القلب تواق لك يا خليفة ٢

بارت ٦

قام خليفة على صوت الباب و هو يندق
فتح عينه شوي و تلفت و ما شاف توق حوله
اندق الباب مره ثانيه

خليفة تنهد : تفضل
دخلت لينا و هي مبتسمه : good morning (صباح الخير)
خليفة ابتسم بتعب : good morning (صباح النور)
لينا : its 1 pm you have missed breakfast so miss touq told me to wake you up for lunch (الساعه 1 و مس توق قالت لي اوعيك عشان تتغدا لانك ما تريقت)

خليفة لف و طالع الساعة و كانت الساعه صدق الساعه وحده
استغرب لان بالعاده توق تقومه حق الريوق و ما تخليه يرقد لين الظهر

خليفة : okay thank you (اوكي شكرا)

طلعت لينا و قام خليفة راح الحمام و تغسل و توضى و طلع
صلى الظهر و عقب طلع من الغرفة
نزل تحت و شاف ابوه و توق قاعدين في الصالة يطالعون الاخبار و يتكلمون
راح و قعد عدال توق
لف عليهم و كانو يتناقشون عن الاخبار الي يشوفونها

توق لفت عليه و ابتسمت : صح النوم
خليفة رد لها الابتسامه : صح بدنج

لف يطالع التلفزيون معاهم شويه و عقب يت لينا و نادتهم حق الغدا
راحو و كلو و كالعاده كان الصمت هو سيد الموقف
بعد ما خلصو راح احمد مكتبه و خليفة و توق طلعو فالحوش قعدو

توق : شو اخبارك اليوم
خليفة : زين ... ليش ما وعيتيني الصبح
توق : امس رقدت متأخر و اليوم شفتك راقد و غمضتني ماقدرت اوعيك
خليفة ضحك : ياريت كل يوم اغمضج عشان ما توعيني من صباح الله خير

توق ضحكت و فرت عليه مخده صغيره
سكتو شويه و خليفة تم يطالع توق بصمت
لاحظ عليها التعب

خليفة : توق
توق : هلا
خليفة : فيج شي ؟
توق : لا ليش ؟
خليفة : رقدتي عدل ؟
توق : هيه الحمدلله

خليفة تم يطالعها

توق : ليش ؟

تمت توق مستغربه من نظراته
عدل قعدته و تم يطالعها

خليفة : مب مريضة ولا تعبانه ؟
توق : همم .. شويه يعني نص نص
خليفة : كيف يعني نص نص
توق : ها الكم يوم حاسه بتعب فجأه مادري ليش
خليفة : تعب شو
توق : مادري ... يعني جي متلوعه و جسمي احسه تعبان... "سكتت"

تم خليفة يطالعها بصمت و نظرات استغراب

قامت توق من مكانها : دقيقه بسير و برد

راحت توق الغرفة و قعدت على السرير و هي تفكر

توق في نفسها : " اقوم متلوعه ... و تعبانه ؟"

راحت توق قدام المراية و طالعت عمرها
لاحظت التعب الخفيف على ملامحها
حاولت ترجع في ذكرياتها لاخر فتره و تذكرت كم شي و هذا اكد شكها