ميار

وبـ لَحظة ندم حَبيتك آني

"البقيه بحياتك"
رفعت راسي بالگوة اباوع بتعب و عيوني منتفخة من البچي
تكلمت واگف گبالي بدشداشتك السودة تطابق سواد روحك و عيونك، تلف الشماغ على رگبتك السمره تمنيت لو اگدر ارد عليك بس بلعومي جاف و صوتي راح من الصريخ .

يا حياة هاي الي راح تبقة اليه؟
انتَ خذيت كلشي بحياتي ما بقيت شي حتى هلي راحوا مني خاف تريد تنهش گلبي بقهر بعد حتى گلب ما بقه روحي انطفت ظهري انكسر ولك الزمني!

هزيت راسي واگف ببداية الچادر ما اعرف شلون رجلية حاملتني .

"اكلت شي؟"

تجاهلت سؤالك و نبرتك المُراعية لوضعي ،
حقك لو شفقت عليه لَك حتى الكافر يصعب وضعي علي.

شنو من گلب شايل بس فك عني روحي خلصت فدوه اروحلك عوفني ما بقة بيه حيل.

"تعال وياي و لا تگول لا ،
سهام طبختلك اكل مو من اكل الفاتحة ادري بيك تلعب نفسك منه ما ينوكل"

سحبتني من ايدي واني بدون ما اقاوم امشي وراك اباوع لظهرك بعيون تعبانه و وجه ناشف و ذابل ،
هذا اليوم الثالث من الفاتحة و اني كلشي ما داخل بـ بطني ولا اشتهي شي .

وليش حتى اكل و اشتهي؟
هو الفاگد عزيز يسترخص على نفسة الماي لك اني راحوا اعزاز مني .

امي و ابوي راحوا شتريدني اكل لخاطر الله اعتقني ما بيه احجي ولا اتملص منك .

"سِـهام جيـبي الـصينيه!"
بخشونة صوتك صحت بزوجتك بعد ما گعدتني بغرفة نومكم على الگاع ما اعرف شوكت صعدت الدرج ؟..

"صار صار جايك"
بسرعة هي ردت عليك و احسدك على وحدة مثلهه ما انكر شگد مسنعة مداريتك و ما ترفضلك طلب خطية.
ما تستحقه..!

بعد دقائق خليت صيني بيه هواي اكل و ريحتة ترست جو الغرفه الي يجمعنه سوه،
معدتي گلبت بسبب الريحه و رغما ما اني جوعان ما صار الي شهيه اكل ،
درت وجهي اطبگ شفايفي احاول ما اتقيأ گدامك كافي الضعف الشفتة مني بـ الثلاث ايام الي مرت.

"شبيك ميمي على بختك تريد تموت؟"

الله يسمع منك اي اريد اموت و الحگ امي و ابوي بلكت الاگيهم بلكي اشوفهم مرة ثانيه .

"اكل يمعود بس شوية"
شفتك تاخذ من صحن التمن بـالخاشوگه تقربه لوجهي و اني اباوعلك ،
شنو هاللطف النزل عليك بعد زمن؟
جنت ما تطيق تشوف وجهي هسه توكلني بـ ايدك؟
بس هيهات تغير صورتك بعقلي.

"يله هاك بس هاي"
كمشت بـ ايدك الخشنه فكي ،
خليت جسمي يقشعر لـ لمستة البسيطه و گلبي التعبان رجع يضخ الدم كانه نزل لمعدتي هالگد ما ينبض.