أحفاد تركي آل خالد

بارت22

~فوق بغرفه هيام~
دخلت ريفان وجلست على السرير ماهي مستوعبه اي شي دخلوا هيام وساره وقفلوا الباب وجلسوا قبالها
هيام بنبره حنان وبكاء:ريفان انتي تعرفين اننا كلنا الي هنا بنمشي ذا الطريق وعمتي الله يرحمها كانت حنونه مره ماعليك الا تدعين لها وتتصدقين عنها وتذكري كيف عمتي كانت قويه ومؤمنه بالله
هزت ريفان راسها بدموع ورجعت تبكي
ساره ماتحملت وبكت معها هيام:ريفان ريفان اسمعوني تكفين لاتبكين مايجوز
وقفت وجلست جنب ريفان وحضنتها على جنب ونطقت ريفان:تكفون والله ماني مستوعبه ولا مصدقه اتمنى انه حلم كيف ووش صار ماعرف
ساره مسحت دموعها:ريفان يلا انتي قويه
ريفان هزت راسها بنفي:تكفون ماعاد اقدر بدونها حياتي بدونها ولا شي ساره:افا وعمي عزوز وخوانك وخوالك واحنا احنا دنيتك وعزوتك وسندك انا وهيام خواتك وانتي تعرفين من حنا صغار كننا نقول اننا خوات وكل من شافنا حسبنا خوات من كثر مانطقم ابتسمت ريفان بحزن:اهخ ياحظي فيكم بس امي ماحد يقدر ياخذ مكانتها
______________________________
(بالمستشفى)
طلع ليث للحديقة وجلس على كرسي من الكراسي رجع ظهره لوراء رفع راسه وطالع السماء نزلت دمعته قاطع حبل افكاره رجل كبير بالسن جلس جنب ليث ونطق
:وش بلاك ياوليدي
ليث رجع راسه ومسح دموعه ونطق:مافيه شي
الرجل طالع المستشفى ونطق:لك فقيد وانا عمك
ليث:هالله هالله فقيد(ن) غاليه
الرجل:منهي ياولدي
ليث بحزن وغصه:امي ياعم
الرجل مسك كتف ليث ونطق:ياولد ذي الدنيا اليوم ولاباتسر(بكره) كلنا بنروح عسى الله يجمعكم معها بجنات(ن) النعيم لك اخوان وانا عمك اكبر منك
ليث: امين يارب لا والله انا أكبرهم ياعم
الجد ابتسم ووقف:يالله شد الهمه وانا عمك اخوانك واخواتك بحاجتك وانا عمك قوي نفسك بين لهم ان انت لهم السند وظهر يشدون فيه ظهورهم وانا عمك البكاء مايرجع لنا فقيد ولا ضعف يضعف اخواننا مايجوز تبكي تصدق عنها والدعي لها وخليها تفرح بقبرها فيك صدقني وانا عمك امك بتكون فخوره فيك
ابتسم ليث وراح الرجل
وقف ليث وتوجهه لسياره سواقهم ركب ورجع للقصر اول ماشاف اسوار القصر جته غصه كيف بيقابل اخوانه قرر انه يقوي نفسه ومستحيل يبين لهم انه ضعيف دخلت السياره الحوش ونزل ليث شاف غيث جالس على الرصيف ومنزل راسه ويدينه محاوطه راسه تقدم له ليث رفع راسه غيث لمح ليث ومسح دموعه ووقف فتح يدينه ليث بمعنى احضني تقدم غيث حضن ليث حضن قوي الحضن الي تمناه ليث كان يبغى كتف يسند راسه عليه كان يبغى سند له من بعد ابوه واخوانه الصغار كان يعتبر غيث اخوه وصديقه وكلشي بذي الدنيا ذا غيث الي يسولف معه ويطقطق وبعد ثواني يفضفض له ويدخلون بنقاش عميق ذولي الي دايم صداقتهم وعلاقتهم تنضرب فيها المثل عند الكل
شد الحضن غيث ونطق:الله يرحمها يروح اخوك
بكى ليث ونطق:امين
طلع الجد تركي وجلس يناظرهم ويتأملهم نزلت دموعه ومسحها بطرف شماغه دخل داخل بدون مايزعجهم
______________________________
(الساعه-10 بالقصر)
الحوش الرئيسي مليان كله رجال
والحوش الخلفي مدخل الحريم للقصر
بغرفه هيام نامت ريفان بتعب ودموعها مانشفت
وقفت هيام تغطي ريفان نزلت دمعتها بدون ماتحس طول الوقت وهي تكابر وكانت قويه دايما واخت وسند ريفان طلعت من الغرفه وتوجهت تجلس بصاله الدور نفسه جلست تهوجس وتنزل دموعها بكت غطت وجهها بيدينها تمنع شهقاتها سمعت صوت ونين وبكاء جاي من المطبخ!!
وقفت وعدلت شالها وحطته على راسها توجهت للمطبخ حصلت سيف جالس على كرسي طاوله الطعام وراسه على طاوله وصاد ويبكي بكل حرقه تقدمت له هيام بكل حزن سحبت كرسي وجلست جنبه مسحت عيونها والتفت لها سيف عدل جلسته ومسح عيونه
هيام بابتسامة:سيف لاعاد تبكي تدري ان امك ماتحتاج الا دعاء
رفع كتوفه بمعنى عدم المعرفه ونطق:بس ماتوقعت يوم من الايام بتتركنا لحالنا
هيام:معليك كلنا معكم وبعدين شرايك اخذك لريفان
سيف وقف ونطق:يلا تكفين وينها بشوفها
طلعوا سيف وهيام متوجهين لغرفه هيام فتحت الباب بخفه طالعت ريفان وهي عيونها بسقف ودموعها اربع اربع تقدم لها سيف عدلت جلستها ريفان وابتسمت ومسحت عيونها ونطقت:تعال تعال عندي
تقدم سيف يحط راسه على فخذ ريفان ويحاول مايبكي
طلعت هيام وتركتهم
نطقت ريفان وهي تلعب بشعره:افا ياسيف تبكي
سيف ببكي:ماتوقعت تتركنا ليش
ريفان بغصه واضحه:قضاء الله وقدره ليش نعترض على قضاء الله وقدره لازم نصبر الله عز وجل وش قال للي إصابتهم مصيبه
ابتسم سيف بحزن ونطق:إنا لله وإنا إليه راجعون
ابتسمت ريفان ونطقت:اي يعني حنا صابرين ومستحيل نضعف بنهايه كلنا ان شاء الله بنجتمع بجنات النعيم
______________________________
الساعه(1)
بعد ماراحو كل المعزين دخلوا الرجال للصاله وجلسوا مع الحريم
ابو غيث:الا سيف وريفان ماشفتهم
ام غيث:والله مدري اسالوا هيام انهاذي هي نازله
نزلت هيام وجلست
نطق ابو ليث:وين ريفان وفارس
هيام:فوق بغرفتي
وقف ابو ليث وتنهد ونطق فارس وليث خذوا ريفان وسيف وتعالوا لي الجناح
فزوا فارس وليث وطلعوا قبل ابوهم لسيف وريفان
استئذن ابو ليث وطلع فوق وقف عند باب الجناح وتنهد واخذ نفس طويل وهو بقلبه حزن كبير على مفارق ام ليث
فتح الباب ودخل كلشي موجود بالجناح كان يشوف صوره ام ليث موجوده كان ريحتها وعطرها موجوده تنهد وجلس على الكنبه ونزل راسه يمنع نزول دموعه
______________________________
(بغرفه هيام)
تقدموا فارس وليث والتعب والإرهاق واضح عليهم طقوا الباب ودخلوا بعد ماخذوا الاذن من ريفان
فارس وهو يحاول يغير الجو بس كان شكله مايهيئ ابداً:اوف احضان بدوننا
ريفان بصوت واطي:تعالوا 
ضحك ليث وتقدم يبوس راس ريفان وجلس عند رجولها تقدم فارس يجلس جنبها وحضنها على جنب
ليث:يلا قوموا ابوي يبينا
ريفان يلا حاولت تتحرك بس كان سيف غارق بافكاره ولاهو صوبهم ليث:سيف سيف
فز سيف ونطق:متى جيتو
فارس ابتسم:يلا يلا قوم ابوي يبينا
وقف سيف ووقف معه فارس حاوطوا اكتاف بعض وطلعوا حاوط ليث كتف ريفان وطلعوا متوجهين لجناح ابوهم
دخل فارس وجنبه سيف بعد ماخذوا الاذن
ووراهم ليث وريفان
ابو ليث ابتسم ونطق:يمرحبا بكم اقلطوا
تقدم سيف يجلس يمين ابوه ويسار ابوهم ريفان وقبالهم فارس وهيام
ابو ليث وهو محاوط ريفان وسيف :كيفكم شصحتكم
الكل تمم له انه بخير وكان مجمعهم بيغير من جوههم ونفسيتهم يمكن يشوفونه قوي يقوون
______________________________
تحت بصاله مابقى الا هيام وساره ووليد وغيث
غيث:وينهم ساره:طلعوا لعمي
وليد:تدرون اني سمعت خبر بس خلو الثلاث ايام تعدي على خير
هيام:تكفى والله ما اصبر وشو
وليد تنهد:وعد مني اقولكم ويمكن حتى انتو تعرفون قبل ماقول يعني قريب ترقبوا
وقف واستئذان وطلع وشويات ولحقوه ساره وغيث وهيام بصاله تهوجس ولا لها نفس تنام

.........