Jada Campbell works as the PA for Andre Wilson a popular jamaican artise that goes by the stage name Sinna . Jada is determine to focus strictly on her job and it should be easy as Andre himself makes it clear from the get go that he doesn't do rela...
" yuh cah just fawod fi tonight ?" Shawn ask through the phone an mi exhale . Mi did a lef tomorrow wid Andre fi guh Trinidad fi him show an them from deh suh to Miami an then New York . Shawn did a try convince mi fi come out wid him a one a him breggin dem party since mi a lef again tomorrow but, mi neva inna the mood fi guh out .
" Shawn mi just bathe an eh only thing mi wah do right now a guh inna mi bed , tun on eh A/C an guh sleep cause mi have plane fi ketch 11 tomorrow "
" ah nah guh pressure yuh but, mi cah link yuh then , just fi wah hour an then mi cut an mek yuh guh sleep?"
"Okay , mek mi share mi location wid yuh" an mi share it wid him an then end eh call. Mi did inna wah nice two piece pyjama set suh mi just climb inna mi bed an put on wah show pon Netflix while mi wait fi him come . Soon mi hear wah car door shut outside a mi gate suh mi get up , walk to eh front door an open it stepping outside pon eh verandah.
Mi open eh grill an walk to eh gate an when mi open it him look dung pon mi an smile ,revealing him familiar dimples weh a did one a eh physical feature dem weh him have weh did mek mi crazy bout him otherwise from eh fact seh him did sexy bad .
Him falla mi in an mi lock eh door behind mi an guh inna eh living room and tek wah seat inna the couch.
" yuh place look nice "
" thanks "
" yuh drink ? Cause mi buy dah backle a wine yah an..."
" sure " mi seh an tek it from him an guh inna eh kitchen fi poor two glass fi eh two a wi .
" suh yuh meet up wid everybody since yuh come back ?" mi ask as mi guh back inna eh living room an gi him fi him glass a wine .
" yeh ,meet up wid mi family an have wah reunion party eh same night an link up couple a mi breggin dem afta . A you mi mainly glad fi link though cause from mi lef mi keep on a convince mi self seh mi did do eh right thing an seh as mi fawod back mi aguh try mek yuh know seh a sumuh mi did have fi do but, a neva eh easiest decision fi mek "
" mi understand an mi nuh feel upset seh yuh lef cause if mi did inna eh position a eh time an get eh opportunity mi woulda tek it to"
" an a that's why mi know wi did good together bredda , yuh know weh yuh wah an yuh nuh fraid fi get it . Ambition an standard an that nuff woman lack . But, eh work yah do now eh good fi yuh ? cause mi like how yah fly out often although a shoulda me a mek that happen fi yuh stillz"
" yes , my work is fine . Mi cah talk bout it inna details because it confidential an mi sign wah contract but, dem treat mi good an eh pay good to an of course mi get nice benefits like fi guh overseas at times suh yeh mi like it "
" ah that good" him finish eh wine an put dung eh glass pon eh coffee table an mi put dung mine although mi did still have likkle wine lef inna it.
" yuh mada good an Kerry ? Neva did get fi talk to har much when mi si har a come from church "
" yeh dem good " him look pon him eye dem fix pon fi mi own an mi know seh whateva him a think mi affi guh shut it dung before him act pon it suh mi stan up an yawn an him stan up to.
" look like yuh ready fi sleep man " him seh
" mmmm, mi aguh come guh a mi bed but, mi will talk to yuh tomorrow"
" ah that gov , thanks fi mek mi link yuh , just wah mek sure seh yuh good an know seh even though wi nuh deh , if yuh eva need anything just seh eh word "
" okay " an mi falla him guh outside to eh gate an before him guh through eh gate an guh inna him car him look pon mi wid dah longing look deh from mi eye to mi lip dem an god si an know mi woulda just seh fuck it an eh consequences an just kiss him but, mi know wid Shawn once yuh act pon sumuh him nah guh let eh guh an as much as mi understand why him lef mi really doh wah guh back inna sumuh wid him cause mi know him aguh lef again an mi doh si how dat woulda work out fi eh two a wi .
" Jada..." him grip mi waist an pull mi against him body an mi press mi hand pon him chest an wah piece a heat rush guh a mi pussy when mi feel him muscles through him shirt.
" Shawn... no ... wi cah do this " an mi pull weh from him an him tek one last look pon mi lip dem an then shake him head
" ah , goodnight link mi tomorrow " an then him get inna him car ah lef . As mi lie dung inna mi bed a try guh sleep mi just keep on a wonda if mi a mek eh right decision because if a did eh right thing fi do why mi body still react to him like wi neva lef inna eh first place ? but, mi shake off eh feeling cause a eh end a eh day a did just that, wah likkle feeling an a months now mi nuh have sex almost wah year suh obviously eh least likkle touch mi get mi body aguh ketch a fiya but, mi nah guh mek sake a sex mi do smuh weh mi aguh regret.
Mi done get ready bout afta 8 an since a Andre a come pick mi up mi sidung an wait an tek some picture fi pass eh time.
Oops! This image does not follow our content guidelines. To continue publishing, please remove it or upload a different image.
(Jada an her outfit)
Him come bout afta 9 a guh 9:30 an as mi get inna eh car eh fus thing mi hear a smaddy a crunch an mi look pon Shanique inna eh front seat a eat banana chips .
" shanique a yuh breakfast that?"
" yeh because eh one Andre him nuh rush mi bout how wi affi reach a airport by 10 a clock an mi neva wake till afta 8 almost 9 . Mi deveen sure mi lock up mi house good but, if anything happen a out a fi him pocket it a come from cause him always a rush people last minute "
" hush , but mi send him all a eh information seh a 11 clock flight suh him wouda know how fi prepare , him neva send it to yuh ?"
" no , probably figat afta him done wid whicheva woman him bring home last night"
" suh how that deh pon fi yuh mind ? A long time yuh nuh get nuh fuck stillz suh mi understand " Andre seh once him done put mi luggage inna him trunk an come back inna eh car .
" cause mi a wuk fi yuh all eh time an how yuh know seh mi nah get nuh sex ?"
" smaddy weh a get fuck nuh suh miserable every bloodclaat day dem get up "
Eh two a dem continue fi argue an mi just put in mi airpods an listen to some music until wi reach a eh airport. Afta wi done check wi bag an a wait fi board eh plane Shanique seh she need fi use eh bathroom suh she lef mi an Andre .
" hope yuh get enough rest cause dah week yah aguh rough " him seh
" I know Adrian updated me . We just have to go an do what we came to do "
" good an mi nuh wah si nuh more engagement wid nuh white man an if unu a guh out mi aguh drive cause Shanique head nuh deh pon him body"
"Okay "
Shanique come back an then a did time fi wi board eh plane . Before eh plane tek off mi did a feel sick suh mi ask sinna if him have nuh gum or nuh icy mint sumuh fi tek mi mind off a eh feeling but, him neva have none . Out a nowhere mi start feel cold an start tremble an then as soon as eh plane tek off inna eh sky Andre unbuckle mi seat belt an mek mi lie dung pon him lap an wrap him arm dem round mi . That shock mi cause mi honestly neva expect him fi do sumuh like that but, as mi relax inna him arms eh trembling stop an mi hear him seh
" wi a tek mi jet come back a Jamaica cause mi nuh like dem thing yah "
" Yuh have yuh own plane ?" Him laugh an mi feel it vibrate inna him chest
" nuh worry yuh head bout that , guh sleep or try fi relax a just plane sickness yuh have eh soon pass " an funny enough as much as mi neva expect weh him do eh neva tek mi long fi mi drop a sleep inna him arms dem .
