آآه من قلب (ن) غدا حبه جنوني..

1

على ايــام البرد و الهوا القويه من شدتها تقطع الشيـر ,, و صوت البرق والرعد القوي ,, والامطار الغزير ,, و الجو البــارد من الخـاطر ,, ولا طيـر يطيـر فـ هالجو من كثر ما هوه يخوف ,, وعلى صوت الصُراخ و الصيـاح ,, كان في واحد يكرهه بنتـه لـدرجه انه يضربها كل يوم ,, ويدعي عليها بـ الموت كل يوم ,, ويضربها من شدة الضرب ساعات دم ينـزل ,, خلوني اعرفكم ع البنيـه ,,


فطـامي ,, عمرها 18 ,, ثالث ثانوي آخر سنه (طلعو النتايج الحين بتبدا الأجازه) ,, على نيتها و مالها خص فحـد ,, طيبـة و قلبها ابيض وتحب الكل ,, ونفس الوقت مظلومــة ,, جمالها رباني طالعه على امها ,, جمالها جمال الهنـود ,, شعرها طويل لين ركبتها اسود سواد الليل وغليض ,, عيونها وســاااع و سود ,, بشرتها بيضا هب وايد بس اوكيه ,, واللي محلنها غمزاتها الخفيفه ,, و خدها اللي ع كل شي يحمر لووول ,, وخاصه يوم تستحي .. و حبة الخـال اللي على خدها ,, مغززه شويه ,, وعليها جسم ماشالله عليها ,, وصوتها العذاب ,, بس يوم تبا تضارب تضارب صدق لانه محد يسلم من لسانها بس يوم تعصب اكثر شي ,, امهـا متوفيه يوم يابتها ,, وعقب تزوج ابوهـا وكان فـ خاطره انه فطوم تكون الولد ,, و من جي يكره فطوم ,, و ام فطـامي هنديـه وكانت حليوه و فطـامي تاخذ من امها وايد بس طبعاً فطـامي احلى ,, ومرت ابوها ماتحبها لانها تغار من فطـامي و بجمالها الربـاني ,,

:: يـوم الخميــس ::


على صوت اذان الفير كانت فطـامي ناشه عليه ,, وعقب سارت تاخذ شاور و وعت ابوها و مرت ابوها و عقب سارت اتصــلي و تقرالها كمن آيه ,, ويوم خلصت حضرت الريـوق و دخنت البيت و عدلته و نظفته ,, كــل يوم على هالحـاله ,, وهيه صابره ,,


وعلى الساعه 6 ونص .. سارت فطـامي تلبس ثيـاب المدرسه و لفت شعرها الطويـل و حطت جحال خفيف و حطت شيلتها على راسها و نزلــت تحت ,, شافت ابوها و مرته ,,


فطـامي: السـلام عليكم ,, صبـاح الخيـر ,,
بو فطـامي + ايمان ((اللي هيه مرت بو فطـامي )) : وعليكم السلام ,,
فطـامي : شحالك ابويه ؟ شحالج عموه ؟و حبتهم على راسهم
بو فطـامي : يسرج
ايمـان : كنت بخيـر
فطـامي حطت فخاطرها و سكتت و جان تسير تشوف التيلفزيون شويه ,, ويوم خلص ابوها من الريوق شافها بعدها ماسارت المدرسه ,,
بو فطـامي : انتي بعدج ماسرتي المدرسه ؟!!
فطـامي : ليش ابويه تباني اسير الحيـن !! محد فالمدرسه !!
بو فطـامي : مالي خص مسودة الويـه ان شفتج عقب الساعه 7 الا ربع فالبيت ماتلومين الا عمرج فاااهمه !!
فطـامي انقهرت و بدون ماتحس قالت : ابويه شو تباني اسير اخم المدرسه من الحين ,, حرام عليك اذا انته ماتباني ايلس وياكم قولي بسير برع لين ما تستوي 7 !!
بو فطـامي يمط شعرها و يوقفهـا : والله و طول لسانج يا بنت الهنديه ,, ماتستحين على ويهج ,, وهوه يضربها ,, انا ابوج تقوليلي هالرمسه هاا ,, ويضربها بالقو,, ان طولتي لسانج مره ثانيه ماتلومين الا عمرج بذبحج بايدي فاهمه و يهدها على الارض ,,
فطـامي والدموع فعيونها : مشكــور ابويه ,,
ايمـان : تستاهل بنت اللذين ماتستحي ..
بو فطـامي : والله لا اعيشها الليل نهار و نهار ليل !!
ايمـان : خلاص الغالي ريح ولا تشيل هم خلها تولي ,,
فطـامي تسمع الكلام و تحس جنه حد يطعن قلبها و سارت فوق تسحي شعرها و عدلت عمرها وتذكرت الجاكيت الوردي هديه من ربيعتها لبسته ,, ونزلت تحت و سارت المدرسه ,, على فكره ترا فطوم تسير المدرسه مشي لانه المدرسه هب بعيده وايد ,, تمت تمشي لين ما وصلت المدرســه فاضيه و يمكـن 20 بنت فالمدرسه بس ,, تمت فالصـف هيه اول وحده ,, وعقب 10 دقايق بـدّو البنات ايون المدرسه ,,
اصـلا هم مداومين بس عشان يشوفون النتــائج ,,
ودقايق جان اوصلون عليـا و مريـم ,, هييل خوات بالرضاعه و عقب بتعرفون زياده عنهم ^_^ ايلسون ويا فطـامي 3 فالصف عدال البعض ,, شافو فطـامي حاطه راسها على الطاوله ,, سيده سارو صوبها
عليا : باسم الله عليج شوفيج !!
فطـامي و هيه ترفع راسها : ها لا مافيني شي !!
مريم : شو مافيج شي و خدج احمر و شفايفج فيها دم !!
عليا : شو مسوي ابوج بعد الله لا يسامح العدو اففف ياربيه فطووم 600 مره قلنالج تعالي عيشي ويانا ...
جان تقاطع فطـامي كلامها : شو قلنا علايه !!
مريم : خلاص عليا ,, قومي فديتج سيري الحمام !!
سارو الحمام و يابو ثلج من المطبخ و تمت فطـامي تقولهم السالفه وهيه تصيح وهم يهدون فيها ,,
كانو سايـرين المدرسه عشـان يشوفون النتـايج ,,
فطـامي : ياويل حالي انا 95,3 فديتني شطوره ..
مريوم : وانا 93,1
عليـا : ههه وانا 91,2
فطـامي : الله وناااااااسه ,,
مريوم : الف مبروك حبايبي ,,
فطـامي وعليـا : الله يبارك فيج ,,
وعقب روحو سارو البيـت ,, مريوم و علييا ,, فرحو اهلهم بـ النسب
اللي ترفع الرااس ,,


فطـامي وسارت البيت مشي كل العاده ,, جان تدخل البيت و بسرعه المطبخ خذتلها تفاحتين و ماي و شرده فوق ,, ماتبا ابوها ولا ايمان يشوفونها عن يحتشرون ,, سار فطوم تغسلت و صلت و كلت التفاحتين ,, كل يوم على هالحال نادراً تاكل اكل يشبع ,, بس الحمدالله ماكانــت تشكي من هالاكـل كل يوم تحمـد ربها ,, سارت طاحت ع الشبريــه ,, سارت الحمام بتغسل جسمها بس شافت الماي بارد ,, فغيرت رايها و دقايق تسمع صوت المطر الخفيف و خذت الكرسي و يلست فالبلكونه ,, و حجرت فطوم مجابله الشارع تقدر تشوف الساير و الراد عاد هيه تحب تطمش عليهم ,,


:: صوب مريم وعليـا ::


مريم : اقولج عليـوه شو رايج نسير المول ؟ و ناخذ فطـامي ويانا بمناسبة النسب الحلوه
عليا : هيه والله بس بيوافق ابوها >> وهيه حايسه بوزها
مريم : والله لا ايب راسه هههه بس تريي عليه بخبر اميه و بييج
سارت مريوم فوق تخبر امها عشان يسيرون المول ,,
مريم : اقووول ماماتي عادي نسير المول ؟؟
ام مريم: ويا منو ان شاء الله ؟
مريم : ماماتي لاتعصبين انزين انا و فطـامي و عليوه بليييييز وتسوي عمرها تغمض ..
ام مريم: لادام فطامي بتسير حافظنكم الله
مريم : تسلمين ماماتي


طلعت من الحجره و هيه فرحانه و تنزل من الدري بسرعه زين ما طاحت
عليا : ايييه شوي شوي ,, ها شو قالت ؟
مريم : اكيد مابتقول لا هههههه
عليا : يلا عيـل قردني الشيبه
مريم : افا عليج ,, جان تتصل ..


فبيت بو فطامي
ترن ترن ,, ترن ترن ,,


بو فطـامي : ألوو
مريم بدلع : السلام عليكم
بو فطـامي : وعليكم
مريم فخاطره وغــد بس براويك : شحالك عميه شخبارك انا مريم الـ ******
بو فطـامي : هلا والله بالغاليه مريم الريم ,, شحالج الغاليه شخبارج و شحال ابوج و امج ؟
مريم فخاطرها مالت والله يسرك الحال عميه كلهم بخيـــر ما يشكـون بـأس ,,
بو فطـامي : يا حيالله بالغاليه ..
مريم : الله يحييك اقول عميه ممكن ارمس فطامي شويه ؟
بو فطـامي : اكيد فديتج ,, وهوه يناديها ,, فطووم ,, فطوووم و صمخ
فطـامي وهيه نازله من الدري : ها ها ابويه آمر ,,
بو فطـامي : اندوج ربيعتج تباج ,,
فطـامي : الو
مريوم : مالت ع الحظ اللي انتي فيه .. بتخبرج قولي حق ابوج عادي تسيرين ويانا المول ؟
فطـامي فخاطرها تضحك على مريوم كان صوتها يضحك : ههههه ,, آآ ها مادري تعالي خبريه اندوج ,,
بو فطـامي : يا الخديه بلاااج ؟؟
فطـامي : تباك ..
بو فطـامي : آمري الغاليه ؟؟
مريوم : آآأأ عميه ممكن طلب صغنووني ؟
بو فطـامي : آمري الغاليه عيوني لج ؟
مريوم بصوت خفيف مالت على هالعم يوم جي من زينك ماباها عيونك تخوف ..
عليـا : ايييه انجبي و تضربها ع جتفها ..
مريوم : وابويه آآآآ .. اقول عميه عادي نودي فطوووم ويانا المول ؟؟
بو فطـامي : افا عليج الغلا عادي اكيد و خذو راحتكم بعد افا عليج انتي بس اندوج فطوم ..
فطـامي : الو
مريوم : هع هع هع واخيراً ..
فطـامي : غربلات هالضحكه
بو فطـامي : اقول فطوم انا بسير ويا حرمتي بيت اهلها .. ماوصيج اذا عطوج بيزات عطيني وياهم انا أولى ..
فطـامي فخاطرها ونعم الأب الصراحه الله وياكم ..
بو فطـامي : ايمااااان يلا تاخرنا
ايمان : يلا ييت ييت
بو فطـامي: يلا فمان الله
فطـامي : فداعة الله


طــاااااخ >> الباب ..


فطـامي : واخيراَ ما اصدق ههههه ..
مريم : افا عليج والله لا اقردنه كل يوم عيل يضربج و لا يظهرج ماعليج كل ما ظهرنا مكان بنوديج افا عليج انتي شرات اختنا و اكثر ,,
فطـامي : فديتكم والله ,,
مريوم : انزين اسمعي عيل ,, سيري لبسي اي لبس اوكيه هب لازم تنوره و لاتحطين شي فويهج بصفعج ,,
فطـامي و هيه فاجه عيونها : ليييـــش !! اسير المول وانا امبهدله ,,
مريوم : يا العنز عندنا مفاجأ لج يلا دقايق و بوصل عندج باي ,,
فطـامي : آآ ,, بـاي : هاي بلاها ,, ويا هالمفاجأت اللي يسونها مصايب والله ,,
سارت فوق و لبست عباتها و شيلتها و نزلت تحت تترياهم ,,
ترا بيتهم هب بيعيد وايد ,,


صوب مريم و عليا
مريوم : اقولج عليوه بصفعج زهبي كل شي فالكبت خلي البشاكير يزهبون العبي و الشيل و وتنانير ..
عليـا : مزهباات ,,
مريوم : عيل زهبي اللي قلتلج عنه و سيري خبري ابويه انه بنسير انزين و ماوصيج ..
عليـا : هههه ماعليج اعرف يلا انجلعي و دزتها باي ..
مريوم : ماتبوين و عقب سارت و ركبت السياره ,, دقايق جان توصل مريوم بيتهم ركبت السياره تسلمت عليها ,,
مريوم : اشوف عيونج !! قلتلج لاتحطين !!
فطـامي : والله هب حاطه طبيعي طبييعي !!
مريوم :غربلات العدو هههه انزين ..
فطـامي: اي مول ان شاء الله ؟
مريوم : امارات مول ..
فطـامي: الله يستتتتر .. غربلات العدو شو مسوين انتو !!
مريوم : ماعليج بتعرفين الصبر زيين ..


صوب عليا
دق دق دق
بو مريم : ادخل
عليا : باباتي !
بو مريم: هلا علايه
عليا وهيه تلوي عليه : ابوووويه ممكن طلب ؟؟
بو مريم: آمري !
عليا : باباتي بنسير المول انا و مريوم و فطوم عطنا ألوووووش
بو مريم: من عيوني الغلا ,, اندوج 1000 حقج و1000 حق مريوم و فطـامي خليها تيني انا ابا ارمسها ,,
عليا : ان شاء الله ابويه ,,




وعقب و صلو مريوم و فطوم و سارت فطـامي سلمت ع ام مريم و عقب سارو فوق
سلمت على عليا و تمو يسولفون كانت الساعه 4 ونص ..


فطـامي: اقولكم عادي اغسل جسمي الماي والله قفــطه ونزلت راسها ..
عليا : عادي فديتج بلاج والله مابينا شي قسم بالله صح مريوم ؟
مريوم : اكيد فديتج مالت عليها مادري متى بتفهم هالشي قومي الغلا سيري و عليوه سيري ييبي الكيكه و العصيير ..
فطـامي : لايكون هييج الكيكه !!
مريوم :هههههههههههه مانسيتيها هيه .. هاي هيه ..
فطـامي: وين الحمام ,, ههههه بتغســل بسرعه..


وعقب سارت تغسلت بسرعه مال 5 دقايق و ظهرت تمت بنفس الثياب لين ما تتريا مفاجأت عليا و مريم ,, وعقب تمو ياكلون و ضحك على فطوم لانها تموت على هالكيكه ويوم خلصو ..
مريوم : يلا عليوه تكشخي وانا بعدل فطوم ..
فطـامي : الله يستر
عليـا : بس طلبناج ..
فطـامي: تــم الساع !!
مريوم : ماتشوفين عمرج الا اذا قلنالج ..
فطـامي : ههههه خيبه انزيــن ,,


عليـا تعدلت بروحها و حطت شدو اسود و برتقالي كان الشدو خفيف وايد و حطت الاكسسوار و الجلوز البرتقالي الخفيف و لبست ثيابها و مريوم سوت حق عمرها اول شي وعقب سوت حق فطـامي ,, نفس الشدو طبعـاً و لبستها الاكسسـوار كلهم نفس الشي ,, تعرفون ليـــيش !!


لانه السبوع الي طاف عليا و مريوم ماخذين 3 اطقم نفس الشي (تنوره قميص جاكيت و شنطه و بوتو اكسسوار ) .. التنوره مخمل اسود وتحت شرات الكركش البرتقالي ,, و القميص هاي نــك برتقالي ,, و فوقه الجاكيت المخمل اسود ,, والشنطه مخمل عليها سلاسل على لون البرتقالي ,, و الجوتي المخمل (بوت) ,,


فطـامي : لبسكم خبال وايد ماشالله ,,
مريوم : حتى انتي شراتها
فطـامي : كيـــف !!
عليـا : مزيدين لج
فطـامي: والله !!
مريوم : هيه فديتج
فطـامي : بسرعه بسرعه ابا ابلس بليز !!
عليـا : هيه صح يوم بتخلصين سيري عند ابويه يباج
فطـامي: باسم بالله ليش ؟
مريوم : شو مابيسويلج شي اكيد بيسلم عليج و بيسولف وياج ماعليج والله دوم يقول احب اسولف وياها وناسه
فطـامي :ههههه حليله والله ..
مريوم : يلا خلص لبسي لبسج و ياويلج ان شفتي عمرج و البس هالاكسسور و الجوتي انزين ويوم بتخلصين قوليلنا بس امانه والله مانتشوفين عمرج !!
فطـامي ابتسمت : ان شاء الله ..
طلعو عليوه و مريوم من الحجره و فطوم تلبس ثيابها و هيه متشققه تبا تشوف عمرها بس ماتروم هههههه و يوم خلصت ,, ادخلوو
عليـا : غربلات بليس .. احلى منا !!
فطـامي : اصلا ابوني حلوه ..
مريوم : ماشالله يا عليج من الخاطر اوكيه
فطـامي : اشوف عمري ..
عليا : لاااااا يلا طوفي لبسي هالشيله وانزلي عند ابويه
و لبست شيلتها و سارت عند عمها ..
فطـامي : باسم الله ,, دق دق دق
بو مريم: تفضل
فطـامي : السلام عليكم
بو مريم: وعليييييييكم السلااام ,, هلا والله ,, حي الله بالبدو ,, شخبارج غناتيه اخبارج شو مسويه ..
فطـامي وهيه شاقه الحلج : يسرك الحال عميه و من صوبك ؟
بو مريم: يوم شفتج شفت بخيـر وجان يقوم و يلس فطـامي و يلس عدالها
بو مريم: اخبارج فديتج طمنيني عليج ؟
فطـامي: والله الحمدالله عايشين
بو مريم: اخبار ابوج ؟
فطـامي تغير ويهها : يسرك ..
بو مريم: اسمحيلي فديج
فطـامي: لا افا عليك عميه
بو مريم: الغاليه فطـامي بغيتج بشي بس و غلات امج ما تردينيه ..
فطـامي مستغربه : ان شاء الله