أهلا جميعاً
اعذروني طولت على مانزلته لكن كنت مضطر على هل تأخير وعوضتكم ببارت من 10 الالف كلمه
لا تنسون تعلقون بين الفقرات وتعطوني رايكم اذا عجبكم البارت هل شي بيسعدني و بينسيني التعب❤️
قبل ثلاثه وعشرون عام وتحديدا عام 2001
الكويت الساعه 1:35ظهرًا
واقف يحط اغراضه بشنطته لف على القاعد بمكانه ويلم كُتبه من داخل الدرج وقال : اليوم تجي اوصلك مابي اعتراض مثل كل مره ولا ازعل
قال الثاني بـ ابتسامه تزين مِحيا وهو يوقف ياخذ الكُتب بيده: لا يا شَدِيد فشله من اخوك وابوي قال بيجيني
عقد حواجبه بـ عدم رضى وطق كتفه بيده وقرب يحاوط كتفه بـ ايده وهم يطلعون من باب الفصل : لا تستعبط فشله من شنو وبعدين ابوك بدوامه ومايطلع الا 3 العصر يالچذاب.. بعدين محسسني بيتك اخر الدنيا ترا قدام بيتنا
وقفوا قدام باب المدرسه ولف عليه : حتى لو
قاطع كلامه صوت البوري و وقوف سيارة مرسيدس بنز سي كلاس 2001 سوداء
مشى شَدِيد للسياره ووقف قدام دريشته وتكلم : توصل مُهيب ويانا
رد عليه : اي حياه الله
مشى شَدِيد اتجاه مُهيب ساحبه من ايده وتكلم وهم يقربون من السياره : امش
ركبوا وكان هو ورا وشَدِيد قدام ونطق بـ سلامه وهو يصك الباب : السلام عليكم
رد السلام بـ ابتسامه واسعه وقلب ينبض من اول ماشافه يركب سيارته: وعليكم السلام شلونك مُهيب
رد مُهيب بـ ابتسامه وتوتر : الحمدلله بخير انت شلونك عساك بخير
رد عليه ببسمه على طرف مبسمه: بخير دامك بخير
قاطعهم شَدِيد وهو رافع حواجبه يتصنع العصبيه : خير يافهد مو بعينك انا تسألني ولا بس مُهيب الي تهمك احواله؟
ضحك فهد بخفه وقرب ايده يبعثر شعر شَدِيد : اصبر على رزقك يا شَدِيدان ..ويلا الحين قول لي احوالك عساها طيبه؟
نطق شَدِيد ببسمه على طرف مبسمه : الحمدلله بخير
وفهد عيونه على المرايه الاماميه يتأمل منها ملامح مُهيب الي منزل راسه ، يشوفه ساكت يلعب باصابع أيده: دوم.. شلون اختباركم زين ؟
سأل بنيه يسمع فيها صوت مُهيب المحبب لقلبه
رد شَدِيد بحماس ونبره طاغي عليها الفرح : عسل على القلب كل الي ذاكرته مع مُهيب جانا
