اخطاء الماضي

Part 1 { بعد 13سنه}

الكاتبه :Zahraa             { اخطاء الماضي }
___________________&&&&&____________
زهراء : الساعه 10:00بليل رجعت للبيت واني احس عيوني توجعني من النعاس الظلمه جانت طاغيه على هاي المنطقه وصلت كدام بيتنه وشفت ابو الايجار واكف يدك بالباب بكل قوه والغضب مبين بعيونه زفرت نفس بتعب وقله حيله فتحت جنطتي شفت الفلوس تكفي بس لايجار شهر واحد واني مطلوبه شهرين تقدمت ورحت يمه حچيت بصوت تعبان هلكان / السلام عليكم
ابو الايجار : ولا عليكم السلام
زهراء : ابتسمت ابتسامه خفيفه ورديت / السلام لله
ابو الايجار : تره صار شهرين صابر عليكم شوكت ادفعولي فلوسي
زهراء : طلعت الفلوس من جنطتي وانطيته اله اخذ الفلوس من ايدي حسبهن وبعدين باوعلي رافع حاجبه يهز بالفلوس وماعاجبه الوضع
ابو الايجار : هذا ايجار شهر واحد وين باقي الفلوس
زهراء : اصبرلي كم يوم وانطيك الباقي
ابو الايجار : هه سامعه هواي من عندج
زهراء : راح وهو يگلي
ابو الايجار : الج اسبوع اذا ماانطيتيني البقيه اطردج من البيت
زهراء : راح وبقيت وحدي مديت ايدي وفتحت الباب دخلت البيت وتوجهت لغرفتي شغلت الضوه وبدلت ملابسي باوعت على ايدي جانت ترجف من الجوع رحت للمطبخ طلعت جبن وحميت الجاي خليت الاكل على الكاونتر وبديت اكل لان بيه داء غريب مااحب اكعد بالكاع كملت ورحت لغرفتي وبالطريق لاگتني نارين طلعت من غرفته وصارت بوجهي صرخت بعلو صوته
نارين : اااااااااا
زهراء : وسم شبيج
نارين : زهراء هاي انتي يمه وعلي عبالي حرامي طب للبيت
زهراء : جبانه
نارين : شنو جبانه شايفه روحج من طبيتي للبيت مااسمع بس صوت الطكطكه شمتوقعه
زهراء : بس فهميني الحرامي شيسوي يجينه
نارين : والله ماادري اصلاً اذا اجانه راح اطلب اشتغل ويا
زهراء : هذا الناقصنه نشتغل بالاجرام
نارين : جا شبي  الاجرام مو عيشتهم احسن من عيشتنه
زهراء : دنجبي وروحي كملي دراستچ
نارين : زهراء راح تنامين
زهراء : لا بعدني ماقاريه الامتحان
نارين : اوك روحي اقري واني هم اروح اقره
زهراء : رحت لغرفتي وطلعت الملازم وبديت اقره ومرت ساعه وساعتين وثلاث واني ماشلت عيني عن المَلازم باوعت للساعه ب 1:00 ذبيت المَلازم وتمددت بالكاع لان تعبت غمضت عيوني علمود اريحهن شوي بس ماحسيت بنفسي ونمت لثاني يوم الساعه 6:00 كعدت على صوت نارين وهي دكعد بيه كعدت وكمت على حيلي بس بعدني نعسانه واثاوب
نارين : زهراء ليش نايمه هنا البارحه
زهراء : ماادري مو جنت اقره الامتحان وفجأه / رجعت بذاكرتي من غفيت من دون ماادري كمزت من مكاني / ولججج نارين راح الامتحان عليه راح شلون بيه
نارين : علكيفج زهراء جا وذا راح الامتحان
زهراء : تحچين صدك نارين شني هالبرود الي عندج
نارين : عادي يمعوده هو امتحان عادي / ماهتمت لكلامي كامت تركض منا ومنا تبدل وتطلع مَلازم وتراجع وانخبصت خبص اني هم كمت بدلت وسويت الريوك وصحت زهراء حته تاكل اجتني والمَلازم بايده حته ماتدري بروحه شتاكل كملنه ورحنه سوه للجامعه وبدت المحاضرات ولان زهراء سنه ثانيه واني سنه اولى فاحنه محاضراتنه تختلف وما نلتقي بس وكت الاستراحه خلصت اول محاضرتين ورحت للكافتريا وهناك شفت يمان كاعد, رحت يمه
نارين : شلونك يمان
يمان : هلا نارين
نارين : كعدت يمه وهو طلبنه كهوه / اهوو يمان من الصبح تشرب كهوه وفوكاه مره
يمان : لعد انتي شلون اشربينه
نارين : اشربها حلوه
يمان : هم مسميته كهوه لج بابا اصل الكهوه مره بس انتو مدري من طلعتو الحلوه
نارين : هو انته مر ماتنجرع والنوب تشرب مر شتصير
يمان : هو اني لو مر وماانجرع ماجان البنات سحلن روحهن عليه
نارين : ايباااااه ومنو ساحله روحه عليك
يمان : اولهن انتي
نارين : اني والله اني لو مااتونس بيك مااكعد لحظه وياك
يمان : اكلج عيني مكتوب عليه للونسه اني
نارين : ههههههه يحچي وهو يعوج حلكه ويقلد البنات خلصناه عرك وضحك وخلص يومي طبيعي ورجعت البيت الساعه 2:00 الظهر رجعت اسحل بروحي سحل كعدت بالصاله هلكانه من التعب وشفت اما زهراء ذبت كتبه وراحت لشغله حته بدون غده كمت اني سويت غده حته اتغده ولل 3:30 يله استوه رحت صبيت واكلت خليت غده زهراء على الكاونتر ورحت نمت
_______________&&&&&&&&&__________
زهراء : بعد ماخلص دوامي رجعت للبيت وي نارين ذبيت كتبي بسرعه وطلعت حته الحك على دوامي لان هو يبدي  1:00 والساعه هسه 2:00 وصلت ورحت لقسمي مامر اله عشر دقايق على وصولي واجاني المدير صاحني لمكتبه واني اعرف شنو الكلام الي يريد يسمعني ياه رحت لمكتبه وهو هجم عليه حته بدون سلام
المدير : لججج الساعه هسه 2 وين جنتي
زهراء : دوامي توه يله خلص
المدير : واني شعليه بدوامج شوفي هذا اخر تحذير واخر مره تجين متأخره المره الثانيه اطردج من الشغل واضح كلامي
زهراء : واضح / طلعت من مكتبه ودموعي بدن يجرن وشكد ماامسح بيهن يرجعن حاولت اقوي نفسي بس صعبه واني جاي اشتغل اجه واحد من ذولي الي مبين عليهم طاكين وطايحين حظ بنفس الوقت ظل يفتر حولي ويباوعلي ضجت حيل من عنده حجيت واني كوه كاتمه غضبي
زهراء : اخي اذا محتاج شي كولي واذا عندك غير شي فتفضل لان عدنه شغل
الولد : بضاعتكم حلوه
زهراء : ظليت ساكته وماحجيت وهو كمل
الولد : بس انتي احله من كل هاي البضاعه
زهراء : عبالك جنت منتظرته يتحرش علمود اذب ضيمي بي صحت بعلو صوتي / اجاوززززت حدوددددككك حيووووان امششششي اطلععع بره
الولد : احترمي نفسج منو الحيوان كلج على بعضچ عامله شكو تستشرفين براسي
زهراء : على صوتنه طلع المدير وهو يصيح شكو اجه عليه يسألني شنو صاير وقبل مااحجي صاح ذاك
الولد : هاي العامله قللت ادب وياي وتغلط وتصيح ماجنت متوقع هاي السمعه على على مولكم وهو اشهر مول ببغداد
المدير: اهدأ ابني وفهمني شنو المشكله
الولد : لا افهمك ولا تفهمني هسه تعتذر لا والله هسه منشور واحد بالفيس تفلسون من كل زبائنكم
المدير : يمعود يا منشور يا فيس اهدأ هسه تعتذر
زهراء : دار المدير وجه عليه وهو يأشرلي اعتذر وذاك الولد يباوعلي بشماته واستحقار هزيت راسي بنفي / هو الي يعتذر مو اني
الولد : منو انتي واعتذر منج
زهراء : المدير جرني من ايدي بعد ماكل الي بالمول التمو علينه واخذني بممر يحاچيني
المدير : زهراء تردين اجيبين سمعه للمول كتلج اعتذري منه وخلصيني ليش تعاندين
oهراء : ليش اعتذر هو الي اجه تحارش بيه المفروض اطرده من المول مو تخليني اعتذر منه لان دافعت عن نفسي
المدير : واذا تحارش بيچ
زهراء : اذا هذا الشي عادي عندك فهو مو عادي عندي
المدير : لعد بس عادي تجين تشتغلين بمول وتراوين جمالچ للناس
زهراء : ماجايه اراوي جمالي جاي اشتغل حته اكدر اعيش
المدير : لا ادوخيني هذا الحچي مايهمني چنتي متوقعه من اشتغلتي يعني
زهراء : شنو حرام البنيه تطلع تشتغل
المدير : مو حرام بس تحملي الي جاي يصير ومن يتحارشون بيج المره الجايه ابلعيه واسكتي
زهراء : واذا ما بلعته
المدير : اطردج اصلاً هسه اذا ماطلعتي اعتذرتي من الولد اطردج يله
زهراء : مستحيل شنو هذا البشر يمشي شغله على حساب الناس عفته بمكانه وطلعت والولد يباوعلي بانتصار عباله راح اعتذر عفت المول وطلعت اجرت تكسي ورجعت للبيت والدنيا اسودت بعيني حسيت كل الابواب انسدت بوجهي وصلت للبيت وگبل رحت لغرفتي ذبيت نفسي على فراشي وبچيت لمن مليت منين اتلكاها وين انطي وجهييي تعبت المسؤليه صعبه حيل صعبه ظليت على هذا الوضع الى ان نمت بفراشي
____________&&&&&&&&______________
نارين : كعدت على صوت موبايلي يرن لان مؤقته كعدت لميت شعري بالقراصه ورحت غسلت وجهي وبالطريق شفت موبايل زهراء مشمور بالصاله على الكرويته معقوله يعني زهراء هنا بس يعد وكت شغله يخلص بال 10 بليل رحت لغرفته وشفته نايمه على بطنه بملابس الدوام تقربت اتلمس المخده وشفته مبلله هزيته من كتفه حته تكعد كعدت بس هيه بعده مامصحصحه گبل سألته
نارين : زهراء شصاير وياج
زهراء : جنت افرك بعيوني بس من سألتني نارين السؤال نزلت راسي كوه لازمه دموعي بس ماتحملت گبل طگيت من البچي واني اگللها / انطردت من الشغل
نارين : انصدمت من جوابه والي صدمني اكثر بچيه حضنته واحاول اواسيه / عليمن البچي ياروحي عليمن يولي الشغل وابو الشغل مسحي دموعچ
زهراء : حضنته حيل واني ابجي موالشغل الي مبچيني الحاله الي احنه بيه هي الي قهرتني كلامه المدير هو الي قهرني شكيتله الي بكلبي / ولج يعاملوني هيج لان يتيمه لان ماعندي احد مليت يعني لو وحده عنده اهل ماسكتوا على التحرش بيه بس اني منو منو الي يوگف بوجهم
نارين : منو تحارش بيج زهراء باوعيلي
زهراء : حچيتله السالفه كله وهي خلتني بحضنه تصبرني تمسح على شعري واثنيناتنه سكتنه همست بتعب / ابو الايجار يريد الفلوس هذا الأسبوع
نارين : شنسوي هسه
زهراء : ماادري
نارين : اصبري الله يفرجه علينا ان شاء الله
زهراء : ان شاء الله
نارين : خليت راسه على المخده وطلعت من الغرفه حته اخليه ترتاح ومن طلعت سمعت صوت موبايلي يدك بالغرفه رحت شفت المتصل يمان فتحت خط عليه / الو
يمان : شلونج نارين
نارين : زينه وانته
يمان : اني هم زين
نارين : انته بالبيت
يمان : لا طالع بس ردت اشوف باچر اداومين لان اني ما بيه حيل اداوم
نارين : مااعرف اصلاً ماالي خلگ اداوم
يمان : ليش صاير شي
نارين : اي صاير
يمان : احچي نارين شكو
نارين : زهراء
يمان : شبيه
نارين : طردوه من الشغل
يمان : ليش
نارين : صارت مشكله وبطلت
يمان : وشلون هسه
نارين : مااعرف
يمان : لا ضوجين نارين كلشي واله حل
نارين : ان شاء الله تنحل باقرب وقت
يمان : ان شاء الله بس لاضوجين وباچر داومي اوك
نارين : مو قبل شويه گلت مابيه حيل
يمان : لا باچر نداوم اني وياج علمود مظلين وحدچ
نارين : تمام
يمان : تمام باي
نارين : باي ودير بالك على نفسك
يمان : وانتي هم
نارين : سديت الموبايل من عده ورحت انظف البيت اسوي العشاء الى ان كعدت زهراء صلينه سوه وتعشينه وهي بعدهي مهمومه تفكر بالمجهول خلصنه عشه وكلمن راحت لغرفته
__________&&&&&_________&&&&&____
علي : يوم طبيعي وروتين طبيعي هيج جانت ايامي الا ان دكت السكرتيره الباب رديت عليه واني مشغول بالملفات الي عندي / تفضل
السكرتيره : استاذ باريس اجت ادخله
علي : دخليه / دخلت واني رفعت راسي ابتسمت وسلمت عليه كعدت على الكرسي وجنت احس بيه هيبه وقوه خياليه شكله يسحر اي شخص يقابله وعلى الرغم انو هيه دخلت بعمر الخمسين الا انو مبين عليه شابه بعمر الثلاثين جانت مسويه شعره ذيل حصان بعد السلام والكلام گبل طبت بالموضوع
باريس : شوف استاذ علي بما انو احنه متفقين على كلشي خلينه نوقع العقد بسرعه
علي : متفقين بس اريد وقت اقر العقد وان شاء الله بليل ارجعلج خبر
باريس : اي طبعاً الك الحق
علي : بس خلينه نتفق انو اذا ماعجبني شي بالعقد اكدر اغير اي شي بي
باريس : متفقين
علي : حلوو وهسه تردين تشربين شي
باريس : Think you بس لازم اروح
علي : اهلاً وسهلاً بيج بكل وقت
باريس : وبيك اكثر عيوني اشكرك
علي : طلعت باريس من مكتبي وتقربياً وره دقيقتين اجه يمان وكالعاده طب بدون استأذان لمكتبي
يمان : شلونك لولو
علي : زين
يمان : اكلك علي
علي : كول
يمان : ولك هاي ياهي الي طلعت من مكتبك قبل شويه
علي : تقصد باريس
يمان : اي اي خايب مو بنيه تشك شك وعيونه الزرق تجنن
علي : انجببب يمان هاي بگد امك مو عيب
يمان : ههههههههه ولك هاي بگد امي
علي : وعلي انتَ يرادلك تربيه من جديد
يمان : شمسوي يمعود
علي : انجب وكول شعدك بسرعه
يمان : جاي اشوفك
علي : رفعتله حاجبي وحچيت بأستهزاء / جاي تشوفني لو عندك مصلحه
يمان : اني يعني شتقصد اني مصلحجي
علي : يمان عندي شغل
يمان : تمام لعد راح اختصر
علي : يله
يمان : محتاج فلوس
علي : شسوي بيهن
يمان : اريد اطلع وي اصدقائي
علي : يمان سوالف البنات وطياح الحظ عوفه وركز على دراستك
يمان : يحچي ويباوعلي بحده اني هم ضجت من تحقيقه واسلوبه كلتله / خلص مااريد راح ارجع للبيت / ردت اطلع بس قبل مااطلع سمعته يكول
علي : اخذ فلوس من كنتوري ولاتتأخر بره
يمان : صح زعلت بالبدايه بس رضيت رحت للبيت اخذت الفلوس وطلعت وبالطريق اتصلت على نارين علمود اكله مااداوم بس صدمتني بحچيه وضجت عليه حيل لان نارين صديقتي من اول يوم دوام الي بالجامعه واعرف بحالته وقصته تمنيت بوكته اكدر اساعده بس مابيدي شي رحت سهرت ببيت أصدقائي بس هم لاحظو اني ضايج وفعلاً جنت ضايج لذا رجعت للبيت من وگت حته علي استغرب بس ماسأل نمت لثاني يوم
________&&&&&________&&&&&_______
زهراء : ظلام شديد ومااكدر اشوف شي ردت احچي بس صوتي مايطلع ردت اكوم مااكدر اكو شي مقيدني بس ماكو لاحبل ولا شي ثاني باوعت الظلام الا مالا نهايه بس كدرت اشوف شخص من بعيد بده يقترب مني ردت اصرخ بس صوتي هم مايطلع صار الرجال قريب من عندي بس وجه مابي ملامح اصلاً فجأه طاح الرجال يمي والدم ترس المكان بعدين كمت اشوف الدم على ملابسي ووجهي فقدت صرخت وصرخت الا ان طلع صوتي صرخت صرخه قويه بحيث فزيت من مكاني باوعت بانحاء المكان اني بغرفتي وماكو شي حلم اي جان حلم بس جان هذا الحلم اسوء كوابيسي لحد هسه ايديه يرجفن كمت ابچي بهستيريه صحت نارين واجت تركض خايفه
__________ يتبع __________ يتبع __________