صعدت لغرفتي و قفلت على نفسي الباب و نمت
نمت يوم كامل بدون حركة محسيت الا على صوت الباب مال غرفتي دا يندك بصوت عالي
كعدت متكسر جسمي كوة جريت روحي للباب حتى افتحها
امي بخوف و قلق و توتر يمة ولك وينك شنو هل نوم من البارحة شصاير وياك ولك
الوالد : ابني شبيك خاف مريض خل افحصك
اني : يابة . يوم
ما بيه شي عوفوني تعبان من الدوام و الخفارات اريد انام و من اشبع نوم اكعد
رجعت دخلت الغرفة و سديت الباب تعبااان كلش اول مرة احس بهيج تعب
باوعت على الساعة دا اشوفها شكد ، دورت تلفوني مشمور بالكاع
باوعت على ملابسي هاي شنو هدوم الدوام بعدني بيها نايم بالبلوز و البنطرون
نزعتهن و دخلت للحمام فتحت مي حار و وكفت جواه حتى اصحصح شوية احس عبالك جنت بغيبوبة
طلعت من الحمام كعدت ع فراشي صفنت شوية شلت تلفوني دكيت عليها مغلق ركعت التلفون بالكاع تفلش الف قطعة
اني : و شرفها لامي مرح اعوفج يا اسيل اذا ما شوفتج ايام اسود من الليل اطلع كواد و بلا شرف هينة اني اعلمج
الكفج و لكل حادث حديث اذا ما كسرته لخشمج ما اطلع ابن ابوية
نزلت اكلت و رجعت صعدت و هنا بديت افكر شرح اسوي و جانت افكاري كالاتي : اخذ اجازة لمدة سنة
اكول لاهلي عندي فرصة عمل برا بغداد
اعرف وين تداوم و اروح اخطفها
نطلع برا بغداد و انتقم منها اخذ حقي
خابرت الولد كلتلهم خل نطلع
والله تجمعنه و طلعنه نفتر
رجعت متاخر كلش للبيت تعبان حيل شربت هواي احس دماغي يريد ينفجر من الوجع
هاي اول مرة اجرب اشرب اني لا ادخن ولا اشرب ولا حتى نركيلة
نمت بوجهي محسيت اله ثاني يوم روزة دك الباب دا تكعدني
فزيت راسي طبل يريد يطك
اني : روز سوي كهوة ثكيلة و جيبيها هنا
اوك بابا دقايق و القهوة جاهز
كمت سبحت لان ريحتي جايفة كلها مشروب
كشخت و تعطرت
صعدتلي روز الكهوة شربتها و نزلت حركت السيارة و بوجي لمدينة الطب
دخلت مباشرة لمدير المستشفى مالتي حجيت وياه و طلبت منه موافقة على اجازة سنة كاملة براتب اسمي و كتله عندي ظروف جبرتني اخطي هيج خطوة
هو ما كال شي تفهم و انطاني موافقة
رحت قدمت طلب و مشيت بيها تواقيع و كالو روح للافراد للموارد البشرية و هناك يفهموك
رحت و جانت هوسة كلش و ما كملت نفس اليوم
رجعت للبيت شفت امي كلتلها يمة ابوية وين ؟
كالت موجود خير يمة صاير شي ؟
حبيبتي اريد احجي وياكم ثنينكم بس لا تقلقين ماكو شي يخوف
يلا حبيبي رح اصيحة و نكعد نحجي بين ما روزة تصب الغدة
اجة الوالد سلمت عليه
اني : يابة . يمة اني اجتني فرصة عمل سوبر انترنشونال بالاقليم و صراحة فرصة ما تتعوض وية شركة تنروش الالمانية و هذا الشي رح ينقلني خوش نقلة
امي : اي كمل
اني : رح اقدم اجازة من وظيفتي و اروح هناك اكمل و ارجع
امي : شكد تبقى هناك ؟
اني : مااعرف تفاصيل يمة اليوم ادزلهم ايميل و انتظر الرد بس اتوقع الموضوع كم شهر بس
الوالد : زين و العيادة مالتك ؟ هذا باب رزقك و انت بعدك هسة بديت تجمع مراجعين يثقون بيك
اني : اني فكرت اشوف دكتور او دكتورة نفس اختصاصي يكعد بيها هل فترة احسن ما تنسد انتو شنو رايكم ؟
الوالد : ابني انت وحيدنا الي طلعنه بي من الدنيا و ربيناك بطريقة صحيحة و الدليل هاي نتيجة تربيتنا هسه انسان ناجح و مستقيم
احنا نثق بيك و مدام انت قررت تروح معناها الك بيها فائدة
توكل على الله
لو شتكولين انتي دكتورة وداد ؟
امي : لا هاهية حجي الي تكوله انت عين العقل بس اني رح اشتاقلك ابني برضاتي عليك لا تكطع ولا تغيب و حاول ترجع بسرعة مو تعجبك الكعدة هناك
حظرت ملابسي و حجزت اول طيارة لاربيل
اجوي وياية الوالد و الوالدة لمطار بغداد و طرت لاربيل
نزلت باربيل حجزت بفندق كلاسي عنكاوة اخذت غزفتي و نمت لان تعبان
كعدت سبحت و نزلت اكلت و افتريت شوية بالشارع قريب من الفندق
رجعت للغرفة فتحت اغاني DMX و بلشت افكر بتفاصيل الخطة جانت كالاتي :
اعرف وين رح تداوم التدرج مالتها
اروحها اكلها دا احجي وياج بس
اخطفها و اخذها لاربيل انتقم منها و اخذ حقي
زين شلون اجيبها لاربيل
اذا طيران اسمها رح يدخل حاسبة و يوصلولها اهلها و اذا بري اسمها رح ينختم عليه بسيطرات التفتيش
اخطفها و ابقيها بغداد ؟؟ لا يلكفونا قابل وين اريد اضمها بغداد صغيرة و بيوتها بيت بنص بيت
اخذها لقرية بالشمال قليل عليها الحركة و السياح ؟
نرجع لنفس السؤال شلون ادخلها للشمال
و هنا اجاني الحل وفكرت بيها من كل الجوانب و ثبتت الخطة و كلت خل انام و الصبح ابدي التنفيذ
نمت و سويت مؤقت تلفوني على ساعة 5 الفجر
كعدت الصبح سبحت و بدلت و حضرت جنطة ظهر حطيت بيها جوازي و الفلوس و نزلت ركضت شوية رجعت للفندق تريكت و بديت اسئل الناس القريبين من الفندق اهل المحلات و المطاعم على قرية بعيدة عن السياح لان اريد اتزوج و اقضي شهر العسل بعيد عن الهوسة
و الاغلبية كالوا ان اربيل مدينة سياحية مزدحمة
الاماكن الهادئة موجودة بسليمانية و دهوك
سئلت و بحثت هواي على النت على القرى مال سليمانية و دهوك و لفت انتباهي قرية ( تازده كروشله ) موجودة بلسيمانية منعزلة و بعيدة و محد يعرفها و قليل احد يوصلها بحثت عنها و طلعت موقعها على النت و حسبت الوقت من اربيل لسيمانية لقرية تارذه
ضبطت كلشي براسي و خططت و دفعت فلوس الليلة الى نمت بيها بالفندق و رحت لمطار اربيل حجزت اول طيارة طالعة لسليمانية
وصلت هناك حجزت بفندق رمادا
بدلت ملابسي و نمت ساعة لان كاعد من الفجر
كعدت اكلت و بدلت و نزلت اسئل شلون اوصل لقرية تازده بس واجهت صعوبة كلششش بموضوع اللغة ، اني مااعرف احجي كردي و جماعة سليمانية ما يحجون عربي ابد
المهم صدفة عرفت واحد بغدادي مستقر بسليمانية سئلته على قرية تازده استغرب كلي شعندك بيها
كتله اني من بغداد و اريد اقضي شهر العسل بمكان هادى و حلو و قليل بي سياح
كلي شيوديك هناك روح قرية سروجاوة هادئة و معزوله و هي تابعة لسليمانية بس هي بين اربيل و سليمانية و كلي كلها طبيعية حتى بيوت بيها قليلة و بيها جداول مي و فد شي كلش مرتب المالديف ما تلحكها و كلي ما تيه ابد
الطريق الرئيسي مال بيتواته هي تصير على طريقها من الشمال
كتله الله و ايدك احجيلي عنها بعد و شلون اوصللها و اكو بيها بيوت او شاليهات خاصة لو لا ؟
والله بقينه نسولف شوية و تعرفت عليه اسمه صالح و اخذت رقمه و تشكرت منه ورجعت للفندق
وصلت للفندق تعشيت و خابرته و كتله اذا تصيرلك روحة قريبة هناك بلغني اجي وياك اندل المكان و اشوفه و احجز لزواجي
والله الرجال ما قصر ويايه يومين هيج و خابرني كلي عندي شغلة قريبة من سروجاوة تجي ؟
اني : اي اجي طبعا شوكت و وين نلتقي ؟
هو : اليوم بالليل نطلع حظر نفسك حدزلك موقعي مرلي لهناك
اني : تمام متفقين بحيل الله
حطيت فلوسي كلها بجيب الشفقة مالتي من جوة و لبست الشفقة و لبست هدومي و اخذت الموحدة و الجواز و فتحت الموقع مال تلفوني و ربطته ويه تلفون والدي
تحسبا لاي شي اني هذا الرجال ما اعرفه و احنا طالعين بليل و هو عرفني مو منا و ما اندل
رحت لصالح للموقع الي دزه الي و لكيته ينتظرني هو و ولد ثاني
عرفني عليه اسمة احمد و كلي هذا اخوية الصغير
والله ركبنه سيارة اني تعمدت اركب ليورة حتى ابقى مسيطر و توكلنا على الله وصلنه لهناك كملوا شغلهم هو و اخو يشتغلون بالسجاد و هل شغلات مال نسيج
وراها دخلنا مطعم اكلنه و اخذنا غرفة بفندق ننام بيها
نمنة ساعتين هيج شي وراها كعدنه اخذوني لسروجاوة اندليتها و اندليت الشاليهات و الفنادق الي بيها و حددت كم نقطة دالة على الطريق علمود ما اتيه صورت كم فديو و كم صورة تحسبا خاف تفيدني بعدين
المهم رجعنه لسليمانية رحت للفندق دفعت فلوس المبيت و اخذت جنطتي و انطلقت اخذت تكسي توصلني لسروجاوة
ابو التكسي و ما اندلها للقرية كتله اخذني لناحية بيتواته هي سروجاوه تصير على طريقها انوب هو ميفهم عربي كلش و شلع كلبي
المهم بالشافعات وصلني
نزلت هناك و رحت لنفس الفندق الي رحنا بي اني و الولد اجرت غرفة يومين و نمت من التعب
كعدت ثاني يوم الصبح تريكت و نزلت افتر اتمشيت اندليت الاماكن سئلت ع الشاليهات و اسعارها و على الاكواخ و اسعارها و تستفسرت على كلشي طريقة الحجز و الدفع و كل التفاصيل الى ردت اعرفها
ضبطت كلشي و اندليت كلشي و اخذت غراضي اجرت تكسي و كتله لمطار السليمانية الدولي و من مطار السليمانية اخذت اول طيارة لبغداد
وصلت لمطار بغداد و رجعت لبيتنا
سلمت على اهلي و بوستهم
هم استغربوا رجعتي من وكت
كلتلهم الاجانب تعاملهم و البزنس مالتهم مو مثلنا اختبرونا امتحان اولي و نجحت بي و انطونا فترة نحظر بيها للامتحان التاهيلي وراها يراسلونا على الايميل حتى نحدد موعد الامتحان الثاني
كلت شعندي كاعد هناك ارجع لبغداد و من يدزولي اسافر
اقتنعوا اهلي بكلامي
كلتلهم اكل و انام شوية و اكعد احجيلكم التفاصيل
اكلت و طلعت لغرفتي نمت
كعدت على صوت الباب صايرة ليل و اني ما حاس من التعب
نزلت جوة شربت كهوة راسي يريد يطك و طلعت بسيارتي
ما حسيت على نفسي اله رايح لبيتهم و طابك بابهم 😞
اشتاقيتلها كلش صح كارها كره العمى و ما طايق اسمع اسمها و اريد انتقم منها بس مشتاقلها و هذا شي خارج عن سيطرتي
فات على غيابها عني 3 اسابيع مدة مو قليلة يا ترى شدا تسوي وين تروح تجي نست كلشي بينا لو بعدها تذكرني هم اجي على بالها
ما حن كلبها و تفتح رقمها
اخذتني الافكار و سمعت صوت هورن سيارة حركت سيارتي و رحت لمول المنصور اخذت ملابس الي و الها و غراض كم شغلة و رجعت للبيت صعدتهن بغرفتي و حطيتهن بجنطة السفر و ضميت الجنطة بالمنزع مالتي و قفلت الباب
