ابعد عنها، ودلوقتي لما كل حاجة باظت هروح أدور عليها؟
يونس__وليه متقولش أن حياتك كانت بايظة، ودلوقتي هتصلحها.
يوسف__يا يونس أنتَ مش قادر تفهمني.
يونس__لاء أنا فاهمك كويس، بس أنتَ اللي مش عايز تبص للحياة غير بالنظرة الضيقة دي.
يوسف__الحياة مش وردي زي مانت مفكر.
يونس__أنا مش مفكر الحياة وردي، أنا بس عارف أزاي أكون راضي بكل حاجة ربنا كتبها، وده اللي لا أنتَ ولا أخواتك عارفين تعملوه.
يونس عنده حق، أنا فعلًا عمري ما كنت راضي عن الحياة دي، ولا اللعنة اللي واقعين فيها، وبحاول أهرب منها.
بعد مرور شهرين...
أميرة__أنتَ بتعمل ايه هنا؟
يوسف__جاي عشانك.
أميرة__عشاني أزاي يعني؟
يوسف__ممكن نقعد نتكلم سوا ؟ وهشرحلك كل حاجة.
ملامحها كان واضح عليها الأستغراب، أيه اللي ممكن واحد غريب زي يحتاجه منها.
يوسف__مش عارف أبدأ منين.
أميرة__الموضوع كبير أوي كدا؟
يوسف__أنا حابب أن أحنا نقرب من بعض.
أميرة__نقرب من بعض أزاي يعني؟
يوسف__أنا حاسس بـ مشاعر حلوة ناحيتك.
أميرة__لحظة بس؛ هو مش أنتَ بتحب حد علىٰ ما أذكر يعني!؟
يوسف__كان في فعلًا حد فـ حياتي، بس محصلش نصيب نكمل سوا.
أنت تقرأ
مطر أغسطس
Romance⥢يبحث يونس عن نصفه الآخر. ⥢قصة حب بالعامية. ⥢الرواية قيد التحويل لنسخة فصحى. جميع حقوق الرواية محفوظة بالكامل للمؤلف. لا يُسمح بالنقل أو الاقتباس دون إذن مسبق.
