اتأخرت عليكو انا عارفه بس حقكو عليا كان غصب عني والله وبقالي كام يوم مفتحتش نت خالص
يلا نبدأ مع بعض ونقول بسم الله...
ـــــــــــــــــــــــــــــــــــــــــ
"في قصر من اكبر وافخم القصور في مصر كلها بتعيش عيله مكونه من ١٨ فرد بس حياتهم عباره عن مشاكل وصراعات وكره وبس .يلا نبدأ ونشوف ايه الي هيحصل"
عاصم بيزعق : انتو يالي عايشين في البيت المنيل دا اجمعولي كلكو هنا
كلهم اتلموا علي صوته وصفاء اتكلمت : أي يا خويا بتزعق ليه ؟
عاصم بصرامه : انتي تخرسي خالص وبلاش شغل الحنيه الي بتتكلمي بيها دي مش هتاكل معايا .
صفاء اتراجعت وسكتت وهو كمل : مين فيكم اللي سحب ربع مليون جنيه من البنك النهارده الصبح ؟
منال مراته اتكلمت : اهدي طيب ياخويا ونتفاهم بالراحه.
عاصم : اسكتي انتي ومتتكلميش خالص علشان الموضوع ميخصكيش انتي فاهمه .
منال : ميخصنيش ازاي يعني مش الي بتحقق معاهم دول يبقو عيلتي
عاصم زعق : انا قولتلك اسكتي يبقي تسكتي، وهعيد سؤالي مره تاني مين الي سحب ربع مليون جنيه من البنك النهارده الصبح؟
سليم بغضب : انا اللي سحبت الفلوس عندك مانع .
كلهم بصو لسليم مستغربين وعاصم اتكلم : سحبتهم ليه يابن حنان
سليم بضيق : انا اسمي سليم خالد النمر ابن اخوك ، بفكرك يعني لو نسيت يااا ياعمي
عاصم بسخريه : طيب يابن اخويا سحبت الفلوس دي ليه ؟
سليم : داخل مشروع جديد ومكنش معايا سيوله تكفي فاعتبرهم سلف يعني وكده كده هرجعهملك متخفش
عاصم : ساعه بالظبط وتجبلي ملف كامل بالمشروع ده ولو لقيته مشروع كويس ويستاهل هبقي ادخل معاك شريك بس لو ميستاهلش فلوسي ترجع في اسرع وقت
سليم ابتسم بتكبر : لا هو من ناحيه يستاهل فهو يستاهل ولو عرفت اصلا مين شريكي في المشروع هتتصدم
عاصم كان هيتكلم بس خالد قاطعه : اوعي يكون اللي في بالي يا سليم ؟
سليم هز دماغه وخالد حس أنه كدا انتصر علي عاصم، وعاصم اتكلم بعدم فهم : مين هو يا خالد؟
سليم : كلامك معايا انا مش مع ابويا ، وعلي العموم يعني يحيي السيوفي هو شريكي، مفاجأة صح ؟
عاصم اتصدم لان ده كان آخر شخص متوقع انه يسمع اسمه اصلا وبص لسليم وخالد بتوعد وجاسر اتصدم زيه بالظبط وهو اللي اتكلم المره دي : عملتها ازاي دي يا سليم ده انا بقالي شهرين بحاول اقنعه وهو رفض يشاركنا عملت ايه انت فهمني ؟
سليم : معملتش اي حاجه وهو رفض يشاركك انت وابوك وبعدين هو كلب فلوس وانا طمعته لحد بس ماوصل للي انا عايزه ، وبعدين سلام بقي عشان عندي معاد معاه ومتأخر ..
سابهم ومشي وعاصم وجاسر كانو هيولعو من الغيظ ودخلو المكتب يفكرو ازاي يقنعو يحيي السيوفي يفض شراكته مع خالد وسليم ويشاركهم هما
صفاء: عجبك كده اهو سليم عرف يقنع يحيي السيوفي وانا واثقه أن المشروع بتاعهم ده هيكبر والربع مليون اللي سليم سحبهم هيزيدو ٤ أضعاف في اقل من شهر وهتشوف
عبدالرحمن: يا شيخه حرام عليكي بقي كفايه كره وحقد لكل اللي حواليكي تعبتيني
صفاء بتريقه : لا اسبلهم هما الجمل بما حمل واطلع انا وعيالي من المولد بلا حمص صح
عبدالرحمن: اللي عندنا مش قليل يا صفاء حسابك في البنك بقي فيه دلوقتي ٥٠ مليون جنيه غير باقي الأملاك الي باسمك من ورث ابوكي وانا الحمدلله عندي بدل الشركه اتنين وتلاته واربعه وعندي حساب في تلت بنوك مختلفين كل بنك اللي فيه ميقلش عن ٢٠٠ مليون غير الاراضي والبيوت والعربيات كل ده ومش عجبك اتقي الله بقي
صفاء بصت لابنها : عجبك كلام ابوك يا رحيم؟
رحيم : لا طبعا مش عجبني ومتقلقيش المشروع اللي سليم فرحان بيه ده هاخده منه وهتشوفي .
صفاء : ايوه كده جدع ، كده تبقي ابني وحبيبي بصحيح
عبدالرحمن بنفاذ صبر : هقول ايه بس ربنا يهديكو ،بس صدقوني هتندمو عشان النعمه اللي احنا فيها مش حامدين ربنا عليها والحمدلله أن رهف مطلعتش زي ابنك وورثت منك الكره والحقد اللي مالين قلبك دول وطلعت قلبها ابيض وطيبه ليا .
صفاء : ما هي خيبه زيك بالظبط..
(في أمريكا)..
فهد كان بيكلم جميله في التلفون وبيحاول يهديها : اهدي طيب ومتعيطيش وانا هتصرف
جميله : بقولك ابويا وابوك غصبو عليا وعملو خطوبتي انا واخوك من يومين وتقولي اهدي ، انت لازم ترجع يا فهد بأي طريقه.
فهد : حقك عليا يا قلبي متزعليش مني انا اسف بجد اني سيبتك وسافرت وخليت ابويا وابوكي يبيعو ويشترو فيكي ، اوعدك اني هرجع وهندم باسم علي عملته السوده دي وهنتجوز ونبعد
جميله : بحبك اوي يا فهد اوعي تتأخر اكتر من كده عشان خاطري.
فهد : وانا بموت فيكي وحاضر يا حبيبتي مش هتأخر متخفيش ..
قفل فهد معاها وهو كرهو لابوه وأخوه بيزيد اكتر واكتر واتوعد لباسم اخوه بسبب الي عمله ..
يحيي السيوفي: اللي اعرفه عنك أن مواعيدك مظبوطه اتاخرت ليه ؟
سليم: هقولك اتاخرت ليه (ضحك ضحكه انتصار ) : اصل حبيبك عاصم باشا النمر هو وابنه جاسر باشا لما عرفو انك هتشاركني انا وابويا اتغاظو وكانو هيولعو وكان نفسي تشوف منظرهم بصراحه
يحيي ضحك بصوته كله: معلش راحت عليا المره دي بس ملحوقه نبقي نتفرج عليهم في الاخر ما هي العبره بالنهايه برضو ولا ايه ؟!
سليم : طبعا يا باشا معاك حق ، المهم هنبتدي مشروعنا امتي
يحيي: من بكره لو تحب انا جاهز في اي وقت
سليم : تمام معنديش مانع بكره إن شاءالله الساعه ٨ بالدقيقه هكون في المكتب عندك ومعايا الفلوس
يحيي : الخمسه مليون بقو جاهزين معاك يعني ؟
سليم : كان معايا خمسه مليون الاربع وخد من حساب العيله اللي في البنك الربع مليون الي كانو ناقصين وبقو جاهزين معايا اطمن
يحيي : تمام اوي يبقي اتفقنا ..
(في بيت بنت اسمها فرح ) ..
فرح : وبعدين بقي يا بابا في الاسطوانه دي قولتلك مش عايزه اتجوز سبني في حالي بقي
عم محمود ابوها : وبعدين معاكي انتي هتفضلي كده لحد امتي قوليلي؟ هتفضلي عايشه علي امل كداب لأمتي فهميني بس ؟
فرح : لحد اخر يوم في عمري يا بابا لاني محبتش ولا بحب ولا هحب غير رحيم افهمني بقي ..
( استوب بقي ثانيه واحده نتعرف علي فرح دي ، دي بنت كانت زميله رحيم في الجامعه و هما الاتنين كانو بيحبو بعض جدا واتخطبو لمده سنه بس صفاء لعبت لعبه قذره عشان تخلي ابنها يسبها لأنها مستواها الاجتماعي أقل منهم شويه )..
محمود : رحيم تاني يا فرح بعد كل اللي هو عملو فيكي هو وعيلته لسه برضو متمسكه بيه
فرح : اه يا بابا متمسكه بيه لاني عارفه ومتاكده أنه ملوش ذنب في حاجه ومسيره هيعرف الحقيقه في يوم من الايام وجواز مش هتجوز عن اذنك ..
( في قصر النمر ) ..
البنات كلهم كانو قاعدين مع بعض لأنهم رغم الصراعات اللي بين العيله بس قريبين من بعض جدا ودايما بيحبو يقعدو مع بعض .
رهف : ما تيجو نخرج شويه انا زهقانه اوي
غزل : اه والله ياريت ايه رأيكو يا بنات ؟
جودي : امم ماشي انا معنديش مانع
نغم : وانا كمان معنديش مانع ايه يا جميله رأيك ايه ؟
جميله : اخرجو انتو انا مليش مزاج خالص النهارده
رهف : لا والله ابدا مش هنخرج من غيرك وبعدين انا عمري ما طلبت منك حاجه وانتي رفضتي يلا بقي عشان خاطري
جميله : والله يا قلبي ماليا مزاج خالص لو مصممه تعالو نتفرج علي اي فيلم ونعمل فشار و عصير ونأجل الخروجه لبكره ماشي
كلهم : إذا كان كده ماشي
غزل ضحكت وبصت لجميله : يا عيني علي الحلو لما تبهدلو الايام هو فهد قالك خلينا اخوات ولا ايه ؟! 😂😉
جميله خبطتها بالمخده : بس يا بت وبعدين ده باسم اخوكي هيشوف ايام سوده من فهد استني واتفرجي
غزل ابتسمت اوي : الله دي هتبقي حته مسرحيه لما اشوف اخواتي الاتنين بيتخانقو مع بعض عشان بنت
جودي باستغراب : هي مالها البت الهبله دي مبسوطه كده ليه إن اخواتها هيتخانقو مع بعض
نغم : انا اعرف يختي
غزل : يا بنتي اخواتي مين بس دول شبه ابو رجل مسلوخه اللي بيقولو عليه ده
كلهم ضحكو وجميله قالت : لو سمعتك بتقولي علي فهد كده تاني مش هيحصلك كويس
غزل : خلاص نقول علي باسم بس ايه رأيك ؟
جميله ضحكت : عاش برافو عليكي...
عدا اليوم بكل حاجه فيه وكانو متجمعين كلهم بليل علي العشا في صمت رهيب لحد ما قطع الصمت ده خالد: في عريس متقدم لنغم وانا وافقت عليه
نغم كانت بتشرب وفضلت تكح جامد وجاسر حس بسكينه بتغرز في قلبه بس منطقش بحرف واحد
سليم : مين هو يا بابا وليه مقولتليش ؟
خالد: لانه لسه متقدم النهارده الصبح إنما مين هو فهو زياد المصري اطمن مش اي حد وخلاص
سليم : ابن هشام المصري نفسه
خالد : ايوه بالظبط
سليم : تمام وانا موافق
هنا جاسر وصل لقمه غضبه ومقدرش يسكت اكتر من كده : وأنا مش موافق
نغم فرحت من جواها وخالد اتكلم : وانت بقي توافق أو ترفض بصفتك ايه إن شاءالله
جاسر : بصفتي ابن عمها الكبير وكبير العيله كمان ونغم مش هتتجوز اللي اسمه زياد ده
سليم : دي حاجه متخصكش يا جاسر ونغم دي اختي الصغيره وانا وبابا وافقنا يبقي خلاص
جاسر بعصبيه : اللي انتو بتتكلمو عنه ده اكبر منها بحوالي ١٢ سنه ومتجوز اصلا والجوازه دي مش هتتم غير علي جثتي انتو فاهمين
سليم ببرود : هتتم يا جاسر وهتشوف
جاسر بص لنغم : رأيك ايه يا عروسه؟!
نغم قامت من مكانها وطلعت تجري علي اوضتها وهي بتعيط من غير ما تتكلم وجاسر كان لسه هيتكلم بس قاطعه دخول فهد عليهم وهو متعصب جامد
فهد بعصبيه : انت يا استاذ باسم ازاي تتجرأ وتعمل اللي انت عملته ده ؟
جميله اول ما شافته قدامها نسيت نفسها وطلعت تجري عليه وحضنته قدام الكل وجاسر عينه كانت بتطلع شرار ساعتها وراح مسكها من شعرها ولسه هيضربها فهد مسك أيده والكل كان مصدوم من اللي بيحصل ..
ــــــــــــــــــــــــــــــــــــــــــــــ
"يا تري فهد هيعمل اي مع باسم اخوه بعد ما خطب جميله وهيعمل ايه مع جاسر اللي عايز يضرب جميله ، وجاسر اصلا عمل ليه كده عشان نغم؟"
(توقعاتكو ورأيكو يهموني جدا في الفصل ده وقولولي اكملها ولا لا ، صراع النمور بقلم : منه محمد♥️)
