ملاحظة حبيت تعرفوها
هاي الاحداث و التفاصيل كلها عرفتها من البطل نفسه .. اني بنت خالتة و مثل اخته احنا تربينة سوة و هو سولفلي كلشي صار بينه و بين اسيل و اني شفت القصة كلش حلوة و غريبة و حبيت انشرها
النشر نفسة مباشرة من كلام احمد بدون اي تحريف او تغيير مني
.......
تكملة ....
رجعت للبيت فرحان طاير احس سويت انجاز
طبكت السيارة بالكراج و صعدت ركض حتى احجي وياها
فتحت الوتساب بعدها حاظرتني التلكرام و الفايبر نفس الشي اتصلت على الخط هم بلوك بقيت الوب ليش لسة ما شالت الحظر يمكن رجعت نامت راسن
يلا نوم العافية اليوم هواي زعلتها باجر اخذلها هدية اصالحها بيها
نمت و اني غركان بافكاري السعيدة
حسيت المغرب نزلت اكلت و بدلت و طلعت رحت لمجوهرات حسن الخفاجي الي بزيونة جبتلها كلادة حرف A حرفي اني وياها و برجعتي مريت على زهور يلدز يمنة بالكرادة اخذتلها اجمل بوكي ورد
رجعت للبيت شافتني الوالدة كالت اووووووووو الامور مطورة ورد و حبشكلات
اني ضحكت كلتلها يمة اليوم هواي ضغطت عليها و اذيتها و شبعت بجي بسببي و اريد اصالحها
امي : يمة علكيفك وياها بالتعامل ترا النسوان تطفر من الرجال الخشن وياها ..
النساء تحب الحنية و الرقة
اني : والله يوم دا اتغير علمودها دا اضغط على نفسي و اغير اطباعي المحلوة علمودها
امي : عفية وليدي اذا عاملتها مثل اب و بنته رح تعبدك عبادة
شوف هسة ابوك صارلي متزوجته من سنة 88 و مااكدر يوم اعيش بدونه لان عرف شلون يعاملني
اني : صدك يمة وينه الحجي لعد اريد اشوفه مشتاقلة
امي : بعده بالعيادة مالته هسه على جية
اني : و انتي يوم شنو اليوم مو عندج عيادة ؟
امي : هسه خالاتك ع جية و مرحت للعيادة اليوم
اني : اي والله مشتاقلهن كلش يمة اني حصعد من يوصلون صيحيلي
امي : متاكل حبيبي ؟
اني : من يوصلن خالاتي عود ناكل سوة
امي : اوكي حبيبي اصعد بدل و ارتاح
صعدت رجعت ادك عليها مغلق
غيرت ملابسي و رجعت دكيت مغلق
اني احجي ويه نفسي : شنو كل هذا نوم يا حبيبتي اكعدي عاد وينج بالي يمج
اجوي خالاتي نزلت تعشينه سوة و كعدنا اني و الوالد بالحديقة شوية وراها وصلت خالاتي لبيت جدي بشارع 52 و بطريقي للبيت دكيتلها مغلق متحملت رحت لبيتهم بقيت انتظر شويه
وراها صفنت على نفسي
احمد شبيك شديصير وياك شنو رجعت مراهق شهل حركات ولك بابا اصحى على نفسك انت دكتور كد الدنيا و حلو و ابن دكاترة و زنكنة شبيك قابل حتطير شكو عليها يجوز تلفونها فاصل شحن او بعدها نايمة
اخذتني الافكار و محسيت الا على صوت التلفون يدك
فرحت و فزيت كلت اكيد هي
رفعت التلفون شفت مكالمة من الوالدة جاوبتها حتى لا يضل بالها و كلتلها راجع يمة هياتني اضطريت اكذب عليها اكلها اني على ابو نؤاس حتى متقلق
رجعت للبيت طبكت السيارة و صعدت لفيت راسي و نمت للصبح فزيت على صوت المنبة
سبحت و بدلت و اكلت و طلعت رحت ركض الها
صعدت للمختبر دورتها ماكو
كلت بعدها يجوز مجاية
كعدت انتظرها
صارت 9 ماكو
9 ونص ماكو
10 ماكو
صعدت للمختبر اسئل عنها كالوا خابرت عبير تسويلها اجازة لان مريضة
سئلت منو عبير ؟ كالت تفضل
اني : اريد احجي وياج
هي : تفضل اسمعك
اني : بالي كلش يمها و تلفوني طافي شحن عادي تخابريها اسمع صوتها
هي : منو انت شصير منها
اني : اني دكتور احمد حبيبها و قريبا نلبس حلقات
هي : بس اسيل ما كالتلي مرتبطة .. اوك على العموم حتصل عليها احجي وياها
دكت عليها فتحت خط سمعت صوتها كالت الو كلبي كام يدك سريع
الو حبيبتي وينج اني احمد ليش ماكو يا روحي ضل بالي
اخذت التلفون و كلتلها من رخصتج شوية و اجي رحت حجيت وياها
اني : وينج كلبة من بارحة حارك التلفون عليج مسويتلي بلوك و صديقتج من اول مكالمة جاوبتيها
هي ساكتة
اني : لج بابا لا تسكتين من احجي وياج عاركيني صيحي عيطي بس لا تسكتين سكوتج يستفزني اني مدا احجي ويه صنم
هي : شلون قنعتها تنطيك التلفون شكلتلها هم كلتلها اني حبيب اسيل مثل ما كلت ل علي شتريد مني مو كافي كل الي سويته رجعت للبيت عيوني مورمة من البجي بقيت نايمه و مكدرت اداوم احس متكسرة افضحني بعد بالدوام طلع سمعة عليه
اني : هذا القندرة مو كتلج لا تجيبين طاري بعد شفهمتج اني البارحة اني اعلمج يصير خير
هي ساكتة
اني : مشتاقلج اريد اشوفج حبابة خل امرلج هسه للبيت
هي : اي مو احنا عايشين باوربا تمرلي للبيت حتى ابوية و الولد يسحلوك
اني : خل يسحلوني اذا علمودج خلي يطيحون حظي قابل حبابة خل امرلج اوكف براس الفرع بس شويه انزلي اشمج و روحي
هي : لا مااريد
اني : زين ارفعي البلوك اريد احاجيج لج عيب صغرتيني كمت اجي اتوسل بفلان و علان و اسوي قصص و افلام حتى يخابروج و اسمع صوتج
هي : تستاهل مو اذيتني كومة تستاهل الي يصير بيك و هم كلبي ميبرد عليك
اني : ارفعي البلوك و هناك شسوين بيه سوي بهذليني ما احجي
هي : مااريد
اني : هسه مااكدر اضغط عليج حبيبتي مريضة رح اتحمل لباجر تداومين و اخذ تلفونج ارفع البلوك بيدي
احبج كلش عمري
هي ساكتة
احبج ولج قزومة
هي : اي اوك شنو الغريب منو يعرفني و ميحبني
اني ضحكت بصوت عالي لك دخيل هل صوت و صاحبته و هل ثقة بالنفس
بس مااقبل احد يحبج بس اني
حبيبي امانة باجر داومي حبابة
هي : اي اداوم . يلا كافي روح عيب من البنية
سديتة و انطيت للبنية تلفونها و تشكرت منها و رجعت للمستشفى مالتي فرحان بس احس جسمي يكرص بيه اريد اشوفها مشتاق لوجها لتفاصيلها
رحت للمستشفى مالتي دخلت للاستشارية كعدت لحد ساعة 12 ونص احس هلكت من هوسة المرضى
طلعت شوية احرك جسمي رحت لكافتريا الجراحات اشرب شي و ارتاح
كعدت شوية وراها نزلت بصمت و طلعت للبيت رجعت تغديت و نمت تعبان
كعدت من النوم رحت للعيادة بقيت بيها لل10 بالليل و رجعت للبيت
سبحت و نمت من التعب حسيت الصبح قبل المنبه بدقايق
كعدت ركضت شوية رجعت تريكت و بدلت و طلعت للدوام من وكت علمود الازدحامات هم مال شوارع الكرادة و هم مال جسر باب المعظم
وصلت طبكت السيارة بكراج الجراحات و رحت اتمشى بحدايق الادارة العامة جان الجو كلش حلو
تمشيت قريب من مستشفى حماية الطفل و نزلت شوية يم نهر دجلة كعدت ربع ساعة و رجعت تمشيت للمستشفى مالتها
صعدت فوك للمختبر مشفتها قلقت خاف هم متداوم اليوم
وكفت يم المصاعد دا انزل
انفتح باب المصعد طلعت بوجهي 😍😍😍😍
هي انصدمت فتحت عيونها و اني فرحت كلش
اخذتها من ايدها و نزلنه جوة رحنا كعدنه يم النهر
اني : شلونج يا نور عيوني ؟ شلون صارت بنت گلبي ؟
هي : زينة
اني : مشتاقلج يا بعد امي و ابوية
هي ساكتة
اني : انطيني ايدج
هي : لا مااريد
جريت ايدها و بستها
اوووف مو ايد عسل عسل عبالك ايد نونو ، انتي النونو الحلو مالتي
يلة ولج انطيني تلفونج
هي : ليشششش
اني : شبيج جفلتي خما عندج بي شي
انتي ضامة عليه شي
دا تحجين ويه احد ؟
هي : اه ايدي شبيك رح تكسرها
اني : اسف حبيبتي محسيت على نفسي كلش اعتذر
انطيني تلفونج
هي : لا مااريد
سحبت جنطة من ايدها و فتحتها و طلعت التلفون
اني بصوت عالي : شكد باسورد ؟
هي : 12121993
فتحت تلفونها كلبت بي دا اشوف ليش متقبل تنطي
اني : ليش ما عندج نت ؟
هي : عدنا راوتر بالمختبر هسة من اروح يكنك
فتحت فورجي و كنكت تلفونها على الشبكة مالتي و دخلت شفت المن ضايفة و ويامن تحجي جات دخلت شفت المكالمات رحت على البرامج شلت الحظر عني شفت الجات و الكروبات الي داخلة بيهن
اني وكفت و كلتلها امشي وياية
هي : وين
اني : شبيج جفلتي لا تخافين حبيبي
نروح للسيارة جايبلج شي
هي : مااريد
لزمتها من ايدها و تمشينة للكراج قدمتلها الكلادة و باقة الورد
منطت ردة فعل واضح بس كالت شكرا
هي : رح اعوفهم يمك
اني : ليشششششش 😡
هي : شبيك ليش راسن تصير عصبي عليه
انت جايب ذهب و احتمال بهوسة الشغل احد ياخذه بدون ما احس
خليهن بالسيارة نهاية الدوام اخذهن بس شكول لاهلي من ادخل بيهن للبيت
اني : سهلة
الكلادة هسه البسها الج و باقة الورد كولي عبير جابتها الي لان بارحة جنت مريضة
لبستها الكلادة كلتلها شوفي حبيبتي هذا حرفي و حرفج و بست ركبتها من ورا
