Revenstice

Jigsaw ; With parts of Human's Body - 1.1

{Unicode }

ထူးလွင်ဆန်း ကားကို ကားပါကင်တွင်ရပ်ပြီး စက်သတ်ထားလိုက်သည်။သို့သော်ကားပေါ်က မဆင်းသေးဘဲ လက်ထဲက စာရွက်ခေါက်လေးကိုဖြန့်ဖွင့်ကာ ထပ်မံပြန်ကြည့်နေသည်။ထိုစာရွက်လေးက သူ့ဆေးရုံကဆင်းတော့ အဖိုးသောင်းတင့်ကိုသွားနှုတ်ဆက်စကားပြောပြီးအပြန်မှာ အဖိုးသောင်းတင့်က သူ့လက်ထဲထိုစာရွက်ခေါက်လေးထည့်ပေးလိုက်သည်။

ထိုစာရွက်ထဲတွင် မြေပုံတစ်ခုပါသည်။ သူထိုလမ်းညွှန်မြေပုံအတိုင်း လာခဲ့ခြင်းပင်။သို့သော်ထိုနေရာသည်ကား အနောက်ခရိုင် ၊ ရပ်ကွက် ၃၁ အပိုင်ထဲက သုသာန်သင်္ချိုင်းတစ်ခုဖြစ်နေသည်။ ထိုသင်္ချိုင်းသည် ၂၀၁၀ ခုနှစ်တွင် ပိတ်ထားခဲ့ပြီးဖြစ်သည်။ဒါကြောင့် ဟုတ်မှဟုတ်ရဲ့လား။လမ်းများမှားသလားဆိုသည့်အမှတ်နဲ့ မြေပုံကိုပြန်စစ်နေမိသည်။

နေရာ က ထိုနေရာအမှန်ပင်။ထူးလွင်ဆန်း သိပ်ရှည်ရှည်ဝေးဝေးတွေးမနေတော့ဘဲ.. ကားပေါ်ကဆင်းကာ သင်္ချိုင်းထဲဝင်သွားလိုက်တော့သည်။အထဲတော်တော် လှမ်းလှမ်းအထိဝင်ပြီးမှ မြေပုံထဲကတည်နေရာကို သူရောက်သွားသည်။

Dennis Lee

1996~2006

Rest in Peace

ကျောက်တိုင်လေးစိုက်ထားသည့်မြေပုံလေး။သန့်သန့်ရှင်းရှင်းသပ်သပ်ရပ်ရပ်လေးရှိနေသည်။

သူ့ဘေးနားကပတ်ပတ်လည်ကမြေပုံတွေ၏အထက်၌ပင် မြက်ပင်တွေကအရှည်ကြီးဖြစ်နေပြီး Dennis ၏အုတ်ဂူကိုဝေးဝေးကလှမ်းကြည့်မည်ဆိုရင်တောင် မမြင်နိုင်ပေ။

ထူးလွင်ဆန်း ကျောက်တိုင်လေးကိုကိုင်ကြည့်တော့ ဖုန်တောင်သိပ်ရှိမနေ။တစ်ယောက်ယောက်က အမြဲလာပြီး သန့်ရှင်းရေးလုပ်နေသည့်သဘောပင်။ ဒီကသန့်ရှင်းရေးဝန်ထမ်းကတော့ သူ့အုတ်ဂူပဲတော့ကွက်ပြီး သန့်ရှင်းရေး လုပ်မှာမဟုတ်ဘူးလေ။ကျောက်တိုင် မှာ Dennis Lee ရဲ့ဓာတ်ပုံကတော့ရှိမနေ။

"ပန်းတွေကလည်း လန်းနေသေးတယ်.... ငါက မင်းဒီမှာတစ်ယောက်တည်းနေနေရပြီး.. အားလုံးရဲ့အမေ့လျော့ခံဖြစ်နေမယ်လို့ ထင်ပေမယ့်.. တစ်စုံတစ်ယောက်ကတော့ မင်းကို သတိတရရှိနေပေးသေးတယ်ထင်ပါတယ်.."