إنهمك كريم في دهان حجرته بنشاط وهو يحاول أن لا يفكر في إلهام و لكنها لازالت في عقله وقلبه ودخلت سعاد وهى تحمل الشاي وقالت: الله ينور يا أسطى, الشقة إتغيرت خالص.
إبتسم كريم وسأل: عجبتك يا ماما؟
طبعا ياحبيبى , تسلم إيدك.
لسه هادهن لك المطبخ والحمام.
كفاية عليك كده بقى ياحبيبى الشقة بقت كويسة كده.
لسه فيه دهان باقى هانرميه يعنى ؟؟ وبعدين ده السقف بس :
طيب تعالى إرتاح شوية وإشرب الشاي.
جذب كريم كرسى وحلس بجوار أمه التي قالت: هو بتاع البوية كان زحمة؟
لأ مكانش زحمة؟
أمال إتأخرت ليه؟
قابلت طنط كوثر وجوزها رجعو من السعودية.
كوثر رجعت من السعودية أخيرا , دى وحشانى قوى.
سألتنى عليكى ..
وغادة رجعت معاهم وإلا تكون إتجوزت.
غادة كانت معاهم ومش عارف إتجوزت وإلا لأ؟
غادة بنت هادئة ورقيقة كانت دايما تيجى لنا هى وكوثر وإنتو كنتو أصحاب قوى ندور عليكم نلاقيكم على السطح بتلعبو ومع بعض .
آه فاكر ....
أبقى اطلع أسلم عليهم بقى.
أنهى كريم الشاي ونهض ليكمل عمله وقال: أكمل شغلى بقى.
الله يعينك؟
صعدت سعاد لشقة كوثر لترحب بها وفتحت لها غادة الباب فقالت: إزيك ياغادة؟
طنط سعاد أهلا أهلا.
ضمتها غادة بسعادة وقالت: ماما, طنط سعاد جت..
إقتربت كوثر وفتحى وبعد الترحيب بسعاد قالت كوثر: معلش الشقة لسه متنضفتش .
هانادى لسلوى ونساعدكم وتخلص فى ساعة زمن.
فتحى: مفيش داعى يا أم كريم البواب بعت لنا بنات تنضف معانا.
خلاص يبقى الغداء عندى
فتحى: ارجوكى متتعبيش نفسك إحنا هانجيب أكل من برة.
أبدا والله مايحصل, أنا هاطبخ لكم النهاردة , معقول تجيبو أكل من برة وأنا موجودة, ده إنتو عشرة العمر..
لم يستطيع فتحى أو كوثر الرفض ونظرت سعاد لغادة وقالت: والله كبرتى ياغادة وبقيتى عروسة جميلة ماشاء الله .
ميرسى ياطنط
أنا مش بأجامل والله دى الحقيقة, ياهناه ياسعده اللى هايتجوزك وإلا إنت مخطوبة؟
أنت تقرأ
لعبة الزواج
Romansaرواية فيها معاناة الفراق والحب الأول وسيطرته على اإنسان وبعدها الحب الحقيقة بالصدفة
