اخطاء الماضي

Part 2{ بدايه النهايه }

الكاتبه : Zahraa { اخطاء الماضي }
____________________________&&&&&&
نارين : فزيت على صوت زهراء تصرخ رحت ركض الها وشفتها تبچي بهستيريه ومكوره نفسها رحت يمها اهديها بس هي تهذي بكلمه دم وجثه رحت جبت مي وغسلتلها وبعدها تبچي ومرت نص ساعه على هاي الحال منا لمن باوعتلي وهمست كلماتها الي مثل الكابوس عليها وعليه
زهراء : كابوس نارين نفس الكابوس نفسه
نارين : ظليت ابچي على بچيه خليت راسه بحضني ونومته بس جسمه كله يرجف من الخوف نامت وخليته على مخدته وظليت كاعده يمه شفت الساعه ب 2 بليل ومنا للصبح وعيني مااخذت نوم صارت بالسته ونعست حيل لزمت ايده ونمت
____________________________&&&&&&&
يمان : كعدت الساعه بالسته الصبح بدلت ونزلت جوه شفت امي وعلي كاعدين يتريكون كعدت يمهم وبنص الريوك اجه اتصال لعلي رد عليه مافتهمت منو المتصل وشراد بس علي يكله بس اوك خلص المكالمه وكام يتأفأف سألته امي
دموع : شكو علي صاير شي بالشغل
علي : السكرتيرة بطلت
دموع : يااا شلون هسه
علي : ادور على سكرتيره بس المشكله ماكو وحده تسوي شغله بالمضبوط وماتشلع كلبي
دموع : يمه علي انتَ التعامل وياك شويه صعب
يمان : شويه
علي : ليش ماعاجبك
يمان : لا حبيبي اكيد عاجبني بس لو تخفف هاي الحده شويه
دموع : شويه
علي : حته انتي يمه
دموع : اشاقه وياك خليك نفس ماانته تخبل احسن من هذا اخوك المسربت
يمان : اني مسربت
علي : طبعاً مسربت لو مااني جا انته هسه بخبر كان ماتدخل كليه لو تموت
يمان : زين خليني اردلك هذا المعروف مالتك
علي : شلون ترده
يمان : اكو بنيه بالجامعه اعرفه تحتاج شغل شنو رأيك احاجيه علمود تشتغل سكرتيره
علي : بنيه وانته اجيبه لا ادكلي وحده من صاحباتك
يمان : لا لتخاف مو من صاحباتي
علي : لعد منين تعرفه
يمان : اصير صديقه صديقتي
علي : لا مااوثق بهذا النوع من البنات
يمان : لا يمعود مو مثل مامتوقع جرب البنيه وراح تشوفه / هز راسه بمعنى موافق
علي : يله عمي جيبه ماعندي غير حل
يمان : اوك بس احاجي البنيه بالاول
علي : بسرعه يمان تره محتاجه
يمان : اي شبيك اليوم اروح للجامعه واحاجيه يموت اذا مايكابل بنات / شفته رفع راسه خزرني وامي كاتمه ضحكته كمت بسرعه من الطاوله ورحت للجامعه بس مالكيت نارين كلت يمكن بعده ماجايه بس خلصت اول محاضره وماكو والثانيه والثالثه وهي لحد هسه ماكو رحت للكافتريا ومالكيته بالحديقة ماكو قررت اتصل عليه اتصلت مرتين وبالثالثه يله ردت حسيت صوته ضعيف كوه يطلع سألته / نارين بيج شي
نارين : لا مابيه شي بس تعبانه ماكدرت اجي اليوم
يمان : نارين عندي الج خبر حلو
نارين : بشر شنو خبرك
يمان : لكيتلج شغل
نارين : قصدك لزهراء
يمان : اي
نارين : وين
يمان : بشركه اخوي
نارين : اوك اني احاجي زهراء بالموضوع
يمان : تمام انتظر منج خبر بس بسرعه لان علي مستعجل
نارين : اوك
يمان : يله اخذي راحتج راح اروح
نارين : الله وياك / سديت الموبايل بس كلبي معصور مااعتقد زهراء راح تكدر تشتغل بهاي الحاله الصعبه واني اكثر وحده تعرف شنو الانهيار الي يصاحب هذا الكابوس بس مابيدنه حل حاولت اتفائل بالامل وكعدته كعدت بس عيونه ذابله وصوته كوه يطلع مسحت على راسه
نارين : زهراء انتي بخير / هزت راسه ب لا ودموعه يجرن
زهراء : اني مو بخير نارين اني تعبت شوكت راح يعوفني هذا الكابوس
نارين : زهراء كعدتج هيج مو حل لازم تحاولين تتذكرين شي لان لازم اكو سبب وره هذا الكابوس
زهراء : لا نارين لا مااريد لا اذكريني
نارين : تحجي وهي تهز براسه خلت ايده على راسها وتعصر براسها حيل وخرت ايده واني اسايره / خلص زهراء لاتتذكرين شي بس لا تأذين نفسج عفيه
زهراء : ماكو شعور يوصف الي جاي امرن بي لحظات خوف مو طبيعيه الرجفه مسيطره على كل جسمي واحس نفسي مو بوعيي مااعرف شحچي وشأسوي جانت اسوء لحظات تمر بحياتي تمددت على الچربايه ورفعت راسي للسقف اباوع بالفراغ كل الافكر بي هي ذيج الثواني القليله الي اخذت حيلي كله مجرد ثواني دمرتني وخلتني بهاي الحاله
نارين : زهراء احچي وياي لاتبقين ساكته احچي
زهراء : حچيت بس كوه اطلع الكلمه / نارين عوفيني وحدي
نارين : تفهمت وضعه وعفته وطلعت رحت كعدت على القنفه بالصالة وفتحت موبايلي گلبت بي شويه بس بالي كله يم زهراء شويه واجاني اتصال من رقم غريب رديت بس اول مارديت انقطع الاتصال وراه مباشراً اجتني رسائل من هذا الرقم يگول بيه
_ تعاي لهاذه العنوان ------
سألته منو انته فرد عليه
_ بدايه النهايه
كتبتله شنو يعني رد عليه
_ كله راح تعرف معناه مو بس انتي بس بعد فوات الاوان
شنو هالكلام ومنو هذا ومنو راح يجاوبني على اسألتي حرت حيل ظليت نص ساعه صافنه برسائله اخير شي قررت انو اروح رغم اني جنت خايفه بالبدايه بس گلت لازم اعرف منو هذا كمت بدلت ورحت للعنوان ظليت واكفه مصدومه من الي شفته
________________&&&&&&&&&
زهراء : فتحت عيوني واني بغرفتي يمته نمت بس غريب ماكو ولاصوت كعدت وخليت ايدي على راسي وبلحظته سمعت صوت شي ينكسر بره طلعت من الغرفه ورحت للمطبخ فتحت عيوني بكل وسعهن واني اشوف هذا المنظر كدامي دم الدم جان يغطي كل المكان الحياطين والارضيه والكاونتر والمواعين وكلشي فقدت وعقل مظل براسي صرخت بكل قوتي / لااااااااااااااا لاااااااا ولكككككككمممم لااااا لا / ظليت اضرب بخدودي املخ شعري واضرب ايدي بالحايط عسى ولعل يروح الم راسي مو بس براسي لا احس الالم جان بعقلي احس احد ضربني على راسي منا لمن تعبت ووگعت منهاره بالگاع كمت ازحف للحايط والكاونتر احاول امسح الدم بايدي بس ماكو فايده تلطخ وجهي بالدم وملابسي واني بعدني امسح بأيدي وملابسي الا ان شفت صوره رجال يمي جسمي كام يرجف لزمت الصوره بأيدي ولقطات ذاك الحلم رجعت كدام عيني بس هالمره الرجال اله ملامح ماتحملت هاذه الضغط النفسي گبل انغمه عليه
___________________&&&&&&&&&&
نارين : انصدمت من الي شفته جان بيت بس محترك وصاير رماد اجتني رساله على موبايلي من نفس الرقم يگول
_ ادخلي نارين
كمت اتلفت بكل مكان بس مالمحت احد لعد هذا شلون جاي يراقبني خفت ردت ارجع ووصلتني رساله ثانيه
_ ادري بيچ خايفه بس اطمئني مااريد ااذيج كل الاريده منچ تدخلين والبقيه بكيفچ
دزيتله رساله
_ منو انته ووين جايبني شنو راح يصير من ادخل
دزلي رساله
_ التغيير يبدي منا
ظليت محتاره بس بالاخير قررت ادخل دخلت وجان كلشي محترك افتريت بالبيت جان عباره عن مطبخ وغرفتين وصاله واستقبال وحديقه طلعت من البيت وكلمات الرساله لهسه اطن بأذني قررت ارجع للبيت كل هذا الحچي بالليل جانت الساعه ب 8 بس المنطقه الي رحتله جانت فارغه تعبت من التفكير وصلت للبيت دخلت ورحت للمطبخ اشرب ماي وشفت گبالي مشهد ماراح انسى طول عمري زهراء بالگاع ممده والمطبخ كله دم رحت احاول اكعد بيه بس ماتكعد حرت وين اروح گبل طلعت الموبايل ادور بالأرقام بس بيمن اتصل واني ما الي احد اجه بوجهي رقم يمان اتصلت عليه بسرعه
يمان : الوو نارين
نارين ببكاء : لك يمان الحگلي فدوه تعال ساعدني
يمان : شكو نارين صاير شي
نارين : زهراء ولك لگيت زهراء فاقده الوعي فدوه تعال مااعرف شسوي
يمان :اهدي نارين جايج بس لا تبچين جايچ
نارين : بسرعه عفيه / مرت ربع ساعه ووصل يمان اجه مفزوع وخايف رحت فتحت الباب وگبل سألني
يمان : شبيه صديقتچ نارين
نارين : ماادري اجيت وشفته بهذا الوضع / راح دخل للمطبخ شاف الوضع ظل مصدوم من هول المنظر گبل شلناها وخليناها بالسياره وتوجهنه للمستشفى اخذوه ودخلوها للطوارئ وكعدنه ننتظر وخلال الانظار سألني
يمان : منو سوه هيج
نارين : هزيت راسي وگلت / ماادري / ظلينه هيج ساكتين الا ان طلع الدكتور رحنه ركض سألناه عن حالته وهو جاوبنه
الدكتور : ماكو شي وماكو داعي للخوف بس صاير عده انهيار عصبي بسبب الظغوطات الي صارت وياه بس اكو اثار ضرب على وجه وايده لذا لازم نستدعي الشرطه
نارين : شنو شرطه يمعود ماكو داعي
الدكتور :بس حاله البنيه ادگول انو اكو داعي
نارين : ظلينه اني ويمان واحد يباوع بالثاني حايرين شلون هسه راح نوگع بمشكله اذا استدعى الشرطه وصدك شويه واجت الشرطه علمود يحققون ويانه والدكتور ينطيهم التفاصيل راح يمان اخذ الظابط على صفحه ويمكن انطا رشوه وخلال هذا الوقت شفت زهراء گعدت رحت عليها بسرعه حضنتها
زهراء : شكو نارين شصار
نارين : اني الاريد اسألج شصار وياج
زهراء : جنت اريد احچي كلشي شفته لنارين بس قبل لا انطق دخلت الشرطه ودخل بمقدمتهم شاب يصير عمره بالعشرين اجوا وتوجهوا عليه وحچه وياي ظابط من عدهم
كيان : السلام عليكم
زهراء : وعليكم السلام
كيان : صرتي زينه هسه
زهراء : باوعت لنارين وعلامات الاستفهام على وجهي سألته محتاره / شديصير هنا
كيان : كلامج وياي مو وياه
زهراء : شنو تقصد / اشر الظابط لنارين حته تطلع وفعلاً طلعت وعافتني وحدي وياه رجع الظابط باوعلي
كيان : هسه ادكدرين تحچين براحتچ
زهراء : عن شنو
كيان : اليوم جابوج للمستشفى واكو على وجهچ اثار ضرب وزراك حول عيونچ لذا احچي بدون خوف چنتي مخطوفه لو هاي اثار تعنيف
زهراء : لا هاي ولا هاي
كيان : لعد شنو
زهراء : اني ضربت نفسي
كيان : ليش
زهراء : چنت وحدي بالبيت ومن رحت للمطبخ شفته مصبوغ بالدم ومن شده خوفي فقدت وصرت اضرب بنفسي
كيان : عايشه وحدج بالبيت
زهراء : اني وصديقتي
كيان : هاي الي جانت واكفه هنا
زهراء : اي
كيان : وين اهلچ
زهراء : متوفين
كيان : همممم
زهراء : سيدي اكدر اطلع
كيان : لا بالاول لازم اتأكد من صحه اقوالچ
زهراء : شلون
كيان : الدم بعده موجود بالبيت
زهراء : ماادري اسأل صديقتي اكيد هي الي جابتني لهنا / باوع للشرطي الواگف يم الباب وگله
كيان : دخلها
زهراء : شويه واجت نارين ومبين عليها الخوف وگفت يمنه وبده الظابط يسأله
كيان : انتي الي جبتي صديقتچ للمستشفى
نارين : اي اني
كيان : وصحيح المطبخ الي جانت بي جان كُله دم
نارين : اي جان مصبوغ بالدم كُله
كيان : لازم اروح لهناك واتأكد طبعاً اذا ماعدچن مانع
زهراء : يحچي ويباوعلنه هزينه راسنه بالموافقه وطلعنه من المستشفى بسياره يمان اما هو ركب سيارته مال الشرطه واجه ورانه نزلنه كلنه من السياره ودخلنه للبيت وچان بس الظابط وشرطي وياه واني ونارين ويمان بس انصدمنه من الي شفنا اني ونارين وحده تباوع بالثانيه والظابط يباوعلنه بشك مستحيل الكلمه الي چانت توصف الوضع الي شفته شلون هيچ يختفي الدم ماكو ولا قطره باوعت لنارين / نارين انتي شفتي الدم صحيح مو شفتي / چانت بس تهز براسه وتباوع للظابط وادگله
نارين : كلام زهراء صحيح اني بعيني شفت الدم
زهراء : حط الظابط ايده على عيونه يفرك بيهن ويصك على اسنانه من يحچي
كيان : صدكت كلامچن واجيت لهنا شنو معنى هذا التصرف
زهراء : ظلينا ساكتين ماعدنا جواب على كلامه من شافنه هيچ رجع گال
كيان : اني مجبور اخليكم تكملون كلامكم بمركز الشرطه
زهراء : اشر للشرطي حته ياخذنه بس اول ماوصل لنارين اجت ببالي فكره وماترددت گبل نطقته وگلت / اللومينول
كيان : شنو
زهراء : خلي نستخدم اللومينول وشوف اذا حجينه صحيح او لا / صفن شويه وبعدين قرر ووجه الكلام للشرطي
كيان : روح جيب فريق البحث الجنائي خلي نشوف وين تاليه
زهراء : وفعلاً نص ساعه واجه فريق البحث الجنائي وبدو يفحصون بالمكان
_______________________________________
ملاحظه : اللومينول هو ماده كيميائيه تتفاعل مع الدم حيث عند وضع هذه الماده على مكان مسح منه الدم تتفاعل الماده معه وتتحول الى اللون البنفسجي مهما كانت كميه الدم ضئيلة او الزمن المار على مسحه
_______________________________________
زهراء : وبعد رش اللومينول على جزء من المطبخ انطت الماده استجابه ايجابيه وتحول لونه الى البنفسجي نارين ويمان متعجبين وفاتحين حلوگهم
حولت انظاري للظابط وهمست / شفت اني مجذبت وحچي صح / وره هاي الكلمات خله فريق البحث الجنائي يرحون وكعد وياي وبده يسأل الاسئله
____________ يتبع __________ يتبع _________