غصن

الاخير

باقي الاخير غصن

ــــــــــــــــــــــــــــــــــــــــــــــــ

خرجت ام منصور وقفلت الباب صهيب قرب من غصن ومسح دموعها واخدها بحضنه، حببتي سامحني واوعدك هعوضك عن كل لحظة قضتيها في الحبس بغيرها سعادة واي طلب تطلبيه هنفذه في وقته بس خلينا نمشي من هنا في حاجات كتيره اوى عاوز اقولهالك وهنا مش هينفع.

غصن بعدت عنه: ميصحش نمشي خالتي ام منصور هتزعل اوي وكمان انا عاوزة اسلم على ابله سناء وعمي ابو منصور.

صهيب قرب أكتر منها وبص في عنيها: حببتي بقولك في حاجات عاوز اقولهالك.

غصن بخجل من كلامه وقفت بسرعة: انا هروح اساعد خالتي.

صهيب شدهل من ايدها: تعالي هنا مفيش خروج من الاوضه دى غير على الاستراحة.

غصن: صهيب ميصحش ومفيش حد غريب عشان .

صهيب : والاخين اللي برة دول ايه.

غصن: قصدك الاستاذ صلاح ومنصور، دول محترمين اوي عمرهم ما خرجوا العيبة من بقهم.

صهيب: وعنيهم اللي عليك من ساعة ما دخلتي، وخصوصا صلاح ده عنيه وتعبير وشه بيقولوا حاجات كتيره اوى.

غصن: الاستاذ صلاح ده طيب اوي وحنيته مش على حد.

صهيب بحدة وغيرة: غصن.

قطع كلامه واخد نفس طويل، يهدي من نفسه: لولي عارف انك عفوية كنت اخدتك ومشيت من هنا واستحالة هسمحلك طول ما انا عايش تجي هنا.

خبط الباب قطعوا كلامهم سمح صهيب بدخول اللي برة دخلت ام منصور تقولهم العشاء جاهز

، صهيب خرج ماسك في ايد غصن لقوا ابو منصور وسناء رجعوا سلمت غصن عليهم وقعدوا اكلوا ويتكلموا، غصن بين الكلام سألت على حورية والبنات.

سناء: بعد العشاء هنحكيلك كل حاجه.

خلصوا اكل وقامت سناء وغصن يشيلوا الاطباق ونظرات صهيب على صلاح اللي عنيه من فترة للتانية على غصن حاول يمسك اعصابه وميمدش ايده عليه، ابو منصور رحب بيه.

ابو منصور: شرفتنا يا صهيب بيه.

صهيب وعينه على صلاح اللي وقف من مكانه لسه هيكلم قطعة منصور.

منصور: صلاح شغل التليفزيون نشوف اعلنوا رمضان بكرة إن شاء الله ولا لاء.

ابو منصور: ان شآء الله هيكون بكرة روايح رمضان هله والبركة في كل حاجه وكفاية تشريف صهيب وغصن لينا وان شآء الله فطرهم اول يوم عندنا هنا.

صهيب برفض: لاء.

ابو منصور: لاء ليه يابني.

صهيب لحق نفسه: لاء اول يوم عندي في المزرعة ان شآء الله اول يوم فطركم كلكم عندي.