Ms. Mafia & Ms. CEO (မာဖီးယားခေါင်းဆောင်ရဲ့ ဧကရီ) Season (2) 🌷💖

အခန်း (၁)

မြန်မာ-ထိုင်း နယ်စပ်တွင်ရှိသော မြဝတီမြို့တွင်ဖြစ်သည်။ ညအချိန်​​​​ဖြစ်သောကြောင့် ထိုမြို့တွင်ရှိသော The Red Evil Bar မှာ ကာမဂုဏ်ခံစားသူများနှင့်ပြည့်နှပ်နေသည်။ Bar တွင်ရှိသော VVIP အခန်းတစ်ခုတွင် လူတစ်ယောက်မှာထိုင်ခုံပေါ်တွင် သွေးသံရဲရဲဖြင့်အရုပ်ကြိုးပြတ်သလိုလဲကျနေသည်။ ထိုသူ၏ ရှေ့တွင် တစ်ကိုယ်လုံးတက်တူးများဖြင့်ပြည့်နေသည့်​ထောင် ထောင်မောင်းမောင်းလူသန်ကြီးမှာ စီးကရတ်တစ်လိပ်ကိုအေးဆေးစွာဖွာပြီး လဲကျနေသောထိုသူအားသွေးအေးစွာကြည့်နေသည်။ ပြီး ဘေးနားတွင်ရှိနေသော သူ့ လူများကိုစကားဆိုလိုက်၏။

"ဒီခွေးကောင်ကို အပိုင်းပိုင်းခုတ်ထစ်ပြီးခွေးစာကျွေးလိုက်စမ်း။ အလကားခွေးကောင်! သောက်သုံးကိုမကျဘူး"

"ဟုတ်ကဲ့ပါ Boss! ဟေ့ကောင်တွေ ဒီကောင့်ကိုခေါ်သွားကြစမ်း"

ထိုသူ၏ စကားအဆုံး၌ ထိုင်ခုံပေါ်တွင်လဲကျနေသော ငနဲကို ကျန်လူများကအပြင်သို့ဆွဲခေါ်သွားကြလေသည်။ ထိုစဥ် ထိုထောင်ထောင်မောင်း မောင်းလူသန်ကြီးဆီသို့ ဖုန်းဝင်လာသဖြင့် ဖုန်းကိုင်လိုက်ပြီး တစ်ဖက်ကိုစကားဆိုလိုက်၏။

"ဟုတ်ကဲ့ပါ ဆရာမိုင်းခွန်နောင် ပြောပါခင်ဗျ"

ထိုသူကတစ်ဖက်ကိုထိုသို့ဆိုလိုက်ပြီး ခဏမျှတိတ်ဆိတ်သွားလေသည်။ ပြီးစကားဆက်ဆို၏။

"ဟုတ်ကဲ့ ဒါဆိုကျွန်တော်တို့ ရန်ကုန်ကိုပြန်လာခဲ့ပါမယ် ခင်ဗျ။ ဆရာစိတ်ချပါ။ ကျွန်တော်တို့ ဆရာရဲ့ဆန္ဒကိုအစွမ်းကုန်ဖြည့်ဆည်းပေးပါ့မယ်"

ထိုသူကထိုသို့ဆိုလိုက်တော့အခါတစ်ဖက်ကဖုန်းချသွား၏။ ထိုသူလည်းသောက်လက်စ စီးကရတ်ကိုတစ်ချက်ခန့်ဖွာလိုက်ကာ ဘေးနားတွင်ရှိသော သူ့တပည့်ကိုစကားဆိုလိုက်လေသည်။

"ကဲ ဟေ့ကောင်တွေ ငါတို့တွေအကုန်လုံးရန်ကုန်ကိုပြန်သွားကြမယ်။ ဒီတစ်ခါတော့ တစ်ကယ့်ပွဲကြီးပွဲကောင်းကိုနွှဲရမယ်ထင်တယ်။ ဟားးဟားးဟားး"

ထိုသူက ထိုသို့ဆိုပြီး သဘောကျစွာ တဟားဟားရီလိုက်လေသည်။

မနက်ခင်းရောင်နီလာသောအခါ သျှားတစ်ယောက် အလိုက်သိစွာနိုးထလာခဲ့သည်။ သို့သော် ဝုန်းခနဲထလို့မရသေးပါ။ ဘာလို့လည်းဆို ရင်ခွင်ထဲမှာ အသက်တမျှမြတ်နိုးရတဲ့ချစ်ရသူလေးက အိပ်မောကျနေတာကိုး။ ဝုန်းခနဲ့ထလိုက်ရင် ချစ်ရသူလေးနိုးသွားမှာပေါ့။ သျှားလည်း မြတ်နိုးစွာနဲ့ နှစ်ခြိုက်စွာအိပ်မောကျနေတဲ့ မေ့ ရဲ့ နဖူးပြင်လေးကိုနမ်းရှိုက်လိုက်လေသည်။ နဖူးထက်မှ ပူနွေးသောအထိအတွေ့ကြောင့်ထင်၏။ မေ့ ရဲ့ နှုတ်ခမ်း​ပါးလေးကတစ်ချက်ပြုံးလိုက်ပြီး ချစ်သူမောင်ရဲ့ ရင်ခွင်ထဲကိုအတင်းတိုးဝင်လိုက်လေသည်။ ပြီး စကားဆိုလိုက်၏။