مستنيه منكو تفاعل اكتر من كده شويه، وهستني رأيكو في الكومنتات..
ــــــــــــــــــــــــــــــــ
الخدامه: جاسر باشا جودي هانم تعبت فجأه واغمي عليها والبنات بيحاولو يفوقوها مش بتفوق
جاسر بخضه: سليم جهز العربيه بسرعه وانا هطلع اجبها
جري علي فوق وشال اخته وسليم بلغ الدكتور والمستشفى كانت جاهزة لاستقبالها
الدكتور: جهزولي اوضه العمليات بسرعه
منال بخوف: بنتي مالها يادكتور؟!
الدكتور: انا قولتلكو قبل كده ان قلبها تعبان جدا ولو اتعرضت لاي ضغط او نسيت تاخد العلاج حالتها هتسوء وهنضطر لتدخل جراحي
جاسر بغضب: انت هتدخل تعمل لاختي العمليه بس قسما بالله لو جرالها حاجه ماهيكفيني انت وعيلتك كلها انت فاهم
الدكتور بتوتر: متخفش يا باشا العمليه متخوفش وانشاء الله خير..
نقلو جودي اوضه العمليات وجاسر كان قلقان عليها اوي وبص للبنات واتكلم بعصبيه: ممكن افهم ايه اللي وصلها للحاله دي؟ بقالها اد ايه مبتاخدش علاجها يا هوانم؟
جميله بدموع: بقالها شهر دلوقتي بس والله العظيم هي كدبت علينا وقالتلنا انها شافت الدكتور وقالها توقف العلاج وعشان كده سكتنا
جاسر: شهر يا جميله اختك مبتاخدش علاجها وانا معرفش الله يسامحك بجد..
(يمكن في مقدمه الروايه كلكو اتعرفتو علي شخصيه جاسر انه قوي وعصبي وبيكره كل اللي حواليه بس اللي نسيت اقولهولكو ان مع كرهو للي حواليه بس بيحب اخواته جدا وحنين عليهم اوي)..
عدي 3 ساعات وكلهم كانو قاعدين قلقانين لحد ما الدكتور خرج عشان يطمنهم
جاسر بلهفه: خير يادكتور طمني
الدكتور: اطمن يا باشا الحمدلله العمليه نجحت واخت حضرتك شويه وهتفوق وهننقلها اوضه عاديه وتقدرو تطمنو عليها عن اذنكو..
منال: حمدلله على سلامتك ياحبيبتي
جاسر: بقي ينفع تخضينا عليكي بالطريقه دي
جودي بتعب: وايه يعني ماهو كله محصل بعضه مبقتش فارقه الموت من الحياه
جاسر حضنها: ليه بتقولي كده بس، وليه اهملتي في نفسك وبطلتي تاخدي علاجك ليه عملتي كده؟
جودي بعياط: تعبت يا جاسر من كل اللي بيحصل ومن المشاكل والصراعات اللي انتو عايشين فيها علي طول، تعبت من الكره والحقد اللي بشوفو في عين اقرب الناس ليا، تعبت يا جاسر تعبت
البنات بصو لكل اللي حواليهم بندم وجاسر حضن اخته اكتر وحاول يهديها: بس ياقلبي اهدي عشان متتعبيش وكل حاجه هتتحل وتبقي كويسه وانا بوعدك بكده بس انتي اهدي عشان خاطري..
عدي اسبوع ومفيش اي حاجه اتغيرت خالص بس في حاجه حصلت قلبت الدنيا فوق دماغ صفاء
صفاء: اقعد مع ابنك واتكلم معاه يمكن تعرف تقنعه انت
عبدالرحمن: انتي مصدقه نفسك ولا ايه؟ ابني مين ده اللي عايزاني اتكلم معاه ده علي اساس انه بيسمع كلامي اوي
صفاء: اتصرف وخلاص المهم انه يتجوز بنت خاله
عبدالرحمن: يارب صبرني، البنت لسه محجوزه في المستشفى وتعبانه وابنك مبقاش بيقعدلك في البيت من عمايلك اتهدي بقي وسيبي الواد في حاله
صفاء: اسيبه في حاله وهو عايشلي علي امل كداب وبيفكر في واحده خانته
عبدالرحمن بشك: مش عارف ليه مش مطمن وحاسس اننا ظلمنا البنت وان الموضوع ده فيه حاجه غلط وصدقيني يا صفاء لو اللي في دماغي طلع صح هتشوفي مني وش عمرك ما شوفتيه ابدا
قام وكان خارج فهي اتكلمت: انت رايح فين؟
عبدالرحمن: رايح اشوف جودي واطمن عليها هتيجي معايا ولا لا
صفاء: هاجي ياخويا هاجي..
"اتحركو الاتنين للمستشفى ورهف قالت لنغم ان البيت فاضي ونغم جريت فوراً ورجعت البيت عشان تنفذ الفكره اللي في دماغها وصفاء مرة واحده جالها رساله خافت واتوترت جامد لما شافتها"
*"جاسر كان في الشركه بقاله يومين ولما حس انه تعبان قال يروح يرتاح شويه وبعدها يروح يطمن علي اخته وطبعا هو كان عارف ان مفيش حد في البيت خالص بس ميعرفش اللي نغم ناويه عليه،نغم وصلت قبله ودخلت اوضتها والبيت كان فاضي ومكنش في حد غيرها وجاسر رجع وهي اول ماسمعت صوته ابتسمت وقررت تعمل الفكره اللي في دماغها، واول ما دخل اوضته رمي نفسه علي السرير من التعب وهي اتسحبت ودخلت وراه براحه وقفلت الباب بالمفتاح وراحت نحيته كان نايم فضلت تبصله وتتأمل ملامحه واد ايه هو وسيم وزي القمر وقربت منو واول ما لمسته صحي واتصدم اول ما شافها"*
اتعدل واتكلم بصرامه: انتي بتعملي ايه هنا وازاي اصلا تتجرأي وتدخلي اوضتي من غير اذني
نغم قربت منو اكتر: بحبك يا جاسر افهم بقي حرام عليك اللي بتعملو فيا ده
جاسر اتوتر من قربها ده وخاف الصراع اللي بين عقله وقلبه قلبه هو اللي يكسب فيه: اطلعي برا يانغم انا راجع تعبان وعايز ارتاح
نغم: لو عايزني اطلع برا فعلا وعايز تثبتلي ان راحتك مش معايا بص في عيني وقول
جاسر بص في عنيها واتقابلت عنيهم في نظرة طويله وهو عنيه فضحته ونغم فهمت انه بيحبها وعرفت هو عايز ايه وراحت راميه نفسها في حضنه: عنيك فضحتك علي فكره وشوفت فيها انك بتعشقني مش بتحبني بس
جاسر اتلجم من حركتها دي وبعدها عنه: انتي ازاي تقربي مني بالشكل ده، عايزه توصلي لايه بحركاتك دي؟!
نغم: انا عايزه اوصل لقلبك وبس وبعدين اللي انا عملته ده رغبتك انت وانا نفذتها
جاسر باستغراب: رغبتي انا انتي اكيد اتجننتي!
نغم ابتسمت: ايوة رغبتك انت، وزي ماقولتلك عيونك فضحتك وشوفت فيهم انك عايز قربي منك مش البعد
جاسر اتوتر اوي وقام من مكانه عشان يخرج بس الباب كان مقفول
نغم: متحاولش مش هتعرف ، انت مش هتخرج من الاوضه غير لما تتكلم(وقربت منو اكتر لدرجه ان المسافه بينهم بقت معدومه): عايز قربي منك صح ولا غلط؟!
جاسر فعلا عايز قربها بس كان دايما بيكدب نفسه انما المرة دي وهي قريبه منو بالشكل ده وعنيه في عنيها وهو سرحان فيهم كده مقدرش يتمالك اعصابه اكتر من كده ومشاعره خانته: انا بعشقك يانغم مش بس بحبك بس مش بايدي اعمل حاجه وانتي عارفه
نغم مكنتش مصدقه نفسها انه قالها كده: جاسر انت قولت ايه! عيد كلامك كده تاني
جاسر بص لعنيها وابتسم وضمها: قولت بحبك، بحبك يانغم
نغم: يااه يا جاسر أخيراً اتكلمت تعبتني يا اخي حرام عليك
جاسر وهو حاضنها: ششش خلاص اللي حصل حصل والمهم دلوقتي ان عيونك خلوني انتصر علي غروري وكبريائي واعترفتلك بحبي أخيراً ومن النهارده صدقيني مفيش يوم هيعدي واحنا بعيد عن بعض و جودي بس تخرج بالسلامه واطمن عليها وهطلب ايدك من عمي ونتجوز...
(في المستشفى)..
عبدالرحمن: عامله ايه دلوقتي يابنتي طمنيني عليكي
جودي: الحمدلله ياعمي احسن
عبدالرحمن: تحمديه علي خير يارب، يلا بقي شدي حيلك كده عشان ترجعي معانا البيت وتنوريه من تاني بضحكتك وشقاوتك
جودي ابتسمت: باذن الله ياعمو ربنا يخليك
رهف بتكشيرة: ياسلام ياسي بابا ده علي اساس بقي ان البيت من غيرها وحش يعني؟!
عبدالرحمن ابتسم: من غيركو كلكو ياقلبي وانتو من يوم اللي حصل وانتو قاعدين معاها فلازم هي تشد حيلها عشان ترجعو كلكو البيت
رهف: اصلا ماهي زي الفل وكويسه اهي بس بتدلع
جودي: بقولك ايه ياعمو خد البت دي معاك وانت ماشي عشان زهقت منها والله
جميله: بس انتي وهي بقي واه صحيح هي نغم فين؟
رهف وغزل بصو لبعض وغزل اتكلمت: رجعت البيت تغير هدومها وقالت بالمرة تجيب معاها لبس لجودي وهتيجي علي طول
رهف كانت قاعده جمب جودي علي السرير فجودي قربت منها واتكلمت بهمس: هو اي الموضوع بالظبط عشان مش مرتاحالكو، نغم فين؟
رهف ضحكت: راحت تتحدي اخوكي وقالتلنا مش هترجع غير لما يعترفلها انو بيحبها
جودي: بقي في حد في الدنيا يعرف يتحدي جاسر النمر، مش هتقدر تعمل حاجه اخويا وانا عارفاه
رهف: والله هنشوف..
صفاء تلفونها كان بيرن كتير اوي واخر مازهقت ردت: ايوة مين معايا؟
مجهول: معقول حضرتك نسيتي صوتي، علي العموم انا هفكرك بيا انا اللي لعبت معاكي لعبتك القذرة عشان تبعدي ابنك عن خطيبته افتكرتيني ولا لسه يا هانم؟!..
(صفاء اتصدمت ومكنتش عارفه تعمل ايه؟ ياتري الشخص ده عايز ايه من صفاء بعد السنين دي كلها وياتري جاسر ونغم هيتجوزو ولا هيحصل حاجه معاهم؟ توقعاتكو ورأيكو يهموني جدا وعايزه تفاعل من الكل، ولسه اللي جاي تقيل. صراع النمور بقلم: منه محمد).. ♡
