(يوم شفتك احلى صدفه ومن بعدك حبيت الصدف)
بـــــــعــد شــــهــــر ..
نروح ل مثايل ..
مثايل بطنها صار واضح بشكل ملحوظ وصار لازم انها تعلم اهلها
راحت لغرفه المهره وطقت الباب ..
المهره سمحت لها بالدخول ..
مثايل : هلا المهره قاعده ولا بتنامين
المهره : لا قاعده حياك
مثايل : بقولك موضوع حيل كبير وانا جايتك وابي منك تقولين لي رايك وتشورين علي اختك بورطه ..
المهره خافت وقالت : ايش فيك .. ونزلت عيونها على بطن مثايل وقالت : انتي ليش سمنانه مثايل جسمك ماكان كذا
مثايل قامت تبكي وتطق روحها
هنا المهره توترت وقالت : يمه شفيك مثايل
مثايل وهي تبكي خذت يد اختها المهره وحطتها على بطنها وقالت من بين دموعها : انا حامل وبتصيرين خاله قريب
المهره فزت ومن الصدمه عطتها كف وماعرف شنو ترد ..
مثايل زاد بكاها وهي بقلبها تقول ( اذا المهره اختي كذا رده فعلها كيف رده فعل ابوي يارب تستر )
وسيده تداركت الموقف وقامت مسكت يد المهره وقالت : اقسم بالله بالحلال وعندي عقد الزواج يا المهره انا متزوجه تركي ولد عمي بالسر وكنت التقي معاه بالسر ببيته اللي بالخبر على اني اروح لصديقتي وماتوقعت كذا بيكبر الموضوع ..
المهره حطت يدها على فمها بصدمه مو قادره تستوعب اللي انقال تو ..
وقالت : انتي تستهبلين صح
مثايل : ياليت اني استهبل
المهره : ومافكرتي بابوي انزين مافكرتي فينا ..
مثايل : والله العظيم غدر فيني الكلب يقول كل هذا انتقام انا انقص علي يا اختي .. وزادت شهقاتها وقالت : تكفين خذيني بحضنك لي اربع شهور وانا منهاره بروحي ولا احد داري عني خففي عني يا المهره حرام عليك لا تصيرين انتي والزمن ضدي ع الاقل انتي بس انا للحين ما قلت حق ابوي وكذا رده فعلك تكفين ساعديني انا مادري شلون بقول حق ابوي وانا بالسادس ..
المهره قلبها عورها عليها بس لازم تقرصها : مثايل انتي اللي سويتيه خطا كبير خليك مني ومن رده فعلي عندك اخواني عندك ابوي
مثايل سكتتها وهي تحط يدها على اذنها : تكفين اسكتي انا ابيك عون صرتي لي فرعون ..
المهره : الحين اسكتي وخل نفكر شنو نسوي ..
مثايل : بروح اقول لأمي واللي فيها فيها ..
المهره : انتظري بجي معاك ..
وطلعو متوجهين لغرفه امهم ..
طقو الباب وسمحت لهم بالدخول ..
موضي : هلا يمه وش فيكم
المهره : يمه مثايل بتكلمك بموضوع بس يمه امسكي روحك لا ابوي يسمعك
موضي طاح قلبها : وش صاير اخوك فيه شي ..
المهره بسرعه : لا لا يمه والله مو اخوي الموضوع مثايل
موضي : شفيها مثايل .. ولفت عليها وطاحت عينها على بطنها وعقدت حواجبها باستغراب بذات بنتها مثايل محافظه على جسمها من وين لها هالكرش ..
قالت : مثايل من متى هالكرش طالعه لك .. ولفت عنها تضحك بس سرعان ما اختفت ابتسامتها لما نطقت مثايل الصاعقه اللي خلتها تنلجم وتنصدم ..
مثايل : يمه انا حامل بس والله بالحلال ومن تركي ولد عمي وانا متوهقه ومتزوجين والله متزوجين وعندي عقد الزواج ..
موضي انهرت ووقفت وجت عند بنتها تتحسس بطنها وتطالع عيون بنتها الغرقانه دموع ..
موضي : ليش يا مثايل تطيحين روسنا بالارض
مثايل وهذا اللي كانت خايفه منه دموع امها : يمه والله كذب علي وقال يحبني وانتي تدرين انه من كنت صغيره وانا مكتوبه له والكل يقول اني له وحاطته ببالي انه خلاص بيكون زوجي يمه والله اني متندمه تكفين الا انتي لا توقفين ضدي ..
حطت يدها على يد موضي وقالت : دخل حفيدك يا يمه وقطعه مني تكفين افهميني وانتي ام وتدرين باللي احس فيه حاولت يا يمه اني اطيحه بس ماقدرت حركاته ببطني حركت احساس الامومه اللي فيني وماقدرت ومستحيل اتخلى عن ولدي لو كلكم بتوقفون ضدي ..
