يلا هنا كلنا استعدلنا لي القصه هو بدأ يحكي :
قبل 13سنه كان في واحد اسمو محمد جمال يلا محمد دا زول شليق كدا اي حاجه الناس تحكي بيها هو يمشي يهبشا المهم الناس قاعدين يتكلمو بي قصه الجبل دا انو مسكون انتو عارفين انو الجبل مسكون ليه؟ قولنا ليهو ليه؟ قال لينا عشان فيهو خزنه فيها دهب كتير خلاص والجن الفيهو حارسين الدهب يلا قصه الدهب دا من زمن حرب المتمه
زمن الحرب النسوان عشان الدهب ما ينسرق كانو بدسنو في الخزنه ال في الجبل دا يلا اي زول يمشي بتحصل ليهو حاجه ولا برجع زي المجنون وبتكلم كلام خارم بارم ما مفهوم المهم فقام محمد اخونا دا فات ومعهو نفرين قبل ما يصلو فوق الجبل جات صخره من فوق قربت تضرب واحد من النفرين ديل الراجل ده قعد يرجف من فوق لي تحت من الخوف وبرضو محمد قال داير يصل لي الجبل يلا اتلقهو رجال واحد منهم قالو يا زول ماش لي فوق وين قالهم لي الخزنه في الجبل قام واحد تاني قالو انت لو داير تطلع فوق الا تجرح يدك وتنقط الدم ال من يدك محل ما تمشي قام محمد دا رجع لي النفرين المعهو قالهم لقيت حل يوصلني لي الجبل من الرجال ديك قالو لو ياتو رجال ديل وصف عليهم قالولو نحن ما شايفين اي رجال هناك وهو يحلف انو هناك في رجال يلا براكم فهمتو الرجال ديل شنو ديل الجن ال في الجبل من هنا محمد عرف انو دي الطريقه البتوصلو الجبل فقام نفز كلامهم لحدي ما وصل وشاف الخزنه لكن ما قدر يفتحها في النهايه قنع منها ورجع كل الناس استغربو حتى النفرين المعاهو قالو كيف الزول دا وصل لي هناك وما حصل ليهو شئ المهم محمد دا عده فتره كدا بتكلم براهو وبتحصل معاهو حاجات غريبه هنا الناس اتزكرو لمن فات الجبل جا راجع فقررو انو يعملو ليهو رقيه شرعية لمن عملو ليهو الرقيه طلع متلبسو جن من الجبل ورفض يطلع منو ولحدي الان معاهو وهو حايم زي المجنون وماف زول بجي بي عندو ذاتو عشان كدا يا أولادي قلت ليكم ما تمشو خطر عليكم وفي كل حاجه قولو بسم الله الذي لا يضر مع اسمه شيء في الأرض ولا في السماء وهو السميع العليم .
دي كانت قصه عم عبد العزيز عن الجبل وبرضو بقى يحكي لينا كم قصه كدا قعدنا لحدي صلاه العصر صلينا العصر وكل زول رجع بيتو.
انا ومحمد ود عمي طلعنا الفرن ومن الفرن رجعت صلاة العشاء صليت من التعب نمت طوالي.
¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦^^^^^^^^^^^^^^^^^^^^^^^^^^^^^^^^^^
