دخلت للغرفة ..
فتحت اللوكر طلعت ملابس الخفارة .. زي زيتوني طبي ، بدلت ورجعت ملابسي النزعتهم بالخزنة ، ولبست الصدرية البيضة .. اخذت السماعة مال القلب حطيتها على اجتافي .. وطلعت من الغرفة .
اخذت السجل باوعت اسماء المرضى اللي لازم انطيهم علاجهم .. وكفت الدكتورة اسماء : ايناس راقبي المريض احمد حالته خطرة جدا .. خلي بالج يمه .
استغربت من تحذير الدكتورة اسماء !!
المريض احمد بالعناية المشددة وواجبي اثناء دوامي انو اراقب حالته بدون تحذير وتنبيه !
جاوبتها : إن شاءالله عمة .
مشيت للاستعلامات : ها ثامر شنو الاخبار ؟
- المدير طالبج
- اهووو معرفت شيريد ؟
- لا كال من تشوف ايناس كللها الدكتور انيس طالبج بغرفة الادارة .
- اكمل علاج المرضى واروحله .
واكفة ومتجية ايدي ع المكتب مال الاستعلامات وكف واحد : السلام عليكم
- وعليكم السلام
- وياج انا اخوج النقيب عابد محمد الجبوري .. اخو المريض احمد الجبوري وكالولي حالته يمج .
- نعم عزيزي ، الزيارة حاليا ممنوعة واي خبر مستجد نبلغكم
- رايد اشوف اخوي اذا ما بيها زحمة لحضرتج
- بلغتك ان الزيارة ممنوعة عزيزي
- الله يهالعثرة شجلبتي بعزيزي ، خليني بس احاجيج وافهمج بالاول .
- اخي رجاءا هذه طابق العناية المشددة اقل كلام وشوشرة تأذي المرضى وكل واحد بيهم بينه وبين الموت شعرية ، فاذا تسمح .. انزل واحنا نبلغكم بحالته .
- شبلاج ما تتفاهمين اطي صبر ، اخوي جاي اكلج بخطر واني ما امن بالعناية يجتلونه
دكيت ع المكتب : ثامر تصرف
عفت الاستعلامات وجريت السجل مال المرضى ومشيت .
باوعت للساعة ٩ الا عشرة
موعد علاج المرضى ب٩ .. دخلت للمريض احمد الصوندة مال التنفس بيها قطرات دم .. عاينت جهاز التنفس ٩٠ ..
اقتريت على المرضى كلهم انطيتهم العلاج بوقته
ورجعت للمريض احمد اراقب جهاز التنفس ..
رج تليفوني بجيبي .
اخذت السجل وطلعت من غرفة العناية المشددة وصلتني رسالة ع الواتساب مكتوب بيها ( اختج مياس نجم طالبة اعدادية المقدام .. خوش بنية )
عقدت حاجبي .. دزيت رسالة ( منو ؟ )
رد ( اذا تتعاونين ويانا اختج بخير وما يمسها شي )
رديت ( شلك بأختي .. منو انت وشنو هالتهديد )
كتبلي ( احمد محمد الجبوري اليوم يموت .. اعتبري امر وخلاف الامر امور ما تسر )
كلبي رجف للحظة
باوعت الممر فارغ .. رجعت اباوع للرسالة دزيت (منو انت ) .. صار خط واحد يعني قفل النت ، تنهدت واني احط ايدي على كصتي بحيرة .. طلعت من قسم العناية .. طلع اخو المريض احمد كبالي .
عابد : اسمعي وثقي والله والأسلام اي بلية تصيب اخوي احملج المسؤلية كاملة واكبر واحد ما يخلصج من شري .
.... كاتم ضمير
قريبا
☆☆☆☆☆
من بعد مشوار رحلة طويلة بكحل عرب
نكمل واياكم غدا الحلقة الأخير لنعرف مصير عباس وكل ابطال الرواية .. نودع فيها عائلة الشيخ سرحان الى الأبد .
من ثم التقيكم برواية جديدة وجميلة ومشوقة بعنوان ( كاتم ضمير ) والجميل بهذه الرواية .. اعرف ابطالها معرفة شخصية وملتقيتهم لتكون هذه القصة اول قصة الية من ارض الواقع توصلني .. مو من الأنترنت .
كاتم ضمير .. روايتي التالية
قريباً... ❤💥
#زينب_ماجد
أنت تقرأ
كاتم ضمير
Romanceتدور أحداث الرواية حول ممرضة تتعرض للابتزاز لقتل مريض قائمة على علاجه ،فتلقى الضغط من اهل المريض لتقع وسط حيرة الضمير و إنقاذ المصير ..... كاتم ضمير كل الحقيقة محفوظة للكاتبة زينب ماجد ... طبعا انا بنقل فقط الروايات المشهورة و التي وقع نقلها من قبل...
