Hoy, Perla! (A Bisaya Diary)

10

Hoy, Perla!

Grabe kalabad sa akong ulo! Di man ko hilig maminaw sa klase pero ganina wa juy nisulod sa akong utok. Natulog rako. Pero wa ko kaexpect ba pukawon mo nimo ug kalit. Abi nako awayon ko nimo kay natulog ko sa klase or gisumbong ko nimong ma'am. Pero hala? Unsa imong ingon? Muuli na ta? Kita duha? Ihatod ko nimo sa balay? Gipananghid nako nimo sa teacher ba mu-absent today?

Tinuod ba ni akong mga nadungog o tungod rani kay gihilantan ko? Pagtarung diha, Per, basin di na nuon ko maulian ani. Gikulata na sad nimo akong kasing-kasing, wala na sad ko kasabot nganung malipay kog kalit pag naa ka sa akong duol.

Nangutana ko nganung imo ning gibuhat unya imong tubag kay gusto raka mubawi sa akong gibuhat atong flag pole incident. Like omg, Per! Bawing-bawi na ka! Sa pagkaon pa lang na imong gidala! Bawing-bawi na kaayo!

Pag abot nato sa balay, ambot unsay nakaon nako o basin tungod nis hilanat pero gigunitan nako imo kamot. Pasayloa ko, Per, sadyang gusto ra jud ko mangutana nganung di ko nimo pansinon sauna.

Dugay ka nitubag. Nitanaw paka sa ako. Grabe titig na titig ra sad ka kaayo uy. Kasayud man ko na gwapo ko pero ayaw ra pod kaayo ko lantawa, maulaw sad baya ko noh. But anyway, nagexpect ko na grabe kalalom sa imong rason. Lalom pas bangag sa North Pole. Pero!

Unsa imong gitubag? Di ka mamansin nako kay palauyab ko?! Hoy! Hoy ka, Perla!

Wa pakoy nauyab! Daghan lang koy bae kay duolonon man ko pero isa sa ila wa jud koy giuyab!

Grabe ka, Per. Pero wala ra sad ko nagbasol na nangutana ko. Karun kasayud nako. And since, kasayud naman ko, di nako magsulat pa diri. Unsa pa may pulos? Wala nakoy reason unya naclear na sad sa ako utok nganu di ka mamansin. Abi nako hate ko nimo pero dili diay.

So sukad ugma, di nako magsulat para sa imo.