الفصل الواحد والعشرون
اخذ يجوب المكان بقلق منذ عودته من الخارج بعد رحلة بحث طويلة استغرقت منه طوال الليل بحثا عن شقيقه يحمل هاتفه فوق اذنه زافرا بحنق ثم يلقى بهاتفه بعدها قائلا
:برضه قافل موبيله...اعمل ايه دلوقت واروح ادور عليه فين تانى
صدر صوت مستهزء ساخر عن زوجته سمر وهى تهز رأسها بأستغراب قائلة
:ده على اساس انه عيل صغير وتايه من امه..وبعدين من امتى الحب ده كله
وصله حديثها ليلتفت نحوها ببطء بوجه محتقن وعيون تنطق بالشر صارخا بها
:انتى تخرسى خالص..صوتك ده مسمعهوش فاهمة ولا لا؟
فزت من مكانها تتخصر فى وقفتها وهى تصيح به هى الاخرى بغضب
:جرى ايه ياسى حسن فوق لنفسك هو انا علشان سكت ليك الصبح هيسوق فيها ولا ايه...لا فوق كده...اااااه
صدرت عنها صرخة كانت مصدومة اكثر منها متألمة عينيها تتسع بذهول وهى تتطلع نحوه بعد ان غافلها مقتربا منها ليلطمها على وجهها بقوة اطاحت بوجهها للجانب الاخر وقد وقف امامها يتنفس بسرعة وغضب وهى تسأله بصدمة وصوت مختنق باكى
:بتضربنى ياحسن؟ حصلت تمد ايدك عليا؟
هجم عليها قابضا على خصلات شعرها بعنف جعل الدموع تنفر من عينيها وصرخات متألمة تصدر عنها وهو يهزها بغضب وغيظ
:واكسر عضمك كمان... ايه فاكرة علشان كتير على بلاويكى وعاميلك السواد يبقى خلاص ملكيش حاكم
جذبها من شعرها يلقى بها ارضا بعيد عنه ينفض يده عنها يقرف ثم يتحرك بخطوات متعبة نحوها جعلتها تتراجع للخلف بخوف لكنه تخطاها جالسا فوق احدى المقاعد يمرر اصابعه فى شعره هو يزفر بتعب وارهاق يسود بعدها الصمت التام جلست هى خلاله ارضا تتطلع نحوه بذهول وجسدها يرتعش من الخوف فلاول مرة تراه بتلك الحالة قد كان طيلة حياتهم معا طيبا ومسالم لم يكن يصل به الامر ابدا ان يمد يده عليها بالضرب مهما تمادت فى افعالها لا يعصى لها امرا رغم اعتراضه ورفضه للكثير منها
اذا ماذا حدث ومتى فاتها هذا التغير به تسمعه يتحدث بصوت مهزوم متألم قائلا
:سنين وانا ساكت على بلاويكى وغلك وحقدك على اهلى واقول يا واد معلش بتعمل كده علشان بتحبك وخايفة عليك....خربتى بيت اخويا وقومتينى عليه ومشيت وراكى زى العيل وبرضه قلت ده كله علشان بتحبك....خلتينى خيال مأتة فى بيتى وادام عيالى وقلت معلش بكرة هتعقل...انما توصل لحد اختى تجرجريها معاكى فى طريقك الو**** وتيجوا على البت الغلبانة دى وكنتوا هتموتوها فى ايدكم.وياريت حاسة بلى عملتيه الا لسه بحجة وعينيكى مكشوفة
فى محاولة منها للدفاع عن نفسها امامه حتى ولو بالكذب والاحتيال نهضت على ركبتيها تتقدم منه قائلة بضعف مصطنع
: قلت لك وحلفت انى مليش دعوة بموضوع سماح ده وكله من اختك هى اللى
نهض من مكانه صارخا بها بغضب وعنف جعلها تتراجع للخلف بذعر ساقطة على ظهرها تنظر اليه بهلع وهو ينحنى عليها يكاد يفتك بها
: اخرسى مش عاوز كدب... ايه هتضحكى عليا هوانا مش عارفك.. بس المرة دى مفهاش سكات بعد ما البيت كله ولع حريقة بسببك وكنت سبب فى كسرة اخويا ادمنا كلنا
صرخ بأحباط يدس اصابعه فى شعره يشد عليه بعنف يشتعل بالغضب من استمرارها فى الكذب عليه يدور فى المكان بأحباط ويأس حتى تجمد جسده فجأة كأنه صورة مجمدة اخافتها واصابتها بالرعب تتطلع اليه فى انتظار عودة جسده للحياة وليته لم يفعل اذ التفت نحوها وعلى وجهه امارات الاصرار والحزم وعينيه تلتمع فى ظلمة المكان بشراسة قائلا بصوت اصابها بالقشعريرة
:كده كفاية..انا بقيت كرهك وكاره نفسى..بقيت مش قادر احط عينى فى عين اخويا..وكله بسببك انتى..بس لحد هنا وكفاية
سمر بقلب مرتجف مخطوف ووجه شديد الشحوب تسأله بتوجس وخوف
:يعنى ايه ياحسن؟ ناوى على ايه
زفر حسن بقوة قبل ان يجيبها بثبات وحزم
:انتى طالق ياسمر...طالق...الصبح يطلع وهوديكى على بيت اهلك..وكفاية عليا كده
ثم تحرك يغادر المكان فورا يغلق خلفه الباب بعنف اما هى فقد جلست بذهن وعقل لايستطيع استعاب ما سمعته للتو لا تستطيع التصديق بأن هذا حسن زوجها وانه استطاع لفظها من حياته دون لحظة تردد واحدة منه
*************************
هبت مستيقظة بفزع حين شعرت بخواء الفراش من دفئه ووجوده معها تتلفت حولها فى ارجاء الغرفة بعيون ناعسة وشعر مشعث بحثا عنه ليصيبها الاحباط من خلو الغرفة من وجوده تحنى رأسها بحزن قد انتابها شعور بالهجر فلم تكن تمر على لحظات عشقهم العاصف سوى لحظات استغرقتهم فى غفوة سريعة وليتها لم تفعلها من الواضح انه استغل نومها حتى يذهب من جديد ويتركها لقلقها وهلعها عليه بعد ان ظنت انها استطاعت اخيرا ان تمحو من داخله كل ماحدث وتأثيره المظلم عليه بعد ان نصهروا بلهيب عاطفتهم ليلة امس قد سلمت له بكل جوارحها تتقبل منه عاطفته المشتعلة هامسة له ولاول مرة بمدى عشقها وحبها له تصب فى اذانه بكلمات كانت ستشتعل خجلا لو خطرت على بالها فقط لكنها امس لم يكن يهمها سواه وسوى ان تخرجه من تلك الحالة لا تبخل عليه بعواطفها ابدا لكنه قابل كلماتها تلك بالصمت المطبق رغم انها لاتنكر بأنها رأت عينيه تشتعل بالعواطف وتتبدد الظلمة بداخلها حينها لكنه ظل على صمته حتى بعد ان سقط فوق جسدها بأنهاك وهو يغلق عينيه بتعب فقامت بحتضنه اليها بقوة تعبث اناملها بخصلات شعره وهى تتحدث اليه بحنان عن مدى حاجتها اليه حتى شعرت بتبطئ انفاسه واستغراقه فى النوم لترتفع ابتسامة حانية لشفتيها تغلق عينيها بتعب هى الاخرى تمنى نفسها بأنها فى الغد ستجد لديه استجابة لاعترافها ولكن خاب ظنها برحيله عنه
زفرت بأحباط تنهض عن الفراش تسرع يديها فى لملمة ملابسها المبعثرة فى ارجاء وارتداء قميصها متجهة بعدها الى المطبخ فهى فى حاجة الى فنجان من القهوة تستعيد به تركيزها حتى تستطيع التفكير فيما سوف تفعله وكيفية التصرف معه لاحقا
تدخل الى المطبخ لتتسمر قدميها مع ابتسامة فرحة تشع على وجهها حين وجدته يجلس فوق المقعد وامامه فنجان من القوة يحيطه بيديه وقد حملت انامله احدى لفافة من التبغ تراقب عينيه بشرود تصاعد الدخان منها فوقفت تقاوم الاندفاع نحوه حتى تلقى بذراعيه حوله وتنثر فوق وجهه القبلات لكنها تمالكت نفسها ودلفت الى الداخل بخطوات خفيفة سريعة حتى وقفت بجانبه ودون لحظة تردد امسكت بيده تنزلها الى جانبه ثم جلست فوق ساقيه تلف ذراعيها خلف عنقه تثلم وجنته بحنان هامسة
: وحشتنى ااوى على فكرة...لما قمت ولقيتك مش جنبى
وبرغم ملامح وجهه المتجمد غير المشجعة انحنت نحوه تقبله بحماس وهى ترتعش خوفا من رفضه لعاطفتها لكنها لم تستسلم تكمل الطريق بأصرار الى ما نوت عليه
تحرك شفتيها على شفتيه فى محاولة لاشعال تلك العاطفة بينهم مرة اخرى ترتعش بسرور حين استطاعت اخيرا الوصول لمرادها بعد ان دس اصابعه فى شعرها من الخلف يثبت رأسها لاستقبال هجوم شفتيه الكاسح عليها يتولى هو السيطرة فيما بينهم للحظات طوال جعلت جسدها يرتفع للسحاب وهى ترى منه كل هذة اللهفة نحوها يملئها الامل من جديد لتبتعد عنه وبعد لحظة وهى تلهث بجنون هامسة بصوت مرتجف من العاطفة
: بحبك ياصالح... بحبك جدا.. بحبك اووى... بعشقك وبعشق كل حاجة فيك
وعلى عكس توقعها تجمد جسد صالح وقد اخترقت كلماتها ضباب المشاعر التى غلفها به قربها منه للتسارع ضربات قلبه بشكل اخرق مضطرب تشتعل اعصابه من تأثير اعترافها كحاله ليله امس لكن ابى عليه عقله مرة اخرى التصديق ينكر ان تكون هذه الكلمات صحيحة وهو يتسأل بغضب لما الان؟ ولماذا فى هذا التوقيت
صارخا به ان الامر لا يتعدى سوى شفقة منها لما رأته يعانيه ليلة امس ومحاولة منها لاصلاح ما كسر بداخله لذا
انسحب برأسه للخلف بعيدا عنها يمسك بذراعيها يحاول ان ينهضها عن ساقيه قائلا بصوت بارد كأنه لم يستمع منها لشيئ متجاهلا نظرة عينيها
: انا هقوم علشان عندى شوية شغل... وهرجع على بليل متأخر... ولو...
المها رفضه لاعترافها والمها اكثر برودته لكنها لم تستسلم بل تشبثت بمكانها تبتسم له ابتسامة ضعيفة قائلة بمرح مصطنع تقاطعه
:حاضر هستناك... ومش هنام الا لما تيجى علشان كده حاول متتأخرش عليا
اربكته حالتها هذه كما اربكه كلامها ففرح التى يعلمها لم تكن ستمرر الامر هكذا بل كانت ستقيم الدنيا فوق رأسه لتجاهله وقسوته هذه معها ليهمس لها بصوت مرتجف حائر
:ليه يافرح....ليه دلوقت بالذات كل ده منك؟!
ادركت انه لم يقصد بسؤاله ما قالته منذ قليل فأحتضنت وجهه بين كفيها هامسة بحب وعينيها ثابتة على عينيه ترى فيهم حيرته وتخبطه
: علشان بحبك يا ابن خالتى انصاف.. سامعنى.. بحبك وهفضل اقولها لحد ما قلبك ده يلين ويحن عليا هو كمان
انزلت يديها لتضعها فوق موضع قلبه مع كلماتها الاخيرة تحس بقصف ضرباته العنيفة تأثرا منه بكلماتها وقد اراد الصراخ لها بأنه لا يحبها فقط بل يعشقها تذوب كل جوارحه فيها يعيش يومه وغده من اجلها هى فقط وبالفعل كاد ان ينطقها يفتح شفتيه لقول كل ما بقلبه لها
ولكن فجأة انعقد لسانه تعاوده مخاوفه مرة اخرى فيطبق شفتيه يمرر عينيه عليها بتية متجاهلا نظرة الامل فى عينيها وهو يهز رأسه ببطء بالموافقة قائلا بتجشرج
: هحاول يافرح... علشان خاطرك هحاول
لم تعلم ان كانت اجابته عن محاولته عدم تأخره ليلا او بالفعل يخبرها انه سيحاول ان يتعلم ويسمح لقلبه ان يتسع لحبها لكنها هزت له رأسها بالموافقة تطبع قبلة رقيقة فوق شفتيه المرتعشة قبل ان تنهض عن ساقيه ثم تقف تراقبه وهو يقوم بجمع اشيائه عن الطاولة يتحرك بعدها بأتجاه الباب مغادرا لتناديه بلهفة توقفه عن الحركة تهرع نحوه تتعلق بعنقه وهى تشب فوق اطراف اصابعها تقبله مرة اخرى بنعومة ورقة اطاحت بالباقى من تماسكه وهى تهمس فوق شفتيه بتأكيد وحزم بأنفاسها الدافئة كأنها تدمغه بكلماتها قبل رحيله
:بحبك ياصالح... بحبك ياعيون وقلب فرح ودنيتها كلها
ارتسمت ابتسامة ضعيفة فوق شفتيه تراه لاول مرة مرتبك خجول لايدرى كيفية التصرف امام هجومها الضارى هذا عليه يغادر فورا المكان بأرتباك لتقف بعدها تبتسم بأنتصار وعينيها تشع بالفرح ثم تتبعه بخطوات متراقصة سعيدة لكنها توقفت حين تعال صوت الجرس بصوت ملح سريع قبل بلوغ صالح للباب فيسرع بفتحه بعجالة لتدلف والدته وهى تبكى وتنوح بشكل جعل قلب فرح يسقط بين قدميها بهلع وهى تقول
:الحقنا ياصالح...الحق يابنى المصايب اللى نازلة على دماغنا من الصبح
اسرع صالح بامساكها وهى تترنح على قدميها بتعب يسير بها ناحية المقعد يجلسها فوقه وهو يسألها بقلق
:فى ايه ياما...اهدى بس وفهمينى ايه اللى حصل
ضربت انصاف فوق وركيها تولول وتنوح قائلة بصوت باكى متحسر
:اخوك ياقلب امك طلق مراته وروحها بيت اهلها..واختك ياصالح...اختك مش مبطلة عياط من ساعة ما خطيبها كلم ابوك امبارح وفشكل الخطوبة
وضعت فرح يدها فوق فمها تمنع شهقة صدمة من الخروج من تطور الاحداث ترى انصاف تمسك بيد صالح متجمد الوجه كأنه لا يعنيه ولا يهتم بما قالت تهتف بتضرع ورجاء
:اتصرف ياصالح كلم اخوك وعقله يابنى علشان خاطر العيال دول ملهمش ذنب...ولا اقولك كلم عادل هو صاحبك برضه وليك خاطر عنده وهيسمع كلامك
ابتعد عنها صالح وعينيها تتطلع نحوه بأمل كأنه فى يده حل كل شيئ ولكن سرعان ما شحب وجهها حين قال بصوت حاد قاسى
:مليش فيها الحكاية دى...من هنا ورايح كل واحد يحل مشاكله بنفسه
نهضت انصاف على قدميها تقترب منه تربت فوق ظهره المتخشب قائلة بحزن
:عارفة يابنى انك زعلان بس علشان خاطرى انا...وحياة...
قطعها وقد احتقن وجهه تنفر عروقه من شدة غضبه ومحاولته السيطرة عليه يصيح بشراسة
:وخاطرى فين ياما عندكم..مش ده حسن ومراته اللى ياما رمونى بكلامهم اللى زى الحجر ادمكم من يوم ما عرفت...مش دى بنتك اللى عايرتنى ادام مراتى وادام البيت كله بعيبى... عوزانى دلوقت اروح اتحايل على صاحبى علشان يرجع لها بعد ما سمع ببلاويها هى ومرات ابنك
نكست انصاف رأسها بخزى وقد ادركت كم بالغت فى طلبها هذا منه ولم تراعى حرج ولدها الحى فى لهفتها لاصلاح امور ابنائها الاخرين هامسة بحزن وخجل
: عند حق ياضنايا... حقك عليا يابنى متزعلش منى... بس اعمل ايه اتعودت انى اجرى عليك اول واحد فى اى مصيبة تحصل لنا علشان تحلها...حق عليا ياصالح
انفجرت فى بكاء مرير تشعر بمدى قسوتها عليه تهم بالانصراف من امامه لكنه لم يحتمل رؤيتها بتلك الحالة او ان السبب فى حزنها يجذبها اليه هو يزفر بقوة وقائلا بأسف وندم
: لا ياما حقك عليا انا... معلش استحملينى بس والله غصب عنى وعلى عينى ارفضلك طلب
انحنى على كفها يقبله بأحترام وحب لتربت انصاف على رأسه ليكمل صالح وهو يرفع رأسه نحوها وانامله تزيح ودموعها عن وجنتيها
:حاضر ياما هعمل كل اللى تأمرى بيه..بس ادينى يومين بس يمكن انسى فيهم.. وانا بعدها تحت امرك
اخذت انصاف تدعو له بقلب وعيون حانية وهو ينحنى عليها مقبلا جبهتها ثم يتحرك نحو الباب تصاحبه دعوات والدته لكن توقفت خطواته امام فرح تلتقى نظراتها بنظراتها الملتمعة بالفخر وقفت تتابع ما يحدث بصمت للحظات قالت فيهم عيونهم الكثير والكثير قبل ان يفصم نظراتهم ثم يغادر المكان فور لتتنهد بعمق ثم تتحرك ناحية انصاف والتى مازالت تبكى لتضمها اليها بحنان تواسيها بالكلمات لكن كان عقلها وروحها مع من غادرهم منذ قليل
*************************
: قلتلى عاوز ايه يا انور..معلش سمعنى تانى كده
قالها شاكر شقيق امانى مستنكرا لانور الجالس امامه باسترخاء ولا مبالاة ليعيد عليه انور طلبه بنفس التعبيرات الهادئة وصوت الواثق
:عاوز اتجوز اختك يا شاكر..ايه مسمعتش من اول مرة ولا ايه
شاكر بحدة وهو يخبط كفيه فوق المكتب امامه بعنف
:لا سمعتك بس بتأكد اصل مش متخيل انك اتهبلت فى عقلك علشان تطلب طلب زى ده منى
اعتدل انور فى مقعده بتحفز قائلا بشراسة وعينيه تطلق الشرر
:ليه ياخويا مش قدم المقام ولا منطولش زى سى صالح بتاعكم
شاكر بابتسامة سمجة ومغيظة قائلا
:اديك قلتها بنفسك يا ظاظا مش محتاجة تفكير هى
احتقن وجه انور يهتف بغيظ
:بقى كده يا شاكر..ليه دانا ناوى ادفع مهر للمحروسة اختك مدفعش فى اجدعها بنت بنوت وانت تقولى كده
التمعت عين شاكر بالطمع وتتغير تعبيرات وجهه للنقيض قائلا بصوت خانع طامع
:محدش قال حاجة يا انور..بس الموضوع جه على غفلة ومحتاج منا تفكير انت عارف ان امانى صالح لسه لحد النهاردة عاوز يرجعها لعصمته وهى ميالة انها ترجعله فى سيبنى كده يومين تلاتة وانا هرد عليك
انور وقد ارتسمت ابتسامة نصر وتشفى فوق شفتيه وقد علم الاجابة منذ الان فهو اعلم الناس بجشع شاكر واهتمامه بمصالحه دون ان يبالى بغيره حتى ولو كانت شقيقته وهذا ما يقوم باللعب عليه فأن كانت حساباته صحيحة فستقوم خطواته هذه بتحريك المياة الراكدة وينال ما يبتغاه بعد فشل كل خطواته السابقة يدعو من قلبه ان تكون هذه هى الخطوة الصحيحة والقاضية ليجيب شاكر وعينيه تبعث اليه برسالة فهمها على الفور
: وانا مستنى ياشاكر وتحت امركم فى كل طلباتكم بس المهم الرد بالموافقة من ست اختك
اومأ شاكر له بالموافقة يمد يده له بالسلام ضغطا فوق يدى انور بقوة اجابة على رسالته قائلا بترحاب
: تمام ياانور... واحنا مش هنتأخر فى الرد عليك
***********************
دخل الى محل عمله بعد زيارة سريعة الى احدى مخازنهم ليجد احدى فتيات الحارة تجلس فوق احدى المقاعد المقابلة لمكتبه وهى تضع قدم فوق اخرى وتهزها بعدم اهتمام وفى فمها علكة تمضغها ببطء وهى تبتسم بتلاعب لسيد العامل لديه وقد وقف مستند بأسترخاء على الحائط يسيل لعابه حرفيا عليها غافلا عن دخوله ليهتف به صالح بحدة جعلته ينتفض واقفا باعتدال وهو الفتاة والتى ما ان لمحته حتى اسرعت بالنهوض تهرول نحوه وعى تصيح بصوت باكى دون دموع
: الحقنى ياسى صالح انا فى عرضك ياخويا
رمق صالح سيد العامل لديه بغضب جعله يغادر المكان فورا بخطوات سريعة قبل ان يلتفت الى الفتاة قائلا بترحاب فاتر
:اهلا ياصفاء ازيك...خير ان شاء الله
صفاء وهى تقترب منه حتى كادت تلتصق به وهى مازالت تنوح بصوتها
:الراجل صاحب البيت عاوز يطردنا بره انا وامى واخواتى علشان يعنى ما اتأخرنا عليه فى الاجرة كام شهر..يرضيك كده ياسيد الرجالة
تراجع صالح عنها للخلف خطوتين قائلا بوجه متجهم وصوت جاف
:طيب ياصفاء روحى انتى وانا هكلمه ونشوف الموضوع ده وهنوصل لحل ان شاء الله
ضحكت صفاء ضحكة انوثية مغرية قائلة بعدها وهى تمر عينيها عليه بأعجاب سافر وقح
:تسلم ليا يا سيد الحارة كلها..كنت عارفة انك مش هتكسفنى ابدا
واقتربت منه اكثر وعلى حين غفلة ودون خجل وضعت يدها فوق صدره تمررها عليه لينتفض بعيدا عنها بعنف وعينيه تشتعل بالغضب جعلها تتراجع هى الاخرى بخوف وحرج لكن فى اثناء تلك اللحظات
كانت فرح تقف على باب المحل تنظر الى المشهد امامها بدم يفور ويغلى وهى تتخصر وسطها بيديها تهز قدمها بغضب وقد نزلت الى هنا حتى تتحدث اليه وتخبره عن ذهابها لزيارة شقيقتها برغم انها قد حصلت على موافقته من قبل فى الهاتف ولكنها وجدتها فرصة لرؤيته والتحدث معه بعد انتظارها له فى شرفة منزلهم تنزل اليه فور رجوعه لتفاجىء بهذا المشهد امامها فلم تستطيع التحكم بنفسها وهى تدلف الى الداخل صائحة بتهكم وقد اعمتها غيرتها
:وهو الشكر ياست صفاء مينفعش وانت ايدك جنبك ياحبيبتى
توترت صفاء وهى تلتفت اليها تهتف بترحاب مزيف برغم الحقد فى عينيها
: فرح! ازيك ياحبيبتى وحشانى والله
لم يلقى ترحيبها القبول من فرح تتقدم للداخل وهى تتطلع لصفاء من اسفلها لاعلاها قائلة بنفور
:كان نفسى والله اقولك وانتى كمان..بس مش قادرة
وفجأة نكزتها بحدة فى كتفيها تهتف بها بشراسة استدعت تحرك صالح للتدخل هو يحاول ابعادها عنها وقد علم بما هو ات
: تانى مرة يا حلوة يا امورة ايدك جنبك لتوحشك.. فاهمة ولا تحبى افهمك بطريقتى
شهقت صفاء تتصنع الصدمة والذهول توجه حديثها الى صالح والذى امسك بفرح بين ذراعيه بعد ان تحولت الى نمرة شرسة تسعى للقتال قائلة بميوعة
:عجبك كلامها ياسى صالح..يرضيك كده
زمجرت فرح تحاول الفكاك من تكبيله لها قائلة بغيظ
: سى صالح ايه يابت..ماتتعدلى فكلامك بدل ما اعدلك...انتى هتتمايصى عليه وانا واقفة دانا...دانا
اخذت تبحث عن كلمات تعبر بها عما ستفعله بها حتى شعرت بهتزاز صدر صالح الملاصق لظهرها دليل على محاولته امساك نفسه عن الانفجار بالضحك لتلتفت نحوه تهتف بشراسة به هو الاخر
:انت كمان بتضحك...عجبك اووى اللى بيحصل من بنت ال...
اتسعت عينى صالح بتحذير ينبها بنظراته عن التمادى لتقطع كلماتها قبل ان تصل للسباب كاد ان يطلقه لسانها هو يهمهم بخشونة فى اذنها
: لمى لسانك واتهدى..واعقلى كده وبلاش الجنونة بتاعتك دى هنا
ثم التفت الى صفاء قائلا بحزم وحدة
: وانت ياصفاء اتفضلى من غير مطرود ومتجيش هنا تانى وانا هشوف موضوع صاحب البيت وهبعتلك سيد بالرد
تجهم وجه صفاء يحتقن حرجا وهى ترمق فرح بغيظ وغل قبل ان تغادر المكان فورا بخطواتها المتمايلة لتهمس فرح بعد خروجها وتلوى شفتيها بقرف وهى تتابع خروجها بعيون غيرة
: غورى داهية فى شكلك عيلة قليلة الحيا مايصة.. بوسط مفكوك
انتبهت على صوته وهو يسألها بعد ان فك قيده لها يبتعد عنها ناحية مكتبه
:عاوزة ايه يافرح ونازلة هنا ليه؟!
امسكت شفتيها بين اسنانها تتغير ملامحها للرقة وهى تتصنع الخجل فى صوتها قائلة بهمس
:كنت نازلة اقولك انى رايحة عند اختى سماح
صالح بجدية برغم تراقص قلبه لرؤيتها امامه وقد اشتاقها منذ ذهابه عنها
:اظن انك قلتى ليا فى التليفون يبقى لازمتها ايه تجى هنا
تجعد وجهها تغمغم من بين انفاسها بغيظ
:علشان حظى ان اقفش بنت ال****وهى واقفة تتمايع عليك ياخويا ..
لكنها اجابته بدلا عن ذلك قائلة بخفوت رقيق
:جيت علشان وحشتنى..وقلت انزل اشوفك قبل ما اروح عندنا...غلطت ياصالح لما جيت؟
سألته بجديه وعينيها تتطلع اليه بأمل وهى تشع ببريق اختطفه وجعله يجلس بدون راحة فوق مقعده يتمنى لو انه ينهض عن مقعده يهرع نحوها يحملها بين ذراعيه وثم يضعها على المكتب امامه ويقتل شوقه اليها والان دون ان يبالى او يهتم بمن سيراهم وقتها لكنه اسرع يتمالك نفسه يتنحنح قائلا بصعوبة وبصوت متحشرج متجاهلا سؤالها الاخير
: طيب يلا روحى علشان متتأخريش وابقى سلميلى على سماح
مرة اخرى يحبطها ويصيبها بالألم لرده الجاف عليها وتجاهله المستمر لها لمحاولاتها التقرب منه ترتفع غصة فى حلقها تخنقها وتهدد بانفجارها بالبكاء بمرارة هنا والان لتسرع هاربة تلتفت للمغادرة فورا قبل انهيار لكن اتى ندائه ليوقفها ولكنها لم تتوقف بل هرعت تغادر المكان فورا وليظن انها لم تسمع ندائه لها فلا تثق بنفسها لو توقفت ثانية امامه الا تهجم عليه طلبا لاستجابة منه حتى ولو كانت غضبه
جلس بعد خروجها يلعن نفسه وكبريائه وما يسببه لها من الم يغمض عينيه وهو يتنهد بتعب وارهاق غافلا عن دخول عادل الى المكان بخطوات بطيئة حرجة حتى القى عليه السلام بصوت هادىء متردد ليعتدل فورا فى مقعده مرحبا به وهو يشير الى المقعد امامه قائلا
: تعال اقعد... فينك من الصبح برن عليك وتليفونك مغلق
هز عادل رأسه بالرفض قائلا بصوت مرهق
: لا تعال نخرج فى اى حتة نقعد بعيد عن هنا فى موضوع مهم ولازم اكلمك فيه
هز صالح رأسه عينيه تراقبه بأهتمام ويرى حالته المشعثة وعينيه المتعبة كأنه لم يذق النوم ليلة امس ليهمس صالح له بحرج وترددهو الاخر
: عارفه الموضوع ده يا عادل وصدقنى.. عمره ما هيغير اللى بينا ابدا دانت اخويا وعشرة عمرى ..وبعدين الجواز ده قسمة ونصيب
شع وجه عادل بالفرح يسألها بلهفة
:بجد ياصالح يعنى مش زعلان منى بعد اللى حصل
نهض صالح على قدميه يلتف حول المكتب يتجه نحوه ويحتضنه بقوة وهو يربت فوق ظهره بقوة
: انا عمرى ما ازعل منك ياعادل..مهما حصل مفيش حاجة ممكن تخسرنا بعض
شدد عادل من احتضانه هو الاخر يشعر بأمتنان لصديق عمره لتفهمه واحساسه بما يشعر به فلا يزيد من اوجاعه وحرجه ليظلا هكذا للحظات كانت ابلغ من اى حديث حتى ابتعدا عن بعضهم ليقول عادل بصوت متحشرج
:برضه تعال يلا نخرج....خلينا نتكلم ونفضفض مع بعض انا برضه حاسس انك عندك كلام كتير عاوز تقوله ليا
ابتسم صالح لصديقه عمره وقد شعر بما يمر به ليهز لرأسه له بالموافقة ليغادرا معا المكان لجلسة مصارحة بين الاصدقاء افتقداها طويلا
***********************************
عادت من منزل اهلها تصعد الدرج بأرهاق وفقد ظنت ان ذهابها الى شقيقتها قد يخرجها من حالتها وقد ترتاح نفسها حين تتحدث معها ولكن لاسف لم تنال تلك الرفاهية فقد جلست طوال الجلسة هى وشقيقتها كل واحدة منهم فى وادى افكارها بعيدا عن الاخرى حتى يأست اخيرا تنهض لتغادرحتى تعود الى منزلها وقد اصبحت لا تشعر بالسلام والراحة الا فيه
وقفت امام الشقة الخاصة بحمويها تترد يديها لطرق الباب ام تصعد على الفور لشقتها لكنها حسمت امرها سريعا تضغط جرس الباب وماهى الا لحظات حتى فتحت لها ياسمين الباب والتى ما ان رأتها حتى شعت من ملامحها الغل والكره ولكن ما اثار حفيظتها وخوفها هى تلك الابتسامة الشامتة والشر بها قد ارتفعت سريعا على شفتيها وهى تفسح لها الطريق دون كلمة تشير لها بالدخول لتتقدم فرح ببطء للداخل تسمع اصوات حادة عالية ومن بينها صوت صالح الهادىء وهو يتحدث لشقيقه الواقف امامه بجسد متحفز غاضب تتطلع نحوهم وقد علمت موضوع حديثهم وقد جالسوا غافلين عن وقوفها امام باب الغرفة ففضلت الانصراف عن الدخول وهم فى وسط حديث خاص لتلتفت مرة اخرى للمغادرة لكنها تجمد مكانها وهى تسمع صوت حماتها ا الباكى تتوسل ابنها البكر
:يابنى الله يهديك..فكر فى عيالك والعيل اللى جاى فى السكة ده..اعقل ياحسن مراتك حامل يابنى
يعنى دول هيبقوا اربع عيال فى رقبتكم... حرام يضيعوا فى النص ما بينكم
لم تعلم لما فى هذا اللحظة انتبه الجميع لوقوفها وقد التفت اليها اربعة رؤوس تحمل عيون مصدومة واسفة
هل صدر عنها صوت او شهقة صدمة نبهتهم لوجودها ام هو فقط حظها السيئ لكنها اسرعت برسم أبتسامة ضعيفة مرتعشة تهمس بشفاه مرتجفة وصوت خرج بصعوبة باعتذار متلعثم قبل ان تسرع بالمغادرة فورا تترك المكان فى الحال
**********************
.
