جاهل في طريق الحب

البارت العاشر

اخذت بيان جوال رهف ودقت على راكان بس راكان ما كان يحب يرد على الارقام الجديده الي تدق عليه بس مدري وش صار ورد واول ما سمع صوت بيان قالها بنت جوال من ذا الي تكلميني منه
بيان : هههههههههههه هد هد يبوي ذا جوال رهف نبيك تيجي تأخذنا اخلص علينا يولد نبي نروح البيت تعبنا من السوق والفرفره
راكان اول ما سمع اسم رهف انبسط لانو صار عنده رقمها وقال لبيان ابشري الحين جايكم بس وين انتم فيه ؟
بيان : مكان ما نزلتنا بس عجل بالله عليك
راكان : يلا يلا جاي فمان الله
قفلوا المكالمه وبيان اعطت رهف جوالها وقالت لرهف : راكان جاي مب صعبه لو كلمتيه ولد عمك على فكره مب عدوك
رهف : وش دخل عدوي ما عدوي بس خلص ما احب اكلمه شدخلك انتِ
ريهام : انتم بزران ؟ خلاص عاد يا بيان البنت ما تبي تكلمه بتغصبيها ؟ وانتِ يا رهف لا تشديها
بعد ما تكلمت ريهام كلهم سكتوا بعد بخمس دقايق او عشر دقايق وصل راكان شافهم بس هم ما كانوا منتبهين دق لهم بوري وراحوا له ركبوا السياره
بيان : وش كل ذا تأخير لو انك جاي من امريكا كان وصلت وش ذا سلحفاه انت ؟
ريهام : ذي مب ناويه تسكت يا بنت الحلال تضاربي مع كل من هب ودب ؟ قبل شوي رهف والحين راكان اهجدي الله يصلحك خلاص
راكان توسعت عيونه يوم عرف انها هاوشت رهف بس ما تكلم قال بنفسه بعلمها شغلها بالبيت وقال لبيان خير ان شاء الله اتخطى القوانين والانظمه عشان اوصل حضرة جنابك ؟ في بالبلد ذي قوانين للسير اذا مب عاجبتس كان رحتي البيت بتكسي كلهم قعدوا بالسياره بدون ما ينطقون بحرف الا انتِ شفيتس متغيره ما كان يطلعلك حس شفيتس الحين ؟
بيان : ياخي والله اني تعبانه خلاص فكوني وصارت تبكي بدون صوت بس يعني دموع
رهف حست انها تبكي ارسلتلها سناب شفيتس تبكين من راكان ؟
بيان شافت الرساله وطالعت برهف ورجعت نزلت راسها بجوالها وكتبت لرهف اي ياخي وهو متغير علي كان مره قريب مني الحين مدري شفيه كذا ومره شادها معي وهو يدري اني ابكي على اتفه الاشياء ومع ذلك بهدلني وياريت لو كنا لحالنا بهدلني قدامك انتِ وريهام
رهف : عادي خليتس قويه لانو انا عندي عبدالعزيز زي كذا دايم يبهذلني  مع اني اخر العنقود المفروض ماله شغل فيني بس كل ما زانت الجلسه بهذلني وانا اقوى من كذا ما كان يهز فيني شعره بس بعض الاحيان اتضايق منه بس كنت دايم اقوله مدام ابوي موجود الله يطول بعمره انت مالك شغل فيني البس الي ابي اطلع مع الي ابي مالك شغل وهو كان يسكت لانو ماله شغل وهو الحين عنده حرمته وعياله خليه يتحكم فيهم مب ييجي يتحكم فيني هو اخوي الكبير على عيني وراسي بس مب لذي الدرجه
بيان : خلاص اصلا اخر شي بيجي يعتذرلي لانو عارف انه اوجعني يوم بهذلني
بس المصيبه انها ما كانت تدري انه يبي يبهذلها وما يبي يصالحها
وصلوا بيت ابو عبدالعزيز عشان رهف قال راكان : تبيني انزلتس اغراضتس ؟
رهف : لا انا بشلهم ( رهف وراكان وريهام وبيان كانوا ناسيين انو اهل رهف مسافرين ومافي احد بالبيت )
ريهام : يولد خلك منها شيل لها الاغراض اخلصوا علينا
نزل راكان واخذ اغراض رهف وقالها يلا تعالي
رهف : ياربي طيب جايه
ضحك راكان بنفسه وناظر من شباك السياره وقال لخواته بس انزل اغراض رهف  واجيكم مب مطول بس لاحد يلعب وينزل من السياره
ريهام : ابشر بس اخلص علينا
دخلوا البيت راكان ورهف ورهف تذكرت انو اهلها مسافرين وقالت
رهف : يارب الغباء نسيت انو اهلي مسافرين
راكان : اي صحححح وش ذا معنا كلنا زهايمر
رهف : منجد ،كيف ابي اجلس الحين لحالي دقيقه بروح اكلم امي وباجي
راكان : بتيجين عندنا ،طيب روحي كلميها
رهف ما ردت على راكان وراحت دقت على امها واول ما ردت قالتلها : السلام عليكم يا ميمتي وش ذا والله لكم وحشه يا يمه تخيلي نسيت انكم مسافرين وخليت راكان يوصلني بيتنا وانا الحين بالبيت وين اروح وش اسوي ؟
ام عبدالعزيز : هلا وعليكم السلام يا بعدي راح راكان ولا باقي موجود ؟
رهف : لا باقي موجود هو وريهام وبيان ليه ؟
ام عبدالعزيز : يا يمه الله لا يهينتس تروحين معهم لبيتهم خلاص يا يمه يارهف باقي يوم ونرجع يلا يا يمه اخر يوم تحميلهم
رهف : اوف يا يمه والله اني تعبت حاسه نفسي ثقيله عليهم ابي ارجع البيت
ام عبدالعزيز : يا بعد روحي والله اني داريه بس وش نسوي بس ذا اليوم بس روحي عندهم يلا يمه 
رهف : ابشري يا يمه ابشري بس عشانتس
ام عبدالعزيز : تبشري بالجنه ياروحي انتِ يلا يمه انتبهي على نفستس فمان الله
سكرت رهف المكالمه وقالت ياربي وش ذا والله طفشت كل شويه شايفته مقدرررر مقدر اتحمله يارب قويني وطلعت من الغرفه وشافت راكان واقف وقالها : وين تبين ترجعين معنا بيتنا ؟
رهف : اي اي باجي بيتكم ،استغفر الله ياربي مابي اجي بيتكم خلاص طفشت مابي اشوفك مابييييييييي
راكان : افا ليه ماتبين تشوفيني افا شايفتني جني ؟
رهف حست انها جابت العيد وقالت : لا احس نفسي ثقيله عليكم وعليك خصوصًا لانك توديني وتجيبني غير كذا مافي شي
راكان ابتسم ابتسامة خبث وقال: بس عشان اوديتس واجيبتس
رهف خافت من ابتسامته وقالت وهي متوتره : اي بس عشان كذا ولا ايش في شي ثاني ان شاء الله بس لانك ابن عمي يعني انك زي اخوي حسيت نفسي ثقيله عليك ( رهف ما كانت تدري وش قاعده تقول وقاعده تهبد اي شي لانها توترت منه )
راكان : لا ولا شي بس انا اسألك متأكده (طبعا راكان لما قالت له عشانك ابن عمي وزي اخوي شوي ضاق ) طيب يلا يلا مشينا خواتي يستنونا
رهف طلعت ورا راكان وهو شايل اغراضها  وهي حاسه نفسها جابت العيد وحست انه ضاق منها يوم قالت انه زي اخوها وطبعا هي شوي وتنفجر توتر من ابتسامته ركبوا السياره وراحوا البيت طبعا طول الطريق محد تكلم وصلوا البيت ونزلوا هم وراكان لحقهم باغراضهم البيت وهنا انتهت اكثر ليله حزينه بالنسبه لبيان عشانها نامت زعلانه من راكان
وراكان كان ضايق من رهف شوي عشانها قالت انه زي اخوها
وريهام ما كان فيها شي بس جاتها ضيقه كذا فجاه
ورهف الي كانت كل ما غمضت عيونها تشوف ابتسامته ووجه وتسمع صوته
( خلص البارت العاشر🌟 اتمنى تقدرون تعبنا بنجمه 🥹💗)