سوري جدا علي التأخير غصب عني والله بس بدأت دروس ثانويه عامه والموضوع صعب عليا والله، هستني رأيكو في الكومنتات..
ـــــــــــــــــــــــــــــــــــــــــ
(صراع النمور الفصل السابع)♡
الشخص المجهول ابتسم: احب اقولك ان صفاء هانم والده حضرتك هي اللي قالتلي اعمل كده
رحيم بصدمه: انت بتقول ايه؟ صفاء هانم مين اللي قالتلك تعمل كده، انت اكيد اتجننت ازاي تقول كده
الشخص المجهول: والله لو حضرتك مش مصدقني عندك الست الوالده تقدر تروح تسألها وهسيب حضرتك تفكر في كلامي لمده يومين بس، سلام ياباشا...
(في قصر النمر)..
الظابط: معايا امر بالقبض علي خالد النمر وابنه سليم
الكل بصدمه: ايه؟!
خالد: يعني ايه معاك امر بالقبض عليا انا وابني ازاي يعني؟
الظابط: متهمين في قضيه غسيل اموال
سليم: لا لا اكيد في حاجه غلط، غسيل اموال يعني ايه
الظابط: انا معنديش وقت عشان اشرحلكو حاجه، اتفضلو معايا لو سمحتو..
(في بيت حسانين ابو جبل)..
نوارة: بابا الحق باسم النمر تحت وعايز يقابلك
حسانين باستغراب: وده عايز ايه وجاي ليه؟
نوارة: معرفش انزل شوفو واهو جاي لحد عندنا برجليه يعني ممكن حضرتك مترجعهوش تاني لعيلته
حسانين ابتسم: تسلملي دماغك بنت ابوكي بصحيح، تعالي ننزل نشوفو عايز ايه
ونزل هو وبنته فعلا عشان يشوفو باسم عايز ايه.
حسانين: يااهلا بالغالي ابن الغاليين
باسم: انا ولاغالي ولا اهلي غاليين عندك بلاش الشويتين بتوعك دول
حسانين: طب يابن النمر خير عايز ايه؟!
باسم: عايز احط ايدي في ايدك واساعدك تاخد حقك من عيلتي الكريمه
نوارة وحسانين بصو لبعض باستغراب ونوارة هي اللي اتكلمت: ده اللي هو ازاي يعني؟
باسم: مالكو مستغربين ليه كده، انا اتخانقت معاهم كلهم وجاسر باشا طردني من البيت وانا بقي عايز انتقم منهم كلهم لانهم فرقو بيني انا وجميله وبالذات جاسر وفهد نفسي اوريهم النجوم في عز الضهر
حسانين ابتسم: حلوة اللعبه دي، مين بجي اللي بعتك تجولي الكلمتين دول ابوك ولا اعمامك
*(ملحوظه عشان الناس اللي نسيت: ان هما صعايده بس لغتهم كلهم عاديه عشان عايشين في القاهرة طول عمرهم بس حسانين بيتكلم صعيدي عشان عاش في الصعيد اكتر من القاهره)*
باسم: صدقني دي مش لعبه ولا حد قايلي اعمل حاجه، وبراحتك بقي بس برضو انت هتستفاد وهتستفاد كتير اوي كمان
نوارة: ونضمن منين بقي انك بتتكلم جد؟
باسم: شوفي انتي والباشا عايزين ضمانات ايه وانا تحت امركو
سكتو شويه وبعد كده حسانين اتكلم: عايزني اصدجك واقتنع بكلامك تعملي توكيل ها قولت ايه؟
باسم بعدم وعي وهدوء: تمام موافق...
(في قصر النمر)..
جاسر: ممكن حضرتك تفهمني ايه الهدوء اللي فيك ده، اخوك وابن اخوك اتقبض عليهم علي فكره
عاصم ببرود: ايوة عارف ان اتقبض المفروض انا اعمل ايه يعني؟!
جاسر بغضب: يعني ايه المفروض تعمل ايه لو حضرتك مش هتتصرف انا هتصرف
عاصم: والله براحتك اعمل اللي يريحك بس خليك فاكر ان حسابك تقل اوي
جاسر: انا مش بتهدد ياباشا وانت عارف كده كويس وعمي وابن عمي انا هخرجهم بطريقتي وهاخد حقهم من اللي عمل كده وهدفعو التمن غالي اوي عن اذنك...
(في سويسرا عند يحيي السيوفي)..
زياد: خلاص ياباشا اللي حضرتك عايزو حصل، خالد وابنه اتقبض عليهم
يحيي ابتسم: حلو اوي الخبر ده ويااه بقي لو اتحكم عليهم واتسجنو هتبقي ضربه الحظ بالنسبالي دي
زياد: انشاء الله ياباشا وساعتها برضو نخلص من جاسر وابوه عشان الساحه تفضلنا
يحيي: لا عاصم ده راس الافعي وعشان نخلص منو هو وابنه محتاجين نخططلهم كويس اوي
زياد: اكيد طبعا ياباشا بس الاول لازم نحتفل بمناسبة الخبر ده صح ولا ايه؟!
يحيي: صح طبعا يلا بينا..
(في النيابه)..
"جاسر كان قالب الدنيا كلها وكلم بدل المحامي اتنين وتلاته من اكبر المحاميين في البلد وعمل كل اللي يقدر عليه عشان يخرجهم حتي بكفاله
جاسر: متقلقش ياعمي انا مش هسبكو هنا دقيقه واحده
خالد بسخريه: وده من امتي الحنيه دي كلها يابن اخويا!
سليم: مش وقته ولا مكانه الكلام ده يابابا المهم دلوقتي اننا نطلع من هنا وناخد حقنا من الزفت يحيي السيوفي
جاسر: هتطلعو ويحيي السيوفي ده هيدفع التمن غالي اوي لانه لعب مع عيله النمر واللي يلعب مع عيله النمر لازم يستحمل اللي يحصله بقي
سليم: بتفكر في اي ياجاسر؟
جاسر ابتسم: كل خير يابن عمي انشاء الله المهم بس تطلعو من هنا الأول..
(في بيت فرح)..
محمود: الباب بيخبط يافرح افتحي شوفي مين
فرح: حاضر يابابا (ويادوب فتحت الباب واتصدمت): رحيم انت بتعمل ايه هنا؟!
رحيم: طيب خليني ادخل الأول اكيد مش هنتكلم علي الباب كده
فرح: اكيد طبعا اتفضل، يابابا ده رحيم
محمود بذهول: رحيم! خير يبني ايه اللي فكرك بينا بعد السنين دي وبعد كل اللي حصل عايز ايه؟!
رحيم: جاي عشان عايز اعرف الحقيقه
فرح: حقيقه ايه؟
رحيم بهدوء: حقيقه اللي حصل في اليوم المشؤوم اياه
محمود: اظن ان اليوم ده عدا عليه دلوقتي 3 سنين تقريبا، جاي تفتح الموضوع ده تاني ليه
رحيم: بالله عليك ياعمي انسي كل اللي حصل زمان وانسي اني كنت ندل وواطي واحكولي اللي حصل بالتفصيل
فرح: وهتستفاد ايه يابن النمر لما تعرف اللي حصل؟
رحيم مسك اديها: ابوس ايدك يافرح سامحيني واحكيلي ايه اللي حصل معاكي يومها
فرح: حاضر يارحيم حاضر...
" حكتله فرح كل اللي حصل يومها من اول ماغابت عن الوعي في الحفله لحد مافاقت وشافت صفاء والشاب اللي كان معاها"
فرح بهدوء: اديني حكتلك كل اللي حصل هتصدقني بقي؟!
رحيم بصدمه: ليه امي تعمل فيا كده بس ليه؟
محمود: الغرور والطمع يبني يعملو اكتر من كده، ووالدتك كانت شايفه اننا اقل منكو وان مينفعش بنتي تبقي من عيلتكو
رحيم: تقوم تكسرني كده بالطريقه دي
فرح بسخريه: حلو اوي الشويتين دول والله، صعبت عليا
رحيم بندم: حقك عليا يافرح سامحيني، وبعدين كنتي عايزاني اعمل ايه لما اشوف صور زي دي انا راجل يافرح وكمان صعيدي يعني دمي حامي ومستحملش
فرح بغضب: والمفروض برضو كنت تديني فرصه حتي ادافع عن نفسي، كان المفروض يبقي عندك ثقه فيا اكتر من كده، انت كسرتني يارحيم كسرتني وعمري ماهسامحك ابدا
رحيم برجاء: ارجوكي اديني فرصه واحده بس وصدقيني انا لسه بحبك وعمري ماحبيت حد غيرك
فرح وهي بتحاول تكتم دموعها: وانا مبحبكش يارحيم واتفضل بقي من غير مطرود...
"عدا اليومين اللي الشخص المجهول اتفق مع رحيم عليهم ورحيم قرر انه يواجه صفاء وفعلا خدها معاه الشركه عشان تقابل الشخص المجهول ده"
صفاء: ممكن اعرف انت خلتني اجي معاك ليه؟
رحيم: هتعرفي حالا ياست الكل
(وكلم السكرتيرة عشان تدخل الشخص المجهول اللي كان مستني برا)..
الشخص المجهول اول مادخل: اهلا رحيم باشا، اهلا صفاء هانم وحشتيني والله...
وصفاء اول ماشافته قدامها اتصدمت واتوترت جامد(هختملكو الفصل ده علي كده ومستنيه توقعاتكو في اللي جاي، ورأيكو يهمني جدا وعايزه تفاعل من الكل. ولسه اللي جاي تقيل، صراع النمور بقلم: منه محمد)..
