Unicode
"မင်းရဲ့လက်ကို ထိန်းတတ်အောင်လည်း အခုကတည်းက ကြိုးစားထား။ ဘယ်နေရာမဆို အင်အားကြီးတာနဲ့ပဲ အလုပ်မဖြစ်ဘူး။ အဓိကအချက်က ဒီအင်အားကို လိုသလို အတိုးအလျှော့နဲ့ ကိုင်တွယ်နိုင်ဖို့ပဲ"
စကားအများကြီး ပြောလိုက်ပြီးနောက် အကြံပေးအရာရှိသည် ရေနွေးကြမ်းခပ်နွေးနွေးအား အနားယူသောက်သည်။ အနည်းငယ် ဖြူဖျော့နေသော နှုတ်ခမ်းသားတွေသည် ရေနွေးကြောင့် အတန်ငယ်အရောင်ပြန်စိုလာရာ ချန်းယောလ်အကြည့်ကို ခက်ခက်ခဲခဲ လွှဲလိုက်ရသည်။
"မင်းအခုအတန်းချိန်တွေကို ဖယ်လိုက်ရင် ဘယ်အချိန်ဆို စအားပြီလဲ"
".....ဗျာ"
အာရုံက ထိုလှုပ်လီလှုပ်လဲ့ နှုတ်ခမ်းပါးပါးတွင်သာ အခြေတည်နေရာ အကြံပေးအရာရှိ၏ မေးခွန်းကို မနည်းပြန်တွေးယူလိုက်ရသည်။
"ကျွန်တော် ..... ၆နာရီနောက်ပိုင်းဆို အတန်းချိန်တွေ မရှိတော့ပါဘူး"
"အင်း။ ဒါဆို တစ်ပတ်ကို ၂ရက်ပေါ့။ တနင်္လာနဲ့ ကြာသပတေးပဲ။ ၆နာရီကနေ ၈နာရီအထိ"
ချန်းယောလ်ဦးနှောက်သည် မျက်စိရှေ့မှ အမျိုးသားပြောသွားသမျှအား တစ်လုံးတစ်ပါဒမှ နားမလည်လိုက်သလိုပင်။
"ဗျာ ?"
ဒုတိယအကြိမ်မြောက် ဗျာသံပြုလိုက်တော့ အကြံပေးအရာရှိ၏ စိတ်မရှည်သလို အကြည့်များက သူ့ထံသက်ရောက်လာသည်။
"မင်းရဲ့လက်မောင်းနဲ့ ပတ်သက်ပြီး ပြောနေတာ။ အဲ့ဒါကို control ဖို့ ငါ့အပြင်ဘယ်နည်းပြမှ မင်းကိုအချိန်ကုန်ခံပြီး train ပေးမှာမဟုတ်ဘူး"
နားမလည်၍ ကြောင်အနေသော ချန်းယောလ်ဦးနှောက်သည် ယခုအကြံပေးအရာရှိ နှုတ်မှထွက်လာသော အသိပေးချက်ကြောင့် ဗုံးပေါက်သွားသည့် နှယ် ထပ်မံကြောင်အသွားရပြန်၏။
အကြံပေးအရာရှိက ........ သူ့အား သီးသန့်အတန်းခေါ်ပေးမည် ဟု ဆိုလိုနေသည်လား ?
အိမ်မက်လား ?
"ကျွန်တော် .... ကျွန်တော် တစ်ယောက်တည်းလား"
