فى فيلا صالح إستمع صالح بتركيز لحديث كريم ثم قال: موقفك صعب فعلا صراعك بين الحب الأول ومراتك.
حقيقى أنا فى حيرة من ناحية إلهام وحبى ليها ومن ناحية غادة اللى بقت مهمة عندى قوى وغالية على ,قولى أعمل إيه؟
النصيحة من خارج الموضوع مش هاتبقى صحيحة.
حضرتك تقصد إيه؟
أقصد من السهل أن أقولك إمشى وراء قلبك اللى بيقول لك إنك لسه بتحب إلهام أو أقول لك أفضل مع غادة اللى هى الأفضل لو هانقارن بين الاتنين.
الأفضل؟؟
أكيد , غادة إنسانة كويسة جدا ومناسبة ليك فى كل حاجة يمكن أكتر من إلهام.
حضرتك كده بتحيرنى أكتر.
شوف ياكريم أنا مجربتش حيرتك دى قبل كده ولا إتحطيت فى موقف مشابه حتى, لكن إنت عشت مع غادة وكنت سعيد معاها جدا وده كان باين عليك وإرتبطت بإلهام وحبيتها أو بتعتقد إنك حبيتها.
إعتقد يعنى إيه ؟ فعلا باحبها.
متأكد!!
نظر له كريم بتساؤل فقال: لو كنت بتحلم وصحيت فى نص الحلم لو نمت تانى هاتعرف تكمله؟؟
لأ طبعا ...لأنى خلاص صحيت .
هى دى علاقتك بإلهام, حلم الحب لم يكتمل وإنت صحيت فى نصه وفاكر إنك لو نمت تانى هاتقدر تكلمه من مكان ماوقف.
بس أنا كنت باحب إلهام من 5 سنين .
المدة مش مهمة أبدا كريم , فيه بيعيش قصة حب سنين طويلة ويكتشف فجأة إنه كان عايش وهم وفيه بيحب من نظرة ويعيش حب قوى جدا وفيه ناس بتحب من غير ماتدرك مشاعرها
أنا مشاعرى واضحة جدا بالنسبة لى وإلهام ...........
قاطعه صالح وقال: هاسألك شوية أسئلة يمكن تساعدك.بس تجاوب بصراحة ووضوح.
تفضل
إنت كنت بتغير على إلهام ؟
طبيعى .........
فكر ياكريم قبل الإجابة , بتغير عليها ؟
فكر كريم بأنه لم يحدث أبدا أن شعر بالغيرة على إلهام وأكمل صالح: عمرك ماغرت مش كده؟ واضح جدا. ولكن بتغير على غادة؟
تذكر كريم يوم رآها مع مدحت كاد أن يجن وغضب بشدة أومأ برأسه فابتسم صالح وقال : فترة جوازك بغادة هل وحشتك إلهام ؟
فى البداية كنت واحشانى وأتمنى أنى أشوفها.
وبعدين؟؟؟
وبعدين ......
عشت حياتك مع غادة وبالتدريج بطلت تفكر كتير فى إلهام ومكانتش بتوحشك خالص .لكن لما طاردتك وفكرتك بالحب القديم كنت عايز تكمل الحلم..
أنت تقرأ
لعبة الزواج
Romanceرواية فيها معاناة الفراق والحب الأول وسيطرته على اإنسان وبعدها الحب الحقيقة بالصدفة
