في قصايد بهاج شامة رحاب

٤

رحاب:- وش همه ياماما؟ انتِ وأخواني مو هم أنا مرتاحه ومستانسه بحياتي معتس ومع أخواني
ام رحاب:- الله يرضى عليتس انا فخوره فيتس بس روحي شوفي عبدالرحمن وعبدالهادي وعبدالملك وينهم
رحاب قامت:- اكيد يلعبون كوره بالشارع أنا أعرفهم مايتركون حركاتهم يستغلون أشغالنا
ام رحاب ضحكت عليها:- خلي اخوانتس يتهنون بطفولتهم
رحاب:- هم يتهنون بس انا بطفولتي كنتي دايم ماتخليني اطلع العب كثير
ام رحاب:- لانتس اول فرحتي واخاف عليتس
رحاب حطت الطرحه براسها وهي تقرب تطالع بالشارع وشافت اخوانها يلعبون وبهاج كان واصل وهو مد يده يفتح الباب
رحاب فتحت فمها من شافت يد رجال وهربت داخل على طول
بهاج انصدم من كائن طار بسرعه ولمح بنت تدخل والشال طاح من شعرها الناعم وحرير ومسك الشال وقعد يشم فيه وشوي تعوذ من الشيطان ودخل لغرفته
بهاج نزل اغراضه وهو يشكر ربه على كل النعم وانسدح بسريره وهو طول النهار يشتغل
ام بهاج دخلت عليه:- انت متى وصلت هنا؟
بهاج فتح عيونه:- هلا بالغاليه
ام بهاج بعصبيه:- غاليه؟ وماجيت تسلم علي وانا انتظرك
بهاج:- اسف يالغاليه كنت تعبان ودخلت انسدح
ام بهاج بخوف:- بسم الله عليك علامك كله من ابوك ماغير يشغلك
بهاج باس يدها:-يا امي ابوي شيخ الديره وانا ولده ولازم اشتغل وابيض وجهه ولا انا بالمستقبل شلون بدير عائله؟
ام بهاج بفخر:- انا فخوره فيك بس ماتفكر تفرح امك؟
بهاج:- ابشري باللي ودتس
ام بهاج:- ابي اخطب لك وافرح فيك
بهاج ابتسم:- اللي تناسبتس اخطبيها لي
ام بهاج غمزت له:- احلام عاجبتني
بهاج بعدم راحه وابتسم بتسليك:- اللي يريحتس
.
.
<عند بيت خالده ام احلام>
شافت بنتها وهي تزرف تلفون السلك لغرفتها
خالدة بعصبيه:- احلام رجعي التلفون لمكانه!
احلام زفرت بقهر:- ماما بكلم صديقتي بعدين ارجعه
خالدة:- وجع يوجعتس انا مو عاجبني وضعتس كل الوقت بغرفتس وتكلمين خوياتس
احلام:- طفش الديره والنت يادوبك يجي
خالدة بعصبيه:- البنات يشتغلون ويسون شغل البيت ويعاونون امهم الا انتِ على التلفون الزفت ذا امشي ساعديني ورانا شغل
احلام بحلطمه:- لا ما ابي اخرب اظافري انا لي شهرين اطولهم
خالده:- السناعه بشغل البيت مو باظافرتس هذي
احلام بقهر:- ماراح اعاون بشغل البيت مو جايز لي
خالدة:- شلون بزوجتس لولد الشيخ وانتِ ماتعرفين شي؟
احلام ضربت راسها:- ماما انتِ ماتشوفين زوجة الشيخ ماتلمس شي وتجلس زي الملكه وعندها خدم
خالده:- وانتِ وش دراتس انها ماتشتغل عايشه معها؟
احلام:- شدعوه ماما الديره صغيره وكل شي ينعرف فيها
.
.
<عند الهنوف>
قفزت من سريرها وهي تفتح الشباك وتشوف امها تستقبل صديقتها اماني اخت بهاج
الهنوف ركضت بفرحه وهي تحضن اماني صح ان اماني عمرها ٢٠ واصغر من الهنوف بس علاقتهم قويه
الهنوف بفرحه:- ما بغيت اشوفتس اشتقت لتس
اماني بادلتها الفرحه:- اكثر والله، اقولتس اليوم جيت اسير عليتس
الهنوف:- امشي داخل نسولف براحتنا
اماني:- منجدتس يا الهنوف تتزوجين من هداج وهو كبير عليتس؟
الهنوف بقهر:- وش اسوي يا اماني نصيب
اماني:- عاد سمعت من اخوي بهيج انه مسيطر على حريمه
الهنوف بدون اهتمام:- وش اسوي له يعني ماهمني
اماني:- كيف ماتهتمين هو بعد اسبوع يصير رجالتس
الهنوف تاففت:- اماني مو وقت تجيبين طاريه انا خلقه متوتره من الموضوع كله وكيف بتزوج واحد كبير احسه اصلع وله كرش كبير
اماني انفجرت من الضحك:- ههههههههههههههههه يلا يا الهنوف تخيلي بس يطلع تسذا بموت ضحك عليتس
الهنوف :- انكتمي لا ادعي عليتس تاخذين واحد مكرش
اماني طيرت عيونها :- لا تكفين الا هذي
الهنوف ضحكت عليها:- لا ماعليتس انا متأكده اللي ياخذتس كفو
اماني:- ياعمري انتِ احبتس
الهنوف نزلت راسها بحزن:- الا انا ماتحقق حلمي بأخذ واحد معدد
اماني ضمتها:- هونيها وتهون يمكن خيره لتس
الهنوف بادلتها ودموعها تنزل:- انا ماعاد يهمني شي بس ابي الايام تعدي وانا اعدي معها
اماني مسحت دموعها:- دموعتس غاليه تكفين لا تبكين وتقطعين قلبي عليتس
الهنوف بقهر :- اصعب شي ان ابوي يدور الفكه مني
اماني مسحت على ظهرها:- مرات ماندري وين الخيرة
.
.
<عند هداج وسميه>
سمية جابت الفواكه وهي توكل هداج
هداج:- بناتس ناموا؟
سمية بدلع:- اي حبيبي نومتهم
هداج:- اي زين عفاف علامها منقلبه؟
سمية نزلت راسها:- ما ادري وش اقولك بس هي زعلانه عشان راح تتزوج
هداج بعصبيه:- فهميها ان الغيره عندي لا وما أحبها انا رجال اللي يحق لي اغار بس الحريم ماتغار
سميه هزت راسها بخوف:- ابشر ابشر ماراح يصير الا اللي تبيه
هداج قام لفراشه وهو يأمرها تطفي الاضواء وسرح وهو يفكر بالهنوف وانه بعد اسبوع يشوفها ابتسم بخفه وهو يلعب بشنبه ويحسها راح تكون مثل حريمه
هداج بينه وبين نفسه:- اول الايام بدلعتس يا الهنوف بعدين تلقمين مع زوجاتي ههههههههههههههههههههههه
.
.
<بهاج تذكر خويه وراح طلع وشافه واقف قريب من بيته>
نمر:- علامك طولت يارجال
بهاج:- اسف والله بس صار معي شي وجيت للبيت وتأخرت عليك
نمر:- ليكون فيك شي؟
بهاج:- لا بس مو مرتاح لاحلام
نمر:- ليش وش مسويه احلام
بهاج:- بقولك بس بيننا
نمر:- قول يارجال اخرشت اهلي
بهاج:- انت تدري اني احبها بس انصدم من تصرفاتها
نمر:-  هي وش مسوين عشان مصدوم تسذا
بهاج:- هي تحبني بس راميه نفسها علي بزياده
نمر:- شلون راميه نفسها عليك
بهاج:- يارجال افهم البنت جريئة وهذي مو من عوايدنا بالديره
نمر:- اي فهمت عليك والله انك صادق عيب تسذا
بهاج:- حتى اختي حسيتها ماتبي احلام لي واكيد هي تعرف شي انا مو عارف له
نمر:- اي لان الاخت تبي لاخوها الزين ودام اختك ماتبيها الاكيد شايفه عليها شي
بهاج:- المشكله انا خايف اتركها واكون اظلمها
نمر:- لازم تستخير وتدعي ربك يعطيك الحل
بهاج:- وانت صادق والله
نمر:- الحين مشينا نقوم المسجد نصلي
بهاج:- ايه يالله الحين صلاة المغرب
قامو للمسجد وصل بهاج صلاته وهو يركع بسجوده رفع يده للسماء وهو يدعي ان هالسنه الله يزوجه وحده بنت اصول وان اذا احلام فيها شر له تبعد عنه قام من صلاته وهو يحس براحه كأنه ربي صب عليه الراحه وطمن قلبه سمع صوت الامطار وهو يحسها اشارة من الله شكر ربه وحمد ربه على كل شي
.
.
<عند رحاب وأمها>
كانت تخيط وتسمع صوت المطر وتذكرت أبوها وأبتسمت بحزن لما تذكرت كيف كان أبوها يحب ينام بالمطر بس عشانه بيوم ولادته كان في مطر وسموه مطر
ام رحاب:- يابنت خيطتي كم فستان؟
رحاب بتعب:- خيطت ٣ وتعبت الشغل واجد الله يعين
ام رحاب: ماصليتي المغرب؟
رحاب:- الا صليت ماما
ام رحاب:- عفيه عليتس ابيتس تسذا ماتنسين لا شغلتس ولا صلواتس لازم تصلينها كلها
رحاب:- ابشري ماما
دخل ابو بهاج البيت وشاف الباب مفتوح وكانت رحاب تشتغل والشال نازل عن راسها انعجب فيها وهو ماهمه عمرها ودخل وهو يشوف شكله والشيب براسه وبلحيته ودقنه
ابو بهاج حط رحاب براسه وبتفكير:- انا ماكبرت بعدي شباب بصبغ الشيبات ذول وبتزوج بنت ام رحاب اكيد ماراح ترفضني لبنتها وبعدين الشرع حلل اربعه وش علي من ام بهاج؟

.
.
#في_قصايد_بهاج_شامة_رحاب