كاتم ضمير

١٩

#كاتم_ضمير

((( بقلم زينب ماجد )))

الحلقة_١٩

يا بوسة محطة موازية الممشة
احبك گبل لا احبك ..
و مستاحش گبل ما اعرف الوحشة

مينا تدفع بيه وتصرخ و ميس جرت رابي وذاك انرعص ، احس ضغطي هبط ، جسمي كله صار يرجف ما ادري شبية ، اريد الزم نفسي .. مدا اكدر

الهوسة كلها صارت براسي
هالحالة صارت تنعاد وياية اكثر من مرة من لما خطفني ابوي ولليوم ، جسمي كله يرجف ، وعيوني تغوش ومينا تصيح : هو ابونا حرام عليكم داوووويه

رادت تطلع لزمت ايدها : اوكفييييي ، لا تفتحين الباب لا تفضحينا

- ابوووويه رااااح يموت

- كتلج متفتحين الباب

- انتم شعدكم وياااه شتريدووون منه

لميت نفسي واستجمعت طاقتي ولزمتها من وجها : صوتج ما اريد اسمعه .. ماكو غيرج فتن على رابي وحتورطينا كلناااا .

دفعتها عني ابوية يصرخ بمكانه وينزف
ومينا وميس التمن عليه ، بالرغم ما هو نذل بس ميس متحملت تشوفه بهالحالة كامت تبجي .

رابي شرد من البيت كله
كلت لميس : جيبيلي الديتول والكطن و اللاصق مال الجروح بسرعة ، ركضت جابتهن واجت فتحت بطنة ، وامي تصيح وحدها صحت : روحي لأمي كووومو عوفوني اركز دخت .

كامت ميس تركض لامي ، باوعت دمه
رجعت باوعت لوجهه .. بسرعة اجت ابالي الصور اللي انطانياهن امين : شلون سلمتني هيج بديهم بكل سهولة واني عرضك، مغرت وكلت شلون يشوفون بنتي بهالحال مهان عليك تشوفني بديهم .

كام يصرخ من بطنة كمت منه ما مديت ايدي عليه كشت روحي ما اكدر اطخه ولا روحي اطاوعني اسويها ، خلي يموت وشيصير خل يصير .

طلعت امي ع الكرسي وتكلي : ولج تبتلين انت ورابي بدمه ما يستاهل ، سلمي بيد الله يمه ، حرام عليج تذبينه هيج ميت ، خابرن الأسعاف شيلننننه

كامت مينا تبجي وتحضنه وهو بعده يلوج
طبيت بالاستقبال كعدت ع القنفة ونزلت راسي وخليت ادية على وجهي وكمت ابجي .. هو الخلاني بهالقسوووة هو الخلا حجارة بكلبي ... هو والله هو

سمعت الباب اندكت ، ولد الجيران اجوا على صوت امي والبنات ، مطلعت ولا الي نفس اسعفه ، خلي يموت وخليهم يحيروني ما راح ادخل ابد .

دك تليفوني
طلعته من الجنطة عابد
دست رد واني ابجي : ها يابه د.....
بعده يريد يطمن اني دخلت البيت بخير ، حس اني دا ابجي قطع كلامه وهو يكولي: شكو يولي دا تبجين ؟

- رابي ضرب ابويه سجين

- شوكت هاي

- هسه

- هسه هسه من تركتج

- اي
كمت ابجي

- عوفي البجي واحجيلي وين ابوج هسه