الآليس

Part3

وحشة البيت بعدك ارجع أترجاك
وحشني بيك كلشي حتى سالفتك
ولو أدري جيتك جيت مودعين
جنت عالأقل هميت جنت ودعتك
ما أدري غفل عن عيني راح تروح
ويخلص بالعجل ما جنت أظن وكتك
"غير معروف"

"الآليس"
بقلمي أنا💕الرَميم💕
🎀لتنسون التعليق بين الفقرات والتصويت🎀
~~~~~~~~~~~~~~~~~~~~~~~~~~~~~~
-شاهين أنتبه لعيون إيلا أخذ مبايله ودز رساله لذو الفقار وگله بيها:وأبو راس الحار حامل الرايه إذا متكوم هسه من يم إيلا أشگك نصين وأسويك دوشك مال كتل وتدري بيه من أحجي أنفذ
"وصل إشعار لموبايل ذو الفقار قره الأسم وشال راسه باوع على شاهين الي جان خازره والشر يطلع من عينه بلع ريكة والخوف سره بجسمه بس يمثل القوة فتح الرساله قراها وكام وكف توجهت الأنظار إله"
-أبو شاهين:ويين فقار هستونه بدينه ناكل أگعد
-ذو الفقار أبتسم وگله:لا عمو ما شبعت بس ضجت من مكاني ما مرتاح
"علي چان گاعد بصف شاهين گله تعال مكاني وگام راح مكان ذو الفقار هنا شاهين أبتسم بمكر وگله تعال أبن عمي تعال يمي أداريك"
-گعد بصف شاهين وگله:بداعت عزيزة گلبك عوفني مالي خلگك
-شاهين:أممم حلفتني بالغالية لتخاف حبيبي قابل شسويلك گدامهم عيب أكل يله لتستحي
"ذو الفقار خله أول لگمه بحلگه وجان شاهين يگرصه من خاصرته بكل قوة ذو الفقار غص باللگمه وظل يكح وشاهين ما قصر طبطب على ظهره عود يساعده"
-ذو الفقار:كافي لدگ ظهري خسفته
-شاهين:على كيفك أكل شبيك مستعجل
-أم ذو الفقار:يمه وحيدي خو مابيك شي حبيبي
-ذو الفقار:أحم أحم لا مابيه شي بسيطه
-علي الدر باوع الشاهين مقلص عينه يحاول يدرس تصرفات شاهين:شاهين شبيك وياه عوفه للولد
-شاهين:قابل شمسويله هسه بس هو مايع زيادة
-علي:أي خطيه مو المدلل هذا هلوحييييد لأهللله هءهءهء"كالها بصيغة نعي ويسوي روحه يبجي"
"إيلا باوعت الذو الفقار وتحرك بحواجبها تضوجه شاهين شافها سرح بيها ومبتسم"
-أبو شاهين ندس شاهين وگله:بابا بس عيونك علي الدر راح يشك بيك
-شاهين:بابا يعني شسوي أحرك روحي قابل
-أبو شاهين:هسه بس عيونك نزلهن وأكل عوف الطفله
-شاهين:راح أنزل راسي وأغمض أحسن
-علي الدر يباوع لشاهين بأبتسامة ونظرة تحقيق:ها أبو صگر شو ضام عيونك خو مابيك شي
-شاهين:علي لو تركز بحياتك بگد ما مركز بيه جان هسه جان لگيت وحده وتزوجت
-علي الدر ضحك وگله:دتزوج أنت بالأول مو أخوك الأصغر منك مزوج وأنت بعدك
-شاهين:مو هذا حمودي خطيه ضحكوا عليه مدري رگعوا بسحر وزوج نرجس
-ضحكوا كلهم إلا نرجس گلبت وجهه وكالت لشاهين:ديله عيني عاد أحسن منك مگضي حياتك تنتظر وحده منعرف أصله من فصلها
-شاهين:لتخافين عليه عيني عزيزة گلبي علوية ومعروف أصلها
"هنا علي صفگ بحرارة متحمس لك هلااااا صارن معلومتين اذا نطول الگعدة بعد شويه أبو صگر يروح يجيبها ويجي ضحكوا كلهم"
-أبو ذو الفقار:بهاي المناسبه أني هم أريد أزوج أبني يعني بس أخطبله هسه و وره ميكمل جامعة يتزوج
-أبو علي الدر:بس فقار صغير يا خويه من هسه تحمله مسؤولية
-ذو الفقار:لا عمو تره ما بقالي شي هي 3سنين وأتخرج وألزم قضايه وخير من الله
-أبو علي الدر:عمو أنت شكد عمرك بالضبط مو أصغر من علي
-ذو الفقار:عمو تره أني أصغر من علي سنه وحده بس أبنك نايم بالأعدادية ما طلع
-علي ضاج وجاوبه بصوت حاد وعالي يحاول يسيطر على رجفة أعصابه:أنجببببب للللللك قابل راسب أنيييييي شسوي اذا الظروف صارت عكسي وأجلت
-ذو الفقار بأستهزاء كله:شبيك عصبت ما گلت شي هسه أنت سادس وتعودت على مرضك ومن الأبر صرت سبونج بوب عود راوينه شطارتك وطلع معدل بي خير مو تفشلنه وتنزل راس أهلك
-علي الدر بنبرة تهديد:فقااااار ألزم لسانك لتخليني أكوم أجتفك وتدري علي شيسوي ميحتاج أكولها
-ذو الفقار:أييييييع لعبت نفسي
-علي الدر لزم أيد علي يهدأه:علي عوفه خيولي علي تسمعني
-علي:إذا متخليني أضربه ما أسمعك لك أني تالي وكت يجي واحد مصلبخ مثل فقار يعيرني الله ياخذني إن شاء الله
-علي الدر:بس نطلع اني أخليك تضربه ولتندعي على نفسك بعد
-شمس تباوع لعلي تريده يشوفه علمود يهدأ شويه بس هو ما منتبه آخر شي گلتله:عليي أنطيني الملح من يمك
"شال راسه وسرح بيها نسى نفسه"
-شمس حست الأنظار عليهم كالت وهي تحاول ترجع علي لوعيه:علللي أنطييني الملح
-علي حم حم وحاول يدارك الوضع:هاج بت عمي حزام ضهري
-ذو الفقار:للعلم المفروض الرجل يصير حزام للأنثى ويساعدها مو العكس
-علي:حبيبي أكل وسكت لتظل تتفلسف لو جلدك يحگك
-ذو الفقار كشور وجهه وگله:همجي
-علي مد روحه بنص السفرة وگله تعال أشاورك ذو الفقار هم مد روحه وخله أذانه يم علي يسمعه شراح يگول:فقار صير حباب ولسانك بلعه لا أكوم أبوووو* بحلگك
-ذو الفقار رجع مكانه:أيييع گبر صدك همجي وما عندك أخلاق
-شاهين أدخل لزم فقار من أيده وعصرها حيل وگله:فقااااار كافي حبيبي أنتتتتت أكل ونچب
-أبو علي تنرفز لان صار مراعص يم الولد ومهامس عاط بيهم: أنتو صدك أدبسزيه متگولون عمامنه كاعدين عيب منهم گاعدين گدام النعمه وتتمالخون أستحوا شويه
-أبو ذو الفقار ضحك وكال:أبو علي عوفهم بيناتهم شباب خلي نرجع لموضوعنه
-أبو علي الدر:يا موضوع يابه
-أبو ذو الفقار:مال زواج أبني ما گلتوا المن أخطب من بيت منو أنطوني رأيكم
-أبو علي الدر:والله ما أدري يا خويه المن تخطب بس أني الي أگدر عليه أدز أم علي ويه النسوان إذا تردون
-ذو الفقار:بويه البنيه موجوده بس أنتو تختارولي وحده لان هنه ثنين
-أبو علي الدر:أيي هيج زين وين لاگيهن بعد عمك كون خوش ناس
-ذو الفقار:عمي من عدنه وبينه البنات بس ترخصوني أحجي
-أبو علي الدر:مرخوص عمي تفضل
-ذو الفقار:عمي أني أريد من عائلتنه وأحنه عدنه ثنين بنات أعمارهن تناسبني شمس و إيلا فأنتو شتفصلون أني ألبس
"صار هدوء وعَم الصمت هنا چانت الصدمة بالنسبة لعلي وشاهين علي صعد السكر مالته وعيونه غوشت من العصبة وشاهين الدمارات الي بأيده ورگبته كلهن طلعن وبس يريد يلزم فقار يمرعده تمرعد"
-علي شدد قبضته على أيد علي الدر وگله:علي الدر يمكن سكري صعد
-أبو شاهين:عمي بس إيلا صغيرة هوايه و ما أنطيها أني أعذرني
-ذو الفقار:عمي أني قابل أنتو شتفصلون أني ألبس اذا مو إيلا شمس
"شمس تجمعن الدموع بعيونها لازمه نفسها متريد تبين ضعفها هنا علي نتفض بعد ما تحمل راح سحل فقار من السفرة ومدده بلگاع ونام فوكاه موته گتل"
"شاهين گمز على علي عود يريد يفاككهم بس هو بالعكس يدفع بعلي على فقار كل ما واحد يجره هو يرجعه ويرفس بفقار وياه"
"بلگوه شالوا علي من فوك فقار بعد ما دماه و زورگه"
-علي يهدد بكلمته المشهوره:بس هدوني أبول بحلكه هذا القندره يريد شمس لك زمال صار سنين ضامها بگلبي وما حاچي بيها كدام أحد أخاف عليها من روحي يجي واحد مثلك حافي يكول أريد شمس وچماله يتشرط أبو حلگ الفاهي لو شمس لو إيلا نعال مننطيك أحنه مو أختنه أدوره
-علي الدر يحاول يسكت علي:علي كافي أسكت سكرك راح يصعد لتتخربط علينه
-أم ذو الفقار گامت تلطم: يمممه ولدي يمه حبيبي الله يكسر أيدك ليش هيج تضربه
-أبو علي الدر صاح بيهم: ببببس كاااافي بويه النسوان طبوا جوه والزلم تفضلوا للأستقبال من رخصة أبو شاهين طبعاً
-أبو شاهين: خويه البيت بيتك
"النسوان طلعن من الأستقبال وكلهن راحن بالصاله"
-أم قمر راحت على شمس تفتهم من عدها:شمس أحجي ولج شعندج ويه علي وهيج سوه علمودج والله أبوج هسه يذبحج
-شمس بخوف:ماما والله ما عندي شي أبن عمي حاله حال فقار
-قمر:أنجبي وصيري شجاعه مو هو يتكاتل عليج وأنتي تبريتي منه تف عليج يمه معليج بيها أني أدري علي كاتل روحه عليها وهي مسرسحه عليه يوميه ترجع من المدرسه هوه يمشي وراها بالبايسكل وهيه بالسيارة من غير الأكل الي يجيب ويشتريلها
-أم قمر:أمداج أي والله باعي من هسه أني معليه أنتي حبيتي و أنتي حيري بمصيبتج مو تجين تتولولين يمي
-قمر:يمه أنتي كل مشكلة هيج تگولين ومن تصير صدك بس يجي بابا تنزل دموعج قبلنه وبداعتي لتأذيهن وبداعتي لتحجي
-أم قمر:أيا طايحة الحظ مو صوجج صوجي أني أدافعلجن
-أم علي الدر:يمه شموسه راح تصير چنتي يمه يوم المُنى أشوفج أبيتي تفترين چنج غصن بان تعاي أبوسج ولج تعااي
-شمس بخجل:شكراً خاله أنتي بان
-قمر لطمت على گصتها:هو هيج يجاوبون
-شمس:شمدريني أول مره يكلولي چنج غصن بان
-أم ذو الفقار:أوووي هم زين وحيدي ما راح ياخذ شمس لو إيلا أني مواعده أختي أخذ بتها تخبل ما شاء الله
"محد أهتم لحچيها وصار هدوء بس صوت الزلم بالأستقبال عالي"
-أبو علي الدر:عللللي تعال يمي
-علي:ها بابا
-أبو علي الدر:ليش ضربت أبن عمك وشمس شعندك وياها
-علي فاقد أعصابه ومتهستر كلش ويرجف:بابا ما عندي شي وياها بس...
"صارت عنده دوخه قويه والدنيا أسودت بعينه و فقد توازنه"
-علي الدر ركض سنده وگعده على القنفه:علي وليدي باوعني شو لتغمض إيلااااااا تعااااااي ركض
-إيلا راحت تركض لعلي:هاا شنو صار شبي علي
-علي الدر:مابي شي يروحي ركضي للسيارة الأبره مالته والدوه جيبيهن طيرييي بتيييي
-إيلا راحت تركض وطلع شاهين وراها خاف يصير شي بيها:ها إيلا لگيتي الأبره لو لا
-إيلا:أييي هاااي
-شاهين:عفيه يله طبي أنطيها لعلي الدر
-إيلا طبت تركض:عللللي الدررررر هاك هاي الأبره
-علي الدر بسرعه ضربه الأبره ونيمه على القنفه علمود يرتاح:مدد شويه خلي ينزل سكرك ونسولف لتخاف
-علي:ليأذوها فدوه معليها هي أني حاسبوني
-شمس موتت نفسها من البجي:ماما خلي أروح أشوفه حبابه راح أموووت
-أم شمس:يمه سودة عليه بس ميصير أطلعين هسه يحچون عليج
-نرجس:شهل عياره كل وحده بعدهي ما طالعه من البيضة وخالتلها واحد جوه أيدها من تكبرن شسون
-قمر ما گدرت تسكت:نرجس لسانج ضبي وسمج ضمي لا أصيح شاهين أخلي يربيج من جديد لان بس هوه دواج
-نرجس:والله يا الله بعد عليه المزعطه عيني إيلا خاتون أنتي متحبيلج واحد ماحود وتخلصينه
-إيلا جاوبتها ببرائه:أي أحب أهلي كلهم أكو واحد ميحب أحد
-نرجس:هممم وأشوفج تتبسبسين وين شاهين وتتختلين وياه
-إيلا جاوبتها بفهاوه:شنو يعني تتبسبسين بعدين عمو شاهين ما لاعب ويايه ختيلان علمود شايفتني أتختل
-نرجس:نننن فقيره عود متفتهم
-أم شاهين:نرجس عيب هذا الحجي أحترمي وبعدين إيلا طفله بعدهي
-نرجس بغضب:عممممه يا طفلللله هاي حييييه هذاك اليوم شفتها تتحارش برجلي على أبو يشرحلها ومدري شنو واليوم ويه شاهين وتگله وديني للغرفه مالتك بأذاني سمعتها
-أم شاهين عصبت وشافت أم علي الدر واكفه ما حجت شي أحتراماً الها أجت جرت نرجس من أيدها وودتها لوحده من الغرف وگلتلها:أدب سز ما أقبلللل تحجين على إيلا هيج كتلج طفللله ومره ثانيه متعلين صوتج عليه هيج يله روحي لغرفتج
-أم شاهين راحت لأم علي الدر:خيه عذريني والله هاي مرت أبني مربيتلي عله گلبها كُله حقد وغل عبالك الناس كلهم يكرهوها ومعاديها
-أم علي الدر:لا خيه معذوره أنتي ما الج علاقه بيها بس هو كل واحد وتربيته
-أم شاهين:فدوه لعمرج حبيبه
-وره ما طلعت أم شاهين من الغرفه نرجس ضربت روحها راشدي قوي وراحت لرجلها تبجي وتصيح:تعاااااال شووووف أمك تضربببببني علمود وحده زعطووووطه
-شاهين گلبه نغزه على إيلا راح للصاله :ها يمه شنو صاير شو طلعت الحيه تنگط سم
-أم شاهين بخوف خاف أحد يحجي شنو صار وتصير مشكله أكبر:هاا يمه ماكو شي عركه مال نسوان معليك بيها
-شاهين:يمه يا عركت نسوان غير أيدج مطبوعه بوجه نرجس بعدين شبيج هيج مصفره أحچيلي لو أكلج لتحجين ميريد أني أعرف بطريقتي إيلا عمووو تعاي
-إيلا جانت تلعب بالموبايل مال علي الدر راحت يم شاهين:ها عموو
-شاهين بمكر لان يدري الكل يعرف إيلا متجذب ومتعرف تضم شغله ولا تعرف شنو الي تحجي وشنو الي متحجي فطيره كلللش:إيلا شنو صار شبيها نرجس
-إيلا ضحكت بفهاوتها وأيدها ثنينهن تخليهن على حلگها:ما صار شي عمو بس يمكن نرجس عباله أنت تلعب ويايه ختيلان وكتله لا عمو شاهين ميلعب ويايه
-شاهين صفن بيها شويه:ءءأحم شلون يعني نلعب ختيلان شمعنى
-إيلا:ما أعرف هي كالت أنتي تتختلين ويه شاهين وتبسبسووون بسبسبس"وضحكت مره ثانيه"
-شاهين أبتسم على تصرفات إيلا:لا عمو ختولي هاي أم راسين معليج بيها
-إيلا رجعت ضحكت ضحكتها:شنو يعني عدها راسين مثل الحيه أم راسين
-شاهين:عفييه بنيتي الشطوره بالضبببط هيج يله روحي كملي لعبتج
"طلع شاهين وقرر ميحجي ويه نرجس شي إلا اذا هيه اندگت بي"
-علي گعد وشويه بدأ يسترجع وعيه:علي الدر حباب جيب فقار أبوووول بحلگه حباااااااب ما أسويله شي بس بوله
"فحطوا ضحك كلهم على علي وهو من كل عقله يحجي وذو الفقار كاعد على القنفه وأبو خال ثلج على وجهه"
_أبو علي الدر:خويه خلي نرجع لبيوتنه هسه لأن وضع الولد مو مال تفاهم واحد مدمه والثاني سكره صاعد
-أبو شاهين:وأني رأيي من رأي أخويه أبو علي
-أبو ذو الفقار:هاهيه خويه أنت الچبير وشتفصل أحنه نلبس
-أبو علي الدر:رحم الله والديك خويه
"وأخيراً رجع كل واحد لبيته"
~~~~~~~~~~~~~~~~~~~~~~~~~~~~~~
في الطريق لبيت أبو علي الدر...
-علي الدر:بويه شناوي تسوي باجر
-حيدر:والله يا بويه ما أدري هذا أخوك سطرني
-علي:بويه شمممممس اني أحبها وما أعوفها والله أسويها مجاااااااازر وعلي أخذها أخذها
-حيدر:هذا من شوكت صاير عنده لسان ويهدد هااا
-علي:من زماااان بس سااااكت علما أكمل هذا السادس المصخم بعدين أنييي أكو واحد واعدني يوكف بظهري وأخذ شموستي"گالها وأنتچه وهو مرتاح "
-حيدر:وهذا يا مطي مواعدك
-علي الدر بأبتسامه:أني المطي بويه
-حيدر:لا بويه حشاك بس معقوله يعني أنت قابل على سوايته
-علي الدر:أني گتله ما دام ما غلطان وتحبها من گلبك مو تگضي وگت أني بظهرك وأني گد كلامي
-حيدر:ما دام أنت راضي لعد أني هم بظهره وهيه بت عمه وهو أوله بيها من الغريب
-مريم:أحم وبت خالته هم
-حيدر:والنعم يابه
-علي:كللللللللللللللليش هو الشافها هو أنعجب بيها هو الگال لأمه روحي خطبيها هاي الرادها وهاي التمناها بت العم لبن العم جبناها
وعرس علاوي هيل وطش بالولايه هم عريس وهم نشمي وهم ربعه يزفونه
"وظل علي الطريق كله يغني ويرگص وإيلا وياه تردح وكلهم فرحانين وصلوا للبيت وكَل عادة علي الدر بهيج وقت يطلع فگالهم أني طالع لتنتظروني ناموا"
~~~~~~~~~~~~~~~~~~~~~~~~~~~~~~
في بيت أبو شاهين...
-شاهين:بويه حلها فدوه حلهااا خاف تصير صدك وهذا العار ياخذ عزيزة گلبي والله أموووت أنتهييي
-أحمد:بويه شنو السالفه تموت وره بنيه لا أول واحد حبيت ولا أول واحد تزوج حبيبته شد حيلك خلي نفتهم لا تخبصنه
-شاهين:بوووووويه ومحمد أسويها قيامه عليهم وأمرعدهم تمرعد أكللللللله عزيزة گللللللبي هاااااي
"على صوتهم أجت أم شاهين تركض"
-نور:شبيكم يا ستااااار شبيك يمه شاااهين ليش تصيح وصوتك رايح
-شاهين:يمممممه أنتي مو تردين تعرفين منيه عزيزة گلبي مو كلكم تردوووون تعرفوها
-أم شاهين:يمه يوم السَعد أعرف منيه الماخذه عقلك وگلبك هيج وبيدي أروح أجيبها الك من حلك السبع أطلعها وداعتك يمه
-نزلت نرجس تركض من فووك وتصيح:أوووووووووكف أنيييي هم أريييييد أعرف منيه الثاولتك هيج
-محمد:نرجس لسانج طولان هوايه
-نرجس:تعال گصه إذا رجال
-محمد:مو أجي أگصه الج بالقندره حيوانه
-شاهين لزم أيد محمد:هسهههههه وكتها أكللللهم راح يزوجوووها همه يتمالخون
-نرجس:لتخاف هاي سولف العياره مال بنات عود راح أتزوج و أجوني خطابه وهاي علمود تروح تخطبها وتورطك تلكاه شو شنو من مصيبه مسويه
-شاهين:راااح أعوف محمد وأخلي يربيج من جديد إذا متنلصمين وعلي أمرعدج تمرعد
-أم شاهين:يمه صلوا على محمد
"الكل:اللهم صلِ على محمد وآل محمد"
-أم شاهين:يله يمه شاهين گول منيه عزيزة گلبك
-شاهين:ما أگول گدام هاي
-محمد:هاهيه هسه تطلع بس أني أبقى
-شاهين:أنت عادي أبقى
-محمد باوع لنرجس وگلها:يله يابه بلا مطرود أمور عائليه
-نرجس حولت عيونها:عيييع قحط بنات
-طلعت نرجس راح وراها محمد يشوفها خو ما وگفت وره الباب ورجع صفگ بحماس:يله فضها گوووول
-شاهين:أحم إيلا عزيزة گلبي
"الكل بين على وجهه الصدمة وكسر الصمت محمد"
-محمد:صلوااااات على محمد أفرح بووويه واحد من ولدك طلع بي خير وجاب خوش چنه لأمي
-نور:ولك حسك عيب من مرتك
-محمد:والله يا يمه ناويلي على نييييه بس أدعيلي
-نور:الله يسهل عليكم ثنينكم يمه وأفرح بيكم
~~~~~~~~~~~~~~~~~~~~~~~~~~~~~~
في المصح العقلي...
-10/15 تأريخ هلاكي
ناز:واوو فهمت كل شي دحجي لك شنو صار بي وليش بيوم 10/15
-آليس:يوم 10/15 ما أنساه عمري كله اليوم الي أنولدت بي وكتلوني بي اليوم المشئوم الي راح يصير رعب لكل واحد شارك بدماري راااااااح أدمرهم كلهم وأنهي حياتهم راح أذبحهم كلهم وأسوي مجازر ماصايره بتأرييييخ العراااق
-ناز بدت تتفاعل ويه القصه وگالت:ليش مشئوم شنو صار بي
-آليس:...........

"فلاش باك ليوم 10/15"
-آليس:مريومتي شنو رأيج اليوم تجون يمي وأعزمكم على عشه يلوك لهل حلك
-مريم:أممم ما أدري أسأل أهلي وأگلك
-آليس:تمام يروحي أنتي أنتظر منج خبر "بدلت وطلعت للمكتب وجان عندي شغل كلش هواي حاولت بكل الطرق أكمل بسرعة بس ما لحگت"
-آليس:أستاذ إذا تسمحلي بس هل مره خلي أطلع من وقت لازم ما اتأخر زوجتي وأهلها ينتظروني
-المدير:وشنو يعني شراح يصير لو تأخرت روح كمل شغل بـ11:00 تطلع للبيت عود
"تنرفزت ورجعت أكمل شغلي بسرعه بسرعه رن المبايل قريت الأسم"مريمي"شفت الساعه بـ10:30"
-آليس:ها يروحي أنتي
-مريم:حبيبي وينك تأخرت أحنه وصلنه وخاله هم بالبيت تنتظرك
-آليس:يروحي أنتي أسف تأخرت هذا المدير القندرة ميقبل أطلع إلا تصير بـ11:00 شلون هسه أگوم أسحله
-مريم:تؤ تؤ تؤ حبيبي لتعصب فدوه عوفه لتحجي وياه خاف يفصلك أنوب منين ناكل باجر عگبه إذا أزوجنه"حچتها وهيه تضحك"يله يروحي أنتانييك أحنه
-آليس:منين تاكلين أم حلگ عود أني عايش عليه راتبه فلوس طلعة وحدة حبيبتي اااخ لو ما أنتي بنعال ما أشتري بس شسوي أمري لالله أكمل الشغل وأجي
"أنهيت المكالمة وظليت أشتغل لحد مصارت بـ11:00 رحت للمدير"
-آليس بملل ممزوج بنبرة غضب:أستاذ صار الوگت أطلع
-المدير:روح روححح عبالك أول واحد بالدنيا يخطب ما شايف
-آليس:أبتسمت بوجهه مجامله لان من الأساس ماأطيقه عفته و طلعت للكراج صعدت السيارة وأنطلقت للبيت وصلت دگيت الجرس محد فتح الباب گلت بيني وبين نفسي هسه أني المفتاح وعندي ما أطب شبيه فتحت باب البيت وجان أشوف منظر بعمري ما أنساه من شدة الرعب والأجرام الي بي...
~~~~~~~~~~~~~~~~~~~~~~~~~~~~~~
جميلاتي الجميلات💗✨

شنو رأيكم بالبارت😌وشنو توقعاتكم للبارتات الجايه😎

حسابي الأنستا:al_remim

أقتباسة اليوم✨‏من أرادَنا فَليُجاهِد✨