آآه من قلب (ن) غدا حبه جنوني..

25

ما صوب فطـوم والبنات
فطـوم : هييه صح ,, حمـدان يايبلكم هديه
مريوم + عليـا : هديــــه !!
فطـوم سارت فجت الكبـت و طلعت الجيس مال مريوم و عليـا : اندوكم
عقب البنات شافو هداياهم وتخبـلو موت ,, و استـانسـو ,, و فطـوم عطتهم مال امها و ابوها .. المهم عقـب سـاره يت صوبهم و راوتهم لبسها ,, بنطلـون وردي وعليه ابيض تحت و قميـص طويل .. المهم وعقب سـارو تحت عشـان يرمسـون ام حمـدان عشـان تعدلهم
سـاره : ماماتي الله يخليـج يمكن حد يخطبنـا
ام حمـدان : جب انتي و فطـوم محجوزات اذا جي بعدل مريوم و عليـا
مريوم : هيه خالوه خلينيه احلى وحده
فطـوم : اصلا انا لو ماحطيت شي بكون احلى وحده
ام مريم : ايه اسطلبـو لو يعرفون الريايل بيذبحونكم
عليـا : انزين خالوه فديتج شو قلتي ؟؟
ام حمـدان : يلا انزين تعـالو ويايه ,, ام مريم ,, تعالي بعطيج كورس ههههه

وعقـب سـارو البنات وام حمـدان و ام مريـم غرفة ام حمـدان ,, طبعـاً اندهشـو بغرفتها وايد عيبتهم ,, اول شي ام حمـدان سوت حق عليـا و مريم ,, حطتلهم شدو خفيف ,, مريوم و عليـا جحلت عنونهم و سوتلهم ظل تحت عنون ,, و حطت شدو وردي خفيف و مسكره و قلـوز ,, و سـاره نفس شي طلعـو كيـوت ,, اما فطـوم تمت تشرط
فطـوم : خالوه رسميلي عينيه جي خليه من اول شي طالع شويه و من آخر شي بعد مديه جي شرات الفرعون ..
مريوم : هههه بتستوين فرعون نمبر 2
فطـوم : انجبي مريوم حمـاره ,, و خالوه خليه ظل تحت عنونيه و حطيليه فوق ع الطرف شدو اسود و وردي باجي العين
ام مريم : بخبر حمـدان عليج ,, اخافهم يخطبـونج
فطـوم : ماعليج خالوه برفضهم ههههه
سـاره : امايه شوي شوي ع فطوم حمـدان بيموت عليـها
فطـوم : وي بسم الله عليه من المـوت عنه يوميه قبل يومه
عليـا : ياويل حاليه عليـج فطـوم ,, ربيه يخليه لـج وتغمزلها
فطـوم وهيه مرتـاحه : آآآآآه آآمين
الكـل : آآمين
ام حمـدان : ها خلصت شوفيه حلو ؟
فطـوم : ياويل حـاليه ,, هممم الحمدالله بعد ماخليتي المكيـاج يبن عدل ,, مشكـوره فديتج
البنـات : مشكـوووره
فطـوم : خلونا نسير نتلبس
البنـات : يلا ,,

وعقب سـارو تكشـخو و زهبـو عبيهم و شنطهم و دخلو المكيـاج اللي يبغونه لول جنه سايرين عرس ,, و عقب سـارو يصلـون و الوقـــــــت مره بسرعه .. و استوت سـاعه 5 ونص و طبعا حمدان و محمد ماشافو البنـات ,, و عقب البنـات نزلو صوب اهلهم ,, سـاره و فطـوم لصقـو فـ بو حمـدان ,, و مريوم وعليـا عند ابوهم
بو حمـدان : وابويه ها شو تبغون فلوس ماعنديه ماعنديه ,, جان يقوم وهوه يضحك ,,
بو مريم : ههههههههههه فقرتونيه ماشي يلا هب كل يوم العيد !!
البنـات يشوفون بعض و هم مستغربين و ابتسامتهم ادل انهم مستغربين ,, و ام حمـدان و ام مريـم يضحكون عليهم ,,
فطـوم : جي عيل السـالفه ,, جان تقـوم و البنات بعد قامو ,, : ماعليه ماعليه خلونا نسير يلا ,, بس شاطرين يعطون حريمهم
ترا ال10000 عنديه بعدهم ماصرفتهم وانا قلت بعطي البنات ع 2500 ,, مالت ع العــدو ,, مانبا منكم شي طوفو خلونا نصيـع
بو حمـدان : بتخبركم شو محطين فـ ويوهكم ؟؟
سـاره : ابويه لوسمحت دام ماحطيتنا فلـوس لاتم تسـألنا يلا بـاي ,, و الكـل كان يضحك عليهم هههههه وجان تسحب البنات و ظهرو برع لبسـو النظـاره نفس الشي كلهم نفس الشي تدرجات الوردي ,, و ركبـو سيـاره محمد البـورش و فطوم سوت هرنات عشان ايون و شغلت آآه من قلب

محمد : بسم الله منو في موتريه ؟
حمـدان : اكيد البنـات خلصوا قوم نسير

عـاد الاولاد كانو صدق كاشخين تقولون مواعدين لول ,, و كانو مطقمين ,, لابسين كندوره عنـابيه و عصـامه ( شال ) و نظاره خبـاااااااال و الشعر طالع شويه من العصامه .. و العطر و الدهن عود و الدخون شال الدنيــا .. هممم بقولكم كيف البنات يالسين
فطوم كانت صوب اليسـار عن الدريشه ,, وعدالها مريوم و عقب عليا و عقب سـاره يعني سـاره صوب الدريشه الثانيه ,,
و كـانو الاولاد ياين صوب الموتر و فطـوم عينها ع حمـدان شويه و بتلصق فـ درشة سـاره
مريوم : ذبحتينا
عليا : اعتدلي هب حمـدان ها عشان يسويلج جيه !!
فطـوم : ياويل حاليه اانا خبـاااال ربيه يحفظه ,, فديته ياربيه
وكان صوتهم عـالي يوم يتحرطـمون ع فطوم حمـدان و محمد فجـو الباب .. حمـدان فخاطره : وااافديتج فطوم اكيد انتي محطيه هالغنيه ,, و حط فباله انه يخوفهم
حمـدان وهوه اونه مسوي عمره معصب : بلاكن تزاعجن ؟
عـااد البنات متيبسيــن
مريوم : هااا لا ماشي سـلااامت خشمك
سـاره : طافـك توه تفدوك
حمـدان وهوه متشقق و طار الحلج : هاا منوه ؟
عليـا : نـاس ورديين ؟
محمد : كلكم ورديين ,,
مريوم : اللي يوراك
حمـدان ابتسم لهـا و فطـوم ذابت و احمرت و قرصت مريوم
مريوم : آآآآآي انزين انا شليه جلبه
فطـوم : .........
وعقب تحركـو و جان تخلص الغنيه و كل حد سـكت و مره وحده
فطـوم صرخت : عيدووووووها !!!
محمد : وريل مايشـوف !! بلاج تباغمين !!
البنـات : ههههههه
فطـوم : جب لاتســب !! عيدها
محمد : انزين ,, وجان يعيدها
ويوم شل الشـاجي فطـوم شلت بس ع صوت اليهـاااال ,, ويوم خلص جان اطيح ع مريوم ( صوب الجتف ) : آآآآآه فديت هالصوت انا كم بعيـــــش
حمـدان : فطووووووم
فطـوم : يا لبيـــه
حمـدان : لبيت حايه ,, عن الحركـاات شويه
مريوم : ذبحتينا وياه شو رايج تزوجينه بعد
فطـوم غيرت ويها و خلته ع ملامح تتخيل : يالييييييت
سـاره : مادري لو حمـدان الشاجي شو بتسوي
فطـوم : واااااااااااايه جب ساروه لاتخلينيه اتخيل وايد
محمد : استخفت الاخت !!!
فطـوم مره وحده ضحكت
الكـل : بلاج ؟
فطـوم : ههههههه تذكرين مريوم يوم عفـروه تقول حق الولد شحـالك فـ الجامعه ؟
عليـا و مريوم نقعو من الضحك : خخخخخخخخخخخخخخخ
فطـوم : و يوم الوغــد هزبنا
مريوم : خخخخخ غربلاته
حمـدان : شو السالفه ؟
فطـوم : الله يسلمك يوم كنا ثالث عدادي ودونا رحله جامعة الشارجه انا و مريوم و عليـوه كنـا آخر شي نمشي جان نسير اول شي مئه و شي كنا نحنا 5 تواسع سايرين المهم و جدامنا واحد جي دب ضخم يخوف كنا نحنا ال3 نمشي و نعلق و نضحك ولا مره وحده
قالنا : امشـو عدل ,, من هاكي الصوب نحنا متيبسـات من الضحك خخخخخخ ,, المهم يوم دخلنا داخل صوب المحاضره يلسنا نحنا ال4 اول لاين من الكراسي ,, يت الحرمه و رمستنا و سلم علينا وجي المهم جان الولد يقدم مشروعه جان يقول السلام عليكم نحنا ردينا عليه و عقب هدووووووء جان العنز عفـروه تقول : شحالك .. ههههههههههههه
عليـا: خخخخخخخخخخخ اشكره ينسمع
مريوم : حتى الابلوات قفطـو و نفس الوكت عصبو
محمد : حركـاااااات
عليـا : بس والله ذكريات خبـال ,, فطـوم شخبـار المزيـون اللي شفتيه هناكي
فطـوم مره وحده صرخت : يا لبيــه لين الحين اذكره ,, ماشالله عليه ههههه
حمـدان : ايييه انتي ..
فطـوم : هيهيهي ان شاء الله ,, واااايه فديت الشـاجي
محمد : اوووهووه ردينا
حمـدان سكر الغنيه بالقو
سـاره : بل السيأره شو ذنبها
عليـا : بتشتكي يوم القيـامه
محمد : ايه شوي شوي ع السيـاره
فطـوم متيبسه من الضحك و مريوم و عليـا نفس الشي ولا مره وحده
فطـوم : ههههههههههههههههههههههههه >> من الخـاااطر
مريوم و عليـا ما استحملـو وياها لوول
سـاره : ههههه بلاكم ؟
فطـوم : هع ماشي
حمـدان ع اعصابه ,, و محمد يشوف المنظره اللي فوقه : بتخبـركم هب جنه جسوم و وليد ورانا
البنـات مره وحده صـدو
سـاره : ياربيه ها اكيد ابويه قالهم
مريوم تشوف عليا : انزين نحنا ما بنضيع
عليـا : شدرانيه !!
وعقـب وصلـوا المرينـا مول ,, وبركـنو و اول ما نزلت فطـوم : انا ابا اسير الحمـام
مريوم بصوت واطي : هههه يا العنز هب جدامهم
حمـدان : انزين اسمـعو ,, نحنا بناخذ وليد و انتو جسوم بس تحملوا ع عماركم و عن الحركـات
محمد : هيه عن الحركـااات وخـاااصه فطوم
فطـوم تسوي عمرها بريئه : انا ما اثــوي شي
عليـا تمطـها : ههههه يلا طوفي

البنـات الـ 4 سيده سـارو الحمـام و جسـوم يترياهم بـرع .. و يـوم دخلـوا ما حصلـو حد الا الفلبينيه
البنـات عقو نظارتهم و بدو يعلـون الشـدو ,, هوه هب مخترب ,, بس جي يتـأكدون لول ,, و فطـوم زيدة جيـلة الجـحال
عليـا : حوه حوه عينج بتنفـجر من الجـحال ,, صرت لا اشوف عينج ولا اشوف هالابيض
فطـوم : هههههه لهدرجه عيونيه وسـاع ,, عن الجذب ,, ايه سـاروه وين هالقلـوز اللي يكبر الشفـايف
سـاره : اي لـون ؟؟
فطـوم : عطينيه وردي شفاف
مريوم : الله انا ابا احط
عليـا : حتى انا ,, بس فطوم انتي روحه فيج شفـايف عذاب بعد شو تبغيـن زيـاده
مريوم : هيه والله ماشالله عليج ,, حمـر و مربربـات كشخه
فطـوم : احم ,, الله و اكبـــر الله و اكبــر
مريوم : مالت عليج
فطـوم يوم خلصت عطت مريوم و عليـا و سـاره و عقب عقة الشيله و ربطت شعرها عدل و لفته و لبست النظـاره كـاان شكلهـا جنااااان ,, دلـوووووعه وايد لول وخاصه انه لابسه وردي ,, و البنـات الـ3 يوم خلصـوا
فطـوم اسمعو خلونيه فالنص والله بظربه اللي بيخرب عليه ما حب امشي ع الينب
سـاره : ههههه انزين قوليلنا كيف نمشي ؟
فطـوم : ببدا ع جهة اليمين ,, سـاره وعقب مريوم و وانا و عقب عليـوه
عليـا : وجان ني عندلج ,, يلا نطلـع
يوم طلـعو ,, جـان يشوفون كرس جان فطـوم تيلس و تحط ريل ع ريل
مريوم : شحـــقه !
فطـوم : يا الحميـر عميه عطاكم شي بعطيكم ال2500 مالكم
عليـا : هيييييييه يلا انزين عطينيه انا دبل
فطـوم : تخسين انا اللي يحتاي اخذ دبل ,,
يوم طلعت البيزات خافت انه مافي خرده
فطـوم : ياربيه ,, انتو موول ع الصفر يعني ؟
البنـات : لا
سـاره : بتخبـرج عطي جسـوم بيسويلنا خرده
فطـوم : هيه والله ,, جان تقوم وتسير عند جسـام

جـاسم AL Body Guard : هـا فطيـم ؟
فطـوم : الله يخليك سولنا خــرده ماعندنا شي
جـاسم AL Body Guard : اوكيه عطينيه انا بسوي و يوم بخلص بصلبج قوليليه انتو وين
فطـوم : خلاص مشكـور ,,
جـاسم AL Body Guard : تحملـوا بعماركم
فطـوم : من عنووونا

جان يـروح جـاسم AL Body Guard و فطـوم سارت صوب البنات و بدو يسـوون SHOPPINH كانو متحمسـات
وكـل مايدشـون محل لازم ياخذون شي ,, وكـل دقيقه يضحكـون و يذكـرون ايام الدراسه ,, وعقب قالت فطـوم شلو النظاره عشـان يشوفون عدل لول ,, وخطـفوا عـدال استـاربوكس وكانو شالين اجيـاس وايد ,,
فطـوم : ياي والله احلـى يوم فحيـاتيه
سـاره : هيه والله كشخه
مريوم : فطـوم طربينا شويه
عليـا : ههههه لا عاد الحين بتغني آه من قلب
فطـوم :
آآه من قلب غدا حبه جنوني ,, وآآه من خلن على بـالي طرا ,, لي سطا فالروح و اتملك شجوني ,, من صدوده ياملا دمعي جرا
سـاره : فديتج والله
يوم كـانت فطـوم تغني ,, كان في 2 وراهم و سمعـوا فطـوم يوم كانت تغني ,, و واحد منهم انبهر فـ صوتها فـ يا وراها وقاللها
(******) : حي الله هالصـوت
فطـوم خافت جان تصـد بسرعه و انصدمت !!!! فخاطرها : معقـوووووله !!!! ما اصدق اللي اشوفه انا
البنـات شهقـوا و نفس الشي مصدومين من اللي يشوفونه