Unicode
ချန်းယောလ်၏ ပတ်ပတ်လည် အမြင်အာရုံသည် အခိုးအငွေ့များဖြင့် ထူထပ်နေပြီး မည်သည့်အရာကိုမျှ ရှင်းရှင်းလင်းလင်း မမြင်ရချေ။ သူမည်သည့်နေရာတွင် ရောက်နေသလဲ၊ ဘာတွေဖြစ်နေသလဲ သေချာ တွေးတောမစဥ်းစားနိုင်သေးခင်မှာတင် ပတ်ပတ်လည်က အခိုးအငွေ့တွေက အသက်ရှူလမ်းကြောင်းထဲ တိုးဝင်ပိတ်ဆို့လာတော့သည်။
မီးလောင်နေသည်။
ဤတစ်ချက်တော့ ချန်းယောလ် သေချာသွားရကား အင်္ကျီစကိုဆွဲမလျက် နှာခေါင်းကိုတစ်ခါတည်း တန်းအုပ်လိုက်သည်။ ထူးထူးဆန်းဆန်းပင် အင်္ကျီသည် သူမစ်စ်ရှင်တွင် ဝတ်ထားသော အဖြူရောင်တပ်သား ယူနီဖောင်း မဟုတ်နေခဲ့။ မကြာသေးခင်ကမှ ဓားထိုးခံထားဟန်ရသော သွေးစွန်းကွက်များလည်း မရှိနေဘဲ သာမန်အိမ်နေရင်း တီရှပ်အနက်ရောင် ဖြစ်နေခဲ့သည်။
ထိုအင်္ကျီသည် ယခုတွင်တော့ ဖုန်ကမ္ဘာထဲ ဆယ်ဘဝ လှည့်လည်ခဲ့ဟန်ရကာ မီးခိုးရောင်ပင် ပြောင်းလုလု ညစ်ပတ်နေပါ၏။ ထို့နောက် လက်တွေ။ ခါတိုင်း မြင်နေကျ ရင်းနှီးနေသည့် သံထည်ကို မတွေ့ရဘဲ သူ၏လက်နှစ်ဖက်လုံးသည် အကောင်းအတိုင်း ရှိနေသေးသည်ကို သတိပြုမိလိုက်သည်။ ဘာတွေဖြစ်နေသလဲ စဥ်းစားဖို့ အချိန်မရသေးခင်မှာပင် ချန်းယောလ်နားထဲ ဝင်လာသည့် အော်ဟစ်ငိုယိုသံများကြောင့် အသံလာရာဘက် ခေါင်းမော့ကြည့်မိလိုက်သည်။
ထိုအသံတွေထဲက တစ်လုံးတစ်လေကိုမျှ ချန်းယောလ် နားမလည်သလို ရင်းလည်းမရင်းနှီးချေ။ သို့ပေမယ့် သူ၏ခြေလှမ်းတို့က သူ့အမိန့်ဖြင့် လှုပ်ရှားနေတာ မဟုတ်သည့်အလား သူကိုယ်တိုင်ပင်မသိလိုက်ပါဘဲ မီးပြင်းနေဟန်ရသော ဆန့်ကျင်ဘက် ဦးတည်ရာသို့ ပြေးထွက်မိသွားသည်။
ရောက်ရှိသွားသည်က သော့ပိတ်ထားသော အခန်းတစ်ခုထံ ဖြစ်ပြီး ချန်းယောလ်ထိုတံခါးအား ချက်ချင်းပင် ခန္ဓာကိုယ်နှင့် တိုးဆောင့်ဖွင့်ချလိုက်သည်။ နှစ်ချီကြာမြင့်သည့်တိုင် အသစ်လဲထားမှုမရှိတာကြောင့် ဆွေးမြေ့နေသော သစ်သားတံခါးက ဘယ်လောက်မှ အားမသုံးလိုက်ရဘဲ ချက်ချင်းပင် ဝုန်းကနဲ ကျိုးပဲ့ပွင့်ဟသွားသည်။
